Published:Updated:

திருமுறைகளுக்கு ஒரு திருக்கோயில்!

ஒட்டுமொத்த விகடனுக்கும் ஒரே ஷார்ட்கட்

Use App
திருமுறைகளுக்கு ஒரு திருக்கோயில்!
திருமுறைகளுக்கு ஒரு திருக்கோயில்!

சி.வெற்றிவேல், படங்கள்: குருஸ்தனம்

பிரீமியம் ஸ்டோரி

தேனினும் இனிய தமிழ்ப் பாக்களால் கயிலைநாயகனின் புகழையும் கருணைத் திறனையும் பாடிப் பரவிய அருளாளர்களின் நூல்களே பன்னிரு திருமுறைகள் என்று போற்றப்படுகின்றன. இந்தப் பன்னிரண்டு திருமுறைகளே சைவர்களின் வேதங்களாகவும் விளங்குகின்றன. காலப்போக்கில் தேவாரப் பாடல்கள் அடங்கிய சுவடிகள் தில்லையம்பலத்தான் திருக்கோயிலிலிருந்த ஓர் அறைக்குள் வைத்துப் பூட்டப்பட்டுவிட்டதுடன், அவற்றுள் பல ஓலைச் சுவடிகள் கரையான்களின் கடும்பசிக்கும் இரையாகிவிட்டன.

ஆனால், நாம் செய்த புண்ணியத்தின் பலனாக, நம்பியாண்டார் நம்பி மூலம் ராஜராஜ சோழன் அவற்றை மீட்டெடுத்தார். மேலும் சிவபெருமானின் புகழினைப் பாடும் மற்ற பாடல்களையும் திரட்டி நம்பியாண்டார்நம்பி மூலம் 11 திருமுறைகளாகத் தொகுத்து வைத்தார். பின்னர், சேக்கிழார் இயற்றிய பெரியபுராணமும் சேர்ந்துகொள்ள, இந்த ஞானநூல்கள் பன்னிரு திருமுறை களாக, அடியார் பெருமக்களால் போற்றப்பட்டும் பாடப்பட்டும் வருகின்றன.

சிவபெருமானின் சந்நிதியில் பாடப்படும் பன்னிரண்டு திருமுறைகளையே இறைவனாகப் பாவித்து, பன்னிரண்டு திருமுறைகளுக்கும், ‘திருமுறை செப்பறைத் திருக்கோயில்’ என்ற பெயரில் ஓர் ஆலயம் அமையவிருப்பதாகவும், அதற்கான பணிகள், விருத்தாசலத்தைச் சேர்ந்த ‘அறுபத்து மூவர் திருப்பணி அறக்கட்டளை’ என்ற அமைப்பின் சார்பாகத் தொடங்கப்பட்டி ருப்பதாகவும் அன்பர் ஒருவர் நம்மிடம் தெரிவித்தார். இது தொடர்பாக அறக்கட்டளையின் செயலாளரான சங்கர் எனும் அன்பரைச் சந்தித்தோம்.

திருமுறைகளுக்கு ஒரு திருக்கோயில்!

‘`சைவத்துக்கு அளப்பரிய சேவைகளைச் செய்தவர்கள் நாயன்மார்கள். அவர்களின் புகழைப் பரப்புவதுடன், நாயன்மார்கள் அவதரித்தத் தலங்களில் அவர்களுக்கு திருக் கோயில் கட்டுதல், நாயன்மார்களின் வருடாந்திர குருபூஜை, அன்னதானம், பெரியபுராணம் தொடர் சொற்பொழிவு போன்ற நிகழ்ச்சிகளைத் தொடர்ந்து நடத்துவது போன்ற பணிகளை மேற்கொண்டுள்ளோம்’’ என்று தங்கள் அறக் கட்டளையின் பணிகளைச் சொன்னவர், திருமுறைச்  செப்பறை கோயில் குறித்த தகவல்களை விவரித்தார்.

பூசலார் நாயனார் சிவனாருக்கு மனக்கோயில் கண்டது போல், தாங்கள் அமைக்கப்போகும் திருமுறை செப்பறை திருக்கோயில் இப்படித்தான் இருக்க வேண்டும் என்று அதன் அழகிய அமைப்பை தங்களின் எண்ணத்தில் பொதிந்துவைத்திருக்கிறார்கள், அறுபத்துமூவர் திருப்பணி அறக்கட்டளை அன்பர்கள். அதுபற்றி அவர்கள் சொன்ன தகவல்கள் அப்படியே உங்களுக்காக.

திருமுறைச் செப்பேடுகளும் திருக்கோயிலும்

பன்னிரு திருமுறைகளும் 155 புத்தகங்களாக வடிவமைக் கப்பட உள்ளன. ஒவ்வொரு புத்தகமும் 25 செப்பேடுகளைக் கொண்டதாக இருக்கும். ஒவ்வொரு செப்பேடும் ஒரு கிலோ எடை கொண்டதாக இருக்கும். பன்னிரு திருமுறைகளும் அடங்கிய 155 புத்தகங்களின் மொத்த எடை நான்கு டன்களாக இருக்கும்.

கருவறை அமைப்பு...

155  திருமுறைச் செப்பேடு புத்தகங்களே கருவறைக்குள்  சிவலிங்க வடிவில் திருமேனியாக விளங்கப்போகின்றன.

திருமுறைத் திருக்கோயில் கருவறை அமைப்பானது, நெல்லையப்பர் கோயிலின் தாமிர சபையைப் போன்று அமையவுள்ளது. தாமிரத் தகடுகளில் பதிக்கப்பெற்ற திருமுறைகள் பிரதிஷ்டை செய்யப்படவிருக்கும் கருவறைக்கு நெல்லையப்பரின் தாமிரசபை அமைப்பு பொருத்த மானதுதானே?! கருவறை விமானமும்கூட கீழ்த் தளத் திலிருந்து விமானக் கலசம் வரை ஒரு டன் செப்புத் தகடுகளால் அமைக்கப்படவிருக்கிறது.

துவார பாலகர்கள்: தில்லையிலிருந்து தேவாரங்களை மீட்டு திருமுறைகளைத் தொகுப்பித்து ‘திருமுறை கண்ட  சோழன்’ எனப் புகழப்படும் ராஜராஜனும், அறுபத்து மூன்று நாயன்மார்களை உலகறியச் செய்த திருத் தொண்டர் புராணத்தை அரங்கேற்றிய அநபாய சோழனும் திருமுறைக் கருவறைக்கு முன் துவார பாலகர்களாக எழுந்தருளி அருள்புரிவார்கள்.

பிற சந்நிதிகள்:
சைவசமயக் குரவர்களான திருஞானசம்பந்தர், திருநாவுக்கரசர், சுந்தரர், மாணிக்கவாசகர் ஆகியோர் தனிச் சந்நிதிகளில் காட்சி தர, மற்ற திருமுறைகளை இயற்றிய திருமூலர், காரைக்காலம்மையார், சேரமான் பெருமாள் நாயனார் உள்ளிட்ட மற்ற அருளாளர் கள் கோஷ்ட மூர்த்தங்களாகவும் காட்சி தருவார்களாம்.

மேலும், பெரிய புராணம் இயற்றிய சேக்கிழார், சைவ சாத்திர நூல்களை அருளிச் செய்த சந்தானக் குரவர்கள் ஆகியோரும் தனிச் சந்நிதிகளில் காட்சி தரவிருக்கிறார்கள். ஒவ்வொரு சந்நிதியிலும் அருளாளர்களின் சிறப்பு, அவர் இயற்றிய நூல்கள் பற்றிய விவரங்களும் பொறித்து வைக்கப்படும்.

ஆண்டு திருவிழாக்கள்:
திருமுறைத் திருக் கோயிலில் முக்கிய திருவிழாவாக ஆனித் திரு மஞ்சனம், ஆருத்ரா  தரிசனம் ஆகியவை வருடந் தோறும் கொண்டாடப்படும். அனைத்து அருளா ளர்களின் திருநட்சத்திரன்று குருபூஜை விழாவும் சிறப்பாக நடைபெறும். 

நித்தியபடி பூஜை: கருவறையில் செப்பேடுத் திருமுறைகளை எழுந்தருளச் செய்து, அந்தச் செப்பேடு திருமேனிகளுக்கு உடையவராக - திரு முறைநாதராக ஸ்படிக லிங்கத்தைப் பிரதிஷ்டை செய்து, அவருக்கு நித்தியப்படி நான்கு கால பூஜை நடைபெறும். சிதம்பரம் நடராஜப் பெருமான் கோயிலில் நடைபெறும் பூஜை முறையே இங்கும் பின்பற்றப்படும்.

திருக்கோயில்  நூலகம்: திருமுறைக் கோயிலில், நம் சைவ சமயத்துக்கே உரியதாகப் போற்றப்படும் சாத்திரம், தோத்திரம், இதிகாசம், புராணம், இலக்கியம், இலக் கணம், மருத்துவம், யோகா, வாழ்வியல் எனப் பல நூல்களை உள்ளடக்கிய நூலகம் ஒன்றும் அமையவுள்ளது.

இங்ஙனம், திருமுறை செப்பறைத் திருக்கோயில் பற்றிய விவரங்களை நம்மிடம் பகிர்ந்துகொண்ட சங்கர் நிறைவாக, ‘`திருமுறைகளுக்கான கோயில் கட்டிமுடிக்கப்பட்டுவிட்டால், உலகத்திலேயே நூல்களுக்காகக் கட்டப்பட்ட ஒரே கோயில் என்ற பெருமை அந்த ஆலயத்துக்குக் கிடைக்கும். நம் திருமுறைகளின் மகிமையையும் உலகெங்கும் பறைசாற்றப்படும். சிவபெருமானின் அருள்திறம் எங்களின் இந்தப் பணிக்குத் துணை நிற்கும் என்ற நம்பிக்கையுடன் திருப்பணிகளைத் தொடர்ந்து கொண்டிருக் கிறோம்’’ என்றார்.

செப்பேடுகள் என்பது நமக்குப் புதிய விஷயமல்ல. அந்தக் கால மன்னர்கள் தங்களுடைய சாதனைகளைச் செப்பேட்டுச் சாசனங் களாகப் பொறித்துவைத்திருக்கிறார்கள். அவற்றுள் தாங்கள் எழுப்பிய ஆலயங்கள், அந்த ஆலயங்களுக்குத் தாங்கள் அளித்த மானியங்கள் போன்ற விவரங்களைக் குறிப்பிட்டிருப்பார்கள். ஆனால், திருமுறைகளைச் செப்பேடுகளில் பொறித்து, கோயிலில் பிரதிஷ்டை செய்யவேண்டும் என்ற எண்ணம் எந்த மன்னருக்கும் தோன்றவில்லை என்பதுதான் விந்தையிலும் விந்தை. தற்போது அறுபத்துமூவர் திருப்பணி அறக்கட்டளை அமைப்பினர், பன்னிரு திருமுறைகளையும் காலத்துக்கும் அழியாதபடி செப்பேடு களில் பொறித்து, அவற்றைப் பிரதிஷ்டை செய்ய ஒரு கோயிலும் அமைப்பதற்குச் சிவபெருமானின் திருவருள் கூட்டியுள்ளது. 

திருமுறைகளுக்கு ஒரு திருக்கோயில்!

அறுபத்துமூவர் திருப்பணி அறக்கட்டளை அன்பர்கள் மேற்கொண் டிருக்கும் இந்தத் திருப்பணிக்கு, ஆன்மிக அன்பர்கள் மட்டுமல்லாமல், தமிழ்மொழியின்பால் அளப்பரிய அன்பு கொண்டிருக்கும் அன்பர்கள் அனைவருமே தங்களால் இயன்ற பொருளுதவி செய்தால், உலகத்திலேயே நூல்களுக்காக ஒரு கோயில் எழுப்பிய பெருமை மட்டுமல்ல, ஒரு புனிதப் பணியில் பங்கேற்ற புண்ணியமும் நமக்குக் கிடைக்கும்சிவ

அன்பர்களின் இதர திருப்பணிகள்...

அருள்நிறை அறுபத்து மூவரில், 24 நாயன்மார்களுக்கு அவர்களின் அவதாரத் தலங்களில், மன்னர்கள் காலத்திலேயே ஆலயங்கள் அமைக்கப்பட்டுள்ளன. மற்ற நாயன்மார்களுக்கு ஆலயம் அமைக்கும் பணியில் அறுபத்துமூவர் திருப்பணி அறக்கட்டளை ஈடுபட்டு வருகிறது. இதுவரை 19 நாயன்மார்களுக்கு ஆலயம் அமைத்து குடமுழுக்கு செய்திருக்கிறார்கள். தற்போது திருவாரூர் மாவட்டம் திருநாட்டியத்தான் குடியில் கோட்புலி நாயனாருக்கு திருக்கோயில் நிர்மாணிக்கும் பணியில் உள்ளனர்.

மேலும், பராமரிப்பில்லாத சிவாலங்களைப் புதுப்பித்து குடமுழுக்கு செய்வது, தினசரி வழிபாட்டுக்கும் ஏற்பாடு செய்தல், ருத்திராட்ச பந்தல் அமைத்தல், பாடல் பெற்ற தலங்களுக்கு பன்னிரு திருமுறைக்கான பேழை அமைத்துக்கொடுத்தல் போன்ற பணிகளிலும் தங்களை ஈடுபடுத்திக்கொண்டிருக்கிறார்கள்.

சிவப்பணிகள் தொடரட்டும்... சிவனருள் பெருகட்டும்!

திருமேனி செப்பேடுப் புத்தகம்...

*பன்னிரு திருமுறைகளையும் செப்பேட்டில் பதித்து சிவலிங்க வடிவத்தில் திருமுறைக் கருவறை அமைக்கிறார்கள். ஒவ்வொரு செப்புத் தகடும் ஒரு கிலோ எடை கொண்டது. 20 செப்புத் தகடுகள் கொண்டது ஒரு புத்தகம். ஒரு புத்தகத்தின் மேல் அட்டை 2 கிலோ, கீழ் அட்டை 2 கிலோ. பூட்டு ஒரு கிலோ.

திருமுறைகளுக்கு ஒரு திருக்கோயில்!

ஒரு செப்புப் புத்தகத்தின் மொத்த எடை 25 கிலோ ஆகும். பன்னிரு திருமுறைகளும் 155 செப்புப் புத்தகத்தில் செய்யப்பட இருக்கின்றன. ஒரு புத்தகத்துக்கு 25 கிலோ என்று 155 புத்தகங்கள் செய்வதற்குத் தேவைப் படும் செப்பின் அளவு 4 டன்.

வங்கிக் கணக்கு விவரம்

Arubathumoovar Thirupani Trust
Bank : State Bank of India,
Virudhachalam Branch.
Ac No.  33803859171
IFSC : SBIN0000954
MICR : 606002001
தொடர்புக்கு : 9842488031

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு