Published:Updated:

நாரதர் உலா... - ஆனந்தம் தருமா ஆழித்தேரோட்டம்?

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
நாரதர் உலா... - ஆனந்தம் தருமா ஆழித்தேரோட்டம்?
நாரதர் உலா... - ஆனந்தம் தருமா ஆழித்தேரோட்டம்?

நாரதர் உலா... - ஆனந்தம் தருமா ஆழித்தேரோட்டம்?

பிரீமியம் ஸ்டோரி

‘அக்னி வெயில் சுட்டெரிக்கும் நிலையில், நாரதர் வருவாரா?’ என்று நாம் நினைத்துக் கொண்டிருக்க... வெயில் சுட்டாலும் மழை நனைத்தாலும் நான், எனது கடமையில் இருந்து தவறமாட்டேன் என்று சொல்லாமல் சொல்வது போல், ‘திருவாரூர் போய்விட்டுக் காலையில்தான் வந்தேன். இன்னும் கொஞ்சநேரத்தில் வந்து விடுவேன்’ என்று நாரதரிடம் இருந்து தகவல் வந்தது.  

நாரதர் உலா... - ஆனந்தம் தருமா ஆழித்தேரோட்டம்?

சொன்னபடியே சற்றுநேரத்துக்கெல்லாம் வந்துவிட்ட நாரதருக்கு வெயிலுக்கு இதமாக மோர் கொடுத்து உபசரித்தோம்.

மோரைப் பருகிவிட்டு, தன்னை ஆசுவாசப் படுத்திக்கொண்ட நாரதரிடம், ‘‘என்ன நாரதரே, திருவாரூர் பயணத்துக்கு ஏதேனும் விசேஷ காரணம் உண்டா?’’ என்று கேட்டோம்.

‘‘என்ன இப்படிக் கேட்டுவிட்டீர்? மே மாதம் 29-ம் தேதி ஆழித்தேரோட்டம் நடக்கப்போவது உமக்குத் தெரியாதா என்ன?’’ என்று பதிலுக்குக் கேட்டார் நாரதர்.

‘‘ஏதோ ஆழித்தேரோட்டத் தேதி மாற்றப் பட்டுள்ளதாக ஒரு தகவல்  வாட்ஸ்அப்பில் பரவுவதாகச் சொன்னார்களே?’’     

நாரதர் உலா... - ஆனந்தம் தருமா ஆழித்தேரோட்டம்?

‘‘அப்படி ஒரு வதந்தியை யாரோ சிலர் பரவ விட்டது உண்மைதான். அதுபற்றிக் கேள்விப் பட்டதும் ‘இனியும் தேரோட்டத் தேதியை அறிவிக்காமல் இருந்தால் குழப்பமாகி விடும்’ என்று நினைத்த கோயில் நிர்வாகம், மே 29-ம் தேதி ஆழித்தேரோட்டம் நடக்கும் என்று அறிவித்துவிட்டார்கள்’’ என்று நாரதர் கூறியதைத் தொடர்ந்து, ‘‘அப்படியென்றால் ஆழித்தேரோட்டம், அடுத்து தெப்பத்திருவிழா எனத் திருவாரூர் களைகட்டப்போகிறது என்று சொல்லும்’’ என்று நாம் கூறி முடிப்பதற்குள் இடைமறித்த நாரதர், ‘‘அதில்தான் சிக்கல்...’’ என்று இழுத்தார்.

‘‘என்ன சிக்கல்? ஆழித்தேரோட்டம் முடிந்ததும் தெப்பத்திருவிழாவும் நடக்குமல்லவா? அதில் ஏதேனும் பிரச்னையா... விவரமாகச் சொல்லும்’’ என்று உரிமையோடு நாம் கடிந்துகொள்ள, அதைக் கண்டுகொள்ளாதவராக, ‘‘நீர் சொல்வது போன்று போன வருஷம் ஆழித்தேரோட்டமும், தெப்பத்திருவிழாவும் நடந்தன. ஆனால், இந்த வருஷம் தெப்பத்திருவிழா நடக்குமா என்பது சந்தேகம்தான்’’ என்று நாரதர் மேலும் பொடிவைத்துப்பேச, நாம் பொறுமை இழந்தோம்.

‘‘தெப்போற்ஸவத்துக்கு என்ன தடை ஏற்பட்டுவிட்டது? விவரமாகச் சொல்லுங்கள் ஸ்வாமி?’’ என்று நாம் இறைஞ்சவே, அதை உள்ளுக்குள் ரசித்தபடியே விவரிக்க ஆரம்பித்தார் நாரதர்.

‘‘கமலாலயக் குளத்தில் தண்ணீர் இருந்தால்தானே தெப்போற்ஸவம் நடக்கும். கமலாலயம்தான் வற்றிப்போய்விட்டதே.’’

‘‘என்ன சொல்கிறீர் நாரதரே? கமலாலயக் குளத்தில் எப்போதும் நீர் நிறைந்திருக்குமே. என்ன ஆயிற்று கமலாலயக் குளத்துக்கு?’’

‘‘குளத்தைச் சுற்றிலும் 2 கி.மீ தொலைவுக்குப் பல பேர் போர் போட்டு நிலத்தடி நீரை எடுத்துவிட்டதால், கமலாலயக் குளம் காய்ந்துவிட்டது’’ என்று நாரதர் சொல்லிக்கொண்டு இருந்தபோதே, நமக்கு வாட்ஸ்அப்பில் சில படங்கள் வந்துசேர்ந்தன. திருவாரூர்க் குளத்தில் தண்ணீர் இருப்பதுபோன்ற அந்தப் படங்களை நாரதரிடம் காட்டினோம்.

‘‘நீர் என்ன கேட்கப்போகிறீர் என்பது எனக்குத் தெரியும். திருவாரூர்க் கோயிலைப் பற்றிச் சொல்லும்போது, கோயில் ஐந்து வேலி, குளம் ஐந்து வேலி என்று சொல்வார்கள். அந்த அளவுக்குப் பிரமாண்டமான குளத்தில் ஒரு போர்வெல் போட்டு, தண்ணீர் நிரப்பிக் கொண்டிருக்கிறார்கள். நான் போனபோதுகூட இதைப் பார்த்தேன்.   

நாரதர் உலா... - ஆனந்தம் தருமா ஆழித்தேரோட்டம்?

ஆனால், ஒரு போர்வெல் மூலம் கமலாலயக் குளத்தை நிரப்புவது கஷ்டம் என்றும், அதனால் தெப்போற்ஸவம் நடப்பது சந்தேகம்தான் என்றும் பக்தர்கள் பேசிக்கொள்கிறார்கள்’’ என்ற நாரதர்,

 ‘‘இது இப்படியென்றால் தேரோட்டத்துக்கான ஏற்பாடுகள் குறித்தும் பக்தர்கள் பெரிதும் குறைபட்டுக்கொள்கிறார்கள்’’ என்று கூறிவிட்டு அது பற்றியும் விவரித்தார்.

‘‘ஆழித்தேரில் தியாகராஜர் பவனி வருவதைத் தரிசிக்க பல ஊர்களில் இருந்தும் லட்சக்கணக்கான பக்தர்கள் வருவார்கள். ஆனால், அவர்களுக்கான போக்குவரத்து வசதி, கழிவறை வசதி போன்றவை இன்னும் முழுவீச்சில் செய்யப்படவில்லை. ஆழித்தேரோட்டம் நடக்க இன்னும் சில தினங்களே இருக்கும் நிலையில், பக்தர்களுக்கான வசதிகளைச் செய்வதில் கோயில் நிர்வாகம் இன்னும் மும்முரமாகச் செயல்பட வேண்டும் என்பது பக்தர்களது எதிர்்பார்ப்பு.

அதேபோல், திருவாரூர்க் கோயில் உலகப் பிரசித்தி பெற்றது. ஆண்டுதோறும் லட்சக்கணக் கான பக்தர்கள் வந்து செல்கின்றனர். ஆனால், கோயிலோ போதிய சுகாதாரம் இல்லாமல் காணப்படுகிறது. கோயிலில் உள்ள ஓவியங்களில் சுண்ணாம்பு தீட்டப்பட்டும், வரலாற்று பொக்கிஷமாகப் போற்றவேண்டிய கல்வெட்டு களில் துளையிட்டு தீயணைப்புக் கருவிகளைப் பொருத்தியும், கோயிலின் தொன்மையைச் சிதைக்கின்றனர்.

மனுநீதிச் சோழனின் கல்தேரும் சரியான பராமரிப்பு இல்லாத நிலையில் உள்ளது. கோயில் வளாகத்தில் உள்ள பூங்காவும்கூட போதிய பராமரிப்பு இல்லாமல் காய்ந்துபோய் இருக்கிறது’’ என்றார் வேதனையோடு.

‘‘சரி, இதுபற்றியெல்லாம் கோயில் நிர்வாகத் தரப்பில் ஏதும் பேசினீரா...’’

நாம் கேள்வியை முடிப்பதற்குள் நம்மை இடைமறித்தார் நாரதர்.

‘‘முயற்சி செய்தேன். உரிய அதிகாரிகள் பலரும் பிஸியாக இருந்ததால் அவர்களைத் தொடர்புகொள்ள முடியவில்லை. எனினும், வேறொரு தகவல் கிடைத்தது. ஆழித் தேரோட்டத்துக்கான ஏற்பாடுகளைப் பற்றி விவாதிக்க மாவட்ட ஆட்சியர் இல.நிர்மல்ராஜ் அனைத்துத் துறைகளின் அதிகாரிகள் கூட்டத்தைக் கூட்டியிருக்கிறார்.

அதில் பேசிய ஆட்சியர், தேரோடும் வீதிகளில் உள்ள ஆக்கிரமிப்புகளை அகற்றுவது குறித்தும், விழா பாதுகாப்பு ஏற்பாடுகள்  குறித்தும் அதிகாரிகளுக்குத் தனது அறிவுறுத்தல்களை வழங்கினாராம். அதேபோல், தேரோட்டத்துக்கு இரண்டு நாள்களுக்கு முன்பிருந்தே திருக்கோயில், திருக்குளம், நகரின் பிரதான இடங்களில் போதிய பாதுகாப்பு ஏற்பாடுகளைச் செய்யும்படி வலியுறுத்தியுள்ளாராம்.’’ என்ற நாரதரிடம்,    

நாரதர் உலா... - ஆனந்தம் தருமா ஆழித்தேரோட்டம்?

‘‘போக்குவரத்து மற்றும் பக்தர்களுக்குத் தேவை யான அடிப்படை வசதிகள் குறித்து எதுவும் தெரிவித்திருக்கிறாரா?’’ என்று கேட்டோம்.

‘‘வெளியூர்களில் இருந்து திருவாரூருக்குப் போதிய போக்குவரத்து வசதிகளை ஏற்படுத்துவ துடன்,  நகருக்குள் போக்குவரத்தை மாற்றி அமைப்பது குறித்தும் உரிய அதிகாரிகளிடம் பேசியிருக்கிறார். அத்துடன், தேர்ச்சக்கரங்களைச் சுற்றிப் பொதுமக்கள் வராமல் தடுக்க கயிறு வளையம் அமைக்கவும் அறிவுறுத்தியிருக்கிறார்.

மேலும், சுகாதாரமான குடிநீர், தேவையான இடங்களில் கழிவறை வசதிகளை ஏற்படுத்தவும் நகராட்சி நிர்வாகத்துக்கு உத்தரவிட்டுள்ளாராம். அதேபோல், மாவட்ட மருத்துவமனையில் இரவும் பகலும் எப்போதும் கூடுதலான எண்ணிக்கையில் மருத்துவர்களும் செவிலியர் களும் இருக்க வேண்டும் என்றும், மின்துறை தடையற்ற மின்சாரத்தை வழங்குவதற்கு ஏற்பாடு செய்ய வேண்டும் என்றும் ஆட்சியர் வலியுறுத்திய தாக போனில் பேசிய நண்பர் பகிர்ந்து கொண்டார்’’ என்று கூறி முடித்தார் நாரதர்.

‘‘நல்லது. எல்லாம் நல்லபடி நடந்துவிட்டால், ஆழித்தேரோட்டம் பக்தர்களுக்கு ஆனந்தம் தருவதாகத்தான் இருக்கும்’’ என்று நாம் சொல்லிக்கொண்டு இருக்கும்போதே, நாரதர் புறப்பட ஆயத்தமாகிவிட்டார்.

‘‘உம்மிடம் ஒன்றைச் சொல்ல மறந்துவிட்டேன். திருவாரூரில் இருந்து திரும்பும் வழியில் வேதாரண்யத்துக்குச் சென்று வந்தேன். வேதங்கள் மரங்களாக இருந்து வழிபட்ட அந்தத் தலத்தில் பக்தர்களுக்கு வேதனை தரும் விஷயங்கள் நிறைய. அதுபற்றி விசாரிக்க மீண்டும் ஒருமுறை அங்கு பயணப்பட வேண்டியிருக்கிறது. வரட்டுமா?’’ என்றபடியே விடைபெற்றுக் கொண்டார் நாரதர்.

படங்கள் : க.சதீஸ்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு