Published:Updated:

ஆதியும் அந்தமும் - 3

ஆதியும் அந்தமும் - 3
பிரீமியம் ஸ்டோரி
ஆதியும் அந்தமும் - 3

மறை சொல்லும் மகிமைகள்ஓவியம்: மாருதி

ஆதியும் அந்தமும் - 3

மறை சொல்லும் மகிமைகள்ஓவியம்: மாருதி

Published:Updated:
ஆதியும் அந்தமும் - 3
பிரீமியம் ஸ்டோரி
ஆதியும் அந்தமும் - 3
ஆதியும் அந்தமும் - 3

ஆறு மனமே ஆறு!

ன்றைக்கு இருக்கக்கூடிய மனிதனிடம் ஒரு பழக்கம் காணப்படுகிறது. அவன் ஆதியைப் பற்றியும் நினைப்பதில்லை; அந்தத்தைப் பற்றியும் நினைப்பதில்லை. அவனுடைய நித்திய வாழ்க்கையில் எதை அனுபவிக்கிறானோ, அதுதான் உண்மை என்று நினைத்துக்கொள்கிறான். அது எப்படிச் சரியாகும்? அது அவனுடைய தனிப்பட்ட அனுபவம். அது எல்லோருக்கும் பொருந்தும் என்று சொல்வது தவறு.

அதேபோல் மனிதன் எப்போதும் நடந்ததையே நினைத்துக் கொண்டிருக்கக் கூடாது. அதேபோல் வருங்காலத்தையும் யூகிக்கக்கூடாது. அது நிச்சயமானதல்ல. ‘நான் பைலட்டாக ஆகவேண்டும்; நான் டாக்டராக ஆகவேண்டும்; நான் மந்திரியாக ஆகவேண்டும்’ என்றெல்லாம் ஒவ்வொருவருக்கும் ஒரு விருப்பம் இருக்கும். இது, பிறக்காத குழந்தைக்குப் பெயர்வைப்பது போன்றது.

அப்படியில்லாமல், ஒவ்வொருவரும் சுயமாகவும் சரியாகவும் சிந்தனை செய்யுமளவுக்குச் சிந்தனை வளம் பெற்றவர்களாக மாறவேண்டும். மற்றவர்களைச் சாராமல், தன்னுடைய சிந்தனை வளத்தின் மூலம் வாழ்ந்து, பிறந்த பிறப்பின் பயனை அடையவேண்டும். ஆனால், இன்று வர வர மனிதனின் சிந்தனை வளம் குறைந்துகொண்டே வருகிறது. அவர்களுடைய சிந்தனை வளத்தை அதிகரிக்கச் செய்யவேண்டும். மாறாக அவர்களுடைய மனநிலைக்கு ஏற்ப நாம் இறங்கிவரக் கூடாது.
 
ஓர் அலுவலகம் இருக்கிறது. அதில் ஒருவர் எம்.டி.யாக இருக்கிறார். மற்றொருவர் எக்சிக்யூடிவாக இருக்கிறார். வேறொருவர் மார்க்கெட்டிங் மேலாளராக இருக்கிறார். மேலும் ஒருவர் தொழிலாளியாக இருக்கிறார். தொழிலாளி தொழிலாளியாகவே இருக்கிறார். அவர், தன் சிந்தனை வளத்தை மேம்படுத்திக்கொள்ளாமல் உடலுழைப்பை மட்டுமே நம்பியிருக்கிறார். அவருடைய சிந்தனை வளத்தை மேம்படுத்திக் கொள்வதற்கான வழிமுறைகளை நாம்தான் ஏற்படுத்தித் தரவேண்டும். அதைச் செய்யாமல், அவருக்குப் பணம் கொடுப்பதன் மூலமும் வீடு கட்டிக் கொடுப்பதன் மூலமும் அவனை அப்படியே மேற்கொண்டு சிந்திக்க முடியாதபடி நாம் விட்டுவிடக்கூடாது.

ஆதியும் அந்தமும் - 3

ஒட்டுமொத்த விகடனுக்கும் ஒரே ஷார்ட்கட்!

ஒரு தேசத்திலுள்ள மக்கள் நோஞ்சான்களாகவும், வலிமையற்றவர்களாகவும் இருந்தால், அந்தத் தேசம் எப்படி வல்லரசாக முடியும்? அப்படித்தான் சிந்தனை வளம் இல்லாத மனிதர்கள் நிறைந்த சமூகமும் சிறந்த சமூகமாக வளர்ந்தோங்கித் திகழ முடியாது.

பிறப்பு என்பது பகவான் கொடுத்த வரம். பகவான் மனிதர்களைப் படைத்ததுடன், அவனுடைய ஜீவிதத்துக்குத் தேவையான மரம், செடி, காய், கனி என்று சகலத்தையும் படைத்தார். அவர் அனைவருக்கும் பொதுவானவையாகத்தான் படைத்திருக்கிறார். ஆனால், சுயநலம் கொண்ட சிலர், அனைத்தையும் தங்களுக்காகவே பயன்படுத்திக்கொண்டு, பலருக்குக் கிடைக்கச் செய்யாமல் இருக்கிறார்கள். இந்த நிலை மாற வேண்டும். அதற்கு மனிதர்களின் சிந்தனை வளம் பெருகவேண்டும்.

நான் முன்பே சொன்னபடி, அனைத்து ஜீவராசிகளுக்கும் ஆறுவிதமான நிலைகள் உண்டு; மனிதனும் அதற்கு விதிவிலக்கல்ல. மற்ற ஜீவராசிகளிலிருந்து மனிதனை வேறுபடுத்திக் காட்டுவது அவனுடைய சிந்திக்கும் திறன்தான்.

சாலையோரத்தில் ஒரு மரக்கன்று நடுகிறோம். அது வளர்ந்து மரமாகும் வரை அதற்குப் பாதுகாப்பாக ஒரு கம்பி வலை தேவை. வளர்ந்த பிறகு கம்பி வலை தேவையில்லை. ஒரு பசு கன்று போடுகிறது. ஒரு வருடம் வரை அதற்குத் தாய்ப்பசுவின் ஆதரவு தேவைப்படுகிறது. அதேபோல், மனிதனுக்கும் குறிப்பிட்ட காலம் வரை தாய் தந்தையின் அரவணைப்பு தேவைப்படுகிறது.

தாய் தந்தையின் இணைவில் கரு உருவாகிறது. இது முதல் நிலை. அடுத்து குழந்தை பிறக்கிறது. இது இரண்டாவது நிலை. குறிப்பிட்ட காலத்துக்குப் பிறகு அவன் கல்வி கற்கச் செல்கிறான். இது மூன்றாவது நிலை. வளர்ந்ததும் அவன் முதலில் கல்வியில்தான் கவனம் செலுத்துகிறான். அப்போதுதான் அவனுடைய சிந்தனை வளம் பெருகும்; உலகத்தைப் பற்றிய ஞானம் வளரும். தன் வாழ்க்கையை எப்படி வளப்படுத்திக் கொள்வது என்பதிலும் இக்கட்டான சூழ்நிலைகளில் தன்னையும் தன்னைச் சார்ந்தவர்களையும் எப்படிக் காப்பாற்றிக்கொள்வது என்பதிலும் அவனுக்கு ஒரு தெளிவு கிடைக்கும்.

ஆதியும் அந்தமும் - 3

இதற்குப் பிறகு அவன் திருமணம் செய்து கொள்கிறான். குழந்தைகள் பெற்றுக்கொள்கிறான். அவனுடைய ஆசைகள் விரிவடைகின்றன. ஓர் ஆசை நிறைவேறியதும் மற்றோர் ஆசை ஏற்படுகிறது. அப்படி, இந்த உலகத்திலுள்ள சுக-சௌக்கியங்கள் அனைத்தையும் அனுபவித்து முடித்த பிறகு, அவனுடைய மனம் பக்குவநிலையை அடைந்து விடுகிறது. வானபிரஸ்தம் மேற்கொள்கிறான். மனதைப் பகவானிடம் லயிக்கச் செய்துவிடுகிறான்.  இறுதியில் தன்னுடைய சரீரத்தை விட்டுவிட்டு, உள்ளே இருக்கும் சைதன்யத்தைப் பிரபஞ்ச சைதன்யத்துடன் சேர்த்து விடுகிறான். மிக லாகவமாகச் சரீரத்தை விட்டுவிடுகிறான்.

அவன் பிறப்பது அஸ்தி; அவன் வளர்வது ஜாயதே; அடுத்து அவன் கல்வி கற்பது வர்த்ததே; அடுத்து விபரிநிமதே: ஆசைகளின் காரண மாக அவன் திருமணம் செய்துகொள்கிறான். குழந்தைகள் பெற்றுக் கொள்கிறான். இது கிரகஸ்தாஸ்ரமம். அறுபது வயது ஆன பிறகு அவனுடைய உடல் தளர்ந்து போகிறது. கண்பார்வை குறைந்து போகிறது. கடைசியில் சரீரத்தை விட்டுவிடுகிறான். இதுதான் மனிதர்களின் வாழ்க்கையில் ஏற்படும் ஆறு நிலைகள். இந்தக் கண்ணோட்டம் வேதம் சொன்ன கண்ணோட்டம். இதிலிருந்து வேதம் என்ன சொல்கிறது என்பது நமக்குப் புரிய வரும்.

அதாவது உலகத்தில் உற்பத்தியான அனைத்துப் பொருள்களுக்கும் ஆறு நிலைகள் உள்ளன என்று வேதம் சொல்கிறது. இது நம் தேசத்துக்கு மட்டுமான தத்துவமல்ல; அகிலாண்டகோடி பிரமாண்ட நாயக என்றபடி உலகம் முழுமைக்குமானது.

அனைத்து ஜீவராசிகளும் ஆறுநிலைகளைச் சந்திக்கவேண்டும் என்ற நிலை இருக்கும்போது, அவை எப்படியெல்லாம் தன் பிறப்பிலிருந்து ஒவ்வொரு நிலையாகக் கடந்து முழு நிலையை அடையவேண்டுமோ, அதைச் சொல்லி செயல்படுத்தக்கூடியவனே சிந்தனை வளம் பெற்ற மனிதன். அவனும் மற்ற உயிரினங்களைப் போல் இருக்கக்கூடாது.

எல்லா உயிரினங்களும் லோகத்துக்குப் பயன்படு கின்றன. செடி கொடிகள் அழிந்துபோனால், அவை அடுத்து வளரப் போகும் செடி கொடிகளுக்கு உரமாகின்றன. மிருகங்கள் மடிந்துவிட்டால் வேறு வகையில் பயன்படுகின்றன. மனிதன் மட்டும்தான் மறைந்துவிட்டால் யாருக்கும் பயன்படுவதில்லை. யானை இருந்தாலும் பதினாயிரம் ரூபாய்; இறந்தாலும் பதினாயிரம் ரூபாய் என்பார்கள். இருக்கும்போது யானைகளைப் பலவிதமான காரியங்களுக்குப் பயன்படுத்திக் கொண்டோம். அது இறந்த பிறகு, அதன் தந்தம் உள்ளிட்ட பல பொருள்களை நாம் பயன்படுத்திக்கொள்கிறோம்.

இப்படி சிருஷ்டியில் இருக்கக்கூடிய அனைத்துப் பொருள்களும் ஆதியிலும் சரி, அந்தத்திலும் சரி பயன்படுவனவாக இருக்கின்றன. ஆனால், மனிதனிடமிருக்கும் குறை, ஆதியில் அவன் பயன்பட்டாலும் அந்தத்தில் யாருக்கும் பயன்படுவதில்லை என்பதுதான். அவனுடைய சரீரம் ஒன்றுக்கும் உதவாது. இந்த நிலையில் இருக்கும் மனிதன் என்ன செய்யவேண்டும் தெரியுமோ?

இருக்கும் வரை தனக்கும் தான் சார்ந்திருக்கும் சமூகத்துக்கும் செய்ய வேண்டிய கடமைகளைச் சரிவர செவ்வனே செய்து வரவேண்டும். தன்னை இறைவன் சிருஷ்டி செய்தது அதற்காகத்தான் என்பதை உணர்ந்து செயல்படவேண்டும். அறுபது வயதுக்குள் அனைத்து விதமான சுக சௌக்கியங்களையும் தானும் அனுபவித்து, மற்றவர் களும் அனுபவிக்கும்படிச் செய்யவேண்டும்.

-இன்னும் வரும்...

-மகாமகோபாத்யாய சேஷாத்ரிநாத சாஸ்திரிகள்