Published:Updated:

சக்தி கொடு! - 2

சக்தி கொடு! - 2
பிரீமியம் ஸ்டோரி
சக்தி கொடு! - 2

சங்கடஹர சதுர்த்தி விரத மகிமை தொடர்ச்சிவி.ஆர்.சுந்தரி ஓவியம்: பத்மவாசன்

சக்தி கொடு! - 2

சங்கடஹர சதுர்த்தி விரத மகிமை தொடர்ச்சிவி.ஆர்.சுந்தரி ஓவியம்: பத்மவாசன்

Published:Updated:
சக்தி கொடு! - 2
பிரீமியம் ஸ்டோரி
சக்தி கொடு! - 2
சக்தி கொடு! - 2

விநாயகரைப் பணிந்து சந்திரன் திருவருள் பெற்ற திருக்கதையை சென்ற அத்தியாயத்தில் பார்த்தோம்.

“சந்திரா! சங்கடங்களைப் போக்கிக்கொள்ள விரும்புபவர்கள், அங்காரக சதுர்த்தியன்று, சந்திர உதயமாகும் காலத்தில் எம்மைப் பூஜித்து, உன்னையும் அர்ச்சித்து வழிபாடு செய்வார்களாக. எம்மை வழிபடும் அனைவரும் உன்னையும் வழிபடும்படியாக, உன் கலைகளில் ஒரு கலை மட்டும் நமது திருமுடி மீது இருந்து வரட்டும்” என்று சந்திரனுக்கு அருள்பாலித்தார் பிள்ளையார்.

சந்திரன் விநாயகரைத் தரிசித்து, சங்கடங்களைப் போக்கும் நாள் என்று விநாயகப் பெருமானாலேயே வரம் பெற்ற அந்த நாள்  தேய்பிறை சதுர்த்தி, செவ்வாய்க்கிழமை.

சக்தி கொடு! - 2

ஒட்டுமொத்த விகடனுக்கும் ஒரே ஷார்ட்கட்!

சரி, அங்காரகனையும்(செவ்வாயை) சேர்த்து, ஐங்கரன் சொல்லக் காரணம் என்ன? அங்காரக சதுர்த்தி என்கிறோமே, ஏன்?

இதுபற்றி தெரிந்துகொள்வோமா?

பரத்வாஜவர் என்றொரு முனிவர். அவருக்கு மகனாக அவதரித்தவரே அங்காரகன். பரத்வாஜர் தன் மகனுக்குக் கணபதி மந்திரத்தை உபதேசித்து, விநாயகரின் அருளை அடையும் வழிமுறைகளையும் கற்பித்தார்.

அதன்படியே அங்காரகன், மந்திர ஜபம் செய்தபடி தவத்தில் ஆழ்ந்தான். விநாயகர் தரிசனம் தந்து, “அங்காரகா! வேண்டும் வரங்களைக் கேள்!” என்றார்.

அங்காரகன், “ஐந்துகரத்து எந்தையே! அடியேன் தங்களை தரிசித்து அருள்பெற்ற செவ்வாய்க்கிழமையும் தேய்பிறை சதுர்த்தியும்  கூடிய இந்த நாளில், தங்களை வழிபடும் அடியார்களின் சங்கடங்களைப் போக்கி, அவர்களுடைய வினைகள் யாவற்றையும் தாங்கள் தீர்த்தருள வேண்டும்!” என்று வேண்டினான்.

“அப்படியே ஆகட்டும்” என்று அருள்பாலித்தார் பிள்ளையார். அத்துடன், அங்காரகன் நவகோள்களில் ஒருவனாகும்படியும் அருளினார்.

இதுதான் கதை. இப்படி சந்திரன், அங்காரகன், புருசுண்டி முனிவர் ஆகியோரைத் தொடர்புபடுத்திச் சொல்லப்பட்ட, சங்கட ஹர சதுர்த்தியின் மகிமை குறித்து, பிரம்மதேவர் இந்திரனுக்கு விவரித்துள்ளார்.

சக்தி கொடு! - 2

கடன்களிலிருந்து மட்டுமின்றி, பித்ருக்கடன் - பித்ரு தோஷம் ஆகிய வற்றிலிருந்தும் விடுதலை அளித்துக் காக்கும் அற்புத விரதம் - சங்கடஹர சதுர்த்தி விரதம்.

இனி, இந்த விரதத்தைக் கடைப்பிடிப்பது எப்படி என்று தெரிந்து கொள்வோம்.

நமது பணமாக இருந்தாலும் வங்கி நிர்வாகம் அறிவுறுத்தியபடி செயல்பட்டால்தானே ‘ஏ.டி.எம்’ - ல் பணம் எடுக்க முடிகிறது? அதுபோல், முன்னோர்கள் வகுத்துத் தந்த சங்கடஹர சதுர்த்தி விரதத்தை, அவர்கள் சொற்படிப் பின்பற்றிச் செய்தால், சங்கடங்கள் விலகி மங்கலங்கள் சேரும் என்பதில் சந்தேகமேயில்லை.

மாசி மாத செவ்வாய்க்கிழமையில் வரும் தேய்பிறை சதுர்த்தியன்று, சங்கடஹர சதுர்த்தி விரதத்தைத் தொடங்கவேண்டும் (அந்தத் தினத்தில் மாலையில், சந்திரோதய காலத்தில் சதுர்த்தி திதி இருக்கவேண்டும்).

அன்று அதிகாலையில் எழுந்து நீராடி விபூதி, குங்குமம் முதலானவற்றை அணிந்து, விநாயகரைத் தியானிக்கவேண்டும். அன்று முழுவதும் உண்ணாமலிருத்தல் நல்லது. 

சங்கடஹர சதுர்த்தியன்று காலையில் பூஜிப்பதுடன், மாலையிலும்  பிள்ளையார் பெருமானைச் சிறப்பாக ஆராதித்து வழிபடவேண்டும். விநாயகரை எழுந்தருளச்செய்து அபிஷேக ஆராதனைகள் செய்யலாம். விக்கிரகமாக இருந்தால் அபிஷேகம் முதலானவை உண்டு; படமாக இருந்தால், அபிஷேகம் கிடையாது.

வழிபடும் பிம்பத்தில் விநாயகரை ஆவாகனம் (எழுந்தருள) செய்து,  பூஜிக்க வேண்டும். அருகம்புல்லால் அர்ச்சித்து, மோதகம், அச்சுவெல்லம், அவல்-பொரிகடலை ஆகியவற்றை நைவேத்தியம் செய்து, பிள்ளையாரை மனதார வழிபடவேண்டும். அதன்பின்னர், சந்திர பகவானுக்கு அர்ச்சனை செய்யவேண்டும். அன்று இரவு முழுதும் உறங்காமலிருந்து, விநாயகர் பற்றிய திருக்கதைகளைப் படிக்கச்சொல்லியோ, யாரையாவது சொல்லச் சொல்லியோ கேட்கவேண்டும்.

இவ்வாறு தொடங்கி, செய்யப்படும் இந்த சங்கடஹர சதுர்த்தி விரதத்தை, ஒரு வருட காலம் செய்யவேண்டும். `ஒரு வருடமா’ என்று பிரமிக்கவேண்டாம்! ஓராண்டு காலத்தில் வரும் சங்கடஹர சதுர்த்தி தினங்களில் இந்த வழிபாட்டைச் செய்யவேண்டும்  என்பதே அதன்பொருள்.

சங்கடஹர சதுர்த்தி, சங்கடங்களைத் தீர்த்து சர்வ மங்கலங்களையும் அருள வேண்டுவோம். செய்யாளின் (திருமகளின்) அருளைப் பெறுவோம்! கடன் தொல்லைகள் நீங்கி, பித்ரு தோஷங்களிலிருந்தும் விடுபட்டு நலம்பெற, ஐங்கரனின் அருளை வேண்டுவோம்.

இந்த விரதம் மட்டுமல்ல, இதுபோல் இன்னும் பல விரத வழிபாடுகள்  குறித்தும் தொடர்ந்து பார்க்கப்போகிறோம்.

இதெல்லாம் எதற்காக? நேராகக் கோயிலுக்குச் சென்று கடவுளை தரிசனம் செய்துவந்தால் போதாதா, கடவுளின் மகிமையை அறிய திருக்கதைகள் போதுமே, வழிபாடுகளும் விரதங்களும் அவசியம்தானா என்றொரு கேள்வி உங்களுக்குள் எழலாம்!

மாணவன் ஒருவன் நன்றாகவே படித்திருந்தான். இருந்தாலும், அவன் தான் படித்ததைத் தேர்வில் எழுதினால்தானே தேர்ச்சி பெற முடியும்?!

அதுபோல், நல்ல நூல்களைப் படிப்பதோடு நின்றுவிடாமல், அவை கூறும் வழிகாட்டல்களைச் சிறிதளவாவது வாழ்க்கையில் செயல்படுத்தினால்தானே, வெற்றி பெற முடியும்?

இதெல்லாம் புரியுமோ புரியாதோ என்றுதான் மகாபாரதத்தில் ஓர் அற்புதமான நிகழ்வு சொல்லப்பட்டுள்ளது.

பஞ்சபாண்டவர்களையும் குந்திதேவியையும் அரக்கு மாளிகையில் வைத்து கொல்ல ஏற்பாடுகள் செய்தான் துரியோதனன். அவனது ஏவலுக்கிணங்க புரோசனன் என்பவன், பஞ்ச பாண்டவர்கள் தங்கியிருந்த அரக்கு மாளிகைக்குத் தீ வைத்தான்.

கண்ணனின் துணையிருக்கக் கனலில் கருகுவார்களா பாண்டவர்கள்? தப்பிப்பிழைத்தார்கள். குந்தியுடன் சேர்ந்து அறுவருமாக நடந்து வந்து கொண்டிருந்த வேளையில், வியாசர் எதிரே வந்தார்.

இவர்கள் அனைவரும் வியாசரை விவரம் சொல்ல, அவர்களுக்கு ஆறுதல் சொல்லி வழிகாட்டினார் வியாசர்.

அவர் நினைத்திருந்தால், ‘பாண்டவர்களே கவலைப்படாதீர்கள். உங்களுக்கும் கௌரவர்களுக்கும் முன்னவன் நான். நான் சொன்னால் துரியோதனனால் மீறமுடியாது. வாருங்கள் என்னுடன்... அவனிடம் சொல்லி, உங்களுக்கு ஒரு வழி செய்கிறேன்’ என்று கூறி, பாண்டவர்களை மறுபடியும் அஸ்தினாபுரத்துக்கே அழைத்து வந்திருக்கலாம்.

ஆனால் வியாசர் அவ்வாறு செய்யவில்லை. அவர்களை, அந்தண உருவில் ஏகசக்கிரவனம் எனும் இடத்துக்குப் போகச் சொன்னார். அதன் மூலம், பகாசுர வதத்துக்கு வழிவகுத்து, திரெளபதியை மணம் முடிக்கவும் வழி காட்டினார். பாண்டவர்களும் அவ்வாறே செயல்பட்டு, உயர்நிலை பெற்றார்கள். வியாசர் ஏன் அவ்வாறு செய்யவேண்டும்?

பிற்காலத்தில், பாண்டவர்கள் திரௌபதியுடன் வனவாசம் மேற்கொள்ள வேண்டிய நிலை ஏற்படும். அதற்காக, பஞ்ச பாண்டவர்கள் காட்டில் அலைந்துதிரிந்து பயிற்சி பெற வேண்டும் என்பதற்காகவே அவ்வாறு செய்தார்.

வாழ்வில், பல்வேறுவிதமான நிலைகளிலும் நாம் பயிற்சி பெற்று  பக்குவப்பட்டால் மட்டுமே உயர்நிலையையும் உள்ளத்தில் அமைதியையும் பெறமுடியும். இதையேதான் மேற்சொன்ன பாரதச் சம்பவம் உணர்த்துகிறது.

அப்படித்தான் நாமும் நம் வாழ்வில் பல வழிகளிலும் சக்தியும் பக்குவ மும் பெறவே, விரதங்களும் நோன்புகளும் உதவுகின்றன.

உணர்வோம்; இயன்றவரை செயல்படுவோம்; இன்னல்கள் நீங்கும்.

- சந்திப்போம்...

எங்கே,  எப்போது ?

ரு ஜென் குருவிடம் மாணவன்  ஒருவன்  மடாலயத்தில்  சீடனாக  இருந்து  பயிற்சி பெற்று வந்தான். பயிற்சியின்  இறுதியாண்டில்  சீடன் பல  ஊர்களுக்கும் தேசாந்திரியாகச் சென்று, காடு மலைகளை  எல்லாம் சுற்றி , ஓராண்டு கழித்து, திரும்ப  வேண்டும். இதுவே தியானத்தின் கடைசிப் பயிற்சி!

சக்தி கொடு! - 2

அவ்வாறே  புறப்பட்டுச்  சென்ற மாணவன் ஓராண்டு  கழித்துத்  திரும்பி  வந்தான்.

குரு  அவனை  விசாரித்தார்.

“ எந்த  ஊரிலிருந்து வருகிறாய் ? “

“சட்டோவிளிருந்து.. “

“ கோடைகாலத்தில் எங்கிருந்தாய் ?”

“ ஹோஜி என்கிற ஊரில்"

“எத்தனை நாள்கள் அங்கிருந்தாய்? "

“ ஐம்பத்து மூன்று நாள்கள் ..”

“உனக்குப் பத்துப் பிரம்படி கொடுத்து மறுபடியும் பயிற்சிக்கு  அனுப்ப  வேண்டும். “

பதறிப் போன சீடன் “என்ன தவறு  செய்தேன்?..” என்று  கேட்டான்.

“ இப்படித்தானா  ஊர்  சுற்றுவது,  மடையனே!  தன்னை  மறந்து  காடு, மலை சுற்றித் திரிபவனுக்கு  ஊர்,  பெயர், நாள், கிழமை போன்ற உலகியல் விஷயங்களை ஞாபகம் வைத்துக் கொள்ள வேண்டிய  அவசியம்  என்ன? ‘என்று கேட்டார், குரு.