Published:Updated:

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்
பிரீமியம் ஸ்டோரி
குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

டாக்டர் ஜெயம் கண்ணன் - படம்: கே.குணசீலன்

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

டாக்டர் ஜெயம் கண்ணன் - படம்: கே.குணசீலன்

Published:Updated:
குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்
பிரீமியம் ஸ்டோரி
குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

‘குறை தீர்க்கும் கோயில்கள்’ தொடரில் இதுவரையில் நாம் தரிசித்தவை எல்லாமே சிவாலயங்கள். முதல் முறையாக, பெருமாள் திருத் தலத்தை தரிசிக்கப் போகிறோம். கும்பகோணத்துக்கு அருகில் இருக்கும் திருக்கூடலூர் என்கிற ஆடுதுறையில் (சீர்காழிக்கு அருகே இருப்பது வேறு ஆடுதுறை)  அருள்பாலிக்கும் அருள்மிகு வையம் காத்த பெருமாளின் மகிமை பல நூற்றாண்டுகளைக் கடந்தது.

108 திவ்யதேசங்களில் 8-ம் இடத்தில் இருக்கும் பெருமை பெற்றது. மதுரை நகருக்கும் கூடலூர் என்ற பெயர் வழங்கப்படுவதால், இத்தலம் ‘வட திருக்கூடலூர்’ என்றும் ‘சங்கம க்ஷேத்ரம்’ என்றும் வழங்கப்படுகிறது.

மிகச் சிறிய கிராமம்...  மிகச் சிறிய கோயில். ஆனால் இதன் கீர்த்தியோ அளவிடற்கரியது. அண்டமே கண்டு நடுங்கும் துர்வாச முனிவரையும் அடிபணிய வைத்த பராக்கிரமம் கொண்டவர் இந்தப் பெருமாள். வடமொழியில் ஜகத்ரட்சகன் என்று அழைக்கப்படுகிறார்.

இத்திருத்தலத்தின் மகிமை பற்றியும் தல புராணம் பற்றியும் விரிவாகப் பேசினார், கோயிலின் மூத்த அர்ச்சகர் கஸ்தூரி ரங்கன் பட்டாச்சார்யர்.

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

‘‘பெருமாளின் வராக அவதாரத்துக்கு முன்னால் தோன்றிய கோயில் இது. ஒரு முறை இரண்யாட் சகன் என்ற அசுரன், பூமாதேவியை ஏழு சமுத்திரங் களுக்கும் கீழே அதல பாதாளத்தில் கொண்டு போய் வைத்துவிட, சிவபெருமான் உட்பட முப்பத்து முக்கோடி தேவர்களும் வந்து பெருமாளி டம் முறையிட்டார்களாம். பூலோகத்தைக் காப்பதற்காக, வராக அவதாரம் எடுத்த பெருமாள், இங்கே ஆடுதுறையில் மண்ணுக்குள்ளே தோண்டிப் புகுந்து, ஸ்ரீமுஷ்ணத்தில் பூமாதேவி யுடன் வெளிப்பட்டதாக புராணங்கள் சொல் கின்றன.  வையகத்தை மீட்டுக் கொண்டு வந்தவர் என்பதால், இத்தலத்தில் ‘வையம் காத்த பெருமாள்’ என்று  அவர் அழைக்கப்படுகிறார். இரண்யாட் சகனை அழிப்பதற்கு பிரம்ம பிரயத்தனம் மேற்கொண்ட முப்பத்து முக்கோடி தேவர்களும் இங்கே ஆலோசித்ததால், இத்திருத்தலம் ‘திருக்கூடல்’ என்றும் வழங்கப்படுகிறது’’ என்று விவரித்தார் பட்டர்.

இப்புராணச் சம்பவத்தை, ‘கூற்றே ருருவின் குறளாய் நிலநீர் ஏற்றா னெந்தை பெருமானூர்போல்’ என்ற திருமங்கையாழ்வாரின் பாசுர வரிகள் விவரிக்கின்றன. மகாவிஷ்ணு ஸ்ரீமுஷ்ணத்தில் பூமிதேவியுடன் வெளிப்பட்டார் என்றாலும், திருமங்கையாழ்வார் அந்த முயற்சியின் முதல் கட்டம் செயல்படுத்தப்பட்ட இந்தத் தலத்தையே பாடியிருக்கிறார் என்பது இங்கே குறிப்பிடத்தக்கது.

ஒட்டுமொத்த விகடனுக்கும் ஒரே ஷார்ட்கட்!

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்


அதாவது, எந்த ஒரு செயல் வெற்றி பெறவேண்டு மென்றாலும், எடுத்து  வைக்கும் முதல் அடிதான் ஆதாரம் என்ற யதார்த்தத்தை உணர்த்தும், அந்த முதல் ‘அடி’யை ‘புகுந்தானூர்’ என்று சொல்லிப் போற்றும் பாசுரம் இது.

‘‘இத்தலத்தில் பெருமாளின் சங்கு, சக்கரம் இரண்டுமே பிரத்யட்சமாகக் காட்சி தருகின்றன. பெருமாள் கையில் இருக்கும் பிரயோக சக்கரமும், பலா மரத்தில் வெளிப்பட்டுள்ள  சங்கு வடிவமும் இங்கே  மிகவும் விசேஷமானவை’’ என்று கூறிய பட்டர், அதற்கான புராணச் சிறப்பையும் விளக்கினார்.

‘‘முற்காலத்தில் இங்கே ஆட்சி புரிந்த அம்பரீச மகாராஜா, பெருமாளிடம் மிகுந்த பக்தி கொண்டவர். மாதந் தோறும் ஏகாதசி விரதம் இருப்பார். அவருடைய பக்தியிலும் விரதத்திலும் அகமகிழ்ந்த பகவான், அவருக்கு நேரே பிரத்யட்சமாகி ‘என்ன வரம் வேண்டும்?’ என்று கேட்க, இதேபோல எப்போதும் விரதம் இருக்கும் ஆன்மபலத்தையும் மனோசக்தியையும் கேட்டாராம் அம்பரீச ராஜா.

இதைக் கண்டு பொறாமையடைந்த துர்வாச முனிவர், அவருடைய விரதத்தைக் கலைக்கும் முடிவோடு, துவாதசி தினத்தில் மன்னர் விரதம் முடிக்கும் தறுவாயில் வந்து, விரதத்தை முடிக்கவிடாமல்  இடையூறு ஏற்படுத்தியிருக்கிறார்.

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

தன் பக்தனுக்குத் துன்பம் விளைவிக்கும் துர்வாசரைக் கண்டு வெகுண்ட பெருமாள், தன் கையிலிருந்த சக்கரத்தை அவர் மீது ஏவ, மிரண்டுபோன துர்வாசர், தன் ஆணவம், கோபம் அடங்கி, பெருமாள் பாதங்களில் பணிந்தார் என்கிறது புராணம். ஏகாதசி விரதத்தின் மகிமைக்கும் இச் சம்பவம் ஓர் உதாரணம். பெருமாள் ஏவிய சக்கரம்தான் இங்கிருக்கிறது என்று ஒரு நம்பிக்கை. அதுதான் ‘பிரயோக சக்கரம்’ என்று அழைக்கப்படுகிறது.

இக்கோயிலின் தல விருட்சம் பலா மரம்.  2003-ம் வருஷம் கோயில் சம்ரோக்ஷணம் சமயத்தில் மரத்தைப் பராமரிக்கிற போதுதான், அதில் தத்ரூபமாக சங்கு வடிவம் வெளிப் பட்டிருந்ததைக் கவனித்தோம். சாட்சாத் பெருமாளே தல விருட்சத்தில் தோன்றி அனுக்கிரகம் செய்வதாக எண்ணி சேவார்த்திகள் எல்லோரும் மெய்சிலிர்த்தோம். இப்போதும் அந்த சங்கு ரூபத்துக்கு மஞ்சள் காப்பு செய்து, மலர் தூவி பக்தர்கள் வழிபடுகின்றனர்’’ என்று பட்டர் விவரிக்க, நாமும் அந்த சங்கு வடிவத்தைக் கண்டோம்.  நமக்கு மேலே ஒரு சக்தி இருக்கிறது என்பதைக் கண்கூடாகக் கண்டுணர்ந்த தருணங்களில் அதுவும் ஒன்று.கோயிலின் தீர்த்தமாக சக்கர தீர்த்தம் என்ற புஷ்கரணியும் காவிரி நதியும் உள்ளன.

பூவராகப் பெருமாள்

பெரிய மதில் சுவருடன் கூடிய பிராகாரத்துடன் அமைந் திருக்கும் கோயிலின் முகப்பில் ஐந்து நிலை ராஜகோபுரம் உள்ளது.  கோயில் கோபுரத்தில் தசாவதாரச் சிற்பங்கள் காணப்படுகின்றன. கோபுரத்தைக் கடந்து உள்ளே சென்றால், எதிரே மண்டபத்தில் இடது பக்கத்தில் சக்கரத்தாழ்வார் வடக்கு நோக்கி தரிசனம் தருகிறார். சக்கரத்தாழ்வாருக்குப் பின்னால் யோக நரசிம்மர் அருளாசி வழங்குகிறார். மண்டபத்தில் வலது பக்கத்தில் பூவராகப் பெருமாள் காட்சி தருகிறார். பூமித் தாயாரை மீட்கும் முயற்சியில், இந்தத் தலத்தில்தான் முதல் அடி எடுத்து வைத்த கம்பீரம் அந்தச் சுதைச் சிற்பத்தில் வண்ணமயமாக விளங்குகிறது. அவர் மடியில் பூமித் தாயார்.

கருவறை மண்டபத்தில் வலது பக்கம்  விஷ்வக்சேனர், ஸ்ரீதேவி பூதேவி சமேதராக வரதராஜப் பெருமாள் ஆகியோரும், பிராகாரச் சுற்றில் பிள்ளை லோகாச்சார்யார், ஆளவந்தார், மணவாள மாமுனிகள், ராமாநுஜர், திருமங்கையாழ்வார் ஆகியோரும் தனித்தனி சந்நிதிகளை அலங்கரிக்கிறார்கள். தாயார் சந்நிதி யில் மூலவராக பத்மாசினி தாயார், உற்சவராக புஷ்பவல்லித் தாயார் ஆகியோர் தனித்தனியே அருள்பாலிப்பது சிறப்பு.

பிராகாரத்தில் தனிச் சந்நிதியில் ஆண்டாள் அருள்பாலிக்கிறார். மூலவர் வையங்காத்த பெருமாள் (ஜகத்ரட்சகன்), நின்ற கோலத்தில் சேவை சாதிக்கிறார். இவருக்கு முன்னால் வராஹர். உற்சவரும்  வையங்காத்த பெருமாளே. இவர் பிரயோக சக்கரத்தைக் கையிலேந்தியிருக் கிறார்.
தம்பதி ஒற்றுமைக்குப் பிரார்த்தனை...

குறை தீர்க்கும் கோயில்கள் - 17 - பாவ விமோசனம் அருளும் திருக்கூடலூர் பெருமாள்

நந்தக முனிவரின் மகளான உஷை மீது, அவள் கணவனும் சந்திரகுல மன்னனுமான விஸ்வஜித் சந்தேகம் கொண்டு, அவளை வீட்டை  விட்டு விரட்டிவிட்டான். அந்தப் பெண்பாவத்தால் செல்வம் அழிந்து, தொழுநோயும் பீடிக்க, மனைவிக்குச் செய்த துரோகத்துக்குப் பிராயச் சித்தம் செய்ய அவளைத் தேடிப் போனான். அவன்  துயரைக் கண்ட துறவி ஒருவர், ‘`நீ திருக்கூடலூர் எம்பெருமானை வணங்கு; உன் மனைவி உன்னைச் சேருவாள்’' என்று ஆறுதல் அளித்தார். அதன்படியே அவன் பெருமாளின் பாதம் பற்ற, விரைவில் தன் நோய் நீங்கியதோடு, மனைவியையும் அடைந்து மகிழ்ந்தான். அதற்கு நன்றிக்கடனாக, பெருமாளுக்குத் தேர் ஒன்றைச் செய்து கொடுத்ததாகவும் கூறப்படுகிறது.

கருத்து வேறுபாடுகளால் பிரிந்திருக்கும் கணவன் மனைவி சேர்வதற்கான பிரார்த்தனைத் தலம் இது. தொடர்ந்து 16 நாள்கள், ஸ்ரீஜகத்ரட்சகப் பெருமாளுக்கு வெண்ணெய், கல்கண்டு நைவேத் தியம் செய்து, வெள்ளை மலர்களால் (மல்லிகை, முல்லை) அர்ச்சனை செய்து, நம்பிக்கையோடு பிரார்த்தனை செய்தால் பிரிந்த தம்பதியர் ஒன்று சேர்வர். இருவருக்குமிடையில் அந்நியோன்யம் தழைக்கும்.

நிவேதனம் செய்த வெண்ணெயையும், கல்கண்டையும் கோயிலுக்கு வரும் குழந்தைகளுக்கு விநியோகிக்கலாம். தம்பதியருக்குள் மன ஒற்றுமை ஏற்பட்டு அவர்கள் மீண்டும் இணைவது, இப்போதும் நடந்துவருகிறது. இந்தப் பரிகாரத்தை இவர்கள் வாரம் ஒருநாள் வீதம் பதினாறு வாரங்களுக்கு மேற்கொள்கிறார்கள். இதற்குச் சாட்சியாக இங்கே வழிபட்டு, 186 தம்பதிகள் சேர்ந்திருப்பதாக பட்டர் கூறினார். என்னே பெருமாளின் சக்தி!

அதேபோல, இக்கோயிலின் வடக்கு நோக்கிய சக்கரத்தாழ்வாரை செவ்வாய்க்கிழமைகளில் 16 நெய் தீபங்கள் ஏற்றி, வெள்ளை நிற வஸ்திரம் சாத்தி, வெள்ளை நிற  மலர்களால் அர்ச்சித்து, தயிர்சாதம் நைவேத்தியம் செய்து வழிபட்டால் கடன் தொல்லைகளிலிருந்து விரைவில் நிவாரணம் பெறலாம்; நஷ்டத்தில்  இயங்கும் தொழில் விருத்தியடைந்து லாபம் கொழிக்கும் என்கிறார்கள்.

அது மட்டுமல்ல; இங்கே 16 தினங்கள் பிரார்த் தனை, அர்ச்சனை செய்தால் நினைத்தகாரியங்கள் தடையில்லாமல் நிறைவேறும். தொழிலில் மேம்பாடு, வேலைவாய்ப்பு, தடைப்படும் திருமணம் என பிரார்த்தனை எதுவாக இருந் தாலும் அதை நடத்தி வைக்கிறார், வையகத்தைக் காத்து வாழவைக்கும் இந்த ஆடுதுறை பெருமாள்

எப்படிச் செல்வது?

கும்பகோணத்திலிருந்து திருவையாறு செல்லும் வழித்தடத்தில், கும்பகோணத்திலிருந்து சுமார் 23 கி.மீ தூரத்திலும், திருவையாற்றிலிருந்து 10 கி.மீ தூரத்திலும் உள்ளது இந்தத் தலம்.

நடை திறக்கும் நேரம்: காலை 8.30 முதல் பகல் 12 மணி வரை; மாலை 4.30 மணி முதல் இரவு 8 மணி வரை.

- தரிசிப்போம்...

தொகுப்பு: பிரேமா நாராயணன்

துரை திருக்கூடல் கோயில், பாண்டிய மன்னர்களின் பெருமைக்குரியதாகப் போற்றப்படுவதுபோல, தஞ்சை திருக்கூடலும், பாண்டிய அரசியின் முயற்சியால் உருவானதுதான். காவிரியில் பெருவெள்ளம் உண்டான போது, திருக்கூடல் பெருமாள் கோயிலை தனக்குள்ளேயே அமிழ்த்திக்கொண்டது. ஆனால், கோயில்  விக்கிரகங்கள் மட்டும் வெள்ளத்தில் அடித்துச் செல்லப்பட்டன. பெருமாளின் அருளால், அந்த விக்கிரகங்கள் மீனவர் வலைக்குள் சிக்கி, அவர்களால் அன்போடு வழிபடப்பட்டு வந்தன. நீருக்குள் மூழ்கிய கோயில், நாளாவட்டத்தில் மண்ணுக்குள்ளே புதைந்துபோனது. இப்படி மணல் மேடிட்டு மறைத்த பகுதி, இப்போதும், ‘பெருமாள் பொட்டல்’ என்றழைக்கப்படுகிறது. தற்போதைய கோயிலில் இருந்து 2 கி.மீ. தொலைவில் உள்ளது இந்தப் பொட்டல்.

ராணி மங்கம்மாளின் கனவில் தோன்றிய பெருமாள், தான் இருக்கும் இடத்தை அரசிக்கு உணர்த்தி, தனக்குக் காவிரிக் கரையில் கோயில் கட்டுமாறு ஆணையிட்டார். தன் பரிவாரங்களுடன் பெருமாளைத் தேடிச் சென்ற ராணி மங்கம்மாள் அவர் மீனவர்களிடம் இருப்பதை அறிந்தார். பின்னர், கோயில் கட்ட இடம் தேடியபோது, தெய்விக ஒளியால் சுட்டிக்காட்டப்பட்ட இடத்தில் கட்டப்பட்ட கோயில்தான் இப்போது இருப்பது. இந்த வரலாற்று உண்மைக்குச் சான்றாக, இக்கோயில் மண்டபத் தூணில் அவரது சிலை வைக்கப்பட்டுள்ளது. காவிரி இவ்விடத்தில் திருமாலை வணங்கிப் பாவ விமோசனம் பெற்று, இழந்த பொலிவைத் திரும்பப் பெற்றதாக ஐதீகம். அம்பரீசன், திருமங்கையாழ்வார், பிரம்மா, கங்கை, யமுனை, சரஸ்வதி ஆகியோர்  பெருமாளின் தரிசனம் பெற்று வழிபட்ட புண்ணியத் தலம் என்றும் கூறப்படுகிறது.