Published:Updated:

சப்த ராம திருத்தலங்கள் - திருவெள்ளியங்குடி

சப்த ராம திருத்தலங்கள் - திருவெள்ளியங்குடி
பிரீமியம் ஸ்டோரி
சப்த ராம திருத்தலங்கள் - திருவெள்ளியங்குடி

கண் பார்வை அருளும் கோலவில்லி ராமர்!தொகுப்பு: கே.குணசீலன் - படம்: செ.ராபர்ட்

சப்த ராம திருத்தலங்கள் - திருவெள்ளியங்குடி

கண் பார்வை அருளும் கோலவில்லி ராமர்!தொகுப்பு: கே.குணசீலன் - படம்: செ.ராபர்ட்

Published:Updated:
சப்த ராம திருத்தலங்கள் - திருவெள்ளியங்குடி
பிரீமியம் ஸ்டோரி
சப்த ராம திருத்தலங்கள் - திருவெள்ளியங்குடி

யோத்தி- ராமபிரானின் அவதார திருத்தலம். திரேதா யுகத்தில் கோசல தேசத்தின் தலைநகராகத் திகழ்ந்த ஊர். ராம பக்தர்கள் வாழ்வில் ஒருமுறையாவது தரிசிக்கத் துடிக்கும் க்ஷேத்திரம்.

உத்திரபிரதேச மாநிலம், பைசாபாத் மாவட்டத்தில் அமைந்துள்ள அயோத்தி முதலாக தமிழகத்தின் ஆறு தலங்களைச் சேர்த்து சப்தராம திருத்தலங்களாகச் சிறப்பிக்கின்றன ஞானநூல்கள். ராமநவமி சிறப்பு தரிசனமாக, தமிழகத்தின் அந்தத் திருத்தல மகிமைகள் இந்த இதழில்... 

சப்த ராம திருத்தலங்கள் - திருவெள்ளியங்குடி

திருவெள்ளியங்குடி கோலவில்லி ராமர், கண் பார்வைக் குறைபாடுகளை அகற்றும் கண்கண்ட தெய்வமாக அருள்கிறார். ஆதிகாலத்தில், ‘மயன்’ என்னும் அசுரகுலச் சிற்பியால் எழுப்பப்பட்ட இந்தக் கோயிலில், கோலவில்லி ராமர், மரகதவல்லித் தாயாருடன் எழுந்தருளியிருக்கிறார்.

பெருமாளின் திருக்கரங்களை அலங்கரிக்கும் சங்கும் சக்கரமும் இந்தத் தலத்தில் கருடாழ்வாரின் கரங்களில் இடம்பெற்றிருக்கின்றன. மேலும், கருடன் நின்ற நிலையிலும் இல்லாமல், அமர்ந்த நிலையிலும் இல்லாமல், ஒரு காலை மண்டியிட்டு, மற்றொன்றை குத்துக்காலிட்டபடி அமர்ந்திருப் பார். இதன் பின்னணியில் ஒரு சம்பவம் சொல்லப்படுகிறது.  

சப்த ராம திருத்தலங்கள் - திருவெள்ளியங்குடி

ஒருமுறை கருடாழ்வார் இந்தத் தலத்துப் பெருமாளைப் போற்றி வழிபட்டு, ``தாங்கள் ஸ்ரீராமபிரானாகக் காட்சி தரவேண்டும்'' என்று பிரார்த்தித்தார். அவரின் பிரார்த்தனைக்கு இரங்கிய பெருமாள், தம் திருக்கரங்களை அலங்கரித்த சங்கு, சக்கரம் ஆகியவற்றை கருடாழ்வாரிடம் கொடுத்துவிட்டு, வில்லும் அம்பும் ஏந்திக் காட்சி தந்தார். ஸ்ரீராமபிரானின் தரிசனம் கண்டு மகிழ்ந்த கருடாழ்வார், பெருமாளை, ‘கோலவில்லி ராமர்’ - அழகிய வில்லை ஏந்திய ராமர் என்று போற்றினாராம். பெருமாள் எப்போது வேண்டுமானாலும் சங்கும் சக்கரமும் கேட்பார் என்பதால்தான், கருடாழ்வார் முழந்தாளிட்ட நிலையில் அமர்ந்திருக்கிறார். பெருமாளைத் தரிசிக்க முடியாத போது, இந்தக் கருடாழ்வாரைத் தரிசித்து வழிபட்டாலே, பெருமாளைத் தரிசித்து வழிபட்ட பலன் கிடைக்கும் என்பது ஐதீகம்.

வாமன அவதாரத்தின்போது, கண் பார்வை இழந்த சுக்கிராசார்யர், இந்தத் தலத்துக்கு வந்து தனக்கு கண் பார்வை அருள வேண்டும் என்று பிரார்த்தித்தார். பெருமாளும், கோயிலுக்கு எதிரில் உள்ள, ‘இந்திர தீர்த்தத்தில் நீராடி, தொடர்ந்து 48 நாள்கள் தம்மை வழிபட்டால், கண் பார்வை கிடைக்கும்' என்றார். சுக்கிராசார்யரும் அப்படியே செய்து, கண் பார்வையைத் திரும்பப் பெற்றார்.

சுக்கிர பரிகாரத் தலமாக இருப்பதால், சுக்கிர தோஷம் உள்ளவர்கள், இந்தத் தலத்துக்கு வந்து கோலவில்லி ராமரையும் மரகதவல்லித் தாயாரையும் தரிசித்தால் சுக்கிர தோஷம் விலகும் என்பது ஐதீகம். மேலும், கருவறையில் அணையா விளக்காகப் பிரகாசித்துக்கொண்டிருக்கும் தீபத்தில் நல்லெண்ணெய் ஊற்றி வேண்டிக்கொண்டால், நினைத்த காரியம் நிறைவேறுவதுடன், திருமணத்தடை விலகி திருமணம் கூடி வருவதாகவும், குழந்தை பாக்கியம் இல்லாதவர்களுக்கு குழந்தை பாக்கியம் கிடைப்பதாகவும் பக்தர்கள் சிலிர்ப்புடன் கூறுகிறார்கள். இதேபோல் 48 நாள்கள் தொடர்ந்து வேண்டிக்கொண்டால், கண் பார்வைக் குறைபாடுகள் நீங்கும் என்பது ஐதீகம்.

வைகாசி, ஆவணி, கார்த்திகை, மாசி ஆகிய மாதங்களில் முதல் நாள் ராமனுக்குச் சிறப்பு திருமஞ்சனம் நடைபெறுகிறது. அப்போது கருடாழ்வாருக்கும் திருமஞ்சனம் நடைபெறும்.

எப்படிச் செல்வது? : கும்பகோணத்தில் இருந்து சோழபுரம் செல்லும் வழியில், அணைக்குடி சாலையில் இருந்து  5 கி.மீ. தொலைவில் உள்ளது திருவெள்ளியங்குடி. காலை 8 முதல் 12 மணி வரை; மாலை 4 முதல் 7 மணி வரை கோயில் நடை திறந்திருக்கும்.