Published:Updated:

திருமணம் - அருள் புரியும் அழகு முத்து அய்யனார்

திருமணம் - அருள் புரியும் அழகு முத்து அய்யனார்
பிரீமியம் ஸ்டோரி
திருமணம் - அருள் புரியும் அழகு முத்து அய்யனார்

கோயில்...எஸ்.தேவராஜன், ஜெ.முருகன் படங்கள்: குரூஸ்தனம்

திருமணம் - அருள் புரியும் அழகு முத்து அய்யனார்

கோயில்...எஸ்.தேவராஜன், ஜெ.முருகன் படங்கள்: குரூஸ்தனம்

Published:Updated:
திருமணம் - அருள் புரியும் அழகு முத்து அய்யனார்
பிரீமியம் ஸ்டோரி
திருமணம் - அருள் புரியும் அழகு முத்து அய்யனார்

றைவனிடம் நாம் வேண்டியது நிறைவேறிவிட்டால், அதற்கு நன்றிக் காணிக்கையாக அபிஷேக ஆராதனைகள் செய்து உண்டியலில் காணிக்கை செலுத்துவோம். அப்படிச் செய்யும்போது நம்முடைய வேண்டுதலை இறைவன் நிறைவேற்றிய விவரம் நமக்கும் கடவுளுக்கும் மட்டும்தானே தெரியும்? நம் கோரிக்கைகளை இறைவன் நிறைவேற்றிய அற்புதத்தை பக்தர்கள் அனைவரும் தெரிந்து கொள்ள வேண்டும் என்பதற்காக ஒரு கோயிலில் சிலைகளை வைத்து, நன்றிக் காணிக்கை செலுத்துகின்றனர் பக்தர்கள். அப்படி பல வடிவங்களில் உள்ள சிலைகள் அழகுறக் காட்சி தரும் கோயில்தான் கடலூர் மாவட்டம் தென்னம்பாக்கத்தில் அமைந்திருக்கும் அருள்மிகு அழகுமுத்து ஐயனார் கோயில். பூர்ணா, புஷ்கலா (இந்தக் கோயிலில் பூர்ணையை பூர்ணா என்றும் பொற்கலையை புஷ்கலா என்றும் அழைக்கப்படுகிறார்கள்) சமேதராகக் காட்சி தரும் அருள்மிகு அழகுமுத்து ஐயனார் கோயிலுக்குப் பின்புறம் அமைந்திருக்கிறது ஸ்ரீஅழகுசித்தர் ஜீவசமாதி கோயில். வேண்டுதல் நிறைவேறிய பக்தர்கள் நன்றிக் காணிக்கையாகச் சிலைகளை வைத்து வழிபடும் வழக்கத்தை ஏற்படுத்தியவர் அழகு சித்தர்தான்.

சபரிமலையில் அருள்புரியும் ஐயப்பன் பிரம்மசாரியாக இருப்பதன் பின்னணியில் அமைந்திருக்கும் சம்பவமே இந்தக் கோயிலின் தலவரலாறாக அந்தப் பகுதி மக்களால் சொல்லப்படுகிறது.

புராண காலத்தில் இந்தப் பகுதியில் சிவபெருமானுக்கும் மோகினி வடிவத்தில் இருந்த மகாவிஷ்ணுவுக்கும் குழந்தையாகப் பிறந்தவர் ஐயனார். அந்த கிராமம் இப்போது கீழ்ப்புதுப்பட்டு என்று அழைக்கப்படுகிறது. சிவபெருமானும் மகாவிஷ்ணுவும் தங்களுக்குப் பிறந்த குழந்தையை, தென்னம்பாக்கத்தில் இருந்த ஒரு முனிவரிடம் கொடுத்து வளர்க்கும்படி விட்டுச் சென்றனர். முனிவரும், தன்னுடைய பெண் குழந்தைகளான பூர்ணை, பொற்கலை ஆகியோரை அன்புடன் வளர்த்து வந்ததைப் போலவே, தம்மிடம் ஒப்படைக்கப்பட்ட குழந்தைக்கு அழகர் என்று பெயரிட்டு வளர்த்து வந்தார். அழகரும் ஆயகலைகள் அறுபத்து நான்கினையும் கற்றுத் தேர்ந்து, வீரமும் விவேகமும் கொண்டவராக விளங்கினார்.

திருமணம் - அருள் புரியும் அழகு முத்து அய்யனார்

மந்திரவாதி ஒருவன் தன்னுடைய மந்திர சக்தியால் அந்தப் பகுதியை ஆட்சி செய்து வந்த பல சிற்றரசர்களைக் கட்டிப்போட்டதுடன், மக்களையும் கொடுமைப்படுத்தி வந்தான். மக்கள் முனிவரிடம் சென்று, மந்திரவாதியை எப்படியாவது அழிக்க வேண்டும் என்று வேண்டினர். அவர்களிடம் இரக்கம் கொண்ட முனிவரும், மந்திரவாதியை அழித்து வரும்படி அழகரை அனுப்பினார்.

அழகரும் மந்திரவாதியுடன் போரிட்டு அவனை அழித்தார். அவனிடம் சிறைபட்டிருந்த சிற்றரசர்களையும் விடுவித்தார். சிற்றரசர்களும் மக்களும் அழகரை வணங்கி நன்றி செலுத்தினர். மந்திரவாதியை அழித்துவிட்டு வந்த அழகரிடம், ‘மந்திரவாதியை அழித்த உனக்கு என்ன வேண்டுமோ கேள்’ என்று முனிவர் கேட்டார்.

`உங்கள் பெண்களை எனக்கு மணம் செய்து தர வேண்டும். மேலும், என்னை விட வயதில் பெரியவரான ஒருவர் எனக்குக் காவலாக இருக்க வேண்டும்’ என்று கேட்டார் அழகர்.

முனிவரும், ‘நீ கேட்டுக்கொண்டபடியே என் மகள்கள் இருவரையும் உனக்குத் திருமணம் செய்து வைக்கிறேன். ஆனால், என் பெண்கள் இருவரையும் கண்கலங்காமல் பார்த்துக்கொள்ள வேண்டும்’ என்று நிபந்தனை விதித்தார். அழகரும் சம்மதித்தார். முனிவர் தன் மகள்களான பூர்ணை, பொற்கலையை அழகருக்குத் திருமணம் செய்து கொடுத்ததுடன், அழகர் கேட்டுக் கொண்டபடியே வீரபத்திரரைக் காவலுக்கு நியமித்தார்.

ஒருநாள், பொற்கலையுடன் மகிழ்ச்சியாகப் பேசிக்கொண்டிருந்தார் அழகர். அதைப் பார்த்த பூர்ணை, அவர்களிருவரின் தனிமையில் குறுக்கிட வேண்டாம் என்று நினைத்து, சற்றுத் தள்ளி போய் தன்னுடைய ஈரக் கூந்தலை விரித்துப்போட்டு ஆற்றிக் கொண்டிருந்தாள். இதைத் தொலைவிலிருந்து பார்த்த முனிவர், தன் மகள் அழுவதாக நினைத்துக் கொண்டார். கோபம் கொண்ட முனிவர் அங்கிருந்தபடியே அழகரிடம், ‘உனக்கு அடுத்த பிறவியில் திருமணமே நடக்காது’ என்று சாபம் கொடுத்துவிட்டார். அதன் காரணமாகத்தான் அடுத்த பிறவியில் மணிகண்டனாக அவதரித்த ஐயப்பன், சபரிமலையில் பிரம்மசாரியாக இருப்பதாகச் சொல்லப்படுகிறது.

பின்னர், அழகர் இந்த இடத்திலேயே அழகு முத்தையனார் என்ற திருப்பெயரில் பூர்ணை, பொற்கலையுடன் கோயில் கொண்டார்.

திருமணம் - அருள் புரியும் அழகு முத்து அய்யனார்

நன்றிக் காணிக்கையாக அணிவகுக்கும் சிலைகள்

அழகுமுத்தையனார் பூர்ணை, பொற்கலையைத் திருமணம் செய்து கொண்ட தலம் என்பதால், திருமணம் தடைபட்டு வரும் அன்பர்கள், இந்தக் கோயிலுக்கு வந்து வேண்டிக்கொண்டால், உடனே அவர்களுக்குத் திருமணம் நடைபெற்றுவிடுவதாக பக்தர்கள் நம்பிக்கையுடன் சொல்கிறார்கள். தங்கள் பிரார்த்தனை நிறைவேறியதும், திருமணக் கோலத்தில் இருப்பதுபோன்ற மணமக்கள் சிலைகளை வைத்து, தங்கள் நன்றியைத் தெரிவிக்கின்றனர்.

திருமணம்தான் என்றில்லை, பக்தர்களின் அனைத்து வேண்டுதல்களும் நிறைவேறுவதாகவும், அதன் பிறகு தங்கள் வேண்டுதலுக்கு ஏற்பச் சிலைகளை நன்றிக் காணிக்கையாக வைத்துச் செல்வதாகவும் சொல்கிறார்கள். மணமக்கள், தாயும் சேயும், டாக்டர், ராணுவ வீரன், இன்ஜினீயர், போலீஸ், குழந்தைகள் என்று கோயிலைச் சுற்றிலும் பல சிலைகள் பக்தர்களால் வைக்கப் பட்டிருப்பதைக் காணமுடிகிறது.
தங்கள் நன்றிக் காணிக்கையாகச் சிலைகளை வைக்கும் வழக்கம் தொடங்கப் பட்டதன் பின்னணியிலும் ஒரு சம்பவம் இருப்பதாகச் சொல்கிறார் பூசாரி குமார்...

குமாரின் குடும்பத்தினர்தான் இந்தக் கோயிலுக்கு பரம்பரை பரம்பரையாக பூசை செய்து வருகிறார்கள். சில நூற்றாண்டுகளுக்கு முன்பு ஒருநாள் குமாரின் முன்னோர் ஒருவர் கோயிலுக்கு பூசை செய்துவிட்டுத் திரும்பும்போது, அங்கு வந்த பெரியவர் ஒருவர், அழகுமுத்தையனாரை வழிபட்டுவிட்டு, பக்கத்திலிருந்த ஆலமரத்தினடியில் அமர்ந்து தவம் செய்ய தொடங்கிவிட்டார். ஊருக்குள் வந்துவிடும்படி மன்றாடிக் கேட்டுக்கொண்டும்கூட, அந்தப் பெரியவர் மறுத்துவிட்டதுடன், தன் தவத்தைத் தொடர்ந்திருக்கிறார். ஆனால், அடுத் தடுத்த நாள்களில் அந்தப் பெரியவரைக் காணமுடியவில்லை.

திருமணம் - அருள் புரியும் அழகு முத்து அய்யனார்

ஆறுமாதங்கள் கடந்த நிலையில் உடல் முழுவதும் பாம்புகள் சுற்றியிருக்கும் நிலையில் அந்தப் பெரியவரைக் கண்டு பதறியிருக்கிறார் பூசாரி. செய்தி அறிந்த ஊர்மக்கள் கோயிலுக்குத் திரண்டு வந்துவிட்டனர்.

அந்தப் பெரியவரிடம், ‘நீங்கள் யார், எதற்காக இங்கே வந்திருக்கிறீர்கள்?’ என்று கேட்டனர். பதில் எதுவும் சொல்லாத பெரியவர், ஊர் மக்களைப் பார்த்து, ‘உங்களுக்கு என்ன வேண்டும்?’ என்று கேட்டிருக்கிறார். அப்போது ஒருவர், தனக்குத் திருமணமாகி நீண்ட காலமாகியும் குழந்தை பிறக்கவில்லை என்று கூறினார். அதைக் கேட்ட பெரியவர், `உன் விருப்பப்படி குழந்தை பிறக்கும்’ என்றும், `குழந்தை பிறந்ததும் அந்தக் குழந்தையைப் போலவே ஒரு சிலையைக் கோயிலில் வைக்க வேண்டும்’ என்றும் கூறினார். பெரியவர் சொல்லியபடியே அந்த நபருக்குக் குழந்தை பிறந்தது. அவரும் குழந்தையைப் போலவே ஒரு சிலையைக் கொண்டு வந்து வைத்தார். அன்று தொடங்கியதுதான் இந்த நடைமுறை.

பிறகு சில காலம் அந்தப் பகுதியிலேயே இருந்த பெரியவர், மக்களின் பிரச்னைகளைத் தீர்த்துக்கொண்டும் விஷக்கடிகளுக்கு வைத்தியம் பார்த்துக் கொண்டும் இருந்தார். மக்கள் அவரை அழகு சித்தர் என்றே அழைக்கத் தொடங்கினர். திடீரென்று ஒருநாள், ‘உங்கள் பிரச்னைகளுக்காக நான் ஐயனாரை வேண்டிக்கொள்கிறேன்’ என்று கூறியபடி கோயிலுக்குப் பின்புறமுள்ள கிணற்றில் இறங்கிவிட்டார். ஊர்மக்கள் கிணற்றுக்குள் இறங்கித் தேடியும் அவர் கிடைக்கவில்லை. அப்போதுதான் அவர் ஜீவசமாதி அடைந்துவிட்டார் என்பதை மக்கள் தெரிந்துகொண்டனர். அதே தருணத்தில், ‘நான் எங்கேயும் போகவில்லை. இங்கேதான் இருக்கிறேன்’ என்று ஒரு குரல் கேட்டது.

பூர்ணா, புஷ்கலா சமேதராகக் காட்சி தரும் அருள்மிகு முத்தையனார் கோயிலின் வலப்புறத்தில் கம்பீரமாக நின்ற கோலத்தில் காட்சி தருகிறார் வீரபத்திர சுவாமி. அருள்மிகு மீனாட்சி சமேத அருள்மிகு சுந்தரேஸ்வரரும் நவகிரகங்களும் காட்சி தருகின்றனர். முத்தையனார் கோயிலுக்குப் பின்புறத்தில் அழகு சித்தர் ஜீவசமாதி அடைந்த கிணறு மூலஸ்தானமாகவும், அழகு சித்தரே மூலவராகவும் இருந்து அருள்பாலிக்கிறார். அபிஷேக நீர் உள்ளே செல்லுமளவுக்குச் சிறிது சிறிதாக மூன்று துளைகள் போடப்பட்டு, பித்தளையால் செய்யப்பட்ட கடினமான தகடுகளால் மூடப்பட்டிருக்கும் கிணற்றை இப்போதும் தரிசிக்கலாம்.

அழகு சித்தர் ஜீவசமாதி அடைந்த சித்திரை மாதம் முதல் திங்கட்கிழமை குருபூஜை விழா நடைபெறுகிறது. அன்றைய தினம் திருமணமாகாத ஐந்து கன்னிகளின் கையால் பூர்ணா, புஷ்கலாவுக்கு திருமாங்கல்யம் அணிவிக்கப்படுகிறது. திங்கட்கிழமைகளில் அழகு சித்தர் ஜீவசமாதி அடைந்த கிணற்றுக்கு அபிஷேக ஆராதனைகள் செய்யப்படுவதால், பக்தர்கள் அதிக அளவில் வருகின்றனர். அபிஷேகத்தின்போது கிணற்றின் மீதிருக்கும் மேடையில் மூன்று பட்டைகளாகப் போடப்படும் விபூதி, மறுநாள் காலை வரை அதே ஈரப்பதத்துடன் காட்சி தருவது குறிப்பிடத்தக்கது

திருமணம் - அருள் புரியும் அழகு முத்து அய்யனார்

திருமணத் தடை நீக்கும் பிரார்த்தனை

திருமணம் தடைப்படும் பெண்கள் இந்தக் கோயிலுக்கு வந்து, மூன்று முறை அகண்ட தீபம் ஏற்றி, அம்மனுக்கு திருமாங்கல்ய சரடு அணிவித்தால், தடை நீங்கி உடனே திருமணம் நடைபெற்றுவிடுவதாக பக்தர்கள் நம்பிக்கையுடன் தெரிவிக்கின்றனர். அதேபோல திருமணமாகாத ஆண்களும் இங்கு வந்து அழகுமுத்தையனாரை வேண்டிக்கொண்டால், திருமணம் கூடிவருவதாகவும் சொல்கிறார்கள். ஐயனாரிடம் நம் வேண்டுதலை வைப்பதற்கும், பரிகாரங்கள் செய்வதற்கும் குறிப்பிட்ட நாள் என எதுவுமில்லை. எப்போது வேண்டுமானாலும் செல்லலாம்.

பெண்கள் மட்டும் மூன்று முறை செல்ல வேண்டும். முதல் முறை அகண்ட தீபம் ஏற்றி, அம்மனுக்கு திருமாங்கல்யம் அணிவிக்க வேண்டும். அடுத்த இரண்டு முறைகளும் அகண்ட தீபம் ஏற்றி வழிபட்டுவிட்டு வர வேண்டும். திருமணம் நடைபெற்றதும், தங்கள் வசதிக்குத் தக்கபடி திருமணக்கோலத்தில் இருக்கும் மணமக்கள் சிலைகளை வைக்க வேண்டும்.

நாம் கோயிலுக்குச் சென்றிருந்த போது, சிலைக்கு ஆர்டர் கொடுத்துக் கொண்டிருந்தார் சென்னையைச் சேர்ந்த செல்வராஜ். அவரிடம் பேசினோம்.

‘`என் மகளுக்கு நீண்ட நாளாக திருமணம் தடைப்பட்டுக்கொண்டே வந்தது. பல பரிகாரங்கள் செய்தும் பலனில்லை. கடந்த ஜனவரி மாதம் ஏம்பலத்தில் இருக்கும் உறவினர் வீட்டுக்கு வந்திருந்தபோது, அவர்தான் இந்தக் கோயிலைப் பற்றிக் கூறினார். முதலில் நான் நம்பவில்லையென்றாலும், அவர் சொல்கிறாரே என்று இந்தக் கோயிலுக்கு வந்தேன். இங்கிருந்த ஆயிரக்கணக்கான சிலைகளைப் பார்த்ததும் எனக்கு நம்பிக்கை வந்து விட்டது. அழகுமுத்தையனாரிடமும் அழகு சித்தரிடமும் வேண்டிக்கொண்டு சென்றேன். ஒரே மாதத்தில் நல்ல வரன் அமைந்து திருமணமும் முடிந்துவிட்டது. வேண்டுதலை நிறைவேற்றுவதற் காகத்தான் இப்போது வந்திருக்கிறேன்’’ என்று நெகிழ்ச்சியுடன் கூறினார் செல்வராஜ்.

எப்படிச் செல்வது?

புதுச்சேரியிலிருந்து தவளக்குப்பம் வழியாக மடுகரை செல்லும் பேருந்தில் ஏறி, ஏம்பலம் என்ற இடத்தில் இறங்கவேண்டும். அங்கிருந்து சுமார் 1 கி.மீ. சென்றால் கோயிலை அடையலாம். ஆட்டோ வசதியும் இருக்கிறது. கடலூரிலிருந்து வருவதானால், கன்னியக்கோயில், பாகூர் வழியாக விழுப்புரம் செல்லும் பேருந்தில் ஏறி, தூக்கனாம்பாக்கம் நிறுத்தத்தில் இறங்கவேண்டும். அங்கிருந்து அரை கி.மீ. தொலைவு நடந்துசென்று ஆலயத்தை அடையலாம்.