Published:Updated:

சைவ ஆகமம்... ஹோம நியதிகள்!

நூல் அறிமுகம்

சைவ ஆகமம்... ஹோம நியதிகள்!

நூல் அறிமுகம்

Published:Updated:

சென்னை ஸ்ரீகாளிகாம்பாள் ஆலயத்தில் சிவாசார்யர் அறக்கட்டளை சார்பில் ஆண்டுதோறும் ஸ்ரீமஹா பிரத்யங்கிரா தேவிக்கு 'பிரத்யங்கிராஸ்திர பெருஞ்சாந்தி பெருவேள்வி’ நடைபெற்று வருகிறது. எட்டாவது வருடமாக இந்த வருடம் ஒரு கோடி ஜபத்துடன் பூர்த்தி அடைந்த இந்த வேள்வியின் சிறப்பம்சமாக, 'ஹோம லக்ஷண ஸங்கிரஹம்’ என்ற நூல் வெளியிடப்பட்டது. 

சைவாகம வித்வான் சிவஸ்ரீ வி.சோமசேகர சிவாசார்யார் அவர்கள் தொகுத்துள்ள இந்த நூலில், சைவாகம முறை வகுத்துத் தந்திருக்கும் ஹோமத்தின் நெறிமுறைகள், அனைவரும் புரிந்து கொள்ளும் வகையில் எளிமையாக கொடுக்கப்பட்டுள்ளன. 

எந்த ஒரு ஹோமமாக இருந்தாலும் பிரதானமாக அமைவது அக்னிதான். ஹோமத்தில் இடப்படும் ஆஹுதிகளை உரிய தெய்வத்திடம் கொண்டு சேர்ப்பது அக்னிதான். அந்த வகையில் இந்த நூலின் தொடக்கத்தில் அக்னி பகவானைப் பற்றிய விரிவான தகவல்கள் கொடுக்கப்பட்டுள்ளன. 

ஒட்டுமொத்த விகடனுக்கும் ஒரே ஷார்ட்கட்!

ஆகம முறை, வைதிக முறை மற்றும் தாந்த்ரிக முறை என்று ஹோமங்கள் மூன்று முறைகளில் செய்யப்படுகின்றன. இந்த நூலில் சைவாகம முறைப்படி ஹோமம் எப்படிச் செய்ய வேண்டும் என்பது பற்றி விரிவாகக் கொடுக்கப்பட்டுள்ளது. 

சைவ ஆகமம்... ஹோம நியதிகள்!

சைவாகம முறைப்படி செய்யப்படும் ஹோமத்தில் அக்னி காரியம் என்பது அக்னியில் சிவபெருமானை வழிபடுவதாகும். இதை எரிஓம்புதல் என்றும் சொல்வதுண்டு. சைவாகம முறைப்படி செய்யப்படும் ஹோமத்தில் சிவபெருமான் யாக அக்னியில் ஆவாஹனம் ஆகி, யாகத்தில் சமர்ப்பிக்கப்படும் ஆஹுதிகளை நேரடியாக ஏற்றுக்கொள்கிறார். 

வேதங்களில் உள்ள வைதிக மந்த்ரங்களை மட்டுமே ஏற்பாடு செய்யப்பட்ட அக்னியில் ஹோமம் செய்வது வைதிக அக்னிகாரியம் என்றும், வேதத்தின் வைதிக மந்த்ரங்களோடு கூடிய சைவாகம மந்த்ரங்களால் உருவாக்கப்பட்ட அக்னியில் ஹோமம் செய்வது மிச்ராக்னிகாரியம் என்றும், சிவாகம மந்த்ரங்களால் மட்டுமே ஏற்பாடு செய்யப்பட்ட அக்னியில் ஹோமம் செய்வது சைவாக்னி காரியம் என்றும் இந்த நூலில் மூன்று வகை அக்னிகாரியங்கள் ஆதாரங்களுடன் விளக்கப்பட்டு இருக்கிறது. 

சகல தெய்வங்களுக்கும் திருமுகமாய் விளங்குவது அக்னியே என்று காரணாகமம் கூறுவதாகக் குறிப்பிடும் நூலாசிரியர், ஆகமாக்னியின் தனிச் சிறப்புகளையும் விளக்கி இருக்கிறார். பிற முறைகளில் செய்யப்படும் ஹோமத்தில் தெய்வங்களைப் பிரார்த்தித்து அழைத்து அவர்களை பூஜிக்கிறோம். ஆனால், சிவாக்னியை மட்டுமே அக்னியின் தாய் தந்தையரான வாகீசீ வாகீசர்களை முதலில் அழைத்து பூஜித்து, அவர்களுக்கு ஆவாஹனம் முதலானவற்றைச் செய்து, அவர்களிடத்தில் அக்னி கருவாக உள்ளதாக பூஜித்து, பின்பு கர்பாதானம், பும்ஸவனம், சீமந்தம், அக்னி ஜனனம், ஜாதகர்மா, நாமகரணம், உபநிஷ்க்ராமணம் போன்ற அனைத்து சம்ஸ்காரங்களையும் செய்த பிறகே அந்த அக்னியை பூஜிக்க வேண்டும் என்பதையும் ஒவ்வொரு சம்ஸ்காரமும் எப்படி செய்ய வேண்டும் என்பதையும் ஆதாரங்களுடன் விளக்கிக் கூறி இருக்கிறார். 

சைவ ஆகமம்... ஹோம நியதிகள்!

மேலும், யாக குண்டங்கள் பற்றியும் ஹோம திரவியங்கள் பற்றியும் அதனால் ஏற்படக்கூடிய பலன்கள் பற்றியும் இந்த நூலில் தேவையான படங்களுடன் விளக்கமாகச் சொல்லப்பட்டு இருக்கிறது. ஹோமத்தின்போது ஏதேனும் குறைகள் ஏற்பட்டுவிட்டால் செய்யக்கூடிய பிராயச்சித்த ஹோமம் பற்றியும் சொல்லப்பட்டு இருப்பது குறிப்பிடத்தக்கது. 

இந்த நூலில் உள்ள சொற்களுக்கு உரிய மரபு நூல் சார்ந்த விளக்கங்களும் நூலின் இறுதியில் இணைப்பாகத் தரப்பட்டு உள்ளதால் அனைவரும் எளிதில் புரிந்து கொள்ளலாம். 

சைவாகம முறைப்படி ஹோமம் செய்பவர் களும் ஹோமத்தில் பங்கேற்பவர்களும் புரிந்து கொள்ளும் வகையில் மிகவும் எளிமையான முறையில் தொகுக்கப்பட்டு இருக்கும் இந்த நூலில் ஆசிரியரின் கடுமையான உழைப்பு பளிச்சிடுகிறது. சைவாகம முறைப்படி ஹோமம் செய்யும் அனைவரும் படித்துத் தெரிந்துகொள்ள வேண்டிய அரிய தகவல்களின் தொகுப்பே இந்த நூல் என்பதில் சந்தேகமே இல்லை. 

தொகுப்பு: ரா.வளன், படங்கள்: கா.முரளி 

நூல் கிடைக்கும் இடம்: சிவாசார்யர் அறக்கட்டளை, 

எண். 207, 2வது மாடி, தம்புச்செட்டி தெரு, சென்னை600001  விலை: ரூ.300/

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism