Published:Updated:

சித்தத்தை தெளிவாக்கும் ஜோதிட சிந்தனைகள் !

காலக் கணிதத்தின் சூத்திரம்சேஷாத்ரிநாத சாஸ்திரிகள்

சித்தத்தை தெளிவாக்கும் ஜோதிட சிந்தனைகள் !

காலக் கணிதத்தின் சூத்திரம்சேஷாத்ரிநாத சாஸ்திரிகள்

Published:Updated:

பெண் ஜாதகத்தில், லக்னத்தில் இருந்து 7ம் வீட்டில் சூரியன் இருக்க, அந்தச் சூரியனை லக்னத்தில் வீற்றிருக்கும் ஒரு பாப கிரகம் 7ம் பார்வையாகப் பார்க்கும் நிலையில், திருமணத்துக்குப் பிறகு, அவளின் கணவன் அவளை ஒதுக்கிவிடுவான் என்கிறது ஜோதிடம் (உத்ஸ்ருஷ்டாதரணெள). 

தட்ப கிரகங்கள், அதாவது சுப கிரகங்கள் அனைத்தும், தாம் இருக்கும் இடத்திலிருந்து 7ம் வீட்டை முழுமை யாகப் பார்க்கும். குரு மட்டுமே, தான் இருக்கும் இடத்திலிருந்து 5ம் வீட்டையும் 9ம் வீட்டையும் முழுப் பார்வை பார்ப்பார். 7ல் எல்லோருக்கும் போல் அவருக்கும் முழுப் பார்வை உண்டு. அதிகப்படியாக 5 மற்றும் 7ம் பார்வையும் முழுமை பெற்றதாக இருக்கும். வெப்ப கிரகங்களுக்கும், அதாவது அசுப கிரகங்களுக்கும் 7ல் பார்வை (முழுமையாக) உண்டு. செவ்வாய்க்கு 7ம் சேர்த்து நான்கிலும் எட்டிலும் முழுப்பார்வை உண்டு. சனிக்கு, 7ஐ தவிர 3 மற்றும் 10ல் முழுப்பார்வை உண்டு. இங்கெல்லாம் பார்வை என்று சொன்னால், எல்லா கிரகங்களுக்கும் பொதுவான 7ம் பார்வையைக் குறிக்கும். விசேஷ பார்வைகளை ஒதுக்கிவிட்டு, பொதுவான 7ம் பார்வையைச் சொல்லும்.

சித்தத்தை தெளிவாக்கும் ஜோதிட சிந்தனைகள் !

ஒட்டுமொத்த விகடனுக்கும் ஒரே ஷார்ட்கட்!

7ல் வெப்ப கிரகங்கள்

7ல் பாப கிரகமான, அதாவது வெப்ப கிரகமான சூரியன் இருந்தால் மட்டும் போதாது. 7ம் பார்வையாக ஓர் அசுப கிரகமும் பார்க்க வேண்டும். 7ம் பார்வையாகப் பார்க்க வேண்டுமானால், அந்த கிரகம் லக்னத்தில் இருக்க வேண்டும். இங்கு 7ல் பாப கிரகம் சூரியன் வீற்றிருக்கிறான். லக்னத்தில் ஒரு பாப கிரகம் இருந்து, 7ஐப் பார்க்கிறது. சூரியனின் செயல்பாட்டுக்கு பாப கிரகத்தின் பார்வை உதவிசெய்கிறது. ஆகையால், மனைவியைத் துறக்கும் எண்ணத்தை, சூரியன் (பாப கிரகம்) மற்றொரு பாப கிரகத்தின் ஒத்துழைப்பில் (லக்னத்தில் இருக்கும் பாப கிரகத்தின் 7ம் பாவையின் தொடர்பு) செயல்வடிவம் பெறச் செய்கிறான் என்று பொருள்.

நிசர்க்கபாபீ (இயல்பாகவே அசுபத்தை நடைமுறைப் படுத்தும் கிரகங்கள்) என்று சூரியன், செவ்வாய், சனி, ராகு, கேது ஆகியவற்றை ஜோதிடம் சுட்டிக்காட்டும். ஓர் அசுப கிரகம் 7ல் இருக்கும். இன்னொரு அசுப கிரகம் 7ம் பார்வையாகப் பார்க்க வேண்டும் என்று சொன்னால், சூரியன், சனி, செவ்வாய் ஆகியவற்றை மட்டுமே குறிப்பிட இயலும். ராகுவோ கேதுவோ 7ல் இருந்தால்... ராகுவோ கேதுவோ நிச்சயமாக லக்னத்தில் இருப்பது சித்தமானபடியால், தனியே எடுத்துச் சொல்ல வேண்டிய தேவை இல்லை; ஆகவே, அவை இரண்டும் இந்த பட்டியலில் வராது என்கிறது சாஸ்திரம். ஆக, ராகு கேதுவைத் தவிர, மூன்று வெப்ப கிரகங்களில் ஒன்று 7ல் இருக்க, மற்றொன்று பார்வையில் இருக்கும்போது, கணவனானவன் மனைவியை ஒதுக்குகிறான் என்று பொருள் வந்துவிடும்.

வெப்ப கிரகங்களின் ஆளுமை!

'வெப்பம் மேலோங்கிய கிரகங்கள் சூரியன், செவ்வாய், சனி’ என்று குறிப்பிடுவார் வராஹமிஹிரர் (ஆக்னேயை:). இந்த மூன்றில் சூரியன் 7ல் இருக்க, செவ்வாய் அல்லது சனி ஆகிய இரண்டும்தான் பார்க்க இயலும். இந்த இரண்டும் வேறு இடங்களிலும் முழுப்பார்வை பெற்றுவிடும் (செவ்வாய்க்கு 4, 8; சனிக்கு 3, 10). இப்படியான சிறப்புப் பார்வையைத் தவிர்த்து, பொதுவான 7ம் பார்வையை மட்டும் எடுத்துக்கொள்ள வேண்டும் என்கிறது ஜோதிடம் (அசுபவீஷிதேர்க்கதனயே).

சித்தத்தை தெளிவாக்கும் ஜோதிட சிந்தனைகள் !

'சூரிய கோளத்தில் இருந்து தோன்றிய சனி கோளம்’ என்று வானவியல் ஆய்வாளர்கள் கூறுவார்கள். சூரியனின் புதல்வன் சனி என்கிறது ஜோதிடம். தகப்பனிடம் இருந்துதான் புதல்வன் தோன்றுவான். சூரிய வெப்பத்தை ஏற்று, பூமியும் வெப்பமாக மாறிவிடும். அந்த பூமியின் புதல்வன் என்று செவ்வாயை ஜோதிடம் குறிப்பிடும் (பௌம:). ஆக, நேரடி வெப்பம் சனியிலும், மறைமுக வெப்பம் செவ்வாயிலும் இணைந்துவிடும். 7ல் முழு வெப்பம் (சூரியன்) இருந்து, வெப்பத்தை உள்வாங்கிய சனி அல்லது செவ்வாயின் பார்வை இருந்தால், கணவனானவன் கைத்தலம் பற்றிய மனைவியை ஒதுக்கிவிடுவான் என்கிறது ஜோதிடம்.

பெண்ணின் கர்மவினை

ஏழில் இருக்கும் சூரியன் 7ம் பார்வையாக லக்னத்தைப் பார்ப்பான். லக்னத்தில் இருக்கும் சனி அல்லது செவ்வாய், 7ம் பார்வையாக 7ஐ பார்ப்பார்கள். தனக்கும் (லக்னம்) தனது மனைவிக்கும் (7க்கும்) பாப கிரகங்களின் தொடர்பு வந்துவிடும். லக்னத்தில் அமர்ந்த பாப கிரகம் லக்னத்தைப் பலவீனப்படுத்தும். அதன் பார்வை 7ல் பதியும்போது 7ம் வீட்டை பலவீனமாக்கும். அதுபோல், 7ல் இருக்கும் சூரியன், 7ம் வீட்டை அதாவது மனைவியை விபரீத விளைவுக்கு உள்ளாக்கும் தறுவாயில், தனது 7ம் பார்வையாக லக்னத்தைப் பார்த்து, அதை பலவீனப்படுத்தி மனைவியைத் துறக்கவைக்கும் செயலில் வெற்றி பெறுகிறான்.

லக்னத்தில் ஒரு பாப கிரகமும், 7ல் இருக்கும் பாப கிரகத்தின் பார்வையும் லக்னத்தின் (கணவன்) சுய சிந்தனையை முடக்கி விடும். மனைவியின் கர்மவினை செயல்பட்டு வென்றுவிடும். கணவனிடமிருந்து பிரிந்து வாழும் நிலை உருவாகும். இங்கு, பெண்ணின் கர்மவினை கணவனின் ஒத்துழைப்போடு நிறைவேற்றப்படுகிறது. மனைவியின் பிரிவு கணவனுக்குத் துயரத்தை அளிக்காது; மனைவிக்குத் துயரத்தை அளிப்பதாக மாறிவிடும். ஒருதலைப்பட்சமான முடிவு இருவரில் ஒருவரையே பாதிக்கும். கணவனிடம் இருந்து பெறவேண்டிய இன்பம் நழுவிப் போவது, மனைவியின் துயரத்துக்குக் காரணமாவதால், பாதிப்பு மனைவிக்கு மட்டுமே இருக்கும். அதை, பெண்ணின் கர்மவினையின் பாதிப்பு என்று ஜோதிடம் மதிப்பீடு செய்யும்

இன்றையச் சூழலில், விவாகரத்து மலிந்த நிலையில் இருவரும் மனமுவந்து பிரிவதால், இருவரிலும் துயரம் தொடாது. வெளிச் சந்தையில், விவாகரத்தைச் சந்தித்த கணவன்மார்களும் மனைவிகளும் தட்டுப்பாடு இல்லாமல் கிடைக்கும் வாய்ப்பு இருப்பதால், புது உத்வேகம் உண்டாகும். எனவே, அவர்களுக்குத் துயரம் ஏற்பட வாய்ப்பு இல்லை. இங்கு, கணவனிடமிருந்து விலகல் என்பது விவாகரத்தில் அடங்காது. வெப்ப கிரகங்களின் இருத்தல், பார்த்தல் ஆகியவற்றைப் பார்த்து கணவனின் சிந்தனை மாற்றம் உருவாகிறது. அந்த மாற்றம் 7ம் வீட்டில் இருக்கும் கிரகத்தை (மனைவி) வைத்து நிகழ்வதால், மனைவியின் கர்மவினையே காரணம் என்பதை உறுதி செய்கிறது.

பார்வையும் வேண்டும்...

இப்படியிருக்க, பெண் ஜாதகத்தில் 7ல் வெப்ப கிரகங்களைப் பார்த்து (சூரியன், செவ்வாய் சனி), மனைவி இழப்பை மதிப்பீடு செய்யும் எண்ணம் ஜோதிட மேதைகளுக்கு வரக்கூடாது. அந்த வெப்ப கிரகத்துடன், ஒரு வெப்ப கிரகத்தின் பார்வையும் இணையும்போதுதான் இழப்பு நிகழ வாய்ப்பு உண்டு. இதை சிந்தனைக்கு எடுத்துக்கொள்ளாமல் இருப்பதில் ஜோதிடத்துக்கு உடன்பாடு இல்லை. ஓட்டுநர் இருப்பதாலேயே கார் பயணம்  சாத்தியமாகும் என்பது சரியல்ல. பெட்ரோல், பாட்டரி, டயரில் காற்று ஆகிய அத்தனையையும் பரிசீலனைக்கு எடுத்துக்கொள்ள வேண்டிய கட்டாயம் உண்டு. ஓட்டுநரின் திறமை நிறைவாக இருந்தாலும், காரில் பயணம் சாத்தியமாகாது!

முறிந்த திருமணத்தை ஒட்டவைக்க விவாகரத்து மறுமணம் பயன்படுமே தவிர, தாம்பத்தியத்தின் தனிச்சுவை இருக்காது. தாம்பத்தியத்தின் தனிச் சுவையை எட்ட, திருமணத்தைப்  பரிந்துரைத்தது ஜோதிடம். தன்னிச்சையாக ஏற்றுக்கொண்ட விவாகரத்தால் ஜோதிடத்துக்கு எந்த விதத்திலும் பாதிப்பு இல்லை.

புதுச் சிந்தனையாளர்களின் குறிக்கோள் வேறு; ஜோதிடத்தின் குறிக்கோள் வேறு. 7ல் செவ்வாய் இருந்து, ஒரு பாப கிரகத்தின் 7ம் பார்வை பதிந்தால், மனைவி இழக்கப்படுவாள் என்கிறது ஜோதிடம். மனைவியின் ஜாதகத்தில் தீர்க்காயுள் திடமாக இருந்தால், அவள் மரணத்தைச் சந்திக்கமாட்டாள். 7ல் சனி இருந்து, ஒரு பாபக் கிரகத்தின் 7ம் பார்வையும் இணைந்தால் கன்னியாகவே இருந்து முதுமையை எட்டுவாள். திருமணம் நிறைவேறாமல் போய்விடும் என்கிறது ஜோதிடம். இங்கும் 7ல் இருக்கும் சூரியன், செவ்வாய், சனி ஆகியோருடன் நிற்காமல்,  7ம் பார்வையாக வெப்ப கிரகத்தின் தொடர்பும் அவசியம் என்பதை ஜோதிடம் வலியுறுத்தும் (அசுபேர்க்கதனயே...). சூரியன் 7ல் இருந்தால் மனைவியை ஒதுக்குவான்; செவ்வாய் இருந்தால் மனைவியை இழப்பான்; சனி இருந்தால், அவள் திருமணத்தைச் சந்திக்காமலே முதுமையை எட்டிவிடுவாள்.

சித்தத்தை தெளிவாக்கும் ஜோதிட சிந்தனைகள் !

மாறுபட்ட சிந்தனை

இன்றைக்கு, முதுமையிலும் திருமணத்தை ஏற்கிறோம் என்பதால் ஜோதிடம் பொய்த்து விட்டது என்று ஆகாது. முதுமையில் ஜோதிடம் நினைக்கும் குறிக்கோள் இருக்காது. பரிணாம வளர்ச்சியில் ஏற்பட்ட பசுமையான இளமையை, விவாகரத்துக்கு உரிய காலமாகச் சொல்லும் ஜோதிடம். அந்தந்த பருவ காலங்களில் மனதில் உதயமாகும் எண்ணத்தை, செயல் வடிவில் சுவைத்து மகிழ்வதுதான் அறம். அதற்குப் புறம்பான செயல்பாடுகளில், விருப்பத்தை முன்வைத்துச் சுவைப்பதில் ஜோதிடம் அக்கறை காட்டாது.

7ல் இருக்கும் செவ்வாய்; வெப்ப கிரகத்தின் (சனி, சூரியன்) 7ம் பார்வை பட்டிருந்தால், மனைவியை இழப்பான் (மனைவியின் ஜாதகத்தில் அல்பாயுள் யோகம் இருக்கவேண்டும்) என்று ஜோதிடம் சொல்லும். ரஜோ குணம் மேலோங்கிய செவ்வாய் லக்னத்தைப் பார்த்தால், கணவன் பலவீனமாக இருப்பதைச் சுட்டிக்காட்டும். அப்போதுதான் மனைவியின் இழப்பு நிகழும். அந்த இழப்பும் கணவனின் சேர்க்கையில் விளைந்தது அல்ல. பெண்ணின் (மனைவியின்) கர்மவினைதான் அவள் மரணத்துக்குக் காரணம். ஆகையால்தான், செவ்வாய் 7ல் இருந்தாலும், அவள் ஜாதகத்தில் ஆயுள் திடமாக இருந்தால், அவள் மரணத்தைச் சந்திப்பது இல்லை. எனவே, கணவனுக்கு மனைவி பாக்கியம் இல்லை; ஆகவே இறந்தாள் என்று மாறுபட்ட சிந்தனைக்கு இடமில்லை.

என்றும் பொய்க்காத ஜோதிடக் கண்ணோட்டம்!

கணவனின் கர்மவினைதான் மனைவியைத் தங்கவைக்காமல் இருப்பது. பண்டை நாளில் கணவனை இழந்தவளை 'விதவை’ என்று தனிமைப்படுத்தினார்கள். மனைவியை இழந்தவனை தனிமைப்படுத்தாமல் மறுமணத்துக்கு அனுமதியளித்தார்கள். இன்று பால்ய விவாகத்தில் குறை கண்டு சட்டம் எச்சரிக்கிறது. முறை தவறிய, வயது வந்த கல்யாணத்தில் தென்படும் குறையை சட்டத்துக்கு உட்பட்டதாகச் செய்துவிட்டோம்.

அதோடு நிற்காமல் அதைப் புரட்சி, முன்னேற்றம், தொலைநோக்குப் பார்வை, சமத்துவம், சம உரிமை என்கிற கோணத்தில் பெருமைப் படுத்திவிட்டோம். இவையெல்லாம் ஜோதிடத்தின் சித்தாந்தத்தை பாதிக்காது. புதுச் சிந்தனையாளர்களின் சட்டத்தை மீறிய செயல்பாடுகள் அத்தனையும் ஜோதிடத்துக்கு ஒத்துவர வேண்டும் என்று பிடிவாதம் பிடிக்கக்கூடாது. அறத்தோடு இணைந்துதான் ஜோதிடம் செயல்படும்.

ஒரு தம்பதிக்கு குழந்தைகள் இல்லை என்று முடிவு சொன்ன ஜோதிடம் இன்று பொய்த்துவிட்டது. விந்து வங்கியின் வாயிலாக செயற்கை முறையில் குழந்தையைப் பெற்றுவிடுகிறோம்.

இயற்கையாக குழந்தை இல்லை என்பதை மட்டும்தான் ஜோதிடம் சுட்டிக்காட்டும். அதனால் அதற்கு பாதிப்பு இல்லை.

செயற்கை முறையில் குழந்தையை ஏற்பதில் ஜோதிடத்துக்கு உடன்பாடு இல்லை. இயற்கையாக குழந்தைக்கு வாய்ப்பு இல்லை என்றால், அற வழியில் குழந்தையைத் தத்து எடுக்கச் சொல்லும். 'தத்த புத்திர யோகம்’ என்று குறிப்பிடும். அதுவும் தவிர, செயற்கை முறை குழந்தைகளில் பல அவர்களது தாய் தந்தையர்களில் உருவாவது இல்லை. மற்றொருவரின் விந்துவில் உருவாவதால், 'அவர்களுக்கு குழந்தை வாய்ப்பு இல்லை’ என்ற ஜோதிடத்தின் கண்ணோட்டம் மெய்யாகிவிட்டது.

மூவகைப் பலன்கள்!

அறத்துக்குப் புறம்பான செயல்பாடுகள் எல்லாம் ஜோதிட அட்டவணையில் இடம்பிடிக்காது. இறப்பும் பிறப்பும் நியதிக்கு உட்பட்டு இருப்பதால், அவற்றை மனித சிந்தனையால் மாற்றி அமைக்க இயலாது.

7ல் சூரியன் இருந்தால், வெப்ப கிரகத்தின் (சனி, செவ்வாய்) 7ம் பார்வை இருந்தால், மனைவியை ஒதுக்கு வான். 7ல் செவ்வாய் இருந்து, வெப்ப கிரகத்தின் 7ம் பார்வை இருந்தால் (சூரியன், சனி) மனைவியின் உயிர் பிரிந்துவிடும்.

அதேநேரம், அவளுக்குத் தீர்க்கமான ஆயுள் இருந்தால் உயிர் பிரியாது.

செவ்வாயின் ரஜோ குணத்தின் தாக்கத்தில் தாம்பத்திய சுகம் சூன்யமாகிவிடும். 7ல் சனி இருந்து வெப்ப கிரகத்தின் (சூரியன், செவ்வாய்) 7ம் பார்வை இனைந்தால், கன்னியாகவே இருந்து முதுமையை எட்டுவாள்; தாம்பத்ய சுகம் அறவே அற்றுவிடும்.

உடலுறவு சுகத்தையும் தாம்பத்தியத்தையும் வேறு வேறாகப் பார்க்கும் ஜோதிடம். இதில் வெப்ப கிரகத்தின் இருத்தல், பார்த்தல் ஆகியவற்றின் மூன்றுவிதமான பலனை வெளியிடும் ஜோதிடம்.

இதையெல்லாம் கவனிக்காமல் சகட்டுமேனிக்கு இழப்பையோ, கெடுதலையோ சொல்வது அறம் ஆகாது. ஆராய்ந்து சொல்லும் திறமை இருப்பவன்தான் ஜோதிடத்தைக் கையாளவேண்டும். அப்பாவி மக்களின் பலவீனத்தைக் கண்ணுற்று, ஆராயாமல் செயல்படுவது ஜோதிடமேதைக்கு அழகல்ல.

சூரியனில் ரஜோ குணம் இருக்கும். செவ்வாயிலும் சனியிலும் தமோ குணம் கலந்த ரஜோ குணம் இருக்கும். செவ்வாயில் ரஜோ குணம் தூக்கலாகவும், தமோ குணம் குறைவாகவும் இருக்கும். சனியில் தமோ குணம் தூக்கலாகவும் ரஜோ குணம் குறைந்தும் காணப்படும். இந்த மாறுபாடுதான் 7ல் இருக்கும் கிரகத்தின் மாறுபட்ட பலனுக்குக் காரணம். சூரியனில் மனைவியை ஒதுக்கிவிடுகிறான். செவ்வாயில் மனைவியின் இழப்பு. சனியில் திருமணத்தைச் சந்திக்க வாய்ப்பு இல்லை. இந்த மூன்றும் சிறந்த தாம்பத்யத்தில் குறையை வரையறுக்கிறது.

உற்சாகம், முனைந்து செயல்படுவது, ஆராயாமல் செயல்படுவது, பின்விளைவை மதிப்பீடு செய்யாமல் செயல்படுவது ஆகிய அத்தனையும் ரஜோ குணத்தில் அடங்கும்.

துயரத்தைச் சந்திக்கும் வேளையிலும் மெத்தனமாக இருப்பது, அதற்கு மாற்றுவழியைத் தேடாமல் சோம்பேறியாக இருப்பது, ஆசையில் மூழ்கி மோகத்தை அடைந்து சிந்தனை செயல்படாமல் இருப்பது, எதிரிடையான பலனைச் சந்திக்க வேண்டி வரும் என்பதை உணர்ந்தும் உற்சாகம் இல்லாமல் செயலற்று இருப்பது ஆகியன தமோ குணத்தில் அடங்கும்.

ரஜோ குணம் மற்றும் தமோ குணம் சேர்க்கையே அத்தனை மாறுபட்ட சிந்தனைகளும் உருவாகக் காரணமாகி விடுகிறது. அதன் அளவுகோளில் மூன்றுவிதமான பலன்களை எடுத்துரைத்தது ஜோதிடம்.

எந்தப் பலனும் சிந்தனை மாற்றத்தில் இருந்துதான் உருவாக வேண்டும். கர்மவினை சிந்தனை மாற்றம் வாயிலாகப் பலனை வெளியிடும். ஆகவே, பொறுமையாகச் சிந்தித்து, கர்மவினையை அடையாளம் கண்டு சேவை செய்வது சிறப்பாகும். அதைச் செயல்படுத்தும் முறையை ஜோதிடம் நமக்கு அளிக்கிறது.

சிந்திப்போம்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism