Published:Updated:

முன்னோர்கள் சொன்னார்கள்

முன்னோர்கள் சொன்னார்கள்
பிரீமியம் ஸ்டோரி
முன்னோர்கள் சொன்னார்கள்

ஜோதிட சிந்தனைகள் 2-ம் பாகம்சேஷாத்ரிநாத சாஸ்திரிகள்

முன்னோர்கள் சொன்னார்கள்

ஜோதிட சிந்தனைகள் 2-ம் பாகம்சேஷாத்ரிநாத சாஸ்திரிகள்

Published:Updated:
முன்னோர்கள் சொன்னார்கள்
பிரீமியம் ஸ்டோரி
முன்னோர்கள் சொன்னார்கள்

ந்துக்கு உடையவனின் அம்சகாதிபதி லக்னத்தில் இருக்கவேண்டும். லக்னத்துக்கு உடையவனின் அம்சகாதிபதி ஐந்தில் இருக்கவேண்டும். குருவின் அம்சகாதிபதி கேந்திரத்தில் (1,4,7,10-ல்) இருக்கவேண்டும். இப்படியோர் அமைப்பு ஜாதகத்தில் தென்பட்டால், அவனுக்கு குழந்தைகள் உண்டு என்கிறது  ஜோதிடம் (புத்ராதிப ஸ்தாம்சபதெளவிலக்னே:).

முன்னோர்கள் சொன்னார்கள்

லக்னம், பிறந்தவேளை, ஐந்து - குழந்தைச் செல்வத்தை வரை யறுக்கும் இடம். குரு - குழந்தையின் காரகன். அதாவது, குழந்தையை ஈட்டித்தருவதில் ஒத்துழைப்பவன்; குழந்தையைப் பெற்றுத்தர உதவுபவன். லக்னம் குழந்தையை பெறுபவன். ஐந்து - குழந்தையை உறுதி செய்பவன். இந்த மூவரும் இணைந்து செயல்படுவது, குழந்தைச் செல்வத்தை உறுதிசெய்கிறது.

லக்னாதிபதியின் அம்சகாதிபதி 5-ல். ஐந்தின் அம்சகாதிபதி லக்னத்தில். காரக கிரகமான குருவின் அம்சகாதிபதி லக்ன கேந்திரத்தில் (1,4,7,10-ல்). லக்னாதிபதியும், ஐந்துக்கு உடையவனும் அம்சகாதிபதி வழி ஒன்றுக்கொன்று இடம் மாறி இரண்டு இடங்களையும் நிறைவு செய்கிறார்கள். காரக கிரகம் குரு அம்சகாதிபதி வாயிலாக 1,4,7,10 ஆகிய இடங்களில் ஒன்றில் அமர்ந்து, லக்னாதிபதியின் விருப்பத்தை (குழந்தைச் செல்வம் அளித்து) நிறைவேற்ற ஒத்துழைக்கிறான்.

இங்கு, ராசிக்கட்டத்தில் அவர்களது இருப்பை ஆராயாமல், அவர்களது அம்சகாதிபதியின் வலுவில் குழந்தைச் செல்வத்தை இறுதி செய்கிறது. ராசிக்கட்டத்தில் ஐந்தில் இருக்கும் கிரகம், லக்னத்தில் இருக்கும் கிரகம், குரு இருக்கும் வீடு ஆகியவற்றை ஆராய்வதுடன் நின்றுவிடாமல், அவர்களது அம்சகாதிபதி வரை நமது சிந்தனைவளம் செயல்பட்டு, இறுதி முடிவை வெளியிட வேண்டும் என்கிறது ஜோதிடம் (பவமம்சகர்க்ஷயோ:).

குறிப்பிட்ட பாவத்தின் இறுதி முடிவுக்கு, அந்த பாவத்தின் அதிபதியின் அம்சகாதிபதி வரை ஆராயவேண்டும். இது எல்லா பாவபலனுக்கும் பொருந்தும் விதி. ராசிக்கட்டத்தில் நீசமான கிரகம், அம்சகத்தில் உச்சம் பெற்று இருந்தால், அந்த அம்சகாதிபதியின் வலுவையும் அல்லது வலு இழப்பையும் சேர்த்து ஆராய வேண்டும் (பலமம்சகர்க்ஷயோ:).

ராசிக்கட்டத்தில் உச்சம் பெற்று அம்சகத்தில் நீசம் பெற்றிருந்தாலும், அந்த அம்சகாதிபதியையும் ஆராய்ந்து முடிவுக்கு வரவேண்டும். உதாரணமாக, தினமும் ராசி பலன் சொல்லும் சில பிரபலங்கள், தனிப்பட்ட ஜாதகத்தின் குறிப்பிட்ட லக்னத்துக்கு பலன் சொல்லும் முறையை சந்திர லக்னத்தோடு இணைத்துச் சொல்வார்கள். சந்திரன் நட்சத்திரங்களோடு இணைந்திருப்பதால், நட்சத்திர பலனாக வெளியிடுவார்கள். அதேநேரத்தில், அவன் பிறந்த ஜாதகத்தில்  லக்னம் வழி தென்படும் நட்சத்திர தசாபுக்தி, அந்தரங்களில் ஏற்படும் பலன்களை ஒதுக்கிவிட்டு பொதுப்படையான பலனை தோராயமாக உதிர்த்து, ஜோதிடத்தின் தரத்தைக் கொச்சைப்படுத்துபவர்களும் உண்டு.

சந்திர லக்னத்தை வைத்துச் சொல்லும்போது ‘தங்களது ராசிக்கு 9-ல் குரு உச்சம் பெற்று, ராசிநாதன் பார்வை பட்டு விளங்குவதால், எதிர்பார்க்காமலேயே பொருளாதாரச் செழிப்பைப் பெற்று மகிழ்ச்சியைச் சந்திப்பீர்கள். இந்த அமைப்பு அரிதானது, அலாதியானது. இப்படியான அமைப்பு எல்லோருக்கும் கிடைக்காது’ என்று விளக்கம் அளிக்கும் சில ஜோதிட பிரபலங்கள் உண்டு. அந்தவேளையில், உச்சமான குருவின் அம்சகாதிபதியை ஆராய முற்படமாட்டார்கள். முழு வேக்காடு அடையா மல் அரைவேக்காட்டிலேயே குறைப் பிரசவமாக பலன் வெளிவந்துவிடும்! இது, ஜோதிடத்துக்குச் செய்யும் சேவை ஆகாது.

உணவு விடுதி ஊழியன், அன்றைய நீண்ட மெனுவை மூச்சுவிடாமல் ஒப்பிப்பதுபோல், கிரக அமைப்புகளின் தர வரிசையை ஒப்பிக்கும் தறுவாயில், மக்கள் பிரமித்துப்போய், அவர்களை முழுமையாக நம்பிவிடுவார்கள். அவர்களுக்கு, நவகிரகங்களும் மனத் தெளிவை அளிக்கவேண்டும் என்று வேண்டுவதைத் தவிர வேறு வழியில்லை.

தங்களுக்கு இப்போது சந்திராஷ்டமம்; கவனத்தோடு செயல்பட வேண்டும், சாட்சிக் கையெழுத்து போடும்போது ஒன்றுக்கு மூன்று தடவை யோசித்து செயல்படவும், அலுவலகத்தில் மேல் அதிகாரிகளுடன் கவனமாகப் பேசவேண்டும், பணம் கொடுக்கல் - வாங்கலில் எச்சரிக்கையுடன் செயல்படவேண்டும், பிரயாணத்தைத் தள்ளிப் போடுவது நலம், துணையை நிர்ணயம் செய்ய நேர்க்காணலைத் தவிர்க்கவும், புது ஒப்பந்தங்கள் வெற்றி பெற வாய்ப்பு இல்லை, ஆனால் விலை யில்லா உதவிப் பொருள்களைப் பெற்றுக் கொள்ளலாம், பதவி உயர்வை ஏற்கலாம், பத்ம பூஷண், பத்மவிபூஷண் போன்ற விருதுகளைப் பெறலாம், ஓய்வு ஊதியத்தைப் பெறலாம், மணி விழாவைக் கொண்டாடலாம், பண முடிப்பை ஏற்கலாம் - இப்படி, பொது நல்லுரையை உபதேசம் செய்யும் பிரபலங்களும் இல்லாமல் இல்லை!

பலன் சொல்லும்போது, அம்சகாதிபதி பலனையும் இணைத்துக்கொள்வது அவசியம். ராசிச் சக்கரத்தில் 12 ராசிகள் உண்டு. ஒரு ராசியை 10 பிரிவுகளாகப் பிரித்து இருக்கிறார்கள். லக்னம், ஹோரா, த்ரேக்காணம், சப்தாம்சகம், நவாம்சகம், தசாம்சகம், த்வாதசாம்சகம், ஷோடசாம்சகம், த்ரிம்சாம்சகம், ஷஷ்ட்யம்சகம் என்ற பெயரில் குறிப்பிடுவார்கள். முறையே 1, 2, 3, 7, 9, 10, 12, 16, 30, 60 - என்று பிரிவை ஏற்படுத்திவைத்திருக்கிறார்கள். அதில் நவாம்சகம் (9) என்ற பிரிவு, பலன் சொல்வதில் தனிப்பங்கு பெறுகிறது.  கிரகங்கள்-9, தசைகள்-9, புக்திகள்-9, அந்தரங்கம்-9. ஒரு ராசிக்கு 9 நவாம்சகம்; 12 ராசிகளுக்கு 12 x 9 = 108 நவாம்சகம்.

நூற்றெட்டின் கூட்டுத்தொகையும் 9. பத்து என்பது, ஒன்பதும் ஒன்றும் ஆகும். 9-க்குப் பிறகு ஒன்றில் இருந்து மீண்டும் எண்ணிக்கை ஆரம்பம் ஆகும். ராசியில் ஆரம்பிக்கும் முதல் நவாம்சகத்தில் துவங்கி வரிசையாக 12 ராசி முடிய 108 நவாம்சகங் கள் தென்படும். ராசிக்கு உயிரூட்டுவது அதன் நவாம்சகம். நமது உடலில் ஒன்பது ஓட்டைகள் உண்டு. கண்கள் இரண்டு, காதுகள் இரண்டு, மூக்குத் துவாரங்கள் இரண்டு, வாய் ஒன்று, சிறுநீர், பெருநீர் துவாரங்கள் இரண்டு. இதில் மூச்சு விடும் இரண்டும் உயிரோட்டத்துக்கு முக்கியமானவை. மற்ற ஏழும் இயங்க இந்த இரண்டும் உதவும். இந்த ஒன்பதும் உயிரோட்டத்தை நிலைநிறுத்துவதற்கு அவசியம் என்கிறது வேதம் (நவவைபுருரஷ ப்ராணா:).

உயிருள்ள புருஷனாக ராசிபுருஷனை விளக்குகிறது ஜோதிடம். 9-ம் வீட்டையும், 9-க்கு உடையவனையும் பாக்யஸ்தானம், பாக்கியத்தை அளிப்பவன் என்கிறது ஜோதிடம். 9-ஐ தகப்பனா கவும், ஒன்பதுக்கு ஒன்பதை அதாவது பாவாத்பாவத்தை (5-ம் இடத்தை), தனயனாகவும் குறிப்பிடும் ஜோதிடம். ஐந்தின் பாவாத் பாவம் 9 என்று, தனயனுக்கு தகப்பனின் தொடர்பையும் சுட்டிக்காட்டும். இப்படி ராசியின் பல பிரிவுகளில், ‘நவாம்சகம்’ என்ற பிரிவு பலன் சொல்லுவதில் பெரும்பங்கு பெறுகிறது. நவாம்சக அதிபதியின் உயர்வு - தாழ்வு, பலனின் இறுதி முடிவை நிறைவுசெய்கிறது.

மேஷ ராசியின் முதல் நவாம்சகமும் ரிஷபத்தின் 5-ம் நவாம்சகமும், மிதுனத்தில் 9-வது நவாம்சகமும் சிறப்பு பெறுகின்றன. இதுபோல், கடகத்தில் இருந்து மும்மூன்று ராசிகளிலும் 1, 5, 9 நவாம்சகங்கள் சிறப்பு பெறும். சிறப்பு பெற்ற நவாம்சகத்துக்கு வர்க்கோத்தமம் என்ற சிறப்பும் கிடைக்க வாய்ப்பு உண்டு. ராசிக் கட்டத்தில் நீசம் பெற்ற கிரகம், அம்சகத்தில் உச்சம் பெறுவது உண்டு. அந்த உச்ச நிலையை பலன் சொல்லும்போது கவனிக்க வேண்டும். ராசிக் கட்டத்தில் உச்சமான கிரகம், நவாம்சகத்தில் நீசம் பெறுவது உண்டு. ராசிக் கட்டத்தில் உச்சனான சந்திரன், அம்சகத்தில் நீசம் பெற மாட்டான். மற்ற அனைத்து கிரகங்களும் அம்சகத்தில் உயர்வையும் தாழ்வையும் சந்திப்பார்கள்.

பாவாதிபதியின் தரத்தை நிர்ணயம் செய்யும் போது, அம்சகத்தில் அவன் அடைந்த உயர்வு - தாழ்வையும், அந்த அம்சகாதிபதியின் தரத்தையும் கருத்தில் கொண்டு பலனை ஆராய வேண்டும் என் கிறது ஜோதிடம். உதாரணமாக ராசிக் கட்டத்தில் உச்சம் பெற்ற மகரச் செவ்வாய், அம்சகத்தில் கடகத்தில் அமர்ந்து நீசம் பெற்று இருந்தாலும்... அம்சகாதிபதி சந்திரன் சுப கிரகமாகவும், அவன் ரிஷபத்தில் பலம்பெற்றும் இருந்தால், செவ்வாயின் எதிரிடையான  பலன்கள் தலைதூக்காமல் இருந்துவிடும். செவ்வாய் வெப்ப கிரகம். அது, நீசம்பெற்ற இடம் கடகம். அது நீர் ராசி; தட்ப ராசி. அதற்கு உடையவன் தட்ப கிரகம். ஆக, செவ்வாய்க்கு (வெப்ப கிரகத்துக்கு)எதிரிடையான உயர்ந்த பலன் அம்சகாதிபதியின் (சந்திரன்) பெருமையில் கிடைத்துவிடும்.

கடக லக்னம் 7-ல் செவ்வாய் உச்சம் பெற்று இருப்பதால், கணவன் அல்லது மனைவி இழப்பு என்று சில ஜோதிட பிரபலங்கள் முடிவெடுப்பது தவறு என்று நடைமுறையில் நிரூபிக்கப் பட்டிருப்பதை எல்லோரும் அறிவார்கள். உச்சனான செவ்வாயின் அம்சகநாதன் சந்திரன், ரிஷபத்தில் உச்சம் பெற்று இருந்தால், கணவன் இழப்பும் மனைவி இழப்பும் பொய்த்துவிடும்; பஞ்சாங்கத்தில் செவ்வாய் அட்டவணையும் ஆராயாமல் உருவாக்கியது என்று புலனாகும். இருவரில் ஒருவருக்கு செவ்வாய் தோஷம் இருக்கும் ஜாதகங்கள் பலவும் இழப்பில்லாமல் செழிப்பாக வாழ்ந்து, தாம்பத்தியத்தைச் சுவைத்து மகிழ்கிறார்கள் என்பதை அனுபவம் உணர்த்துகிறது.

மகர லக்னம் 7-ல் உச்சனாக இருக்கும் குரு, அம்சகத்தில் மகரத்தில் அமர்ந்து நீசம் பெற்று, அம்சகநாதன் சனி மேஷத்தில் நீசம் பெற்றால், கணவனை அல்லது மனைவியை இழந்து தவிப் பதைக் காண்கிறோம். ‘ஏழில் இருக்கும் குரு உச்சம் பெற்று லக்னத்தை முழுமையாகப் பார்ப்பதால் (7-ம் பார்வையாக) தாம்பத்தியம் சிறப்புற்று விளங்கும்’ என்று பதிலளிக்கும் பிரபலங்களும் உண்டு; அது பொய்த்துப்போவதும் உண்டு!

7-ல் இருக்கும் வெப்ப கிரகமான செவ்வாயோ, 7-ல் இருக்கும் தட்ப கிரகமான குருவோ, தாம்பத்தியத்தின் தரத்தை, உயர்வை, நீட்டிப்பை, மகிழ்ச்சியை உறுதி செய்யும் திறன் அற்றவை. அவர்களது அம்சகாதிபதியின் பங்குதான் இறுதி முடிவை வரையறுக்கிறது. நாம் எதிர்பார்க்கும் பாவத்தை ஆராயும்போது, பாவத்தில் இருக்கும் கிரகம், பாவத்தைப் பார்க்கும் கிரகம், பாவாதிபதி, பாவாதிபதி நின்ற ராசிநாதன் இவர்களோடு முற்றுப்புள்ளி வைக்காமல், அவனது அம்சகாதி பதியையும் ஆராய்ந்து, பலன் சொல்லும்போது இணைத்துக்கொள்ள வேண்டும் என்று ஜோதிடம் வலியுறுத்தும்.

மீன லக்னம் 7-ல் புதன் உச்சம் பெற்று (கன்னி ராசி), அம்சகத்தில் நீசம் ஏற்பட்டு, அதன் ராசிநாதன் குரு மகரத்தில் அமர்ந்திருந்தால் சிந்தனை வளம், ஆராய்ச்சி, கல்வி அத்தனையையும் இழந்து தவிப்பான். மீன லக்னம் 7-ல் சுக்கிரன் நீசம் பெற்று, அம்சகத்தில் உச்சத்தை அடைந்து, அம்சகநாதன் குரு கடகத்தில் அமர்ந்திருந்தால், செல்வந்தனாக விளங்கி, உலகவியல் சுகபோகங்களை அனுபவித்து மகிழ்வான். ராசிக் கட்டத்தில் நீசனான சுக்கிரனையும், உச்சனான புதனையும் பார்த்துவிட்டு, அம்சகநாதன் வரைக்கும் ஆராயாமல் விபரீத பலன்களைச் சொல்லும் பிரபலங்களாக மாறக்கூடாது.

தசாநாதன், புக்திநாதன், அந்தரநாதன் - இவர்களில் ஒன்பது கிரகங்களுக்கும் பங்குண்டு. இம்மூவரின் தரத்தை நிர்ணயம் செய்யும்போது, அவரவரின் அம்சகநாதனையும், அவனது தரத்தையும் இணைத்துக்கொண்டு பலனை வெளியிடவேண்டும்.இந்த மூவரில் யாருக்கு பலம் அதிகமாக இருக்கிறதோ, அந்த பலனையே அந்த தசையில் சந்திக்க நேரிடும். தசாநாதனும் அந்தரநாதனும் பலம் குன்றியவர்கள்; புக்திநாதன் பலம் பெற்றவன் என்றால், புக்திநாதனின் பலன் அனுபவத்துக்கு வரும். ஒருவேளை, அந்தரநாதன் பலம்பெற்று, மற்ற இருவரும் பலம் இழந்த நிலையில், அந்தரநாதனின் பலன் அனுபவத்துக்கு வரும்.

இங்கு இம்மூவரின் பலத்தை முழுமையாக ஆராய, அவர்களின் அம்சகநாதனின் தகுதியையும் சேர்த்து சிந்தனை செய்து முடிவெடுக்க வேண்டும். தசாநாதன் சுக்கிரன் உச்சம் பெற்று விளங்குகிறான். அவனது தசா காலம் 20 வருடமும் பொருளாதாரச் செழிப்பை தடையின்றி நிலைத்திருக்கச் செய்யும் என்று பிரபலங்கள் முடிவெடுத்துவிடக் கூடாது. 20 வருட தசா காலங்களில் புக்தியிலும் அந்தரத் திலும் ஒன்பது கிரகங்களின் பங்கும் இணைந் திருக்கும். இணைந்த அந்த ஒன்பது கிரகங்களும் தசாநாதனுக்கு எதிரிடையான மாறுபட்ட பலனை அளிக்கவும் ஒத்துழைக்கவும் செய்யும். எது மாறுபட்ட பலனை அளிக்கும், எது ஒத்துழைக்கும் என்பதை இறுதி செய்ய, அம்சக நாதன் வரை சிந்தனை வளத்தை கையாள வேண்டும்.

ஜோதிடத்தில் தனிப்பட்ட ஒரு கிரகத்தின் பலன் இறுதி முடிவாகாது. மற்ற மாறுபட்ட 8 கிரகங்களின் பங்கையும் சேர்த்துதான் பலன் சொல்லவேண்டும். கிரகங்களின் கூட்டுப் பலன்தான் ஜோதிடத்தில் உண்டு. ராசிக் கட்டத் தில் ஒரு பாவத்துக்கு பலன் சொல்ல முற்பட்டால், மற்ற பாவங்களையும் இணைத்து தான் இறுதி முடிவை எட்டவேண்டும். அதில், அம்சகநாதனின் இணைப்பும் ஒன்று. அதை அலட்சியப்படுத்தி விட்டு, பலனைச் சொல்ல முற்படக்கூடாது. படித்து ஆராய்ந்து பலன்சொல்லும் முறையை வளர்த்துக்கொள்ள வேண்டும்.

(இன்னும் வரும்)

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism