Published:Updated:

நாரதர் உலா... - தண்ணீருக்குத் தவிக்கும் பக்தர்கள்!

நாரதர் உலா... - தண்ணீருக்குத் தவிக்கும் பக்தர்கள்!
பிரீமியம் ஸ்டோரி
News
நாரதர் உலா... - தண்ணீருக்குத் தவிக்கும் பக்தர்கள்!

நாரதர் உலா... - தண்ணீருக்குத் தவிக்கும் பக்தர்கள்!

நாரதர் வருகிறாரா என்று வாசலைப் பார்த்தபடி இருந்தோம். நம்மை அதிகம் காத்திருக்க வைக்காமல், சுட்டெரிக்கும் வெயிலில் வியர்த்து விறுவிறுத்து வந்த நாரதரை வரவேற்று, பாக்கெட் இளநீர் கொடுத்து உபசரித்தோம்.

நாரதர் உலா... - தண்ணீருக்குத் தவிக்கும் பக்தர்கள்!

இளநீரைப் பருகி, தன்னை ஆசுவாசப்படுத்திக் கொண்ட நாரதரிடம், ‘`என்ன நாரதரே... போன முறை வந்தபோது கோயில் குளங்களின் நிலை குறித்து விசாரித்து வருவதாகச் சொன்னீர்களே, ஏதும் தகவல்கள் உண்டா?’’ என்று கேட்டோம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

‘‘நான் மட்டுமல்ல... எனக்குத் தெரிந்த சோர்ஸ்கள் மூலமும் விசாரித்து வருகிறேன். இன்னும் பல ஊர்களுக்கு நேரில் சென்றும் பார்க்க வேண்டியுள்ளது. முழுமையான தகவல்கள் சேர்ந்ததும் விரிவாகவே உம்மிடம் பகிர்ந்து கொள்கிறேன்’’ என்று நிறுத்திய நாரதர் தொடர்ந்து, ‘`குளங்கள் பற்றி விசாரித்தபோது, புகழ்பெற்ற அம்மன் திருத்தலம் ஒன்றில் அம்மனுக்கு அபிஷேகம் செய்யவே தண்ணீருக்கு அலையும் நிலைமையைப் பகிர்ந்துகொண்டார் நண்பர் ஒருவர். அவர் சொன்னதைக் கேட்டதும் அதிர்ந்துபோனேன்’’ என்றார்.

அவருக்கு மட்டுமல்ல... நமக்கும் அந்தத் தகவல் அதிர்ச்சியாகத்தான் இருந்தது. ‘`என்ன சொல்கிறீர் நாரதரே? தமிழ்நாட்டில் தண்ணீர்ப் பஞ்சம் தலைவிரித்து ஆடுவது உண்மைதான். ஆனால், அம்மனுக்கு அபிஷேகம் செய்யக்கூட தண்ணீர் இல்லை என்ற தகவலைச் சொல்வது அதிர்ச்சி யாகத்தான் இருக்கிறது. எந்தக் கோயில் அம்மனுக்கு இந்தப் பரிதாப நிலை?’’ என்று கேட்டோம்.

‘`சிவகங்கை மாவட்டம் இளையான்குடி அருகில் இருக்கும் தாய மங்களம் கிராமத்தில் உள்ள முத்துமாரியம்மன் கோயிலில்தான் இந்த நிலைமை. குடும்பம், தொழில், அரசியலில் உயர்வு போன்ற பல பிரச்னைகளுக்குத் தீர்வு வேண்டி, தினமும் ஆயிரக்கணக்கில் பக்தர்கள் அந்தக் கோயிலுக்கு வருகிறார்கள். பங்குனி மாதத் திருவிழாவின்போது மட்டும் சுமார் 10 லட்சம் பக்தர்கள் கூடுவார்கள். அந்தக் கோயிலில்தான் இந்த நிலைமை’’ என்றார்.

‘`இதுபற்றி அங்கே இருப்பவர்களிடம் பேசினீர்களா?’’

‘`அம்மனின் பக்தரும், விவசாயச் சங்கத்தின் மாவட்டத் தலைவருமான அழகர்சாமியிடம் பேசினேன். ‘இந்தக் கோயிலில்  மூன்று போர்வெல் மோட்டார்கள் போடப் பட்டன. அதில் இரண்டு பழுதாகிவிட்டன. இருக்கும் ஒரு போர்வெல்லில்கூட தண்ணீர் அதல பாதாளத்துக்குச் சென்றுவிட்டது. தண்ணீர் சரியாக வருவதே இல்லை. இங்கே வரும் பக்தர்கள் அம்மனுக்குப் படையல் போடுவது வழக்கம். அப்படி வரும் பக்தர்கள் சமைக்கத் தேவையான பொருள்களோடு தண்ணீரையும் சுமந்து வர வேண்டிய நிலையில் இருக்கிறார்கள்’ என்று தன்னுடைய ஆதங்கத்தை நம்மிடம் பகிர்ந்துகொண்டார்’’ என்ற நாரதரைக் குறுக்கிட்டு,

‘‘அப்படியென்றால் அபிஷேகத்துக்கும் வெளியில் இருந்துதான்  தீர்த்தம் வருகிறதா?’’ என்று கேட்டோம்.

‘‘அதைத்தான் சொல்ல வந்தேன். பொறுமை யாகக் கேளும்’’ என்ற நாரதர், அதுகுறித்து விவரித்தார். ‘`கோயிலுக்கென்றே தெப்பக்குளம் இருக்கிறது. ஆனால், கோடிக்கணக்கில் வருமானம் வந்தும்கூட தெப்பக்குளத்தைச் சரியாகப் பராமரிப்பதில்லை. இதனால் தெப்பக்குளம் வறண்டு, வெளியில் இருந்து தண்ணீர் கொண்டு வந்து நிரப்புகிறார்கள். பக்தர்கள் குளிக்கும் அந்தக் குளத்தில் இருந்துதான் அம்மனின் அபிஷேகத்துக்கும் தண்ணீர் எடுக்கிறார்கள். இது பக்தர்களுக்கு மிகுந்த மனவருத்தத்தை ஏற்படுத்தி யுள்ளது. ‘அம்மன் அபிஷேகத்துக்குத் தேவைப்படும் தண்ணீருக்குக் கோயிலுக்குள் ஒரு போர்வெல் போட்டுப் பயன்படுத்தக்கூடாதா?’ என்று பக்தர்கள் ஆதங்கப்படுகிறார்கள்’’ என்றார்.

‘‘அவர்களது ஆதங்கம் நியாயமானதுதான். சரி... கோயிலில் வேறு ஏதேனும் பிரச்னைகள், குறைகள் உண்டா?’’

‘`நிறையவே உண்டு’’ என்றவர் ஒவ்வொரு பிரச்னையாக விவரித்தார்.

‘‘தீச்சட்டி எடுக்கவும், அங்கப் பிரதட்சணம் செய்யவும் வரும் பெண்கள், நேர்த்திக் கடனை முடித்துவிட்டு, தெப்பக்குளத்தில் குளித்து உடை மாற்றிக்கொள்வது வழக்கம். அவர்கள் உடை மாற்றிக்கொள்ள அறைகள் வசதியாக இல்லை. இதனால் பெண் பக்தர்கள் படும்பாடு மிகவும் வருத்தமாக இருக்கிறது. மேலும், பக்தர்கள் தங்குவதற்குப் போதுமான விடுதி வசதிகூட இல்லை. இத்தனைக்கும் ஏராளமான இடம் இருக்கிறது. அந்த இடங்களில் விடுதிகள் கட்டினாலே போதும்; பிரச்னைகள் தீர்ந்துபோகும் என்கிறார்கள் உள்ளூர் மக்கள். 

நாரதர் உலா... - தண்ணீருக்குத் தவிக்கும் பக்தர்கள்!

அதேபோல், பக்தர்கள் செலுத்தும் முடிக் காணிக்கையால் மட்டும் கடந்த ஆண்டு சுமார் 45 லட்ச ரூபாயும் இந்த ஆண்டு 75 லட்சம் ரூபாய் வரையிலும் ஏலத்தின் மூலம் வருமானம் கிடைத்திருக்கிறதாம். அதுமட்டுமின்றி மொட்டைப் போடுவதற்கு வேறு டிக்கெட் வைத்து, தலைக்கு 30 ரூபாய் வசூலிக்கிறார்கள். ஆனாலும், பக்தர்கள் முடிக்காணிக்கைச் செலுத்துவதற்குப்  போதுமான இடவசதி செய்து தராமல் இருக்கிறது நிர்வாகம். இதனால் பக்தர்கள் மொட்டைப் போட அங்குமிங்கும் அலைமோதுவதை நானே நேரில் கண்டேன். போதுமான கழிவறை வசதியும் இல்லாமல் பக்தர்கள் படும் கஷ்டம் கொஞ்சநஞ்சமல்ல.

இதுதான் இப்படியென்றால், கோயிலுக்கு வரும் பக்தர்களில் சிலர் சொந்தப் பிரச்னைகளின் காரணமாகச் சண்டை போட்டு, கைகலப்பில் ஈடுபடுவதும் நடப்பதுண்டு. அதுவும் பக்தர்களுக் குப் பெரிய இடையூறாக இருக்கிறது. இதனால் போலீஸ் புறக்காவல் நிலையம் அமைக்க வேண்டும் என்று பக்தர்கள் பலமுறை கோரிக்கை வைத்தும், நிர்வாகம் அதைக் காதில் வாங்கிக்கொள்ளவே இல்லையாம்’’ என்ற நாரதரிடம் அடுத்த கேள்வியை முன்வைத்தோம்.

‘`நீர் நேரில் சென்று வந்தீரே... உமது கண்ணிலும் ஏதாவது பிரச்னைகள் பட்டதா?’’

‘`ஆமாம்! கோயில் மூலஸ்தானம் மிகவும் குறுகலாக உள்ளதால், பக்தர்கள் நெரிசலில் சிக்கித் தவிக்கவேண்டி இருக்கிறது. பலருக்கு மயக்கம்கூட வந்திருப்பதாகப் பேசிக்கொள்கிறார்கள். முடி ஏலம், கடைகள் ஏலம், கோயில் உண்டியல் காணிக்கை, டிக்கெட் மூலம் வரும் வருமானம்... இப்படி வருமானம் குவியும் இந்தக் கோயிலில் ஏ.சி வசதி செய்து தர ஏனோ நிர்வாகத்துக்கு மனம் வரவில்லை’’ என்றார் வேதனையுடன்.

‘`நீங்கள் கேட்டதையும் பார்த்ததையும் கோயில் நிர்வாகத்திடம் சொன்னீர்களா?’’ என்றோம்.

‘`கோயிலின் பரம்பரை டிரஸ்டி வெங்கடேசனிடம் பேசினேன். அதற்கு அவர், ‘நீங்கள் சொல்வதெல்லாம் உண்மைதான். பக்தர் களுக்குத் தேவையான அத்தனை அடிப்படை வசதிகளையும் செய்து தர நிர்வாகம் தயாராகத்தான் இருக்கிறது. அறநிலையத்துறையின் உத்தரவு வர வேண்டும். புதிதாக வந்திருக்கும் இணை ஆணையர் எங்களிடம் கலந்து பேசி இருக்கிறார். விரைவில் பக்தர்களின் குறைகள் தீர்க்கப்படும்’ என்றார்’’ என்ற நாரதரிடம்,

‘`கோயில் இணை ஆணையரைப் பார்த்துப் பேச முடிந்ததா?’’

‘`இந்துசமய அறநிலையத்துறையின் சிவகங்கை மாவட்ட இணை ஆணையர் செந்தில்வேலவனைப் பார்த்து விவரம் கேட்டேன். அதற்கு அவர், ‘முதல்கட்டமாக இரண்டு கோடி ரூபாய் மதிப்பீட்டில் குடிநீர், கழிவறை, உடை மாற்றும் அறை, தங்கும் விடுதி போன்ற அடிப்படை வசதிகளைச் செய்து தர உத்தரவிடப்பட்டுள்ளது. கோயில் நிர்வாகம் விரைந்து செயல்படும் என்று நம்புகிறேன்’ என்றார்.’’

இப்படி நாரதர் சொல்லவும், ‘`நிர்வாகத்தைக் கேட்டால் அறநிலையத்துறையைக் கை காட்டுவதும், அறநிலையத்துறையைக் கேட்டால் கோயில் நிர்வாகத்தைக் கைகாட்டுவதும்தான் நடக்கிறது’’ என்று நாம் அலுத்துக்கொள்ள, அதை ஆமோதித்தவாறே எழுந்த நாரதர், புறப்பட ஆயத்தமானார்.

``சித்திரைத் திருவிழாவுக்காக மதுரைக்குச் செல்கிறேன். ஏதேனும் தகவல் கிடைத்தால் ஃபோனில் தொடர்புக்கொள்கிறேன். வரட்டுமா?'' என்றவர், நமது பதிலுக்குக் காத்திராமல், புறப்பட்டுச் சென்றார்.