Published:Updated:

ஜோதிட சிந்தனைகள் 2-ம் பாகம்

முன்னோர்கள் சொன்னார்கள்சேஷாத்ரிநாத சாஸ்திரிகள்

ஜோதிட சிந்தனைகள் 2-ம் பாகம்

முன்னோர்கள் சொன்னார்கள்சேஷாத்ரிநாத சாஸ்திரிகள்

Published:Updated:

பிறந்த வேளை தனுசு லக்னம். அந்த லக்னம் 8-வது அம்சகத்தில் பிறப்பு நிகழ்ந்திருக்கிறது. ராசியின் ஒன்பது அம்சகத்தில் கடைசியில் இருந்து இரண்டாவது அம்சகத்தில், அதாவது 8-ல் இணைந்திருக்கிறது. அதாவது தனுசு ராசியின் 30 பாகைகளில் 26-வது பாகையில் பிறப்பு ஏற்பட்டிருக்கிறது.

பிறப்பு நிகழ்ந்த பாகையில் இருந்து முன்னும் பின்னும் 15 பாகைகள் இணைந்து மொத்தம் 30 பாகைகள் லக்ன பாவம் ஆகும். அதாவது, இந்த லக்ன பாவம் தனுசிலும் மகரத்திலுமாக இணைந்திருக்கும். மகர ராசியில் 11 பாகை வரை லக்னம் வியாபித்து இருக்கும். இப்போது  மகரம் 11 பாகை வரை லக்னபாவம்; கும்பம் 11 பாகை வரை இரண்டாம் பாவம்; மீனம் 11 வரை மூன்றாம் பாவம். இப்படி, தனுசு வரை பாவங்களின் அளவு இருக்கும். கடக ராசியில் ஐந்தாவது பாகையில் இருக்கும் ராகு பாவத்தில் 7-லும், சிம்மத்தில் இரண்டாவது பாகையில் இருக்கும் செவ்வாயும், 9-வது பாகையில் இருக்கும் சூரியனும் பாவத்தில் 8-லும் இருப்பார்கள். கட்டத்தில் பார்க்கும்போது 8-ல் ராகுவும், 9-ல் செவ்வாயும் சூரியனும் இருப்பதாக எடுத்துக்கொள்வோம். பாவத்தில் ராகு ஏழிலும், செவ்வாயும் சூரியனும் 8-லும் இருப்பார்கள்.

ஜாதகப் பொருத்தம் பார்க்கும்போது, பாவத்தை வைத்து நிர்ணயிக்கவேண்டும் என்கிறது ஜோதிடம் (பாவப்ரவிருத்தௌஹி பலப்ரவிருத்தி: பாவசந்தை விபலோக்ரஹேந்த்ர:) அம்சகக் கட்டத்தில் இருக்கும் கிரகங்களை ஆராய்ந்தால், ராசிக் கட்டத்தில் இருக்கும் கிரகம் எந்த பாகையில் இணைந்திருக்கிறது என்பது புலனாகும். ராசியில் எந்த பாகையில் கிரகம் அமைந்திருக்கிறது என்பதை விளக்கிக்கூற அம்சகக் கட்டம் உருவாகியிருக்கிறது. ராசிக் கட்டத்தின் விளக்கவுரையாக அம்சகக் கட்டம் பயன்படுகிறது. இப்படியிருக்க, அம்சகக் கட்டம் இல்லாமல் ராசியை மட்டும் வைத்து பலன் சொல்வதில் ஜோதிடத்துக்கு உடன்பாடு இல்லை.

ஜோதிட சிந்தனைகள் 2-ம் பாகம்

அம்சகக் கட்டத்தை ஆராய்ந்து, ராசிச் சக்கரத்தில் இருக்கும் கிரகத்தின் பாவத்தை உணர வேண்டும். அந்த பாவத்தை ஆராய்ந்துதான் பலனை இறுதி செய்ய வேண்டும். தற்போது, ஜோதிட மேதைகள் சிலர், கணினியின் உதவியுடன் பாவச் சக்கரத் தைத் தனியாக அமைத்துத் தருகிறார்கள். ஸ்தூலமான ராசியின் (விரிவான ராசியின்) சூட்சும வடிவம் பாவச் சக்கரம். அந்த பாவத்தை இறுதி செய்த பிறகு, எந்த பாவத்துக்கும் பலன் சொல்ல வேண்டும். ராசி வேறு பாவம் வேறு. ராசி நிரந்தரமானது. பாவம் பிறந்த வேளையை ஒட்டி மாறுதலுக்கு உள்ளாகும். பிறந்த வேளைதான் லக்னம். அதுதான் ஜாதகத்தின் அடிப்படை. எல்லோரது பிறப்பும் ராசியும் பாவமும் ஒன்றாக இணைந்த வேளையில் நிகழ இயலாது.

மேஷ ராசியில் முதல் பாகையில் ஒருவன் தோன்றுகிறான். மற்றொருவன் அந்த ராசியின் 30-வது பாகையில் தோன்றுகிறான். ராசியின் முழுப் பயன் இருவரிலும் தென்படாது. முதல் பாகையில் பிறந்தவனுக்கு, அந்த ராசியின் 16-வது பாகை இரண்டாவது பாவத்தின் ஆரம்பமாகிவிடும். அங்கு லக்ன பாவ பலன் இருக்காது. அந்த ராசியில் முப்பதாவது பாகையில் தோன்றியவனுக்கு, அடுத்த ராசியில் 15 பாகைகள் லக்ன பாவமாக மாறிவிடும். பிறந்த ராசியின் முதல் 15 பாகைகள், அவனைப் பொறுத்த வரையிலும் 12-வது இடமாக மாறிவிடும். இந்த விளக்கங்களைக் கண்ணுற்று பாவ பலனை இறுதி செய்ய வேண்டும்.

இங்கு, குறிப்பிட்ட ஜாதகத்தில் 8-ல் ராகுவையும், 9-ல் குஜன், சூரியன், புதன் ஆகியவற்றைக் கண்ணுற்று, பாவத்தைக் கவனிக்காமல், கட்டத்தை வைத்து செவ்வாய் 9-ல் இருப்பதை உறுதி செய்து, செவ்வாய் தோஷம் இல்லாத ஜாதகமாக எடுத்துக் கொண்டு, தோஷம் இல்லாத புருஷ ஜாதகத்தை இணைத்து, விவாகரத்தை சந்திக்கவைக்கும் நிலையை ஜோதிட பிரபலங்கள் உருவாக்கக்கூடாது. மேலும், 9-ல் இருக்கும் பாப கிரகங்களான செவ்வாயும் சூரியனும் சந்நியாச யோகத்தைச் சுட்டிக்காட்டுவதை அறிந்தும், அதை அலட்சியப் படுத்திவிட்டு, இணையைச் சேர்த்துவைத்த புரட்சியாளர்களும் ஜோதிட பிரபலங்களில் தென்படுகிறார்கள். அது நமது துரதிர்ஷ்டம்.

விளம்பரங்கள், பிரபலங்களை உருவாக்கி விடுவதால் அப்பாவி மக்கள் எளிதில் ஏமாற்றத் துக்கு ஆளாகிறார்கள். மண் மறைந்த பண்டைய ஜோதிட வல்லுநர்கள் இன்று தோன்றினால், இன்றைய ராகு-கேது பெயர்ச்சி பலன்களை விரிவாக விளக்கிக் கூறும் பிரபலங் களின் விளக்கவுரைகளைப் பார்த்து வெட்கிக் தலை குனிவார்கள். வாழ்க்கையிலும் அரசியலிலும் முழு சுதந்திரத்தை சுவைக்க இயலவில்லை. ஆனால், ஜோதிடத்தில் முழு சுதந்திரம் உண்டு. அவர்களை எதிர்த்து குரல் கொடுக்க எவரும் துணிய மாட்டார்கள். குரு-சிஷ்ய பரம்பரைப் பாடசாலைகளோ, பாட திட்டத்தோடு இணைந்த பள்ளிக்கூடமோ இல்லாத நிலையில், அவர்களது விளக்கங்கள் அரங்கேறிவிடுன்றன. ஆனால், புதுத் தலை முறைகள் விழித்துக்கொண்டு, குரு-சிஷ்ய முறையில் கற்க முன்வந்திருக்கிறார்கள். அவர்களிடையே காரண காரியங்களுடன் விடை காண்பதில் ஆர்வம் தென்படுவது மகிழ்ச்சி அளிக்கிறது.

பாவ ரீதியில் பலனை இறுதியாக்கும் பழக்கம் வந்துவிட்டால், மக்களை இன்னலில் இருந்து விடுவித்து சேவை செய்யும் பாக்கியம் கிடைத்துவிடும். திருமணத்தில் இணைக்க விரும்பும் பெண் ஜாதகத்தில், ஏழுக்கு உடையவன் 5-ல் இருப்பது, ஐந்துக்கு உடையவன் 7-ல் இருப்பது, எட்டுக்கு உடையவன் 7-ல் இருப்பது... இந்த நிலைகள் தாம்பத்தியத்தில் நெருடலை ஏற்படுத்திவிடும். புருஷ ஜாதகத்துக்கும் அது பொருந்தும்.

ஒட்டுமொத்த விகடனுக்கும் ஒரே ஷார்ட்கட்!

ஜோதிட சிந்தனைகள் 2-ம் பாகம்

‘ஐந்து’ பூர்வ புண்ணிய ஸ்தானம். அது, வாரிசையும் குறிக்கும். அவன் 7-ல் வந்தால் 7-ன் தரத்தை வலுவிழக்கச் செய்யும். ரத்த பந்தமில்லாத பெண்ணின் இணைப்பு தாம்பத்தியத்தைச் சிறக்க வைக்கும். ரத்த பந்தம் இருக்கும் பெண்ணை மணப்பதை தர்ம சாஸ்திரமும், ஆயுர்வேதமும், நமது கலாசாரமும் ஏற்காது. நமது தாயார் வேறிடத்தில் இருந்து நம் குடும்பத்தில் இணைந்தவள். நம் பாட்டி வேறு இடத்திலிருந்து நம் குடும்பத்தில் இணைந்தவள் அந்தப் பாட்டியின் மாமியாரும், முப்பாட்டனின் மனைவியும் வேறு இடத்திலிருந்து நம் குடும்பத்தில் இணைந்தவர்கள். அவர்கள் அத்தனைப் பேரும் ரத்த பந்தம் இல்லாதவர்களாக இருந்தார்கள். அங்குதான் தாம்பத்தியத்தின் முழுமை பளிச்சிடும்.

ஐந்துக்கு உடையவன் 7-லும், ஏழுக்கு உடையவன் 5-லும் இருப்பதில், விட்டகுறை தொட்ட குறை போன்று ரத்தபந்தத்தின் சாயல் தென்படு வதால் தாம்பத்தியம் சிறக்காது. எட்டுக்கு உடையவன், 7-ல் அமர்ந்தாலும் தாம்பத்தியம் சிறக்காது. 6, 8, 12- க்கு உடையவர்கள் எந்த பாவத்தை அடைந்தாலும், அந்த பாவ பலனை அனுபவிக்க முடியாமல் செய்துவிடுவார்கள். எட்டுக்கு உடையவன் 7-ல் இருந்தால் தாம்பத்தியம் சிறக்காது. விருச்சிக லக்னத்துக்கு 8-க்கு உடைய (மிதுனத்துக்கு) புதன் 7-ல் (ரிஷபத்தில்) அமர்ந்தால், தாம்பத்தியம் சிறக்காது என்கிறது ஜோதிடம். புதன் சுப கிரகமானாலும் 8-க்கு உடையவன் என்பதால், பாப கிரகமாக மாறிவிடுகிறான். அந்த புதனுக்கு, ‘11-க்கு உடையவன்’ என்ற தகுதி இருந்தாலும், ‘8-க்கு உடையவன்’ என்ற தகுதி அமலுக்கு வந்து விடும். கன்யா லக்னத்தில் பிறந்தவனுக்கு மீனத்தில் தென்படும் செவ்வாய், 8-க்கு உடையவனாக இருப்பதால் (மேஷம்), செவ்வாய் தோஷம் வலுப்பெற்று துயரத்துக்கு இடமளிக்கிறது. செவ்வாய் மூன்றுக்கு (விருச்சிகம்) உடையவனாக இருந்தாலும், பலனை அளிப்பதில் 8-க்கு உடையவன் வெற்றி பெற்றுவிடுகிறான்.

அதுபோல் 12-க்கு உடையவன் 7-ல் வருவதும், 6-க்கு உடையவன் 7-ல் வருவதும் தாம்பத்தியத்தில் முழு மகிழ்ச்சியை எட்ட வைக்காது. 6-க்கு உடையவன் வந்தால் விபரீத எண்ணம் வாயிலாகவும், 12-க்கு உடையவன் வந்தால் இழப்பின் வாயிலாகவும் தாம்பத்திய நெருடல் தென்பட்டுவிடும். 6, 8, 12-க்கு உடையவர்களை, ஒரு ‘யூனிட்’டாக வைத்து ‘த்ரிகம்’ என்ற பெயரில் விளக்கமளிக்கும் ஜோதிடம். இதில் சுப கிரகம், பாப கிரகம் என்ற பாகுபாடு இருக்காது. எந்த கிரகமானாலும் (சுபமானாலும் பாபியானாலும்) இந்து மூன்று வீட்டுக்கு உடையவர்கள் மற்ற பாவங்களில் தென்பட நேர்ந்தால், பலனில் நெருடல் இருக்கும்.

ஜோதிட சிந்தனைகள் 2-ம் பாகம்

மனைவி அழகாகவும் திறமையாகவும் இருக்கிறாள். கை நிறைய சம்பாதிக்கிறாள். சமுதாயமும் அவளைப் பெருமைப்படுத்துகிறது. பொருளாதாரச் செழிப்புக்கும் ஊக்கமளிக்கிறாள். ஆனால் தாம்பத்தியத்தில் நிறைவைத் தர மறுக்கிறாள். கசப்பும் இனிப்பும் கலந்து இருப்பதால் அவளை துறக்கவும் மனமில்லை, ஏற்கவும் முடியவில்லை. அவளோடு இணைந்து இருக்கவேண்டிய கட்டாயத்தில் கசப்பு உணர்வை ஜீரணித்துக்கொள்கிறான். இப்படியான உணர்வு த்ரிகத்தின் (6,8,12) இணைப்பில் ஏற்பட்டுவிடும். படிப்பிலும் வேலையிலும் திறமை பெற்றவன். அலுவலகத்தில் உயர்ந்த பதவியில் அமரும் பாக்கியம் பெற்றவன். ஆனால் அவனது மேலதிகாரியின் இடையுறு வேலையில் நிம்மதியாக இருக்க இடமளிக்கவில்லை. குடும்பச் சூழல் வேலையை விட இடம் தரவில்லை. வேலை நிம்மதியை குலைக்கிறது. ஆக, விடவும் முடியாமல் வைத்துக்கொள்ளவும் முடியாமல் துயரத்தை ஏற்க வைக்கும். இதுவும் த்ரிகத்தின் தாக்கத்தில் தென்படும் திருமணத்துக்குப் பிறகு வேலை நிமித்தமாக பிரிந்து வாழும் தம்பதியினர், பொருளாதார இழப்பை நினைத்து பயந்து தாம்பத்தியத்தைச் சுவைக்க முடியாமல் தவிப்பதை ஏற்கிறார்கள். இதுவும் த்ரிகத்தில் விளையும் துயரம்தான். வேலை நேரம் முடிந்து எல்லோரும் வீடு திரும்புவார்கள். ஒருவன் மட்டும் மேலதிகாரியின் இங்கிதத்துக்கு இணைந்து இரவு பத்து மணி வரை அவருக்கு உதவியளித்து வீடு திரும்புவான். சட்டப்படி அதை ஏற்காதவர்களும் உண்டு. ஆனால், ஏதோ ஒரு பயம் அவனை ஆட்கொண்டு, சுதந்திரத்தை அடகுவைத்து அடிமையாகும்படி செய்து விடுகிறது. - இதுவும் த்ரிகத்தின் வேலை.

கணவன் மெத்தப் படித்தவன், திறமை மிக்கவன், பொருளாதாரத் தில் நிறைவை எட்டியவன், வாரி வழங்கும் வள்ளல், ஆனால் தாம்பத்தியத்தில் சூன்யம்; அதில் பிடிப்பில்லாதவன். அன்பான அணுகு முறை; உடலுறவில் நாட்டம் இல்லாதவன். இந்த கசப்பு உணர்வை ஜீரணிக்க முடியாமல் விடவும் முடிய வில்லை, சேர்ந்து வாழவும் முடியவில்லை. இப்படியான நிலையும் உண்டு. அவனை விட்டு விலகினால் பொருளா தாரச் சேமிப்பில் கிடைக்கும் அனுபவங்கள் இல்லாமல் போய்விடும். இணைந்திருந்தால் தாம்பத்தியம் கசப்பை ஊட்டுகிறது. ஆனாலும் குடும்ப வாழ்க்கை தொடர்கிறது. - இந்த நிகழ்வும் த்ரிகத்தின் தாக்கத்தில் தென்படும்.

அன்பான கணவன் அற்பாயுளில் மறைந்து விட்டான். புதுக் கணவனை ஏற்றாள். பாதுகாப்புக்கு அவன் வேண்டும். ஆனால் தாம்பத்தியம் கசப்பு உணர்வை ஏற்படுத்துகிறது. விடவும் முடியாமல் தொடரவும் முடியாமல் தவிப்போடு தாம்பத்தியம் தொடர்கிறது. இதுவும் த்ரிகத்தின் விளைவுதான். தேர்வில் முதன்மையாக வெற்றி பெற்றவன். எனினும் படிப்புக்கு உகந்த வேலை கிடைக்க வில்லை. குறைந்த வருவாயில் வேலையை ஏற்கவேண்டிய கட்டாயம். அதையும் விட்டுவிட்டு பல வேலைகளின் இணைந்தும் பொருளாதாரம் செழிப்புறவில்லை; ஏழ்மையில் தவிக்கிறான்.  இதுவும் த்ரிகத்தின் வேலை.

ஜோதிட சிந்தனைகள் 2-ம் பாகம்

படிப்புக்கு சம்பந்தம் இல்லாத வேலையில் இணையவேண்டிய கட்டாயம் ஏற்படும். பட்டம் பெற்றும் வேலை கிடைக்காமல் வியாபாரத்தில் இணையவேண்டிய கட்டாயம் ஏற்படும். வெகுசுலபமாக வேலை செய்யும் திறமை இருந்தும், வியாபாரத்தில் நுழைந்து வியாபார நுணுக்கங்களை கற்றுக்கொண்டு, சிரமப்பட்டு காலம் கடத்தவேண்டிய சூழல் உருவாகி விடும். இதுவும் த்ரிகத்தின் வேலையே.

அன்பான மனைவி, பொருளாதாரத்தில் நிறைவு, இன்பத்தை அளிக்கும் குடும்பச் சூழல், குழந்தைச் செல்வங்களும் சிறப்பாக இருக்கிறது. இப்படி இருந்தும் மனம் திருப்தியடையாமல் தவிக்கும். எது திருப்தி அளிக் கும் என்று அந்த மனதுக்குத் தெரியாது. நிறைவை அனுப வித்து உணரும் மனநிலை இருக்காது. இதுவும் த்ரிகத்தின் வேலை. வீட்டில் எலி; வெளியில் புலி. இதுவே மாறுபட்டும் இருக்கலாம். இதுவும் த்ரிகத்தின் வேலை.

முதிர்ந்த முன்னோர்களை அரவணைத்து வாழ விரும்புகிறான் அவர்கள் ஒத்துழைக்கவில்லை. புதல்வர்களோ சொல்பேச்சு கேட்பதில்லை. இரு தரப்பினரின் நடைமுறைகளும் அவனை நிம்மதி இழக்கவைக்கின்றன. எனினும், அவனால் இருவரையும் துறக்க இயலவில்லை. இதுவும் த்ரிகத்தின் வேலை. ஆனால், ஜோதிட பிரபலங்கள் சிலர், இதையெல்லாம் அலட்சியப்படுத்திவிட்டு, துயரத்துக்குப் பரிகாரம் சொல்லி திசை திருப்புகிறார்கள். எல்லாம் நமது துரதிருஷ்டம்!

- தொடரும்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism