Published:Updated:

உயர்வு உன்னதம்... உத்திரம்!

உயர்வு உன்னதம்... உத்திரம்!
பிரீமியம் ஸ்டோரி
உயர்வு உன்னதம்... உத்திரம்!

நட்சத்திர குணாதிசயங்கள்

உயர்வு உன்னதம்... உத்திரம்!

நட்சத்திர குணாதிசயங்கள்

Published:Updated:
உயர்வு உன்னதம்... உத்திரம்!
பிரீமியம் ஸ்டோரி
உயர்வு உன்னதம்... உத்திரம்!

சூரிய பகவானின் அம்சத்தில் வந்த இரண்டாவது நட்சத்திரம். `உத்திரத்தில் பிள்ளை பெற்றால் உறியில் சோறு’ என்பார்கள். கட்டடத்துக்கு வலு சேர்க்கும் உத்திரத்தைப் போல நீங்கள் பெற்றோருக்கு உறுதுணையாக எப்போதும் இருப்பீர்கள்.

உயர்வு உன்னதம்... உத்திரம்!

இந்த நட்சத்திரத்தில் பிள்ளையிருந்தால் வீடு சுபிட்சம் அடையும் என்று முன்னோர்கள் கூறினர். இந்த நட்சத்திரத்தின் முதல் பாதம் சிம்ம ராசியிலும் 2,3,4-ம் பாதங்கள் கன்னி ராசியிலும் அமைந்திருக்கின்றன. நட்சத்திர மாலை, ‘அழகிய நடையனாகும், அரிவையர் தம்மைப் பேணும், பழகினார் தமக்கு நல்லான், பழியது பார்த்து வாழும்...’ என்கிறது. அதாவது, கம்பீரமாக நடப்பவனாகவும் அருகிலிருப்பவர்களை, பெண்களை நேசிப்பவனாகவும் வாழ்க்கையில் பெருஞ் செல்வம் சேர்ப்பவனாகவும் இருப்பான் என்று  இந்த நட்சத்திரக்காரர்களின் குணங்களைப் பற்றிக் கூறுகிறது.

ஜாதக அலங்காரம், ‘கையாத உரையன், முன்கை வலியன், வித்தை உளன், அழகாங் கண் வாய்...’ என்று கூறுகிறது. அதாவது, `இதமாகப் பேசுவீர்கள்; முன் கை பலவானாகவும், கல்வி கேள்விகளில் சிறந்தவர்களாகவும், முன்கோபியாகவும் இருப்பீர்கள்’ என்கிறது. பிருகத் ஜாதகம், ‘ஸுபகோ...போகி...’ என்கிறது. அதாவது நீங்கள் சர்வ ஜனப் பிரியன். போகமுள்ளவர்; துக்கமில்லாதவர் நீங்கள். யவன ஜாதகம், `நீங்கள் சத்ருக்களை வெல்பவராகவும், வேத சாஸ்திரம் அறிந்தவர்களாவும் இருப்பீர்கள். மனோ சக்தி வாய்ந்தவர்களாகவும் உண்மை பேசுபவர்களாகவும் இருப்பீர்கள்’ என்று கூறுகிறது.

நீங்கள் வல்லவனுக்கு வல்லவனாகவும் கல்விமானாகவும் விளங்குவீர்கள். உங்களில் சிலர் கவி, காவிய ஆராய்ச்சி செய்பவர்களாக இருப்பார்கள். சில செயல்களைத் தன்னால் மட்டும்தான் செய்ய முடியும், வேறு யாராலும் செய்ய முடியாது என்று எண்ணுவீர்கள். உங்களைக் கண்டவர்கள் மீண்டும் மீண்டும் உங்களைக் காண ஆசைப்படும் அளவுக்கு வசீகரமான தோற்றத்தை பெற்றிருப்பீர்கள். உடலைக் கட்டுக்கோப்பாக வைத்திருப்பீர்கள். உங்கள் முகத்திலும் மார்பிலும் மச்சமிருக்கும். நடையில் நளினமும் அழகும் இருக்கும்.

பூர்வீகச் சொத்துகளைப் பெற்றிருப்பினும் சொந்த முயற்சியால் வீடு, வாகனம் ஆகியவற்றை வாங்குவீர்கள். ஆடம்பரப் பொருட்களை சேகரிப்பீர்கள். கால்நடைகளையும் கறவை மாடுகளையும் வீட்டில் வளர்க்கும் அளவுக்கு நீங்கள் அன்புடையவர்கள். நயவஞ்சகம் அறியாதவர். பெண் நண்பர்களை கவர்வதற்காக இனிமையாகப் பேசுவீர்கள். குறைகளைக் கண்டால் யோசிக்காமல் முகத்தில் அடித்தாற் போல் பேசிவிடுவீர்கள். உண்மை பேசக்கூடிய நீங்கள் எந்த சூழ்நிலையிலும் தடம் மாற மாட்டீர்கள்.

அடிக்கடி பசியுடையவர்களாக இருக்கும் நீங்கள், கொஞ்சம் கொஞ்சமாக உண்பவர்களாகவும் இருப்பீர்கள். `கலையில் ஆர்வம் உள்ளவர்களாகவும் மிகச் சிறந்த சிந்தனாவாதியாகவும் திகழ்வீர்கள்’ என்று நந்தி வாக்கியம் கூறுகிறது. அனுபவ அறிவு அதிகம் உடைய நீங்கள் இளமையில் வறுமைக்கோட்டில் வாழ்ந்தாலும் முதுமையில் அனைத்து வசதி வாய்ப்புகளையும் பெற்று வாழ்வீர்கள். இலக்கிய அறிவும் வேத ஞானமும் உங்களிடம் இருக்கும்.

தெய்வத்தைப் பற்றிப் பேசக்கூடியவர்களாக இருப்பீர்கள். அனல் பறக்கும் உங்கள் பேச்சால் எதிரிகள் தவிடுபொடியாவார்கள். முதல் முப்பது வயதைக் காட்டிலும் இரண்டாவது முப்பதில் அதிக செல்வம், செல்வாக்கு ஆகியவை உங்களை வந்தடையும்.

எவரையும் அலட்சியம் செய்ய மாட்டீர்கள். சிக்கனவாதிகளான நீங்கள், சுயமதிப்பும் கண்ணியமும் உடையவர்களாக இருப்பீர்கள். தன்னலத்தைக் கருதாது பிறர் நலனுக்குப் பாடுபடும் உங்களிடம் தர்ம சிந்தனை நிறைந்திருக்கும். ஞானத்தோடு சூரத்தனமும் உடையவர்களாக இருப்பீர்கள்.

பெரிய வியாபாரம் அல்லது பெரிய நிறுவனத்தை நடத்தும் எஜமானர்களாக இருப்பீர்கள். யார் மனதையும் புண்படுத்தமாட்டீர்கள். உற்றார் உறவினர் மேல் நீங்கள் பாசமும் நேசமும் கொண்டவர்கள். ஜோதிடக் கலையில் ஆர்வமும் சமயம், சாஸ்திரம், வேதம் ஆகியவற்றில் அதிக ஈடுபாடு கொண்டவர்களாகவும் இருப்பீர்கள்.

உயர்வு உன்னதம்... உத்திரம்!

முதல் பாதம்

(சூரியன் + சூரியன் + தனுசு குரு)

ந்தப் பாதத்தில் பிறந்தவர்கள், செய்யும் ஒவ்வொரு வேலையிலும் அவர்களுடைய நுணுக்கம் வெளிப்படும். அரசாங்கத்தில் பெரிய பதவிகளை வகிப்பார்கள். வசதியான வாழ்க்கை வாழ்வார்கள். அவ்வப்போது துறவறம் பற்றியும் யோசிப்பார்கள். தங்களின் மதிப்பை வெளிக்காட்டிக்கொள்ள முக்கியஸ்தர்களுடன் நட்புறவாடுவார்கள். அவர்களுடன் பொது நிகழ்ச்சிகளில் கலந்துகொள்வார்கள். கனிவான பேச்சால் அனைவரையும் கவர்வார்கள்.

தன் வீடு சுத்தமாக இருந்தால் போதுமென்று நினைக்காமல், தான் வாழும் தெருவையும் தூய்மையாக வைத்துக்கொள்வார்கள். தன் கண் முன்னே எந்தத் தவறு நடந்தாலும் நியாயம் கேட்பார்கள். சொந்தபந்தங்களை அரவணைத்துப் போவார்களே தவிர அவர்களிடமிருந்து ஒரு துரும்பைக்கூட எதிர்பார்க்கமாட்டார்கள். சிலர், சிறு வயதிலேயே தாயையோ தந்தையையோ  ஒருவரை இழக்க வேண்டி வரும். அல்லது விடுதியில் தங்கிப் படிக்க வேண்டி வரும்.

ஆன்மீக நாட்டம் அதிகமுள்ளவர்கள். கோயில் சிற்பக்கலையை ரசிப்பதுடன் பழைய கோயிலைச் சீரமைக்கவும் முயல்வார்கள். 24 வயதிலிருந்தே முன்னேற்றப் பாதை தென்படும். 43 வயதிலிருந்து தொடர் வெற்றி கிட்டும். மருத்துவமனை, சுற்றுலா, நீதிமன்றம், சட்டசபை, பாராளுமன்றம், வங்கி இவற்றில் ஏதாவது ஒரு துறையில் பணிபுரிவார்கள். நன்கு வாழ்வார்கள்.

பரிகாரம்: காஞ்சிபுரத்துக்கு மேற்கே இருக்கும் திருப்பனங்காட்டில் கோயில் கொண்டிருக்கும் ஸ்ரீபனங்காட்டீஸ்வரரை வணங்கி வருவதால், சிறப்பான பலன்கள் கிடைக்கும்.

இரண்டாம் பாதம்

(சூரியன் + புதன் + மகர சனி)

ரண்டாம் பாதத்துக்கு நவாம்ச அதிபதி மகர சனி. இதில் பிறந்தவர்கள் தொன்றுதொட்டு வரும் பண்பாட்டுக் கலைச் சின்னங்களைச் சேகரித்து வைப்பார்கள். எதிலும் கலை நயத்தை விரும்புவார்கள். வீட்டை ரசித்துக் கட்டுவார்கள்.

இவர்கள் காதலை விரும்புவார்கள். ஆனால் சிலருக்குத்தான் காதலியே மனைவியாகும் யோகமுண்டு. சில நேரங்களில் பழைய காதலை மனதில் அசை போடுவார்கள். குடும்பத்தில் உள்ளவர்களுடன் கலகலப்பாகப் பேசுவார்கள். சிறிய வயதில் பிடிவாதமாக இருப்பார்கள். மற்றவர்கள் செய்ய தயங்கும் கடினமான வேலைகளைக்கூட இவர்கள் சர்வசாதாரணமாக செய்து முடிப்பார்கள். எந்நேரமும் கதை, கவிதை என்று சிந்திக்கும் இவர்கள் அவ்வப்போது கற்பனைக் கடலில் மிதப்பார்கள்.

பணம் இவர்கள் வாழ்வில் ஏற்ற இறக்கமாகவே இருக்கும். சிலர் தொழிற்கூடங்கள் வைத்து நடத்துவார்கள். கதாசிரியர், தனியார் கல்வி நிறுவன நிர்வாகம், தபால் துறை ஆகிய பணியில் இருப்பார்கள். 37 வயதிலிருந்து வசதி வாய்ப்புகள் பெருகும்.

பரிகாரம்: வேலூருக்கு மேற்கே இருக்கும் விரிஞ்சிபுரத்துக்கு ஒருமுறை சென்று, அங்கே கோயில்கொண்டிருக்கும் ஸ்ரீமரகதவல்லி உடனுறை ஸ்ரீவழித்துணைநாதரை வணங்கி வழிபட்டு வாருங்கள்; நன்மைகள் பெருகும்.

மூன்றாம் பாதம்

(சூரியன் + புதன் + கும்ப சனி)

மூன்றாம் பாதத்துக்கு நவாம்ச அதிபதி கும்ப சனி. இதில் பிறந்தவர்கள் உண்மை பேசுபவர்களாகவும் எதையும் கடின உழைப்பால் அடைபவர்களாகவும் ஆசாரமுடையவர்களாகவும் இருப்பார்கள். கால்நடைகளை விரும்பி வளர்ப்பார்கள். மனைவி, பிள்ளைகளின் சுதந்திரத்தில் தலையிடமாட்டார்கள். உரிமையையும் கொள்கையையும் யாருக்காகவும் விட்டுக்கொடுக்க மாட்டார்கள்.

பொதுவாக சாந்தமாகத்தான் இருப்பார்கள். ஆனால் சில நேரங்களில் உணர்ச்சிவசப்பட்டு விடுவார்கள். பாதையில் நடந்து செல்லும்போது கல், முள் கிடந்தால், அவற்றை அப்புறப்படுத்திவிட்டுச் செல்லுமளவுக்கு பொதுச் சிந்தனை உடையவர்கள்.

குழந்தைப் பருவத்திலேயே இவர்களிடம் ஒரு முதிர்ச்சி தெரியும். காராமணி, ஜிலேபியை விரும்பி உண்பார்கள்; அதேநேரம் பாகற்காயையும் பதம் பார்ப்பார்கள். முதியோர் இல்லம், அனாதை ஆசிரமம், மகளிர் விடுதி, தட்டச்சு, சுருக்கெழுத்துப் பயிலகம் ஆகியவற்றை நடத்துவார்கள். 

24, 27, 32, 33 வயதுகளில் திடீர்த் திருப்பங்கள் ஏற்படும். 41 வயதிலிருந்து சமூகத்தில் அந்தஸ்தைப் பெறுவார்கள். அந்த வயதில் வசதி வாய்ப்புகள் சேரும்.

பரிகாரம்: ஸ்ரீவைகுண்டத்துக்கு அருகிலுள்ள திருக்குளந்தை அதாவது பெருங்குளம் எனும் ஊரில் வீற்றிருக்கும் ஸ்ரீகுளந்தைவல்லித் தாயார், ஸ்ரீஅலமேலு மங்கைத் தாயார் உடனுறை ஸ்ரீசோரநாதப் பெருமாளை வணங்குதல் நலம்.

நான்காம் பாதம்

(சூரியன் + புதன் + குரு)

நான்காம் பாதத்துக்கு நவாம்ச அதிபதி குரு. இதில் பிறந்தவர்கள் செய்நன்றி மறவாத குணமுடையவர்கள். பிறரை அதிகமாக மதிக்கமாட்டார்கள். தான் என்ற கர்வம் கொண்டவர்கள். கடுஞ்சொற்களைப் பேசுபவராக இருப்பர்.

குடும்பத்தில் முக்கியமான ஒருவரைத் தங்கள் சிறு வயதில் இழப்பார்கள். பம்பரம் போலச் சுழன்று வேலை செய்யக்கூடியவர்கள். நேர்மையாக சம்பாதித்து வாழ்வில் உயரும் குணமுடையவர்கள். சமயப் பற்று, இனப் பற்றை ஒருபோதும் விட்டுக்கொடுக்க மாட்டார்கள். கல்வி - கேள்விகளில் சிறந்து விளங்குவார்கள். எடுத்த பணியில் முத்திரையைப் பதிக்கும்விதமாக செய்து முடிப்பார்கள்.

கொள்கைகளை அநாவசியமாக விட்டுக்கொடுக்க மாட்டார்கள். குடும்பத்திலுள்ளவர்களிடம் மிகையான பாசமும் நேசமும் கொண்டிருக்கும் இவர்கள் தாய், தந்தையை தெய்வமாக மதிப்பார்கள். வீட்டில் சாப்பிடுவதைக் காட்டிலும் விருந்து, விசேஷங்களில் சாப்பிடுவதையே விரும்புவார்கள். 27, 30 வயதுகளில் அதிரடி மாற்றம் நிகழும். 39 வயதிலிருந்து பெரிய பதவிகள் நாடி வரும்.

பரிகாரம்: சென்னை- திருவலிதாயத்தில் (பாடி) கோயில் கொண்டிருக்கும் ஸ்ரீதாயம்மை உடனுறை ஸ்ரீவல்லீசர் எனும் திருவலிதாயநாதரை வணங்குதல் நலம்.

-‘ஜோதிட ரத்னா’ முனைவர்  கே.பி.வித்யாதரன்

இந்த நட்சத்திரத்தில் பிறந்தவர்கள்...

ஸ்ரீமகாலட்சுமி, தேவகுருவான பிரகஸ்பதி, கவியோகி சுத்தானந்த பாரதியார், மகாவீரர், சாரதாதேவி,ஹடயோகி எல்.எஸ்.ராய், சுவாமி விவேகானந்தர், லால் பகதூர் சாஸ்திரி, அண்ணாதுரை ஆகியோர் இந்த நட்சத்திரத்தில் பிறந்தவர்கள்.

உத்திர நட்சத்திரத்தில்...

திருமணம், தாலிக்குப் பொன் உருக்குதல், பூ முடித்தல், தெய்வ பிரதிஷ்டை, விதை விதைத்தல், சீமந்தம், புதுமனை புகுதல், தொட்டிலில் குழந்தையை விடுதல், புது வேலைக்கு விண்ணப்பித்தல், புது வேலையில் சேருதல், வியாபாரம் தொடங்குதல், புதிய ஆடை, அணிகலன் அணிதல், வாகனம் வாங்குதல், வியாதிக்கு மருந்துண்ணல், ஆயுதப் பிரயோகம் பயிற்றுவித்தல், குளம், கிணறு வெட்டுதல், தானியம் செலவிடுதல், கதிரறுத்தல் ஆகிய விஷயங்களை இந்த நட்சத்திரத்தில் செய்தால் நன்மை பயக்கும்.

பரிகார ஹோம மந்திரம்

ச்ரேஷ்டோ தேவானாம் பகவோ பகாஸி
தத்த்வா விது: பல்குனீஸ்தஸ்ய வித்தாத்
அஸ்மப்ப்யம் க்ஷத்ரம ஜரஹும் ஸவீர்யம்
கோமதச்வவதுபஸந்நுதேஹ
பகோ ஹ தாதா பக இத் ப்ரதாதா
பகோ தேவீ: பல்குனீராவிவேச
பகஸ்யேத்தம் ப்ரஸவங் கமேம
யத்ர தேவைஸ்ஸதமாதம் மதேம

உத்திர நட்சத்திரம்

நட்சத்திர தேவதை:    தேவர்களில் ஒருவரும், பத்ரி நாராயணனின் அம்சமுமான பகன்.

வடிவம் : கட்டில் கால்களைப் போன்ற வடிவத்தில் இரண்டு பிரதான நட்சத்திரங்கள் சேர்ந்த கூட்டம்.

எழுத்துகள்    : டே, டோ, ப, பி.

ஆளும் உறுப்புகள்  : 1-ம் பாதம் - முதுகெலும்புப் பகுதி; 2, 3, 4-ம் பாதங்கள் - குடல், சிறுநீர்ப்பை, கல்லீரல்.

பார்வை    : மேல்நோக்கு.

பாகை    : 146.40 - 1600.

நிறம்    : சிவப்பு.

இருப்பிடம்    : சூன்யம்.

கணம்    : மனுஷ கணம்.

குணம்    : உறுதி.

பறவை    : கிளுவை.

மிருகம்    : எருது.

மரம்    : பாலுள்ள அலரி.

மலர்    : தங்க அரளி.

நாடி    : தட்சிண பார்சுவ நாடி.

ஆகுதி    : எள், உளுந்து.

பஞ்சபூதம்    : ஆகாயம்.

நைவேத்யம் : எள் சாதம்.

தெய்வம்    :  ஸ்ரீமகாலட்சுமி.

சொல்ல வேண்டிய மந்திரம்

ஓம் மஹாதேவ்யை ச வித்மஹே
விஷ்ணுபத்ன்யை ச தீமஹி
தன்னோ லக்ஷ்மி: பிரசோதயாத்

அதிர்ஷ்ட எண்கள்    : 1, 5, 6.

அதிர்ஷ்ட நிறங்கள்    : மெரூன், வெளிர்ப் பச்சை.

அதிர்ஷ்ட திசை    : வடகிழக்கு.

அதிர்ஷ்டக்
கிழமைகள்        :
புதன், ஞாயிறு.

அதிர்ஷ்ட ரத்தினம்    : பச்சைக் கல் (ஜேட்)

அதிர்ஷ்ட உலோகம்    : பிளாட்டினம்.