Published:Updated:

மூல நட்சத்திரத்தில் பெண் எடுக்கலாமா?

மூல நட்சத்திரத்தில் பெண் எடுக்கலாமா?
பிரீமியம் ஸ்டோரி
மூல நட்சத்திரத்தில் பெண் எடுக்கலாமா?

கேள்வி - பதில்சேஷாத்ரிநாத சாஸ்திரிகள்

மூல நட்சத்திரத்தில் பெண் எடுக்கலாமா?

கேள்வி - பதில்சேஷாத்ரிநாத சாஸ்திரிகள்

Published:Updated:
மூல நட்சத்திரத்தில் பெண் எடுக்கலாமா?
பிரீமியம் ஸ்டோரி
மூல நட்சத்திரத்தில் பெண் எடுக்கலாமா?
மூல நட்சத்திரத்தில் பெண் எடுக்கலாமா?

?நிச்சயத் தாம்பூலம் என்றால் என்ன? அதேபோல், முகூர்த்த தாம்பூலம் என்றும் சொல்வார்கள். அதற்கு என்ன பொருள்?

- சி.வி. கணேசமூர்த்தி, அம்பாசமுத்திரம்


பாக்கு வெற்றிலை மாற்றிக்கொண்டோம் என்றும், தட்டை மாற்றிக்கொண்டோம் என்றும் நிச்சய தாம்பூலம் குறித்து நாம் சொல்வது உண்டு. அதாவது பெண்ணின் தகப்பனார் பெண்ணை மணமகனுக்கு அளிப்பதாக வாக்குறுதி அளிக்கிறார். இரு பெற்றோரும் ஒன்று சேர்ந்து செய்யும் சடங்கு இது. 

மூல நட்சத்திரத்தில் பெண் எடுக்கலாமா?

ஒட்டுமொத்த விகடனுக்கும் ஒரே ஷார்ட்கட்!

இப்படி, வேத விற்பன்னர்கள், பெரியோர்கள் நிறைந்த அவையில், மேளதாளத்துடன் செயல்படும் நிச்சயத் தாம்பூலம் திருமண சம்ஸ்காரத்தின் முதல் நாழிகைக் கல் ஆகும்.
வாக்குறுதிக்கு சாட்சி தாம்பூலம். அதை சம்ஸ்காரமாக மாற்றி, மங்களகரமான திருமண ஆரம்பத்தை மங்களப் பொருளான தாம்பூலத்தின் மூலம் ஆரம்பிக்கவேண்டும் என்பது தர்ம சாஸ்திரத்தின் வழிகாட்டல்.

தாம்பூலம் என்பது நமது பண்பாட்டின் அடையாளம். திருமணத்தை உறுதிசெய்ய நிச்சயத் தாம்பூலம். திருமணத்தை நிறைவு செய்ய முகூர்த்த தாம்பூலம். விருந்தினரின் வாய் மணக்க புக்தத் தாம்பூலம். தெய்வ வழிபாட்டில் உபசரிக்க தர்ப்பூரத் தாம்பூலம். மக்கள் செல்வம் பெருக தானத் தாம்பூலம். சுமங்கலிப் பெண்களுக்கு மங்கல தாம்பூலம். நவராத்திரியில் நங்கையர்களுக்கு கொலுத் தாம்பூலம். இப்படி, வரவேற்பிலும், கெளரவிப்பதிலும்,  பிரிவு உபசாரத்திலுமாக இந்திய கலாசாரத்தில் எங்கும் தாம்பூலம்... எதிலும் தாம்பூலம்தான்!
                     
?திருமணச் சடங்கில் ‘மாங்கல்யம் அணிவிப்பதன் முக்கியத்துவம் என்ன? புராணங்களில் அதன் மகத்துவம் குறித்த தகவல்கள் உண்டா?

- கீர்த்தனா சுப்ரமணியன், வந்தவாசி


பிறந்த குழந்தைக்கு தேன், நெய் கலந்து, அதில் தங்கம் தோய்த்து  ஊட்டுவது உண்டு. இது, குழந்தையின் கபத்தைக் கட்டுப்படுத்தவும் ஜீரண சக்தியை வலுப்படுத்தவும் உதவும்.  குழந்தை பிறந்த 7-வது  நாளில் அதன் கைகளுக்கு தங்கக் காப்பும், கால்களுக்கு வெள்ளிக் காப்பும் அணிவிப்பார்கள். மேலும், குழந்தை வளர வளர தங்கத்தாலான அணிகலன்கள் சேர்ந்துகொண்டே வரும்.

காதுகுத்தி தங்க அணிகலன்கள் மாட்டுவர். கைகளில் மோதிரம், மூக்கில் மூக்குத்தி, அரையில் தங்க அரைஞாண், காலில் வெள்ளிக் கொலுசு ஆகியன அலங்கரிக்கும். வயது வந்த பிறகு மூக்கில் புல்லக்கு, கைகளில் வங்கி எனும் ஆபரணம், இடையில் ஒட்டியாணம் ஆகியவற்றை அணிவிப்பர். இவை தங்கத்தாலானவை.

குறிப்பாக, பெண் குழந்தைகளுக்கு தங்க அணிகலன்களை அணிவிக்கச் சொல்கிறது தர்மசாஸ்திரம். வேதமும் தங்கத்தைத் தரித்துக் கொள்ள வேண்டும் என்று அறிவுறுத்தும் (தஸ்மாக் சுவர்ணம் ஹிரண்யம் தார்யம்). அதன்படி அணிவிக்கப்படுவதே தாலி. தங்கம் மங்கலப் பொருட்களில் ஒன்று. தங்கத்தாலான தாலியும் மங்களகரமானது. மங்களம் அளிப்ப தால் அதற்கு, ‘திருமாங்கல்யம்’ என்று பெயர்.

மூல நட்சத்திரத்தில் பெண் எடுக்கலாமா?

திருமாங்கல்யதாரணம் என்பது திருமணத்தில் சிறப்பான ஒரு பகுதி. தன் வாழ்க்கைக்கு-முழு மகிழ்ச்சிக்கு முக்கிய பங்காற்றும் அந்தப் பெண்ணுக்குத் திருமாங்கல்யத்தை அணிவித்து மகிழ்கிறான் அவன். அவனது மகிழ்ச்சிக்கு முழு உத்தரவாதம் அளிக்கிறது திருமாங்கலயம்.

‘என் வாழ்க்கைக்கு - மகிழ்ச்சிக்கு தேவையான திருமாங்கல்யத்தை உனக்கு அணிவிக்கிறேன். நீ அழகின் வடிவம். உன் அழகுக்கு அழகு சேர்க்கிறேன். நீ நீடுழி வாழ வேண்டும்’ என்கிற கருத்தை வலியுறுத்தும் மந்திரம்தான் எல்லோருக்கும் தெரிந்த ‘மாங்கல்யம் தந்துனானேன...’ என்பது. உலகின் தாயான பார்வதிக்கு உலகின் தந்தையான பரமேஸ் வரன் திருமாங்கல்யத்தை அணிவித்தார் என்ற தகவலை ‘காமேசபந்த மாங்கல்ய சூத்ரசோபித சுந்தரா’ எனும் தொடரின் மூலம் அறியலாம். திருமாங்கல்யத்தின் அடையாளம் மூன்று கோடுகளாக அம்பிகையின் கழுத்தில் பதிந்திருப்பதாக ஆதிசங்கரர், செளந்தர்ய லஹரியில் குறிப்பிடுகிறார்.

‘மங்கல தேவதா’ என்பது லட்சுமியின் பெயர். மங்கள தேவதாயை நம: என்று திருமாங்கல்யத்தை வழிபடுகிறோம். ‘மஹா விஷ்ணு ஸ்வரூபஸ்ய வரஸ்ய’- கல்யாணம் பண்ணிக் கொள்பவனை உலகைக் காப்பாற்றும் விஷ்ணுவாக பாவிக்கிறோம். லட்சுமியின் இருப்பிடமான நிவாஸனாகவும், கெளரிக்குப் பாதி உடலை அளித்த பரமேஸ்வரனாகவும் தம்பதியைக் கொண்டாடுவது உண்டு. தெய்வத் தம்பதி போன்று இணைந்து வாழ, மங்கள சூத்திரத்தின் இணைப்பு அவசியம். தாலிகட்டி இணைப்பை உறுதிப்படுத்துகிறார்கள் தம்பதிகள்.

?‘மூல நட்சத்திரத்தில் பெண்ணெடுத்தால் மாமியார் விதவை ஆகிவிடுவார்’, ‘பெண் மூலம் நிர்மூலம்’ என்றெல்லாம் சொல்கிறார்களே, இது சரியா?

பவித்ரா, சென்னை-94


நட்சத்திரம் மட்டுமே இருவரும் தம்பதியாக இருப்பதற்குப் போதுமான பொருத்தத்தைக் கொடுத்துவிடாது. அதற்கு அவ்வளவு சக்தியில்லை. நூறு தினுசாகப் பார்க்கப்படும் பொருத்தத்தில் நூறாவது தினுசு அது. ஒரு சின்னப் பகுதி அது. மற்ற பொருத்தங்களெல்லாம் நன்றாக அமைந்துவிட்டால் நட்சத்திரத்தினால் ஏற்படும் இடையூறு கரைந்து போய்விடும். எடுபடாது. பட்டப்பகல் வேளையில், சூரியன் காய்ந்து கொண்டிருக்கும்போது ஒரு மெழுகுவத்தியைக் கொளுத்தி வைத்தால் என்ன வித்தியாசம் தெரியும்? அதே மெழுகுவத்தியை இரவில் ஏற்றினால் நமக்குப் பயன்படுகிறது. ஜாதகத்தில் இருக்கும் நல்ல பலன்கள், நட்சத்திரத்தினால் வரும் இடையூறுகளைத் தூக்கி எறிந்துவிடும். அப்படியிருக்க, இவரின் நட்சத்திரத்தால் இவரது மாமனார், மாமியாருக்குக் கெடுதி நடக்கும் என்பதை சாதாரண புத்தியின் மூலமே மறுத்துவிட முடியும். இந்தப் பெண்ணின் நட்சத்திரம் கணவனுக்குப் போய், பிறகு கணவனின் அம்மாவுக்குப் போய், அதற்கப்புறம் அவளது கணவனுக்குப் போய் தீங்கு விளைவிக் கிறது என்கிற கோட்பாடெல்லாம் ஜோதிட சாஸ்திரத்துக்குள் வராது. எனவே, இதைப்பற்றிக் கவலைப்படவே தேவை இல்லை.

இன்னொரு விஷயம்... கல்யாணம் பண்ணிக் கொள்வது இந்தப் பிள்ளை. பெண் எங்கிருந்தோ வந்தவள். பிள்ளைக்கும் பெண்ணுக்கும் தனித் தனியாக ஜாதகங்கள் இருக்கின்றன. இருவரும் பிறந்த நேரமோ, படித்த நேரமோ, சிந்தனையோ ஒரே வேளை அல்ல. இருவரும் வெவ்வேறு ஆட்கள்; இருவருக்கும் வெவ்வேறு ஆயுசு. இவர்களுக்குள்ளேயே பரஸ்பரம் ஒருவருக்கு வந்தது, இன்னொருவரைப் பாதிக்காது.

கணவனுக்கு இருக்கும் ரோகம் மனைவிக்கு வராது. அதைப் பார்த்து இவள் கவலைப்பட நேருமே தவிர, அதே ரோகம் இவளுக்கு வரும் என்பதில்லை. அவளுக்குப் பசித்தால், இவன் சாப்பிட்டால் போதும் என்பதும் இல்லை. இவள் மரணத்துக்கு அவனோ, அவன் மரணத்துக்கு இவளோ காரணமாக முடியாது. உடலுறவோடு சேர்ந்திருக்கக்கூடிய இந்த இரண்டு மனிதர்களுக்குமே இவ்வளவு இடைவெளி இருக்கிறபோது, இதையெல்லாம் மீறி இவள் நட்சத்திரத்தைக் கணவனிடமும், அவனுக்குப் பிறப்பைக் கொடுத்த தாயார் தகப்பனாரிடமும் இழுத்துக்கொண்டு போகிறவர்களையும், அவர்களை நம்புகிறவர்களையும் என்ன சொல்வதென்று தெரியவில்லை.

?திருமணத்தின்போது அம்மி மிதித்தலும்- அருந்ததி பார்த்தலும் எதற்காக? அதேபோல் ஸப்தபதி எனும் சடங்கு விளக்கும் தாத்பரியம் என்ன?

- மகேஷ் பூபதி,  சென்னை-55


மன ஒற்றுமையை உறுதிப்படுத்தும் நிகழ்வு தான் அம்மி மிதித்தலும், அருந்ததி பார்த்தலும்.

கருங்கல்லால் ஆனது அம்மி. ஓர் இடத்தில் வைத்தால் அசையாது; நகராது. பல சுவைகளை அரைத்து அரைத்து, அதன் மேல்பகுதி மிருதுவாக வழவழவென்று இருக்கும். அம்மி சுத்தமான பொருள். மணப்பெண், தன் வலது காலை அதன் மீது எடுத்துவைக்க மணமகன் உதவுவான். அவளை அம்மி மீது ஏறி நிற்கச் செய்வான்.

அவளின் பாரத்தால் அதற்குச் சோர்வு ஏற்படுவது இல்லை.  அவளின் ஸ்பரிசத்தால் அது மகிழ்ச்சி அடைவதும் இல்லை. இரண்டை யும் அது சமமாக எடுத்துக்கொள்கிறது. அதுபோல்தான் வாழ்க்கையும். இரவும் பகலும் போல் சுகமும் துக்கமும் மாறி மாறி வருவது இயல்பு. அவற்றைச் சமமாக பாவித்து வாழ்வில் வெல்ல வேண்டும் என்பதை உணர்த்தும் நிகழ்வு இது.

பனி, மழை, வெயில், காற்று போன்ற இயற்கையின் தாக்குதல்களையும் உயிரினங்களின் ஊடுருவலையும் ஏற்று, தனது தனித்தன்மையை இழக்காமல் இருப்பது கல். அது புகட்டும் பாடத்தை நாம் கற்றுக் கொள்ள வேண்டும்.

அதேபோல், மணப்பெண்ணுக்கு விண்வெளி யில் தெரியும் அருந்ததி நட்சத்திரத்தைச் சுட்டிக்காட்டுவான் மணமகன். அந்த மாதரசி என்றும் நிலையாக மாதர்களுக்குக் கலங்கரை விளக்கமாகத் திகழ்கிறாள். வசிஷ்டரோடு இணைந்து இல்லறத்தைச் சுவைத்து ஆன்மிகத்தில் லயித்தவள் அவள். அவளைப் பின்பற்றுவது நல்லது. அவளது சரித்திரம் தம்பதியருக்கு நல்ல வழிகாட்டி.

மன ஒற்றுமையை வலியுறுத்தும் மற்றுமொரு நிகழ்ச்சி ஸப்தபதி.

மணமகளும் மணமகனும் கிழக்கு-மேற்காக நடக்கிறார்கள். பெண் அடியெடுத்து வைக்கிறாள். அதற்கு மணமகன் உதவுகிறான். அப்போது இருவருக்கும் இடையே உரையாடல் ஏற்படுகிறது.  ஒருவரோடு ஏழு வாசகம் பேசினாலே நட்புக்கு அடித்தளம் உண்டாகிவிடும் என்பது  முதுமொழி. அப்படியோர் உரையாடலுக்கு வழி ஏற்படுத்துவது ஸப்தபதி.

ஒவ்வோர் அடி எடுத்து வைக்கும்போதும் பெண்ணிடம் அவன் பேசுகிறான் -

முதல் அடி: ‘நீ என் வீட்டுக்கு வந்து என் குலத்தைப் பெரிதாக்கி, நீ சந்தோஷம் அடைந்து என்னையும் சந்தோஷப்படுத்த இருக்கிறாய். செல்வங்களுள் முக்கியமானது உணவுச் செல்வம். நீ வரும்போதே அந்தச் செல்வத்தை நிரப்பி வை. இதற்கு விஷ்ணு உனக்கு அருளட்டும்

இரண்டாம் அடி: ‘நீ உடல்  வலிமை குன்றாமல் இருக்க வேண்டும். நீ என் வீட்டுக்கு வருவதே உன் எண்ணத்தை நிறைவேற்றிக் கொள்ள. அதற்கு உடல் வலிமை தேவை. அதை விஷ்ணு உனக்குத் தரட்டும்.’ (ஏன் விஷ்ணு என்றால், அவன் எங்கும் நிறைந்த கடவுள். அவனை அழைப்பதுதான் பொருத்தம்).

மூன்றாம் அடி
: ‘புது வாழ்வில் நாம் எடுக்கும் முயற்சிகளில் அசையாத நம்பிக்கையோடும் சட்டதிட்டங்களை மீறாமலும் கடமை உணர்வோடும் செயல்பட கடவுள் உனக்கு ஒத்துழைக்கட்டும்’. (இதற்கு விரதம் என்று பெயர்)

நான்காவது அடி: ‘என் எதிர்பார்ப்பு என்ன தெரியுமா? இந்த உலக வாழ்க்கையில்  சுவைக்க வேண்டிய அத்தனை சுகங்களும் நம் இருவருக் கும் முழுமையாகக் கிடைக்க வேண் டும் என்பதுதான். அது கிடைக்க, என்னோடு சேர்ந்த உனக்கு அந்தக் கடவுள் அருளட்டும்.’

ஐந்தாவது அடி: ‘சுகம் மட்டும் போதாது. அதை அடையத் தேவையான உபகரணங்களும் வேண் டும் (வீடு, வாகனம் போன்றவை) இவற்றையும் கடவுள் அருளட்டும்.’

மூல நட்சத்திரத்தில் பெண் எடுக்கலாமா?

ஆறாவது அடி: இயற்கையாக ஏற்படும் பருவ கால மாற்றங்கள் நம்மைத் தாக்கும்போது, வாழ்வின் சுவை குன்றிவிடாமல் இருக்குமாறு பார்த்துக் கொள்கிற அளவில் நம் இருவர் மனங்களையும் கடவுள் பக்குவப்படுத்தட்டும்.

ஏழாவது அடி:
‘வாழ்க்கை என்பது சுகத்தை மட்டும் சுவைப்பது அல்ல. அதற்கு அடிப் படையான மழை, வெயில், பனி போன்ற சூழ்நிலைகளைத் தக்க காலத்தில் ஏற்படுத்தும் கண்ணுக்குப் புலப்படாத அந்த சக்திக்கு (தெய்வத்துக்கு) செய்ய வேண்டிய கடமைகளை இருவரும் சேர்ந்து நிறைவேற்ற வேண்டும். அதற்குக் கடவுள் நமக்கு உதவுவார். அது நமக்கு மனத்தெளிவைக் கொடுத்து, ஆன்மிகப்
பாதையில் திருப்பிவிடக் கூடியது.

பிறப்பில் இருக்கும் கடமைகள் நிறைவேற்றப்பட வேண்டு மானால், இயற்கையின் உதவியும் தேவை. அந்த இயற்கைக்கும் கடமைப்பட்டிருக்கிறோம். இந்த நன்றிக் கடனை வேள்வி மூலமோ பூஜை, வழிபாடுகளின் மூலமோ தீர்த்துக் கொள்ளலாம். அதைச் சரிவர நடைமுறைப்படுத்த விஷ்ணு அருளட்டும்.’

இப்படி ஒவ்வோர் அடிக்கும் மணமகன் உரையாடுகிற கருத்துக்களை மந்திர ப்ரஸ்னத்தில் பார்க்கலாம். உலக வாழ்க்கையில் அடியெடுத்து வைப்பவன், அடிப்படைத் தகுதிகளை வேண்டுவ தோடு நிற்காமல் வாழ்நாள் முழுவதற்கும் தேவையான பொருள்கள் அனைத்தையும் அந்த ஏழு அடியின்போது வேண்டிக்கொள்கிறான்.

?செவ்வாய் தோஷம் இருந்தால் திருமணம் தள்ளிப் போவது எவ்வளவு காலத்துக்கு இருக்கும்? வாழைத் திருமணம் போன்ற பரிகாரங்கள் செய்வதால் தடை விலகுமா?

- சுந்தரமூர்த்தி, திருவையாறு


முதலில், செவ்வாய் தோஷம் என்றால் என்னவென்று தெரிய வேண்டும். அடுத்து, அது இடையூறு செய்கிறதா என்று தெரிய வேண்டும். அது நிரந்தரமாக இருக்கிறதா என்று பார்க்க வேண்டும். அப்போதுதான் பரிகாரமே வரும். எடுத்த எடுப்பிலேயே பரிகாரம் இல்லை.

உங்கள் எதிரி இடைஞ்சல் செய்கிறான் என்றால், பத்து நாட்கள்தான் பண்ணுவான் என்றில்லை; இருக்கிறவரை பண்ணுவான்.

செவ்வாய் தோஷம் இருப்பது உண்மை, அது உங்களுக்கு நிரந்த இடையூறு செய்யும் என்கிற பட்சத்தில், அதை எந்தப் பரிகாரத்தாலும் மாற்ற முடியாது. இருக்கிற குறைகளுக்கெல்லாம் பரிகாரம் செய்ய முடியுமானால் கெடுதியை யார் அனுபவிப்பது?

ஒரு பணக்காரனுக்கு நல்ல ஜோதிடன் கிடைத்துவிட்டான். அவன் மூலம் பரிகாரம் பண்ணியே இருக்கிற செவ்வாய் தோஷத்தை எல்லாம் கரைத்துவிட்டால், செவ்வாயால் ஏற்படும் தீங்கை அனுபவிப்பது யார்? உலகில் இருக்கிற ஏழைகளா?

அப்படி எந்த சாஸ்திரமும் சொல்லாது. ‘பரிகாரம் செய்து விலக்கலாம்’ என்று ஜோதிடர் சொல்வது, ‘ஒருவேளை அது பலித்தால் பலிக் கட்டுமே!’ என்கிற எண்ணத்தில்தான். பரிகாரம் பலிக்கிற விஷயம் எது, பரிகாரம் இல்லாமல் அனுபவித்தே தீர வேண்டிய விஷயம் எது என்பதை ஜோதிடர் விளக்க வேண்டும்.

ஒருவரின் செவ்வாய் தோஷத்துக்கு இடையூறு செய்யும் சக்தி குறைவாக இருக்கிறது என்பதைப் பல கோணங்களில் ஆராய்ந்து அறிய முடிந்தால், அதற்கு இந்த அளவு பரிகாரம் பண்ண வேண்டும் என்று நிர்ணயம் செய்ய வேண்டும். அப்போதுதான் வாழைக் கல்யாணம் வருகிறது. மற்றபடி, சகட்டுமேனிக்கு செவ்வாய் இருந்தாலே வாழைக் கல்யாணம் பரிகாரம் என்று எங்கேயும் சொல்லப்படவில்லை.

பரிகாரம் என்பது ஜோதிடத்தின் பகுதியே அல்ல; அது தர்மசாஸ்திரத்தின் அங்கம். அந்த ஜோதிடர் ஜோதிடம், தர்ம சாஸ்திரம் இரண்டிலும் ஞானம் உள்ளவரா என்பதையும் நாம் கணக்கில் எடுத்துக்கொள்ள வேண்டும்.

- பதில்கள் தொடரும்...

மூல நட்சத்திரத்தில் பெண் எடுக்கலாமா?


 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism