Published:Updated:

நாரதர் உலா - அடைக்கப்பட்டதா திருக்கோயில் பிராகாரம்?

ஒட்டுமொத்த விகடனுக்கும் ஒரே ஷார்ட்கட்

Use App
நாரதர் உலா - அடைக்கப்பட்டதா திருக்கோயில் பிராகாரம்?
நாரதர் உலா - அடைக்கப்பட்டதா திருக்கோயில் பிராகாரம்?

நாரதர் உலா - அடைக்கப்பட்டதா திருக்கோயில் பிராகாரம்?

பிரீமியம் ஸ்டோரி

விபூதி மணக்க அறைக்குள் பிரவேசித்தார் நாரதர். என்ன ஏதென்று நாம் கேட்பதற்குமுன், பையிலிருந்து மிகப் பவ்யமாக எடுத்து நீட்டினார் விபூதிப் பிரசாதத்தை. நாமும் பயபக்தியோடு விபூதியை நெற்றியில் இட்டுக்கொள்ள, ``திருவிடைமருதூர்ப் பிரசாதம்...’’ என்று முன்னோட்டம் தந்துவிட்டு, “குறுக்கே பேசாமல் நான் சொல்வதை மட்டும் உன்னிப்பாகக் கேளும்’’ என்று உத்தரவு போட்டபடி, தாம் கொண்டுவந்த தகவலைக் கொட்டத்  தொடங்கினார்.

நாரதர் உலா - அடைக்கப்பட்டதா திருக்கோயில் பிராகாரம்?

நாமும் நாரதரின் ஆணையைச் சிரமேற்கொண்டு, எவ்வித குறுக்கீடும் செய்யாமல் பேச்சைக் கவனிக்கத் தொடங்கினோம்.

‘‘கும்பகோணம் அருகேயுள்ள சிவத் திருத்தலம் திருவிடை மருதூர். மருத மரத்தைத் தலவிருட்சமாகக் கொண்ட மூன்று கோயில்கள்தான் இந்தியாவில் இருக்கின்றன. அவற்றில் ஒன்று `இடை மருதூர்’ எனப்படும் இந்தத் திருவிடைமருதூர்.

மகாலிங்கேஸ்வரர் கோயில் கொண்டிருக்கும் ஊர்; பாடல் பெற்ற ஸ்தலம். 32 தீர்த்தங்களைக்கொண்டு திகழ்வது இக்கோயிலின் ஒரு சிறப்பென்றால், கொல்லூருக்கு அடுத்து அம்பாள் மூகாம்பிகைக்கு சந்நிதி அமைந்திருப்பது இங்கு மட்டுமே என்பது மற்றொரு சிறப்பு. மட்டுமின்றி இங்குள்ள பிராகாரங்களுக்கும் விசேஷம் உண்டு’’ என்றவர், சற்று நிதானித்துவிட்டு மீண்டும் தொடர்ந்தார்.

‘‘ஏழு பிராகாரங்களைக் கொண்ட இந்தக் கோயிலில் கருவறையைச் சுற்றியுள்ள பிராகாரத்தை வலம் வந்தால் மோட்சம் கிடைக் கும் என்பதும், `அஸ்வமேத பிராகாரம்’ எனப்படும் வெளிப் பிராகாரத்தை வலம் வந்தால் அஸ்வமேத யாகம் செய்த பலன் கிடைக்கும் என்பதும், இரண்டுக்கும் இடையிலுள்ள கொடுமுடி பிராகாரத்தை வலம் வந்தால், சிவபெருமானின் கயிலையையே வலம் வந்து வழிபட்ட புண்ணியம் கிடைக்கும் என்பதும் ஐதீகம்.

நாரதர் உலா - அடைக்கப்பட்டதா திருக்கோயில் பிராகாரம்?

இப்படியான புனிதம் வாய்ந்த கொடுமுடி பிராகாரத்தில் சினிமா படப்பிடிப்பு நடத்த அனுமதி வழங்கியது குறித்துதான் பெரும் சர்ச்சை எழுந்திருக்கிறது பக்தர்கள் மத்தியில்’’ என்று நிறுத்தியவர், ‘இனி குறுக்கிடலாம்’ என்பதுபோல் நம்மைப் பார்த்தார். நாம் எதுவும் கேட்கவில்லை; முழு விவரங்களையும் அவரே சொல்லட்டும் என்று அமைதியைத் தொடர்ந்தோம்.

அதைப் புரிந்துகொண்டவராக மேலும் பேசத் தொடங்கினார் நாரதர்: ‘`அனுமதியின்றி திருக்கோயிலில் புகைப்படங்கள் மற்றும் வீடியோக்கள் எடுக்க கோயில் நிர்வாகம் தடைவிதித்திருக்கும் நிலையில், ஆலயத்தின் மிக முக்கியத்துவம் வாய்ந்த புனிதமான கொடுமுடி பிராகாரத்தில் சினிமாப் படங்கள் எடுக்க அனுமதி தந்திருப்பதாகவும், படப்பிடிப்பு நடைபெறும் நேரங்களில் நிம்மதியாக வழிபாடு செய்ய முடியவில்லை என்றும் பக்தர்கள் வருத்தத்துடன் கூறுகிறார்கள். மட்டுமின்றி, கொடுமுடி பிராகாரத்தை பக்தர்கள் வலம் வர முடியாதபடி அடைத்து வைத்திருக்கிறார்கள் என்றும் குறைபட்டுக் கொள்கிறார்கள் பக்தர்கள் தரப்பில் மேலும் ஆகமம் மற்றும் கோயிலின் புனிதம் பற்றிக் கவலைப் படாமல் படப்பிடிப்புக் குழுவினர் நடந்துகொள்ளும்விதம் முகம்சுளிக்கச் செய்வதாகவும் ஆதங்கப்படுகிறார்கள் பக்தர்கள்.திருவாவடுதுறை ஆதீனத்தின் நிர்வாகத்திலுள்ள இந்தக் கோயிலில், பணத்துக்கு ஆசைப்பட்டுப் படப்பிடிப்பு நடத்த அனுமதிப்பது சரியாகுமா என்றும் கேட்கிறார்கள். இது இப்படியென்றால், வேறுசில பிரச்னைகளைப் பட்டியலிடுகிறார்கள்’’ என்றார் நாரதர்.

நாரதர் உலா - அடைக்கப்பட்டதா திருக்கோயில் பிராகாரம்?

‘`வேறென்ன பிரச்னைகள்..?’’

‘`தினமும் இறைவனுக்குச் சாத்தப்படும் மலர்களைக் கொடுக்கும் நந்தவனம் சரியாகப் பராமரிக்கப்படுவது இல்லையாம்.’’

‘`இதுகுறித்து கோயில் நிர்வாகத்தினரிடம் பேசினீரா?’’

‘‘முதலில் திருக்கோயிலின் சந்திரசேகர சிவாசார்யரிடம் பேசினேன். ‘இந்தக் கோயிலில் பட்டினத்தார் வாழ்க்கையைப் படம் எடுத்தார்கள். அப்போதுகூட, கோயிலின் புனிதம் கருதி, வெளிப்பிராகாரத்தில்தான் எடுத்தார்கள். ஆனால், இப்போது அப்படியல்ல. கொடுமுடி பிராகாரம் வரையிலும் அனுமதிக்க அவசியம் இல்லையே’ என்றார் அவர். தொடர்ந்து நாம், திருவாவடுதுறை ஆதீனம் சார்பில் கோயில் கண்காணிப்பாளராக பணியாற்றும் சுந்தரத்திடம் விசாரித்தேன்.

‘கோயிலுக்குள் சினிமா படப்பிடிப்பு நடத்துவதில் எனக்கு உடன்பாடில்லை. இதற்கு முன் ஆதீன நிர்வாகத்திடம் உத்தரவு பெற்றே படப்பிடிப்பு நடத்தியிருக்கலாம். எந்த இடம் வரை அனுமதி அளிக்கப்பட்டது; அந்த அனுமதி எப்படி பயன்படுத்தப் பட்டது என்பது தெரியவில்லை. நான் சமீபத்தில்தான் மீண்டும் இங்கு பணிக்கு வந்துள்ளேன். இனி கோயிலுக்குள் யாரும் படப்பிடிப்பு நடத்த அனுமதி அளிக்கமாட்டோம்’ எனக் கூறினார் அவர்’’

``அதுசரி, பிராகாரத்தை அடைத்து வைத்திருப்பது ஏனாம்?’’

நாரதர் உலா - அடைக்கப்பட்டதா திருக்கோயில் பிராகாரம்?

‘‘இந்தக் கேள்விக்கும் சுந்தரம் பதில் சொன்னார். `கொடுமுடி பிராகாரத்திலுள்ள சிற்பங்களையும் ஓவியங்களையும் அவற்றின் அருமைபெருமை தெரியாமல் பார்வையாளர்கள் சிதைத்துவிடுவதாகவும், காதலர்கள் அதனைப் பூங்கா மாதிரி பயன்படுத்துவதாகவும் அடுதடுத்துப் புகார்கள் வந்ததால்தான் பூட்டிவைத்துள்ளோம். ஆனாலும், விருப்பப்படும் பக்தர்களுக்கு கோயில் ஊழியர்கள் மூலம் திறந்துவிடுகிறோம். அதேபோல், நந்தவனத்தையும் ஊரிலுள்ள சிலர் தவறான காரியத்துக்குப் பயன்படுத்துவதால் பூட்டி வைத்துள்ளோம். விரைவில் நந்தவனம் மீண்டும் பொலிவுடன் மாற்றியமைக்கப்படும்’ என்றார் அவர்’’ - நாரதர் சொல்லி முடித்ததும் வேறொரு கேள்வியை முன்வைத்தோம்.

‘`தருமபுர ஆதீனத்தின் நிர்வாகத்திலுள்ள சில கோயில்களுக்குப் பல வருடங்களாகவே கும்பாபிஷேகம் நடைபெறவில்லை என்றொரு புகார் வந்தது நமக்கு. அதுபற்றி உம்மிடம் தகவல்கள் உண்டா?’’

‘‘ஆமாம்! தருமபுர ஆதீனத்தின் நிர்வாகத்திலுள்ள  வைத்தீஸ்வரன் கோவில், திருக்கடையூர் அமிர்தகடேஸ்வரர் கோயில், சீர்காழி சட்டைநாதர் கோயில் ஆகிய கோயில்களுக்குப் பல வருடங்களாகவே கும்பாபிஷேகம் நடத்தப்படாமல் உள்ளதாக
ஆன்மிக அமைப்பினர் தரப்பிலிருந்து நம் கவனத்துக்கும் தகவல் வந்தது. இதுகுறித்து விசாரிக்கலாம் என்று தருமபுர ஆதீனத்தின் மேலாளர் மோகனிடம் பேசினோம்.

‘100 ஆண்டுகளுக்கு மேலான பழைமை வாய்ந்த கோயில்களுக்குக் கும்பாபிஷேகம் செய்யவேண்டும் எனில், இணைஆணையர் தலைமையிலான மண்டல கமிட்டியிடம் ஒப்புதல் பெற்று, அதன் பின்னர் கமிஷனர் தலைமையிலான உயர்மட்ட கமிட்டியிடம் ஒப்புதல் பெற்று, இறுதியாக ஐகோர்ட்டு கமிட்டியிடம் ஒப்புதல் பெறவேண்டும் என்று விதி இருக்கிறது.

நாரதர் உலா - அடைக்கப்பட்டதா திருக்கோயில் பிராகாரம்?

நீங்கள் குறிப்பிடும் அனைத்துக் கோயில்களுக்குமான பரிந் துரைகள் மேலிடத்துக்கு அனுப்பப்பட்டுள்ளன. அந்தக் கோயில் களுக்குக் கும்பாபிஷேகம் செய்ய ஆதீன நிர்வாகமும் மிக ஆவலாக இருக்கிறது. விரைவில் உரிய உத்தரவுகள் கிடைக்கும் என நம்புகி றோம்’ என்கிறார் அவர்’’ என்று விவரித்த நாரதர், ஏதோ யோசனை வந்தவராக செல்போனை ஆன்செய்து, வாட்ஸ்அப் பகிர்வுகளில் ஏதோ தகவலைத் தேடினார்.

தேடிய தகவல் கிடைத்ததும் நிமிர்ந்து, ‘‘முக்கியமான தகவல் ஒன்றை உமக்கும் பகிர்ந்திருக் கிறேன்... படித்துப் பாரும்’’ என்ற படியே, நம் பதிலுக்குக் காத்திருக்காமல் புறப்பட்டுவிட்டார்.

நமக்கு நாரதர் அனுப்பிய தகவலைப் பார்த்தோம். சிறுவாபுரி முருகன் கோயில் தொடர்பான பிரச்னைகளைப் பட்டியிலிட்டிருந் தது அந்தத் தகவல்!

- உலா தொடரும்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு