Published:Updated:

புரட்டாசியில் புண்ணிய தரிசனம்!

ஒட்டுமொத்த விகடனுக்கும் ஒரே ஷார்ட்கட்

Use App
புரட்டாசியில் புண்ணிய தரிசனம்!
புரட்டாசியில் புண்ணிய தரிசனம்!

புரட்டாசியில் புண்ணிய தரிசனம்!

பிரீமியம் ஸ்டோரி

சேனாதிபதி ஏற்பாடு செய்த பொங்கல் பிரசாதம்!

ஐந்து ஆழ்வார்களால் மங்களாசாசனம் செய்யப்பட்டதும், பஞ்சகிருஷ்ண க்ஷேத்திரங்களுள் ஒன்றானதும், கீழை வீடு என்று புகழப்பட்டதுமான பெருமாள் க்ஷேத்திரம் ‘திருக்கண்ணபுரம்’. இங்கு அருள்பாலிக்கும் பெருமாளின் திருப்பெயர் ஸ்ரீசௌரிராஜ பெருமாள்.

நாகை மாவட்டத்தில் உள்ள இந்தக் கோயிலில் தினமும் நள்ளிரவில் பெருமாளுக்கு சர்க்கரைப் பொங்கல் நிவேதனம் செய்யப்படுகிறது. அந்த ஏற்பாட்டைச் செய்தவர் முனியதரையன் என்ற சேனாதிபதி. சோழ மன்னரிடம் பணிபுரிந்தவர். அதனால், அப்பொங்கல் “முனியதரன் பொங்கல்” என்ற பெயர் பெற்றது!

புரட்டாசியில் புண்ணிய தரிசனம்!

மோட்சம் அருளிய பெருமாள்...

ஸ்ரீயதிராஜர் திருமலையில் இருந்த காலம்.

ஒருநாள் தயிர் விற்கும் வயதான கிழவி ஒருத்தி, அவரைக் கண்டு ஆவலுடன் விரைந்து வந்து பணிந்து வணங்கினாள். பிறகு, தான் விற்பதற்காகக் கொண்டுவந்திருந்த தயிர் முழுவதையும் அங்கிருந்த ஸ்ரீவைஷ்ணவ தாசர்களுக்கு அன்புடன் வழங்கினாள்.

“சரியான நேரத்தில் தயிர் கொடுத்து எங்கள் தாகம் தணித்தாய். தயங்காமல் விலையைக் கூறு. கொடுத்து விடுகிறோம்” என்றார் ஒரு ஸ்ரீவைஷ்ணவ தாசர்.

அதற்கு அவள், “காசு வேண்டாம். மோட்சம் வேண்டும். கருணை காட்டுங்கள்” என்றதும், அதைக் கேட்ட ஸ்ரீயதிராஜர், “மோட்சமா? அதை வேங்கடவனிடம் வேண்டிக்கொள். அவர்தான் அதற்கு அதிகாரி” என்றார்.

“சுவாமி! அவர் பேச மாட்டார். ஒரு சீட்டு எழுதிக் கொடுங்கள். தாங்கள் இந்த உதவியைச் செய்தால் போதும்” என்றாள் கிழவி.

தன்னிடத்தே அந்த மூதாட்டி கொண்டிருந்த மனப்பூர்வமான நம்பிக்கையை எண்ணி வியந்த ஸ்ரீயதிராஜர், அவள் கோரியபடியே மோட்சம் அருளும்படி வேண்டி வேங்கடவனுக்கு விண்ணப்பம் எழுதி அவளிடம் கொடுத்தார். சீட்டைப் பெற்றுக்கொண்டு கோயிலுக்குச் சென்ற கிழவி அங்கிருந்த அர்ச்சகரிடம் கொடுத்து, ‘ஸ்ரீயதிராஜர் கொடுத்த சீட்டு’ என்று சொன்னாள். சீட்டைக் கையில் வாங்கிய அர்ச்சகர் ஆவலுடன் அதைப் படித்தார். மறுகணம் பெருமாளின் திருக்கரம் சீட்டைப் பற்றியது. ‘அவளுக்கு மோட்சம் அளித்தோம்’ என்ற குரல் அசரீரியாய் ஒலித்தது. மோர் வழங்கிய மூதாட்டி மோட்சம் அடைந்தாள்.

திருஷ்டிப் பொட்டு!

திருவிடந்தை தலத்தில் உற்சவர் ஸ்ரீநித்யகல்யாண பெருமாள், கோமளவல்லி தாயார் இருவருக்கும் இயற்கையிலேயே தாடையில் திருஷ்டி பொட்டு அமைந்துள்ளது. பெருமாளையும் தாயாரையும் மனமுருகி வேண்டுபவர்களின் திருஷ்டிகள் நீங்குகின்றன என்பது நம்பிக்கை.

மூன்று வாசல் தரிசனம்!

ஸ்ரீதிருவட்டாறு திவ்விய தேசத்தில் சயனக்கோலத்தில் இருக்கும் பெருமாளை மூன்று வாசல்கள் வழியாக தரிசிக்க வேண்டும். முதல் வாசல் வழியாக சிரசையும், இரண்டாம் வாசல் வழியாக சரீரத்தையும், மூன்றாவது வாசல் வழியாக பாதத்தையும் தரிசிக்கலாம்.

ஆழ்வார்களும் அவதாரச் சந்நிதிகளும்!

பொய்கையாழ்வார் -  ஸ்ரீகாஞ்சி யதோக்தகாரி
பூதத்தாழ்வார் - திருக்கடல்மல்லை
பேயாழ்வார் - மயிலை
திருமழிசை ஆழ்வார் - திருமழிசை
குலசேகர ஆழ்வார் - மலைநாடு
பெரியாழ்வார் - ஸ்ரீவில்லிபுத்தூர்
தொண்டரடிப்பொடி ஆழ்வார் - திருமண்டங்குடி
திருப்பாணாழ்வார் - உறையூர் நாச்சியார்
திருமங்கை ஆழ்வார் - திருவாலி திருநகர்
ஆண்டாள் - ஸ்ரீவில்லிபுத்தூர்

தொகுப்பு: க.புவனா

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு