Published:Updated:

நாரதர் உலா - குப்பைமேடான கோயில் குளம்

நாரதர் உலா - குப்பைமேடான கோயில் குளம்
பிரீமியம் ஸ்டோரி
News
நாரதர் உலா - குப்பைமேடான கோயில் குளம்

நாரதர் உலா - குப்பைமேடான கோயில் குளம்

‘‘அப்பப்பா, என்ன நெரிசல், தாங்கமுடியலையே சாமி’’ என்று அலுப்பும் சலிப்புமாகச் சொல்லிக்கொண்டே நம்முடைய அறைக்குள் பிரவேசித்தார் நாரதர்.

நாரதர் உலா - குப்பைமேடான கோயில் குளம்

தீபாவளிக்குச் சென்று திரும்பியவர் போக்குவரத்து நெரிசலில் சிக்கிக்கொண்டதைத் தான் அப்படிச் சொல்கிறார் என்று புரிந்து கொண்ட நாம், அவருக்கு சூடான இஞ்சி டீ கொடுத்து ஆசுவாசப்படுத்திவிட்டு,

‘‘என்ன நாரதரே, தீபாவளிக் கொண்டாட்டம் எல்லாம் நல்லபடி முடிந்ததா?’’ என்று விசாரித்தோம்.


‘தீபாவளி அன்று எல்லோரும் கங்கா ஸ்நானம் ஆச்சான்னு ஒருத்தரை ஒருத்தர் விசாரிப்பாங்க. அன்றைக்கு மட்டும் எல்லா இடங்களிலும் தண்ணீரில் கங்கை இருப்பான்னு ஐதீகம். ஆனா, நான் போயிருந்த கோயில் குளத்தைப் பார்த்தப்போ மனதுக்கு ரொம்பவே கஷ்டமா இருக்கு’’

‘‘நீர் எந்தக் கோயில் குளத்தைப் பற்றிச் சொல்கிறீர்?’’

‘‘ராமநாதபுரம் பரமக்குடி பக்கமுள்ள சௌந்தர்யநாயகி சமேத நாகநாத சுவாமி கோயில் குளத்தைப் பற்றித்தான் சொல்கிறேன்’’ என்றவரிடம்,

‘‘அந்தக் கோயில் ஆற்காடு நவாப் ஒருவரின் மகளின் மனநிலை பாதிப்பை குணப்படுத்திய கோயில் அல்லவா?’’ என்று கேட்டோம்.

‘‘சரியாகச் சொன்னீர். அதுமட்டுமல்ல, வசிஷ்டரின் 1000 பிள்ளைகளுக்கு சாப விமோசனம் கிடைத்ததும் இந்தத் தலத்தில்தான்'' என்ற நாரதரிடம்,

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

''அது என்ன வரலாறு?'' என்று ஆவலுடன் கேட்டோம்.

''சூரிய வம்சத்தில் வந்த திரிசங்கு வயதானதால் ஆட்சிப் பொறுப்பை மகனிடம் ஒப்படைத்துவிட்டு, ஒரேநாளில் சொர்க்கத்துக்குச் செல்ல விரும்பினான். எனவே, அவன் தன் குலகுருவான  வசிஷ்டரிடம் வந்து, தான் ஒரேநாளில் சொர்க்கத்துக்குச் செல்லவேண்டும் என்றும் தன்னுடைய விருப்பத்தை நிறைவேற்றவேண்டும் என்று கேட்டுக்கொண்டானாம். ஆனால், ஒருவருடம் யாகம் செய்தால்தான் சொர்க்கத்துக்குப் போகமுடியும் என்று கூறிவிட்டார். திரிசங்கு பிடிவாதமாக இருக்கவே வசிஷ்டர் அவனை புலையனாக மாறும்படி சபித்துவிட்டார். தன் சாபத்தைப் போக்கிக்கொள்ளவும் ஒரேநாளில் சொர்க்கத்துக்குச் செல்லவும் விசுவாமித்திரரிடம் சென்றான். தான் பஞ்சாட்சர மந்திரம் ஜபித்து யாகம் செய்து திரிசங்குவை சொர்க்கத்துக்கு அனுப்புவதாக உறுதி கூறிய விசுவாமித்திரர், யாகம் நடத்த வசிஷ்டரின் 1000 பிள்ளைகளை அழைத்தார். அவர்கள் மறுக்கவே விசுவாமித்திரர் அவர்களை வேடர்களாக மாறும்படி சபித்துவிட்டார்.

நாரதர் உலா - குப்பைமேடான கோயில் குளம்

அப்படி விசுவாமித்திரரால் சாபத்துக்கு ஆளான வசிஷ்டரின் 1000 பிள்ளைகளும் சாப விமோசனம் பெற்ற திருத்தலம் இது என்று சொல்கிறார்கள்'' என்ற நாரதர் தொடர்ந்து,    ''நான் அந்தக் கோயிலுக்குப் போயிருந்தப்போ ஒரு வித்தியாசமான காட்சியைப் பார்த்தேன். பொதுவா கோயிலுக்கு வரும் பக்தர்களை, கோயிலுக்கு வெளியில் இருக்கற கடைக்காரர்கள் தேங்காய், பழம் வாங்கச் சொல்லி வற்புறுத்துவதைத்தான் பார்த்திருக்கிறேன். ஆனால், இந்தக் கோயிலுக்கு வெளியில் பிளாஸ்டிக் டம்ளரை வாங்கச் சொல்லி வற்புறுத்துகிறார்கள். என்னன்னு விசாரிச்சப் பதான் கோயில் குளத்தோட மோசமான நிலைமை நமக்குத் தெரியவந்தது’’

‘‘நீர் அந்தக் குளத்தைப் போய் பார்த்தீரா?’’ என்று கேட்டோம்.

‘‘அவ்வளவுதூரம் போய்விட்டு குளத்தைப் பார்க்காமல் வருவேனா என்ன?’’ என்றவர் தொடர்ந்து,

‘‘கோயிலுக்குச் செல்லும் பக்தர்கள், தங்களை சுத்தப் படுத்திக்கொண்டு கோயிலுக்குச் செல்ல ‘வாசுகி தெப்பக்குளம்’ இருக்கிறது. ஆனால், அதற்கு தண்ணீர் வரவேண்டிய வழித்தடம் ஆக்கிரமிக்கப்பட்டுவிட்டதால், குளத்துக்குத் தண்ணீர் வரத்து சுத்தமா இல்லாமல் போய் விட்டது. அதுதான் சமயம் என்று கோயிலுக்குச் சுற்றுப்புறங்களில் இருக்கறவங்க அந்தக் குளத்தை குப்பை கொட்டும் இடமாக மாற்றிவிட்டனர். தண்ணீரைப் பார்த்து பல ஆண்டுகளாகிவிட்ட இந்தக் குளத்தில் குருவி குடிக்கக் கூட நீர் கிடையாது. இதனால் அருகில் உள்ள தண்ணீர் தொட்டியில் இருந்து தண்ணீரை பயன்படுத்தவே இந்த பிளாஸ்டிக் டம்ளர்’’ என்றவரிடம் வேறு ஏதாவது பிரச்னை இருக்கிறதா?’’ என்று கேட்டோம்.

நாரதர் உலா - குப்பைமேடான கோயில் குளம்



‘‘ஏன் இல்லாமல்?’’ என்று திருப்பிக் கேட்ட நாரதர் தொடர்ந்து, ‘‘நேர்த்திக் கடனாக முடிகாணிக்கை செலுத்துபவர்கள் நீராட எந்த வழியும் இல்லை. இது மட்டுமா வெளியூர்களில் இருந்து வரும் வயதானவர்கள், பெண்கள், குழந்தைகள் அவசரத்துக்கு ஒதுங்க ஒரு கழிப்பறைகூட இல்லை. அவர்களின் அவசரத்துக்கு உதவியாக இருப்பது குப்பை கூளங்கள் நிறைந்த, அசுத்தமான 'தெப்பக்குள' பகுதிதான்’’ என்ற நாரதரிடம்,

‘‘என்ன, ஒரு கழிப்பறைகூட இல்லையா?’’ என்று நாம் கேட்டதற்கு,


‘‘ஏன் இல்லாமல்? பஞ்சாயத்து நிர்வாகத்தால் கட்டப்பட்ட கழிவறை பராமரிப்பு இல்லாமல் இருப்பதால் பூட்டப்பட்டுவிட்டது. சுற்றுலா நிதியின்மூலம் கட்டப்பட்ட கழிவறை 2 வருடம் ஆகியும் இன்னும் திறக்கப்படவில்லை. மேலும் பேருந்து செல்லும் பாதையும், கோயிலின் பிரதான வாயிலும் ஆக்கிரமிப்பாளர்களின் கட்டுப்பாட்டில் இருப்பதால், கோயிலுக்கு வரும் பக்தர்கள் ஒற்றையடிப் பாதையில்தான் சிரமப்பட்டு நடக்கிறார்கள்’’ என்றார்.

‘‘கோயில் நிர்வாகத்திடம் இதுபற்றி பேசினீர்களா?’’ என்று கேட்டோம்.


‘‘கோயில் நிர்வாகத்திடம் பேசினோம். அவர்களோ, கோயில் ராமநாதபுரம் சமஸ்தா னத்தின் பொறுப்பில் இருந்தாலும், தெப்பக்குளம் அரசின் கட்டுப்பாட்டில் உள்ளது. எனவே குளத்தைச் சுத்தப்படுத்தி, நடைபாதை மற்றும் சுற்றுவேலி அமைக்க திட்ட மதிப்பீடு அரசின் அனுமதிக்காக 5 மாதங்களுக்கு முன்பு அனுப்பப் பட்டு உள்ளது. அனுமதி கிடைத்ததும் தெப்பக்குளத்தை சுத்தப்படுத்துவதற்கான பணிகள் தொடங்கிவிடும். புதிய கழிவறைக்கு இன்னும் மின் இணைப்பு வரவில்லை என்பதால் திறக்கப்படவில்லை. மற்றபடி கோயிலைச் சுற்றி உள்ள ஆக்கிரமிப்பு களை அகற்றுவதற்கு சில அரசியல்வாதிகளும் அதிகாரி களும் இடையூறாக உள்ளனர்’’ என்று நாரதர் சொல்லிக்கொண்டு இருக்கும்போதே, அவருடைய செல்போன் ஒலித்தது.

நாரதர் உலா - குப்பைமேடான கோயில் குளம்

எடுத்துப் பேசியவர், ‘‘அவசரமாக குத்தாலம் வரை போகவேண்டி இருக்கிறது. விரைவில் திரும்பிவிடுகிறேன்’’ என்று சொல்லிவிட்டு நம்முடைய பதிலை எதிர்பார்க்காமலேயே புறப்பட்டுவிட்டார்.

 படங்கள்: உ.பாண்டி