Published:Updated:

சீரும் சிறப்புமாய் ஸ்ரீவாரி சேவை...

சீரும் சிறப்புமாய் ஸ்ரீவாரி சேவை...
பிரீமியம் ஸ்டோரி
சீரும் சிறப்புமாய் ஸ்ரீவாரி சேவை...

பிரேமா நாராயணன், படங்கள் : RSP Network

சீரும் சிறப்புமாய் ஸ்ரீவாரி சேவை...

பிரேமா நாராயணன், படங்கள் : RSP Network

Published:Updated:
சீரும் சிறப்புமாய் ஸ்ரீவாரி சேவை...
பிரீமியம் ஸ்டோரி
சீரும் சிறப்புமாய் ஸ்ரீவாரி சேவை...

இது பக்தர்களுக்கான பணிவிடை

திருப்பதி திருமலைக்குச் செல்பவர்கள் அங்கே ஆரஞ்சு வண்ணச் சீருடையில் பெண்களும், வெள்ளை நிறச் சீருடையில் ஆண்களும் கழுத்தில் ஆரஞ்சு வண்ண ஸ்கார்ஃபுடன் ஆங்காங்கே தன்னார்வப் பணியில் ஈடுபட்டிருப்பதைப் பார்த்திருக்கலாம். திருமலை முழுவதும் பக்தர்களின் காத்திருப்புக் கூடமாகட்டும், அன்னதானக் கூடமாகட்டும் அல்லது லட்டு பிரசாதம் வழங்கும் இடமாகட்டும்... எல்லா இடங்களிலும் இந்தத் தொண்டர்கள் நீக்கமற நிறைந்திருப்பார்கள். இந்தத் தன்னார்வலர்கள் செய்யும் தொண்டுக்கு, ‘ஸ்ரீவாரி சேவா’ என்று பெயர். 16 ஆண்டுகளுக்கு முன் இந்த சேவை தொடங்கப்பட்டது. தொடர்ந்து 15 வருடங்களாக திருப்பதி ஸ்ரீவாரி சேவைக்குத் தன்னார்வலர்களை ஒருங்கிணைத்து, குழுக்களாக அழைத்துச்சென்று வருபவர் சேலத்தைச் சேர்ந்த மகாலிங்கம். இதுவரை 178 குழுக்களை சேவைக்காகத் திருப்பதிக்கு அழைத்துச் சென்றிருக்கும் இவர், ஸ்ரீவாரி சேவை குறித்த தகவல்களையும் தன் அனுபவங்களையும் பகிர்ந்துகொண்டார்.

சீரும் சிறப்புமாய் ஸ்ரீவாரி சேவை...

“முதன்முதலில் இந்தச் சேவையைத் தொடங்கியது யார்?”

‘‘பிரபலத் திரைப்படத் தயாரிப்பாளரும் இயக்குநருமான மறைந்த ஏ.பி.நாகராஜன்தான் பெரும் முயற்சி எடுத்து, திருப்பதியில் இச்சேவையைக் கொண்டுவந்தவர்.

ஒட்டுமொத்த விகடனுக்கும் ஒரே ஷார்ட்கட்!

சீரும் சிறப்புமாய் ஸ்ரீவாரி சேவை...

‘எல்லாக் கோயில்களிலும் ‘உழவாரப் பணி’ என்ற பெயரில் பொதுமக்கள் தங்களால் இயன்ற சேவைகளைச் செய்கிறார்கள். ஆனால், லட்சக்கணக்கான பக்தர்கள் கூடும் திருப்பதியில் பொதுமக்கள் சேவை செய்ய வாய்ப்பே இல்லாமல் இருக்கிறதே!’ என்று சிந்தித்த ஏ.பி.நாகராஜன், தன்னுடைய அரும்பெரும் முயற்சியின் பலனாக திருப்பதியில் பொதுமக்கள் வந்து பக்தர்களுக்குத் தொண்டு செய்யும் அனுமதியைப் பெற்றார். அவரை அடுத்து சேலத்திலிருந்து, ‘குப்புலு’ என்பவருடைய குழு சென்றது. அதன்பின்னர், இந்தச் சேவையைப் பற்றித் தெரிந்துகொண்டு ஒவ்வொரு குழுவாக வரத் தொடங்கியது. ஏழுமலையானைத் தரிசிக்க வரும் ஒவ்வொரு பக்தரையும் பெருமாளாகவே பாவித்து, பெருமாளுக்கு சேவை செய்வது போலவே சேவை செய்ய வேண்டும் என்பது இதன் தாத்பர்யம். திருமலைக்கு வரும் ஒவ்வொரு பக்தரையும் ‘கோவிந்தா’ என்றுதான் அழைக்க வேண்டும்.’’

சீரும் சிறப்புமாய் ஸ்ரீவாரி சேவை...
சீரும் சிறப்புமாய் ஸ்ரீவாரி சேவை...

“ஓர் ஆண்டுக்கு எத்தனை பேர் இந்தச் சேவையில் ஈடுபடுகின்றனர்?”

‘‘ வருஷத்துக்குச் சுமார் ஒன்றரை லட்சம் பேர் இந்தச் சேவையில் ஈடுபடுகிறார்கள். திருமலை திருப்பதி தேவஸ்தானத்தின் மக்கள் தொடர்பு அலுவலர்தான் ஸ்ரீவாரி சேவைக்கான துறைத் தலைவர். அவர்தான் சேவைக்கு வருபவர்களின் விண்ணப்பங்களைப் பரிசீலித்து, அனுமதி வழங்குகிறார். திருமலை திருப்பதி மற்றும் இந்தியாவில் திருப்பதி தேவஸ்தானத்தைச் சேர்ந்த கோயில்கள் எங்கெல்லாம் இருக்கிறதோ, அங்கெல்லாம் பணியாற்றும் தேவஸ்தானத்தின் ஊழியர்கள் 14,500 பேரைத் தவிர்த்து, ஆயிரக்கணக் கான தன்னார்வலர்களும் கோயில் பணிகளை உற்சாகமாகச் செய்கிறார்கள்.’’

“ஸ்ரீவாரி சேவைக்கு எல்லோரும் விண்ணப் பிக்க முடியுமா? அதற்கான தகுதி என்ன”

‘‘ஸ்ரீவாரி சேவை மூன்று வகைப்பட்டது. பொது சேவை, லட்டு பிரசாத சேவை மற்றும் பரக்காமணி சேவை (உண்டியல் பணம் எண்ணும் பணி). பொது சேவைக்கு, சாதாரணமாகப் பொதுமக்கள் எல்லோரும் விண்ணப்பிக்கலாம். லட்டு பிரசாத சேவைக்கு அரசு அலுவலர்கள் மட்டுமே விண்ணப்பிக்க முடியும். அதேபோல, பரக்காமணி சேவைக்கு விண்ணப்பிக்க, அரசுடைமையாக்கப் பட்ட வங்கிகள், எல்.ஐ.சி. நிறுவனங்கள், போர்டு நிறுவனங்கள் மற்றும் அரசு அலுவலகங்களில் பணியாற்றும் ஊழியர்களே தகுதி பெற்றவர்கள்.’’

சீரும் சிறப்புமாய் ஸ்ரீவாரி சேவை...

“சேவை செய்ய விரும்புபவர்கள் எப்படி விண்ணப்பிக்க வேண்டும்?”

‘‘நல்ல உடல், மனம் ஆரோக்கியமாக உள்ள, 18 வயது முதல் 60 வயது வரையிலான ஆண், பெண் அனைவருமே விண்ணப்பிக்கலாம். லட்டு பிரசாத சேவைக்கு 18 வயது முதல் 60 வயது வரை உள்ள அரசு அலுவலர்கள் விண்ணப்பிக்கலாம். குறைந்தபட்சம் பத்து பேர்கொண்ட குழுவாகத்தான் அனுமதிக்கப்படுவார்கள்.

ஸ்ரீவாரி சேவைக்கான விண்ணப்பம், தேவஸ்தானத்தின் இணையதளத்திலேயே இருக்கிறது. பதிவிறக்கம் செய்துகொள்ளலாம். அல்லது பத்து பேர்கொண்ட குழுவாக சேவை செய்ய விருப்பம் தெரிவித்து மக்கள் தொடர்பு அதிகாரிக்குக் கடிதம் எழுத வேண்டும். எந்தத் தேதிகளில் அவர்கள் சேவை செய்ய விரும்புகிறார்கள் என்பதையும் குறிப்பிட வேண்டும். அவர்களுக்கு தேவஸ்தான பி.ஆர்.ஓ. அலுவலகத் திலிருந்து, விண்ணப்பங்களையும் விதிமுறைகளையும் அனுப்பிவைப்பார்கள்.  அந்த விண்ணப்பத்தைக் குழுவிலுள்ள ஒவ்வொருவரும் பூர்த்திசெய்து, பாஸ்போர்ட் சைஸ் புகைப்படம் மற்றும் ஆதார் கார்டு நகல் இணைத்து மீண்டும் அனுப்பி வைக்க வேண்டும். அவர்களுக்கு அனுமதியளித்து, பின்னர் ‘ஆர்டர்’ அனுப்பி வைக்கப்படுகிறது.

குறிப்பிட்ட தேதியில் குழுவினர் வந்து பி.ஆர்.ஓ. அலுவலகத்தில் ‘ரிப்போர்ட்’ செய்துவிட்டு அவர்கள் வழங்கும் ஆணைப்படி சேவையைத் தொடங்கலாம். இதற்குக் கட்டணம் எதுவும் இல்லை.’’

சீரும் சிறப்புமாய் ஸ்ரீவாரி சேவை...

“விண்ணப்பதாரர்களுக்கு ஏதேனும் விதி முறைகள் உண்டா?”

‘‘கண்டிப்பாக 18 வயதிலிருந்து 60 வயதுக்குள் இருக்க வேண்டும். உடல் குறைபாடு மற்றும் மனநலக் குறைபாடு இருக்கக் கூடாது. நீண்டநாள் நோய் அல்லது தீவிர நோய் இருப்பவர்கள் அனுமதிக்கப்பட மாட்டார்கள். குழந்தைகளை அழைத்துவரக் கூடாது. சேவை செய்ய வரும் தன்னார்வலர்கள், தேவஸ்தானம் ஒதுக்கும் விடுதிகளில் மட்டுமே தங்க வேண்டும். ஆண்கள் வெள்ளை நிற பைஜாமா, குர்தா அணிய வேண்டும். பெண்கள் மெரூன் கரையிட்ட ஆரஞ்சு வண்ணப் புடவை, மெரூன் வண்ண ரவிக்கை அணிய வேண்டும். அல்லது ஆரஞ்சு நிறத்தில் சுடிதாரும் மெரூன் நிறத்தில் துப்பட்டாவும் அணிய வேண்டும். ஊர்களிலிருந்து வந்து இறங்கும் சேவை குழுவினர், பி.ஆர்.ஓ அலுவலகத் துக்கு வந்ததும் அவர்களுக்கு தேவஸ்தானத்தின் முத்திரை அச்சிடப்பட்ட ஆரஞ்சு வண்ண ஸ்கார்ஃபும், புகைப்படத்துடன் கூடிய அடையாள அட்டையும் வழங்கப்படும். பிறகு அவர்களுக்கான விடுதி அறையில் (ஆண்கள், பெண்களுக்குத் தனித்தனியே விடுதிகள் உள்ளன) உள்ள பொருள்கள் வைக்கும் லாக்கர்களுக்கான சாவிகள் வழங்கப்படுகின்றன. விடுதிகளில் லாக்கர்கள், படுப்பதற்கான பெரிய கூடம், குளியலறைகள், கழிப்பறை வசதியுடன் சுத்திகரிக்கப்பட்ட குடிநீர் மற்றும் குளிக்க வெந்நீர் வசதியும் உண்டு.

விடுதிக்குச் சென்று லாக்கர்களில் தம்முடைய உடைமைகளை வைத்த பிறகு, சீருடையை மாற்றிக்கொண்டு, சேவைக்குக் கிளம்பலாம். இவர்களுக்கான உணவை அன்னதான பிரசாதக் கூடத்தில் சாப்பிட்டுக்கொள்ளலாம்.

சேவை செய்ய தேவஸ்தானம் அனுமதிக்கும் காலம், ஒரு வாரம். எட்டாவது நாள் கோயிலுக்குள் அதிகாரபூர்வமாக அழைத்துச்சென்று தரிசனம் செய்ய வைப்பார்கள். பிறகு விடுதியைக் காலி செய்து, ஸ்கார்ஃப்களை மீண்டும் ஒப்படைத்து விட்டுக் கிளம்ப வேண்டும். 

சீரும் சிறப்புமாய் ஸ்ரீவாரி சேவை...
சீரும் சிறப்புமாய் ஸ்ரீவாரி சேவை...

தினசரி 6 மணி நேரம் சேவை (ஒரு ஷிஃப்ட்) செய்ய வேண்டும். சில நேரங்களில் முழு நாள் பணி (2 ஷிஃப்ட்) வரும். லட்டு பிரசாத சேவை, 64 கவுன்ட்டர்களில், 4 ஷிஃப்ட்டாக இருக்கும். ஒவ்வொரு ஷிஃப்டும் 6 மணி நேரம். உண்டியல் பணம் எண்ணும் பரக்காமணி சேவையும் தினசரி 4 ஷிஃப்ட் இருக்கும். தினசரி எங்கே, எந்த இடத்தில், என்ன சேவை என்பது பி.ஆர்.ஓ அலுவலகத்தில் அட்டவணை இட்டு ஒதுக்கீடு செய்வார்கள்.’’

சீரும் சிறப்புமாய் ஸ்ரீவாரி சேவை...

தமிழ்நாடு மற்றும் ஆந்திராவிலிருந்து பெரும் பாலான மக்கள் வருகிறார்கள். மேலும் கேரளா, மகாராஷ்டிரம், மத்தியப்பிரதேசம் போன்ற மாநிலங்களிலிருந்தும் இந்த சேவைக்கென பக்தர்கள் வருகிறார்கள். எனினும் சேவை செய்யும் நாள்களில் அவர்கள், இனம், மொழி, மாநிலம் என எந்த பேதமும் பார்ப்பதில்லை. அவர்களுக்குத் தெரிந்த ஒரே இடம், திருமலை; ஒரே இனம், மனித இனம்; ஒரே மொழி, ‘கோவிந்தா’ எனும் திருநாமம்தான்!

ஓம் நமோ நாராயணா!

‘ஆண்டவனின் பிரசாதத்தை   அன்போடு பரிமாறுவோம்!’

சிவகாசியிலிருந்து 15 வருடங்களாக ஸ்ரீவாரி சேவைக்குச் சென்று வருபவர் ஜீவரேகா. ‘‘முதன்முதலில் எங்க சொந்தக்காரங்களோடு சேர்ந்து போக ஆரம்பிச்சது, இப்போதுவரை வெற்றிகரமாகத் தொடர்ந்துகிட்டு இருக்கு. வருஷத்துக்கு நான்கு முறை போயிடுவேன். அங்கே, நமக்குக் கொடுக்கிற பணிகள் எதுவாக இருப்பினும் சந்தோஷமாகச் செய்வேன். என்றாலும் அன்னதானக் கூடத்தில் பரிமாறும் சேவை என்றால் அதீத சந்தோஷம் எனக்கு. பசியோடு வந்து உட்காரும் பக்தர்களுக்கு, ஆண்டவனின் பிரசாதத்தை அன்போடு பரிமாறும்போது கிடைக்கிற சந்தோஷத்துக்கு ஈடு இணை இல்லை! பிரம்மோற்சவம் மாதிரி அதிகமா கூட்டம் வரும் சமயமாக இல்லாமல், கூட்டம் இல்லாமல் கொஞ்சம் ஃப்ரீயாக இருக்கும் நாள்களில் சேவைக்குப் போகத்தான் நான் விரும்புவேன். ஏன்னா, அப்போ வாலன்டியர்ஸ் ரொம்ப வர மாட்டாங்க. அப்போதான் வேலைக்கு ஆட்கள் அதிகமாகத் தேவைப்படுவாங்க. ஆண்டவனுடைய அடியார்களுக்குச் சேவை செய்றது அவருக்கே செய்ற மாதிரி. அதனால்தான் எங்களை எந்தக் குறையுமில்லாம வெச்சிருக்கார்!’’ என்கிறார் ஜீவரேகா.

`பெருமாள் சேவையே கதி!'

சேலத்திலிருந்து பத்தாண்டுகளாக சேவை செய்வதற்கென திருமலைக்குச் செல்பவர் பிரபாவதி. ‘‘என் பிள்ளைங்க ரெண்டு பேருக்கும் கல்யாணமாகிட்டதால், நான் இப்போ ஃப்ரீ. வருஷத்துக்கு இரண்டு, மூன்று முறை ஸ்ரீவாரி சேவைக்குப் போயிடுவேன். மலைக்குப் போய்ட்டோம்னா, வீடு, பிள்ளைகள்னு எந்த எண்ணமும் தோணாது. சேவைக்குனு போய்ட்டா, எனக்கு வயசெல்லாம் மறந்துடும். ஓடியாடி வேலை செய்றதுக்கு அவ்ளோ உற்சாகமாக இருக்கும். அது என்ன அதிசயம்னே தெரியலை!’’ என்று பிரமிக்கிறார் பிரபாவதி.

`வேங்கடவன் கொடுத்த வாய்ப்பு!'

‘‘ஸ்ரீவாரி சேவையில் கிடைக்கும் மன நிறைவையும் ஆத்ம திருப்தியையும் வார்த்தைகளில் சொல்ல முடியாது. ஒரு தடவையாவது போய் வந்தால்தான், அதன் மகத்துவம் புரியும். அதிகாலை டியூட்டி போட்டால், நடுங்குற குளிரில் குளிச்சிட்டு, யூனிஃபார்மும் ஐடி கார்டும் போட்டு, சேவா ஸ்கார்ஃப் கட்டினதுமே நமக்கு ஒரு கம்பீரமும் உற்சாகமும் வந்துடும். நாள் முழுவதும் நடந்துக்கிட்டே இருக்கறதால உடலுக்கு நல்ல பயிற்சி; முழுக்க முழுக்க ஆண்டவன் சேவையில் இருக்கிறதால் மனசுக்கும் நல்ல நிம்மதி!’’ என்று விவரிக்கும் மதுரையைச் சேர்ந்த உமா பாண்டியன், தனக்குக் கிடைத்த பேற்றினை பரவசத்தோடு பகிர்ந்துகொண்டார். ``முதல் வருஷம் சேவைக்குப் போனபோதே, எனக்கு அருமையான ஒரு வாய்ப்பை வேங்கடவன் கொடுத்தார். எங்கக் குழுவுக்கு ஏகாந்த சேவை சமயத்தில் கோயிலின் முகத்துவாரத்தில் நிற்கும் டியூட்டி போட்டாங்க. ராத்திரி 8 மணியிலிருந்து 2 மணி வரைக்கும் டியூட்டி. சரியாக ஒரு மணிக்குக் கோயிலின் உள்ளே இருக்கும் பக்தர்கள் எல்லாரையும் வெளியே அனுப்பிட்டு, கதவுகளை மூடிட்டாங்க. அர்ச்சகர்கள், அலுவலர்கள், சேவகிகள் மட்டும் சந்நிதியில் இருந்தோம். அப்படி ஓர் ஏகாந்தம்... அமைதி. நாகஸ்வர வித்வான்கள் பெருமாளைத் தூங்கவைக்க நாதஸ்வரம் இசைக்க, ஆரத்தி காட்டினாங்க. ஆரத்தி முடிந்ததும் சுவாமிக்கு நைவேத்தியம் பண்ணின பாலும், பழமும் பிரசாதமாகத் தந்தாங்க. மெய்சிலிர்த்துப் போச்சு. வாழ்வில் மறக்க முடியாத அனுபவம் அது. ஆண்டுதோறும் வந்து சேவை செய்யும் வாய்ப்பை கோவிந்தன் கொடுக்கணும்!’’

ஸ்ரீவாரி சேவையில் ஈடுபடுபவர்களுக்கான பணிகள்

* சுவாமியைப் பார்ப்பதற்காக வரும் கூட்டத்தைச் சீர்படுத்துதல்.

திருமலையில் இடம் தெரியாமல் தடுமாறும் பக்தர்களுக்குச் சரியானபடி வழிகாட்டுதல்.

விசேஷ தினங்களிலும் பண்டிகை நாள்களிலும், பக்தர்கள் காத்திருக்கும் 31 கம்பார்ட்மென்ட்களையும் தாண்டி, வெளியே வரிசையில் நிற்பவர்களுக்கு அவர்களின் இடத்துக்கே சென்று, உணவு, பால், தண்ணீர் வழங்குதல்.

அன்னதானக் கூடத்தில்  உணவு பரிமாறுதல்.

பிரசாதக் கூட்டத்தை ஒழுங்குபடுத்துதல்.

ஏழு நாள்களில் ஒரு நாள் மட்டும் கோயிலுக்குள் டியூட்டி போடப்படும். கோயிலுக்குள் கூட்டத்தை ஒழுங்குபடுத்துதல், உண்டியல் அருகிலும் தீர்த்தம் கொடுக்கும் இடத்திலும் மக்களை வரிசையில் செல்லவைத்தல். ஏழுமலையான் சந்நிதிக்கு முன்பாக பக்தர்களை வேகமாக நகரவைத்தல் (ஜருகண்டி) போன்ற பணிகளைத் தன்னார்வலர்கள் செய்வார்கள்.

உணவு சமைக்கும் இடத்தில் காய்கறிகளை வெட்டுதல்.

ஒவ்வொரு பவுர்ணமி அன்றும் மலையில் நடைபெறும் கருட சேவையின்போது, நான்கு மாட வீதிகளிலும் கூட்டத்தைச் சீர்படுத்தி, உணவு, தண்ணீர் வழங்குதல்.

பிரம்மோற்சவத்தின்போது ஒன்பது நாள்களும் காலையிலும் மாலையிலும் சுவாமி வாகனங்களில் வலம்வரும்போது பக்தர்களுக்கு உணவு, தண்ணீர் வழங்குதல்.

பாத யாத்திரையாக மலையேறி வரும் பக்தர்களுக்குத் தண்ணீர், உணவு மற்றும் குழந்தைகளுக்குப் பால் வழங்குதல்.

தேவஸ்தான அலுவலர்களுக்கான கேன்டீனில் ஊழியர்களுக்கு உணவு பரிமாறுதல்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism