Published:Updated:

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

ஒட்டுமொத்த விகடனுக்கும் ஒரே ஷார்ட்கட்

Use App
திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)
திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

பிரீமியம் ஸ்டோரி

சின்னபொம்ம அரசர், தஞ்சை அரசர், அப்பய்ய தீட்சிதர், மற்றுமொரு வித்வான் ஆகிய நால்வரும் ஆலய தரிசனத்துக்குச் சென்றார்கள். அங்கே, மூக்கின் மேல் ஆள்காட்டி விரலை வைத்தபடி திகழும் சாஸ்தா விக்கிரகம் குறித்து விளக்கம் கேட்டார்கள்.

“மகான் ஒருவர் வந்து இந்த விக்கிரகத்தின் ரகசியத்தைப் புலப்படுத்துவார். அப்போது, ஆள்காட்டி விரலை மூக்கிலிருந்து சாஸ்தா எடுத்துவிடுவார்” என்று காரணம் கூறப்பட்டது. அரசர்கள், ஸ்ரீதீட்சிரையும் வித்வானையும் நோக்கி, “அந்த ரகசியத்தை வெளிப்படுத்த முடியுமா?’’ எனக் கேட்டார்கள். வித்வான் முந்திக்கொண்டு பதில் சொன்னார்.

“தாம் மகாவிஷ்ணுவுக்குப் பிள்ளையாக, பிரம்மாவுக்குச் சமமானவராக இருந்தும், சிவனுடைய பூதகணங்களுடன் சேர்ந்திருக்கவேண்டியதாக உள்ளதே என்று சிந்திக்கிறது” என்றார். ஊஹூம்! விக்கிரகத்தின் விரல் அப்படியேதான் இருந்தது. அனைவரும் ஸ்ரீதீட்சிதரிடம் விளக்கம் சொல்லும்படி வேண்டினார்கள்.

“ `நான் கயிலாயம் சென்றால் பார்வதியை அம்மா என்று அழைப்பேன். ஆனால், மோகினி வடிவம் எடுத்த என் தாயான மகாவிஷ்ணுவின் மனைவி லட்சுமிதேவியை என்னவென்று சொல்லி அழைப்பது' என்று சிந்திக்கிறது” என விளக்கம் சொன்னார் ஸ்ரீதீட்சிதர்.

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

மறுகணம், விக்கிரகத்தின் மூக்கிலிருந்த விரல் உடனே கீழே இறங்கிவிட்டது. அனைவரும் ஸ்ரீதீட்சிதரைப் பாராட்டிப் புகழ்ந்து பணிந்தார்கள்; அவரிடம் ஆசி பெற்றார்கள். ஸ்ரீதீட்சிதரின் பெருமையும் புகழும் நாளுக்குநாள் அதிகரித்தது; பொறாமையாளர்கள் கூட்டமும் அதிகமானது. அது செயலிலும் இறங்கியது.

ஒருமுறை ஸ்ரீதீட்சிதர் வழிபாட்டுக்காக ஆலயம் சென்றபோது, அவருக்குத் தீர்த்தப் பிரசாதம் அளிக்கும் போது, அதில் விஷத்தையும் கலந்து கொடுக்க ஏற்பாடு செய்தார்கள் பகைவர்கள். ஸ்ரீதீட்சிதரும் அதை வாங்கி அருந்தினார். அவர் கீழே விழுந்துவிடுவார் எனப் பகைவர்கள் நினைத்தனர். ஆனால், ஸ்ரீதீட்சிதர் அருந்திய நஞ்சோ, அவர் கழுத்தோடு நின்றுவிட்டது. நீல கண்டராகக் காட்சியளித்த ஸ்ரீதீட்சிதர் அனைவரையும் மன்னித்து ஆசி வழங்கினார்.

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)



அரசர்கள் தரும் சன்மானங்களை  வலது கையால் பெறுவது புலவர்கள் வழக்கம்; இதை மறுத்து இடது கையால் சன்மானம் பெற்ற புலவரும் உண்டு. அதேபோல், அரசர் களுக்கு வலது கையால் ஆசி வழங்கும் மகான்கள் உண்டு; பதிலாக இடது கையால் ஆசி வழங்கும் மகான்களும் உண்டு. ஸ்ரீதீட்சிதர் 2-வது வகையைச் சேர்ந்தவர். அவர் இடதுகையால்தான் ஆசி வழங்குவார்.

ஒருமுறை, ஸ்ரீதீட்சிதரின் பகைவர்கள் மன்னரிடம் சென்று, “மன்னா! தீட்சிதர் இடது கையால் உங்களுக்கு ஆசி வழங்கி, உங்களை அவமானப்படுத்துகிறார்” என்றார்கள்.

ஸ்ரீதீட்சிதரைப் பற்றி நன்கு அறிந்திருந்த அரசர், அவர்களுக்கு ஸ்ரீதீட்சிதரின் மேன்மையை உணர்த்த விரும்பினார். ஆகவே, அவர்களையும் அழைத்துக்கொண்டு ஸ்ரீதீட்சிதரிடம் சென்றார். அவர்களது வருகையின் நோக்கத்தைப் புரிந்து கொண்ட ஸ்ரீதீட்சிதர், மன்னரின் படத்தைக் கொண்டு வரச் சொன்னார்.

அரசரின் படம் வந்ததும், அதை முன்னால் வைத்து, அதற்கு வலது கையால் ஆசி வழங்கினார். ‘குப்’பென்று தீப்பற்றி எரிந்து சாம்பலானது அந்தப் படம். பார்த்தவர்கள் பயந்து நடுங்கினர்; உண்மையை உணர்ந்தனர்.

ஏற்கெனவே, ஸ்ரீதீட்சிதர் மீது பகைமை பாராட்டிய வித்வான் பார்த்தார்... “ஊஹூம்! கதையை முடித்துவிட வேண்டியதுதான்” எனத் தீர்மானித்து, ஸ்ரீதீட்சிதரைக் கொல்வதற்கு ஆட்களை ஏற்பாடு செய்தார்.

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

ஒருநாள் நீராடப் புறப்பட்டார் ஸ்ரீதீட்சிதர். சதிச் செயல் குறித்து விவரம் அறிந்திருந்தவர், ‘மார்கபந்து ஸ்தோத்ரம்’ எனும் துதியைப் பாடி சிவபெருமானைத் தியானித்து வணங்கிவிட்டுப் புறப்பட்டார். வழியில் கொலைஞர்களும் தயாராக நின்றார்கள். ஆனால் அவர்கள் ஸ்ரீதீட்சிதரைக் கொல்லவில்லை. காரணம்?

ஸ்ரீதீட்சிதரைச்  சுற்றி சூலாயுதங்கள் தாங்கியபடி பலர் வருவது, கொலையாளிகளின் கண்களுக்குத் தெரிந்தது. அவ்வளவுதான்! ஆயுதங்களைக் கீழே வீசிவிட்டு, ஸ்ரீதீட்சிதரின் திருவடிகளில் விழுந்து வணங்கி, தங்களை ஏவியவர் யார் என்று கூறி, தங்களை மன்னிக்கும்படி வேண்டினார்கள்.

“தான் கெட்டுப் போவதுடன், அடுத்தவர் நெஞ்சிலும் நஞ்சை விதைக்கிறார்களே இவர்கள்!” என மனம் வருந்திப் பரமேஸ்வரனிடம் முறை யிட்டார் ஸ்ரீதீட்சிதர். அதன் பலனாக, இடி விழுந்து மாண்டனர் பகைவர்  எனும் தகவலும் உண்டு.

ஸ்ரீதீட்சிதரின் வாழ்வில் நாம் பார்த்தவை ஒரு சிலவே. வாழ்க்கையில் ஒருசில எதிர்ப்புகள் எழுந்தாலே, துவண்டு விழும் நமக்கு, போராட்டங் களையே வாழ்க்கையாகக் கொண்ட ஸ்ரீதீட்சிதரின் வாழ்க்கை, பெரும் பாடமாக அமைகிறது.

தன்னை எதிர்ப்பதையே நிலையாகக் கொண்டவர்களிடம்கூட, பகைமை பாராட்டாமல் இறைவனின் திருவருள் ஒன்றை மட்டுமே துணையாகக் கொண்டு வெற்றி பெற்ற ஸ்ரீதீட்சிதர் 72-ம் வயதில் நடராஜப் பெருமானின் திருவடிகளில் இரண்டறக் கலந்தார்.

வேதங்களிலும் சாஸ்திரங்களிலும் பெரும் திறமை பெற்ற ஸ்ரீதீட்சிதர், ஏறத்தாழ 104- நூல்களை இயற்றியிருக்கிறார். இவர் இயற்றிய மார்கபந்து ஸ்தோத்ரம், இன்றும் பலரின் பயணங்களின் போது, பாராயண நூலாக உள்ளது.

ஸ்ரீதீட்சிதருக்கு, அரசர் சின்னபொம்மன் கனகாபிஷேகம் செய்விக்க, அந்தச் செல்வத்தைக் கொண்டு அடையபலத்தில் ஸ்ரீபார்வதி அம்பாள் சமேத காலகண்டேசுவரர் ஆலயத்தையும்; ஸ்ரீமகாதேவீ சமேத வரதராஜ சுவாமி ஆலயத்தை யும் ஸ்ரீதீட்சிதர் நிறுவினார்.

தன் அருள் வாக்கினால் அவ்வப்போது ஸ்ரீதீட்சிதரைப் பற்றி வெளியிட்டு வந்த, காஞ்சி ஸ்ரீமகா சுவாமிகள் ஏற்பாட்டின் பேரில் 16.3.60 அன்று அடையபலம் அருள்மிகு பார்வதி அம்பாள் சமேத அருள்மிகு காலகண்டேசுவரர் ஆலயம், கும்பாபிஷேகம் செய்விக்கப்பட்டது.

அங்கு அதேநாளில் ஸ்ரீமகாசுவாமிகள், ‘ஸ்ரீஆசார்ய தீக்ஷித கோசம்’ எனும் பெயரில் ஒரு நூல் நிலையம் ஏற்படுத்தினார். அத்துடன்,  ஸ்ரீதீட்சிதர் இயற்றிய ‘ந்யாய ரக்ஷாமணி’ முதலான நூல்களை மடத்திலிருந்து அளித்தும், ஸ்ரீகாமகோடி கோசஸ்தானம் எனும் பத்திரிகை அலுவலகத் திலிருந்து பல நூல்களைக் கொடுக்கும்படிச் செய்தும் அருள்புரிந்தார்.

காஞ்சி ஸ்ரீமகாசுவாமிகள் அருளாணைப்படி, வருடந்தோறும் ஸ்ரீஅப்பய்ய தீட்சிதர் ஜயந்தி விமர்சையாகக் கொண்டாடப்படுகிறது.

சென்னை - வேளச்சேரியில் சில காலம் இருந்த ஸ்ரீதீட்சிதர்  திருவான்மியூர் முதலான திருத்தலங் களைத் தரிசித்ததாகவும், ஸ்ரீதீட்சிதருக்காக திருவான்மியூர் ஈசன், மேற்காகத் திரும்பினார் என்றும் வரலாறுகளும் உள்ளன.

அடையபலம், திருவிரிஞ்சை முதலான தலங்களுக்குச் சென்று, ஸ்ரீதீட்சிதர் ஏற்படுத்திய ஆலயங்களைத் தரிசிப்போம். நமக்கும் திருவருள் ஸித்திக்கும்.

- திருவருள் பெருகும்...

- சொல்லின் செல்வன் பி.என்.பரசுராமன்

படங்கள்: க.முரளி

திருவருள் செல்வர்கள்! - 13 - ஸ்ரீஅப்பய்ய தீட்சிதர் (தொடர்ச்சி)

துன்பங்கள் தீர்க்கும் துர்கா சந்திர கலா ஸ்துதி!

காந்தார மத்ய த்ருடலக்ன தயாவஸந்நா:
மக்னாச்ச வாரிதி ஜலே ரிபுபிச்ச ருத்தா:
யஸ்யா: ப்ரபத்ய சரணௌ விபதஸ்தரந்தி
ஸா மே ஸதாஸ்து ஹ்ருதி ஸர்வ ஜகத்ஸவித்ரீ


கருத்து: நடுக்காட்டில் அகப்பட்டுக்கொண்டு வழி தெரியாமல் தவிக்கின்றவர்களும், கடல் நீரில் மூழ்கி வெளிவர முடியாமல் திணறுகின்றவர்களும், எதிரிகளால் சூழப்பட்டவர்களும்,  எந்த அம்பாளின் திருவடிகளைச் சரணடைந்து அந்த ஆபத்துகளில் இருந்து விடுபடுகிறார்களோ... உலகத்தைப் படைத்த அந்த அம்பிகை எப்போதும் என் மனதில் இருக்கவேண்டும்.

நிலத்திலும் நீரிலும் நமக்கு ஏற்படக்கூடிய துயரங்களிலிருந்து விடுவித்து, அருள்மழை பொழிபவள் அம்பாள்.

ஸ்ரீஅப்பய்ய தீட்சிதர் அருளிய துர்கா சந்திர கலா ஸ்துதிப் பாடல் இது. இந்த நவராத்திரி புண்ணிய காலத்தில் ஒவ்வொரு நாளும் பூஜையின்போது இந்தப் பாடலைப் பாடி அம்பாளை வழிபட்டால், துன்பங்கள், சத்ருபயம், தீவினைகள் ஆகிய அனைத்தும் விலகும்; நினைத்த காரியங்கள் நினைத்தபடி நிறைவேறும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு