Published:Updated:

நாரதர் உலா - நம்மாழ்வார் சந்நிதியில்!

ஒட்டுமொத்த விகடனுக்கும் ஒரே ஷார்ட்கட்

Use App
நாரதர் உலா - நம்மாழ்வார் சந்நிதியில்!
நாரதர் உலா - நம்மாழ்வார் சந்நிதியில்!

நாரதர் உலா - நம்மாழ்வார் சந்நிதியில்!

பிரீமியம் ஸ்டோரி

‘ஸ்ரீரங்கபுர விஹாரா...’ என்று சுருதி சுத்தமாகப் பாடியபடி, நமது அறைக்குள் பிரவேசித்தார் நாரதர்.

நாரதர் உலா - நம்மாழ்வார் சந்நிதியில்!



வழக்கம்போல், அவருக்கு ஏலக்காய் சேர்த்த தேநீர் கொடுத்து உபசரித்தபடி, ‘`என்ன நாரதரே, நீர் பாடிக்கொண்டே வந்த பாடலைக் கேட்டால்,  ஸ்ரீரங்கத்திலிருந்து வருவதுபோல் தெரிகிறதே...’’ என்று கேட்டோம்.

‘`என்ன செய்ய, ஸ்ரீரங்கத்தில்தான் பிரச்னைக்கு மேல் பிரச்னையாக இருக்கிறதே...’’ என்றார் நாரதர்.

‘`அங்கே, அப்படி என்ன நடக்கிறது?’’

‘`ஒவ்வொன்றாகச் சொல்கிறேன் கேளும்.   ‘திருவரங்கம் கோயிலிலுள்ள இரண்டாவது பிராகாரத்தை பிரதட்சிணம் செய்து பெரிய பெருமாளை வழிபடுவதை காலங்காலமாகக் கடைப்பிடித்து வருகிறார்கள் பக்தர்கள். இதை ஒரு சம்பிரதாயமாக மட்டுமல் லாமல், அப்படி பிரதட்சிணம் செய்து, ஸ்ரீரங்க விமானத்தைத் தரிசனம் செய்வது, ஸ்ரீரங்க நாதரை தரிசிப்பதற்குச் சமம் என்று சிறப்பித்துச் சொல்வார்கள்.

அந்தப் பிராகாரத்தில்தான் ஸ்வாமி நம்பிள்ளை ஈடு காலட்சேபம் செய்த இடமும், ஸ்வாமி மணவாளமாமுனிகள் ஈடு காலட்சேபம் செய்த இடமும்,  ஸ்ரீபாஷ்ய காலட்சேபம் நடந்த இடமும் அமைந்திருக்கின்றன. மேலும் துலுக்க நாச்சியார், சேரகுலவல்லித் தாயார்,  ஸ்ரீகிருஷ்ணர்ஆகியோரின் சந்நிதிகளும் அமைந்திருக்கின்றன.

நாரதர் உலா - நம்மாழ்வார் சந்நிதியில்!

இந்தப் பிராகாரத்தில்தான் ஏகாதசி முதலிய திதிகளில் நம்பெருமாளுக்குத் திருமஞ்சனமும் நடைபெறுகின்றன. அர்ஜுன மண்டபம், சந்தனு மண்டபம், கண்ணாடி அறை மற்றும் எம்பெருமானின் பல்வேறு அறைகளும் இந்தப் பிராகாரத்தில்தான் உள்ளன. மொத்தத்தில் எம்பெருமானின் தரிசன மகிமையை உயர்த்திக் காட்டும் பிராகாரம் இது...'' என்று விவரித்த நாரதரை, இடைமறித்துக் கேட்டோம்.

``இந்தப் பிராகாரத்தில் ஏதேனும் பிரச்னையா?''

``அதுபற்றிதான் சொல்ல வரு கிறேன். இந்தப் பிராகாரத்தைப் பிரதட்சிணம் செய்யமுடியாதபடி இப்போது தடை செய்திருக்கிறார்கள். இந்தத் தடையை விலக்கி மறுபடியும் பிரதட்சிணம் செய்யக் கோயில் நிர்வாகம் அனுமதிக்கவேண்டும் என்பதே எங்கள் கோரிக்கை’ என்கிறார்கள் பக்தர்கள்'' என்று நாரதர் சொல்லி முடிக்கவும், ஸ்ரீரங்கம் கோயிலிலுள்ள பிரச்னைகளைத் தீர்க்கவேண்டிக் கடந்த 10-ம் தேதி பொதுக்கூட்டம் நடைபெற்றது நம் நினைவுக்கு வந்தது. அதுபற்றி நாரதரிடம் கேட்டோம்.

‘`அந்தக் கூட்டத்தில், திருக்கோயிலில் ஸ்தலத்தார்களை மதிக்காமல், கோயில் நிர்வாகம் அலட்சியம் காட்டுவதாக  பக்தர்கள் ஆதங்கப் பட்டது குறித்து அன்பர் ஒருவர் பகிர்ந்து கொண்டார்’' என்ற நாரதரிடம்,  ‘`ஸ்தலத்தாருக்கும் கோயிலுக்கும் உள்ள தொடர்பை சற்று விரிவாகச் சொல்லும்?'' என்று கேட்டுக்கொண்டோம்.

`‘ஸ்ரீரங்கத்தில் பூஜைமுறைகளை ஒழுங்கு படுத்திய ஸ்ரீராமாநுஜர், கோயிலிலுள்ள 55 சந்நிதிகளில் கைங்கர்யம் செய்யவும், கோயிலைப் பாதுகாக்கவும் ஸ்ரீரங்கத்தைச் சேர்ந்த 8 குடும்பத் தினரை ஸ்தலத்தாராக நியமித்தார்.

ஆரம்பத்தில் அவர்கள் 55 சந்நிதிகளிலும் கைங்கர்யம் செய்து வந்தார்களாம். பிற்காலத்தில்  பல சந்நிதிகளை கோயில் நிர்வாகமே எடுத்துக் கொண்டுவிட்டதால், அவர்கள் கைங்கர்யம் செய்யும் சந்நிதிகளின் எண்ணிக்கை வெகுவாகக் குறைந்துவிட்டது. அவர்கள் வம்சத்தில் வந்தவர்கள்தான் அந்தச் சந்நிதிகளுக்கும் கைங்கர் யம் செய்யவேண்டுமாம். இதற்காக அவர்களுக்கு ஒரு மாதத்துக்கு சம்பாவனையாக ரூ.1.35 மற்றும் தீர்த்தப் பிரசாதம், சடாரி மரியாதை கொடுக்க வேண்டும். இது ஸ்ரீராமாநுஜர் ஏற்படுத்திய நியதி.

ஆனால், கடந்த நான்கு வருடங்களாக ஸ்தலத் தார் கைங்கர்யம் செய்வதற்கு, நிர்வாகத் தரப்பில்  அனுமதிப்பதில்லையாம். மேலும், அவர்களுக்குத் தரவேண்டிய மாதாந்திர சம்பாவணை தரப்படாத துடன், தீர்த்தப் பிரசாதம், சடாரி மரியாதை கொடுப்பதைத் தடுப்பதற்கும் நிர்வாகம் முயற்சி செய்து வருகிறது என்று ஸ்தலத்தார் தரப்பில்  ஆதங்கப்படுகிறார்களாம்''

``இதுகுறித்து ஸ்தலத்தார் தரப்பில் முறைப்படி புகார் எதுவும் அளிக்கப்பட்டதா?''

``பல முறை அரசின் உயர் பொறுப்பில் இருப்ப வர்கள்வரை புகார் மனு அனுப்பியும் இதுவரை நடவடிக்கை எதுவும் எடுக்கவில்லை என்கிறார்கள்.

`கோயில் நிர்வாகம் கோயில் வழிபாட்டு முறைகளில் தலையிடுவதை விட்டுவிட்டு, கோயிலுக்கு உரிய அசையும் மற்றும் அசையா சொத்துக்களிலிருந்து வரக்கூடிய வருமானத்தை முறையாக வசூலித்துக் கோயிலின் வளர்ச்சிக்கும் பாதுகாப்புக்கும் பயன் படுத்திக்கொள்ளவேண்டும் என்பதே எங்கள் முக்கியமான வேண்டுகோள்’ என்று, அந்தப் பொதுக்கூட்டத்தில் பேசப்பட்டதாக நண்பர் தெரிவித்தார்’’ - என்றார் நாரதர்.

‘`இந்தப் புகார்கள் பற்றி கோயில் நிர்வாகத் தரப்பில் விசாரித்தீரா?’’ என்று கேட்டோம்.

``பேசினோம். `கோயில் நிர்வாகத்தின் மீது புகார் சொல்பவர்கள், தங்களது கடமையை முறை யாகச் செய்வதில்லை. இதை எப்போது வேண்டு மானாலும் நாங்கள் நிரூபிக்கத் தயாராக இருக் கிறோம்' என்கிறார்கள் கோயில் நிர்வாகத் தரப்பில் சிலர்'' என்ற நாரதர்,   ``திருவரங்கத்துக்கும் மீண்டும் செல்லவுள்ளேன். இதுகுறித்து மேலும் விசாரித்து வருகிறேன்'' எனக்கூறிவிட்டு, அவராகவே அடுத்த விஷயத்துக்குத் தாவினார்.

‘`பெருமாளே தேடி வந்து மங்களாசாசனம் பெற்றுக்கொண்ட பெருமைக்கு உரியவர் நம்மாழ் வார்...'' எனத் தொடங்கியவரிடம், ``நம்மாழ்வாரின் பெருமையை அறியாமல் இருப்போமா'' என்று உரிமையோடு கடிந்துகொண்டோம். நம்மைப் புரிந்துகொண்ட நாரதர், தான் கூற வந்ததை விவரிக்க ஆரம்பித்தார்: ‘`காஞ்சிபுரம் வரதராஜப் பெருமாள் கோயில் பிரம்மோற்சவத் திருவிழாவில் முக்கிய நிகழ்ச்சியான கருடசேவை கடந்த 29-ம் தேதி நடைபெற்றது.

நாரதர் உலா - நம்மாழ்வார் சந்நிதியில்!

இந்நிலையில், நம்மாழ்வார் அவதார நட்சத்திரத் தன்று அவரது சந்நிதியில் வரதராஜப் பெருமாளை எழுந்தருளச் செய்து, தென்கலை அன்பர்கள்  நாலாயிரத் திவ்யபிரபந்தப் பாசுரங்களைப் பாடி சேவிப்பதுடன், நம்மாழ்வாருக்கு பெருமாளின் சடாரி வைத்து மரியாதை செய்வது வழக்கம். இந்த ஆண்டும் அவ்வாறு பாடும்போது,  ‘மறுநாள் அதிகாலையில் கருடசேவை நிகழ்ச்சிக்குப் பெரு மாளை அலங்காரம் செய்யவேண்டும்’  என்று கூறி வடகலை அர்ச்சகர்கள்  பெருமாளை எடுத்துச் சென்றார்களாம்.

அதிலும் பெருமாளை வஸ்திரத்தால் முழுவதும் மறைத்து, அப்பிரதட்சிணமாக எடுத்துச் சென்றார் களாம். பொதுவாக பெருமாள் வீதியுலா செல்லும் போது, வழியில் ஏதேனும் இறப்பு நேரிட்டிருந்தால், அப்போது மட்டுமே பெருமாளை வஸ்திரத்தால் மறைத்து எடுத்துச் செல்வது வழக்கமாம். இப்படி சம்பிரதாயம் மீறப்படவே, இரண்டு பிரிவினருக்கும் இடையே தகராறு ஏற்பட்டுவிட்டதாம். ஆன்மிகப் பெரியோர்களும்,  அறநிலையத்துறை அதிகாரி களும் சேர்ந்து சமாதானம் செய்தார்களாம்’’ என்ற நாரதர், நாம் கேள்வி கேட்பதற்கு இடம் கொடுக் காமல் தொடர்ந்து பேசினார்.

‘`மறுநாள் அதிகாலையில் பெருமாள் கருட வாகனத்தில் எழுந்தருளவேண்டும் என்பதால்தான் சீக்கிரம் எடுத்துச் சென்றதாக ஒரு தரப்பினர் கூறுகிறார்கள். ஆனால், மற்றொரு தரப்பினரோ 4 மணிக்கு நம்மாழ்வார் சந்நிதியில் எழுந்தருள வேண்டிய பெருமாளை ஒரு மணிநேரம் தாமதமாக எழுந்தருளச் செய்ததாகவும், அதன் காரணமாகவே இப்படி நடைபெற்றதாகவும் கூறுகிறார்கள்’’ என்று கூறிமுடித்தவர், ‘`கோயில்களில் வெளிப்புறம் நடக் கும் நெய்தீப விற்பனை பற்றி உமக்கு ஏதேனும் தகவல் வந்ததா?'' எனக் கேட்டார்.

``சமூக வலைதளங்களில் அதுபற்றிய பகிர்வு களைப் படித்தோம்...'' என்று கூறி முடிப்பதற்குள் நம்மை இடைமறித்து, ``அடுத்து வரும்போது அதுபற்றிய தகவல்களோடும் வருகிறேன்''  என்று விடைபெற்றுக்கொண்டார்.

- உலா தொடரும்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு