Published:Updated:

திருவருள் திருவுலா - கொங்கு நாட்டு ஆறுபடை வீடுகள்!

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
திருவருள் திருவுலா - கொங்கு நாட்டு ஆறுபடை வீடுகள்!
திருவருள் திருவுலா - கொங்கு நாட்டு ஆறுபடை வீடுகள்!

ரா.கெளசல்யா

பிரீமியம் ஸ்டோரி
திருவருள் திருவுலா - கொங்கு நாட்டு ஆறுபடை வீடுகள்!

`குன்றிருக்கும் இடமெல்லாம் குமரன் இருக்கும் இடம்' என்பது ஆன்றோர் மொழி. குன்றுதோறும் நின்று பக்தர்களுக்கு முருகக் கடவுள் அருள்பாலிக்கும் தலங்கள் தமிழகம் முழுவதும் ஏராளம் உண்டு!

திருவருள் திருவுலா - கொங்கு நாட்டு ஆறுபடை வீடுகள்!

அப்படி, கொங்குதேசத்தில் அமைந்துள்ள ஆறு திருத்தலங்களை ‘கொங்குநாட்டு அறுபடை வீடுகள்’ என்றே போற்றுகிறார்கள் பக்தர்கள். பழநிக்கு நிகரான பெருமை கொண்டவை என்று முருகனடியார்கள் சிறப்பித்து வணங்கும் இந்தத் திருத்தலங்களை தரிசனம் செய்வதன் மூலம் மகத்துவமான  பலன்களைப் பெறலாம். வாருங்கள்... நினைத்த காரியங்களை நினைத்தபடி நிறைவேற்றி அருளும் குமரனின் கொங்குநாட்டு நாட்டு ஆறுபடை வீடுகளை தரிசித்து மகிழ்வோம்!

1. திருமண யோகம் அருளும் சிவன் மலை

 இறைவன் : அருள்மிகு சுப்பிரமணிய சுவாமி

 திருத்தலச் சிறப்புகள்: சிவபெருமான் திரிபுரத்தை அழிக்க மேருமலையை வில்லாக வளைத்தார். அப்போது அதிலிருந்து சிதறிய சிறு துகளே, சிவன் மலை என்கின்றன புராணங்கள்.

திருவருள் திருவுலா - கொங்கு நாட்டு ஆறுபடை வீடுகள்!

முருகன், வேடனாக மாறி வள்ளியைத் திருமணம் செய்ய முயன்றபோது, அவர் யார் என்பதை அறியாது அவரை எதிர்த்துப் போர்புரிந்தனர் வள்ளியின் உறவினர்களான வேடர்கள். வேலனுக்கு எதிரான போரில் அவர்கள் இறந்தனர். முருகன், வள்ளிப் பிராட்டியைத் திருமணம் செய்துகொண்டதும், இந்தத் தலத்தில் அந்த வேடர்களை உயிர்ப்பித்தார். முருகனின் திருவிளையாடலை அறிந்து அவர்கள் ஆர்ப்பரித்த இடம் ஆதலால், ‘பட்டாலி’ என்று பெயர் பெற்றதாம் இந்த மலை. எனவே இந்தத் தலத்து இறைவனுக்குப் பட்டாலியூரன், பட்டாலி பால் வெண்ணீஸ்வரர் ஆகிய பெயர்களும் உண்டு. 

இந்தத் திருக்கோயிலில் காணப்படும் உத்தரவுப் பெட்டி மிகவும் முக்கியமானதாகக் கருதப்படுகிறது.   ஆண்டுதோறும் எவரேனும் பக்தர் ஒருவர் கனவில் தோன்றும் முருகப்பெருமான், ஒரு பொருளைக் காட்டியருள்வாராம். அந்தப் பக்தர் உடனடியாக கோயிலுக்கு வந்து கனவு குறித்து தெரிவிப்பார்.

திருவருள் திருவுலா - கொங்கு நாட்டு ஆறுபடை வீடுகள்!

முருகனின் திருவுளம் உறுதியானால், அந்தப் பொருளைக் கண்ணாடிப் பெட்டியில் வைத்துப் பூட்டுவர். இப்படி, உத்தரவு பெட்டிக்குள் வைக்கப்படும் பொருள், வருங்காலத்தில் நிகழக் கூடிய சம்பவத்தை முன்னதாக உணர்த்தும் என்கிறார்கள் பக்தர்கள்.

 வழிபாட்டுச் சிறப்புகள்: அனைத்துக் கோயில்களிலும் முதல் வழிபாடு விநாயகருக்கே நடைபெறும். ஆனால் இங்கு முருகனுக்கே முதல் வழிபாடு. இங்கு வந்து வழிபட்டால், கல்யாண வரம் கிடைக்கும்.

 எப்படிச் செல்வது : திருப்பூர் மாவட்டம் காங்கேயத்தில் இருந்து சுமார் 5 கி.மீ தொலைவில் அமைந்துள்ளது சிவன் மலை.

2. செவ்வாய் தோஷம் தீர்க்கும் சென்னிமலை

  இறைவன்  : அருள்மிகு சுப்பிரமணியர்

  திருத்தலச் சிறப்புகள்:  ஒருமுறை, ஆதிசேஷனுக்கும் வாயு தேவனுக்கும் இடையில், `இருவரில் பெரியவர் யார்' என்று போட்டி ஏற்பட்டது. மேருமலையை ஆதிசேஷன் வளைத்து இறுக்கிக்கொள்ள, அதன் பிடியிலிருந்து மேரு மலையை வாயு மீட்கவேண்டும் என்பதே போட்டி. இதில், மேரு மலையின் சிரசுப் பகுதியாகத் திகழ்ந்த சிகரம் சிதறி பூமியில் விழுந்தது.

அந்தச் சிகரம் விழுந்த இடமே சென்னி மலை.

திருவருள் திருவுலா - கொங்கு நாட்டு ஆறுபடை வீடுகள்!

இங்குள்ள முருகப்பெருமானின் விக்கிரகம், தலையிலிருந்து வயிற்றுப் பகுதி வரை மட்டுமே வேலைப்பாடுகளுடன் காணப்படும். அதற்குக் கீழ் ஒழுங்கின்றிக் காணப்படும். முருகப்பெருமானே அர்ச்சகர் உருவில் வந்து பூஜித்து, சோழ மன்னன் ஒருவனைப் பீடித்திருந்த பிரம்மஹத்தி தோஷம் நீங்கிட அருள்பாலித்தாராம். இங்கு, இந்திரனும் லட்சுமியும் பூஜை செய்து அருள்பெற்றதாகவும் சொல்லப்படுகிறது. இடும்பனுக்குப் பழநி மலைக்குச் செல்லும் வழியைக் காட்டியருளியதும் இங்குதான்.

அருணகிரிநாதர் இந்தத் தலத்தில் திருப்புகழ் பாடி இறைவனைத் தொழுதுள்ளார். பிண்ணாக்கு சித்தரின் ஜீவ சமாதி இந்த மலையில்தான் அமைந்துள்ளது. இங்கு இறைவனுக்குத் தயிர் அபிஷேகம் செய்து வழிபடுவது விசேஷம். அப்படி  அபிஷேகிக்கப்படும் தயிர் புளிப்பதில்லையாம். அதேபோல், `ஆலயக் கோபுரத்தின் மீது காகங்கள் பறப்பதில்லை' எனும் தகவலையும் சிலிர்ப்போடு பகிர்ந்துகொள்கிறார்கள் பக்தர்கள்!

திருவருள் திருவுலா - கொங்கு நாட்டு ஆறுபடை வீடுகள்!

  வழிபாட்டுச் சிறப்புகள்: நவகிரகங்களில் செவ்வாய் தவிர்த்து பிற கிரகங்கள் இங்கு மூலவரைச் சுற்றி அமைந்துள்ளன. செவ்வாயின் அதிபதியாக முருகக் கடவுளே மையத்தில் அமர்ந்திருக்கிறார். இவரை வழிபட்டால், செவ்வாய் தோஷம் நீங்கும்.

  எப்படிச் செல்வது :  ஈரோடு - பெருந்துறை சாலை யில், ஈரோட்டிலிருந்து 30 கி.மீ தொலைவில் உள்ளது சென்னிமலை.

3. தம்பதி ஒற்றுமைக்கு அருளும்  கைத்தமலை!

  இறைவன் : அருள்மிகு வெற்றிவேலாயுத ஸ்வாமி

  திருத்தலச் சிறப்புகள்: ஞானப்பழத்தின் காரணமாக முருகன் கோபம் கொண்டு கயிலாயத்திலிருந்து வந்து, முதன்முதலில் ஏறி நின்ற மலை கதிர்த்தமலை (கைத்தமலை) என்று சொல்கிறார்கள்.

`கதிர்த்த' எனும் சொல்லுக்குக் கோபித்த என்று பொருள் உண்டாம். சிவனும் பார்வதியும் பசுவும் கன்றுமாக மாறி வந்து முருகனின் கோபத்தைத் தணிக்க முயன்றனர். ஆனால் அதற்கு இடம் கொடாத முருகன், சென்னி மலை, சிவன் மலை என்று பயணித்துக் கடைசியில் பழநியில் கோயில் கொண்டதாகப் புராணங்கள் சொல்கின்றன.

திருவருள் திருவுலா - கொங்கு நாட்டு ஆறுபடை வீடுகள்!

அகத்தியர் தியானம் செய்வதற்காக இந்த இடத்துக்கு வந்தபோது, நைவேத்தியம் செய்ய நீா் கிடைக்கவில்லை.  முருகப்பெருமானை வணங்கி அவா் உதவியை நாடினார் அகத்திய மாமுனிவா்.  உடனே முருகன் அவா் முன் தோன்றி, தன் வேலால் நிலத்தில் ஊன்றி ஊற்றை உருவாக்கினார்.இதையொட்டி, இந்த மலை அமைந்துள்ள ஊருக்கு  `ஊற்றுக்குழி' எனும் பெயர் ஏற்பட்டு, அதுவே `ஊத்துக்குளி' என்று  மருவியதாகச் சொல்கிறார்கள்.

  வழிபாட்டுச் சிறப்புகள்: வாழ்க்கைத் துணைவரைப் பிரிந்து வாடும் அன்பர்கள், இங்கு வந்து சேலை, மஞ்சள், குங்குமம், வளையல், பூ ஆகியவற்றை வைத்து பூஜை செய்தால் மனக் கஷ்டங்கள் தீர்ந்து, விரைவில் துணைவரோடு ஒன்றுசேர்வார்கள். திருமணத் தடையை நீக்கும் கோயிலாகவும் இந்தத் தலம் விளங்குகிறது.

திருவருள் திருவுலா - கொங்கு நாட்டு ஆறுபடை வீடுகள்!

விசேஷ நாள்களில் மரத்தினால் செய்யப்பட்ட தேரில், வள்ளி தேவசேனா சமேதராக முருகன் பவனி வருவார். மூலவருக்குப் பின்புறம் பால மரத்தடியிலுள்ள சுக்குமலையாண்டவர், குழந்தை களுக்கு ஏற்படும் கக்குவான் நோயை தீர்ப்பவராம்.

  எப்படிச் செல்வது : திருப்பூரிலிருந்து 15 கி.மீ தொலைவில் உள்ளது ஊத்துக்குளி - கைத்தமலை.

4. கல்விஞானம் அருளும் தோரணவாவி!

  இறைவன்: அருள்மலையாண்டவர் (கிருபாகர சுப்பிரமணிய ஸ்வாமி)

  திருத்தலச் சிறப்புகள்: பழநிக்கு நிகரானது என்று போற்றப்படுவது அருள்மலை எனப்படும் தோரணவாவி முருகன் கோயில். 60 படிகள் கொண்ட சிறிய குன்றின் மீது திருக்கோயில் அமைந்துள்ளது. அரளி மரங்கள் சூழ ஆலயம் எழிலுறக் காட்சி கொடுக்கிறது. இங்கு இறைவன் ஞான குருவாகக் காட்சிகொடுக்கிறார். அருணகிரிநாதரால் பாடல் பெற்ற தலம் இது.

திருவருள் திருவுலா - கொங்கு நாட்டு ஆறுபடை வீடுகள்!

சந்தக்கவி நந்தியன் என்ற மகான் அவதரித்த தலம் இது. படிப்பறிவற்ற சிறுவனான நந்தியன் இங்கு மாடு மேய்த்துக்கொண்டிருந்தபோது, அவர் முன் தோன்றிய முருகப்பெருமான், ‘தன்னைக் குறித்துப் பாடுமாறு’ கூறினார். ‘தன்னால் எப்படிப் பாடமுடியும்’ என்று நந்தியன் தவிக்க, அருகில் இருந்த கள்ளிச் செடியிலிருந்து ஒரு துளி பால் எடுத்து அவன் நாக்கில் `ஓம்' என்று எழுதியருளினார் முருகன். உடனே, மடை திறந்த வெள்ளம்போல சந்தக்கவி பாடத் தொடங்கினார் நந்தியன் என்கிறது தலபுராணம்.

திருவருள் திருவுலா - கொங்கு நாட்டு ஆறுபடை வீடுகள்!

  வழிபாட்டுச் சிறப்பு: இங்கு முருகன் ஞான குருவாக வீற்றிருப்பதாலும், நந்தியனுக்கு அருள்புரிந்ததாலும் கல்வியறிவில் குறைபாடுள்ள குழந்தைகள் இங்கு வந்து வேண்டிக்கொண்டால், கல்வி கேள்விகளில் வெற்றி கிட்டும். ஏராளமான மாணவர்கள் இங்கு வந்து விளக்கேற்றி முருகனை வேண்டிக்கொண்டு நல்லறிவைப் பெற்றுச் செல்கிறார்கள். கோயிலின் வெளி மண்டபத்தில் காசிவிஸ்வநாதரின் சந்நிதியும் கலைவாணியின் சந்நிதியும் அமைந்துள்ளன. இந்தத் தலத்தில் வேண்டிக்கொண்டால் மன அமைதி கிட்டும் என்கின்றனர் பக்தர்கள்.

  எப்படிச் செல்வது : ஈரோடு மாவட்டம், பெருந் துறையிலிருந்து 19 கி.மீ தொலைவில் அமைந்துள்ளது தோரணவாவி. பெருந்துறையிலிருந்து பேருந்து வசதி உள்ளது.

5.குழந்தை வரம் அருளும் சீனபுர மலை

  இறைவன்: விஜயபுரி வேலாயுத சுவாமி

  திருத்தலச் சிறப்பு: ஒருகாலத்தில், நல்லாம் பட்டியைச் சேர்ந்த முத்துப்பிள்ளை எனும் முருக பக்தர் ஒருவர், ஆண்டுதோறும் பழநிக்குக் காவடி எடுத்துச் செல்வது வழக்கம்.

அவ்வாறு ஒரு முறை காவடி எடுத்துச் செல்லும் போது, வழியில் ஒரு தடங்கல் ஏற்பட்டது. காவடியை இறக்கவும் முடியாமல் பயணத்தைத் தொடரவும் முடியாத நிலையில் தவித்தபோது, அப்பன் முருகனை நினைத்து வேண்டிக்கொண்டார்.

திருவருள் திருவுலா - கொங்கு நாட்டு ஆறுபடை வீடுகள்!

அப்போது, அங்கு சிறு பாலகன் ரூபத்தில் தரிசனம் கொடுத்த முருகன், அருகிலுள்ள சீனபுர மலையில் காவடியை இறக்கிவைத்து தம்மை வழிபடுமாறு ஆற்றுப்படுத்தினார். பழநிக்கு இணையான புண்ணியத் தலமாக சீனபுரமலை கருதப்படுகிறது.

சீனபுரத்தில் 60 அடி உயரக் குன்றில் முருகப் பெருமான் மேற்கு நோக்கி எழுந்தருளியுள்ளார். மலை உச்சிக்கு 60 படிகள் ஏறித்தான் செல்ல வேண்டும். இந்த ஆலயத்தில் ‘பூ கேட்பது’ எனும் வழக்கம் ஒன்று உண்டு. திங்கள்கிழமை அல்லது வெள்ளிக்கிழமைகளில் காலை 6 முதல் 9 மணி வரை பூ கேட்பது இங்கு வழக்கம். சுற்றியிருக்கும் கிராமத்து மக்கள், தங்களின் நற்காரியங்கள், வீட்டு விசேஷங்கள் குறித்து இங்கு பூ கேட்பதன் மூலமே முடிவு செய்கிறார்கள்.

மேலும் இந்தக் கோயிலுக்கு வந்து முருகப் பெருமானை வழிபடுவதால், தடங்கல்கள் அனைத்தும் நீங்கும்; எடுத்த காரியங்களில் வெற்றி கிடைக்கும் என்பது நம்பிக்கை.

  வழிபாட்டுச் சிறப்புகள்: சஷ்டியில் விரதம் இருந்தால் அகப்பையில் குழந்தை வரும் என்பது ஆன்றோர் வாக்கு. இங்கு நடைபெறும் கந்த சஷ்டி விழாவில் கலந்துகொண்டு வேண்டிக்கொண்டால், குழந்தை இல்லாதவர்களுக்குக் குழந்தை வரம் கிட்டும் என்பது ஐதிகம்.

நிம்மதியும் நிறைவும் அருளும் மலை என்று பக்தர்களால் போற்றப்படும் சீனபுரம் மலைக் கோயிலில் கந்த சஷ்டி வைபவம் மட்டுமன்றி, பங்குனி உத்திரம், தைப்பூசம் போன்ற பண்டிகைகளும் சிறப்பாகக் கொண்டாடப்படுகின்றன.

  எப்படிச் செல்வது : பெருந்துறையிலிருந்து 11 கி.மீ தொலைவில், குன்னத்தூர் செல்லும் வழியில் சீனபுரம் அமைந்துள்ளது. பெருந்துறை மற்றும் குன்னத்தூரிலிருந்து பேருந்து வசதி உண்டு.

6. சகலமும் அருளும் திண்டல் மலை

  இறைவன் : அருள்மிகு வேலாயுத சுவாமி

  திருத்தலச் சிறப்பு: கொங்கு நாட்டின் தனித்துவம் மிக்க ஆலயமாக திண்டல் வேலாயுத சுவாமி ஆலயம் விளங்குகிறது. முன்னொரு காலத்தில் இங்கு பஞ்சம் ஏற்பட்டது. அப்போது, மக்கள் இடும்பனை வேண்டிக்கொண்டு வழிபட்டனர். அதன் பலனாக நல்ல மழை பெய்து நாடு செழித்தது. எனவே, அவர்கள் தொடர்ந்து  இடும்பனையும் இடும்பன் மூலம் முருகனையும் வணங்கி வழிபடுகின்றனர். இந்த ஆலயத்தின் தீபஸ்தம்பம் கோயிலுக்கு வெளியே நிறுவப்பட்டுள்ளது.  

திருவருள் திருவுலா - கொங்கு நாட்டு ஆறுபடை வீடுகள்!

  வழிபாட்டுச் சிறப்புகள்: செவ்வாய் மற்றும் வெள்ளிக் கிழமைகளில் வேலாயத மூர்த்திக்குச் சிறப்பு பூஜைகள் நடைபெறும். அந்த நாள்களில் பக்தர்கள் எலுமிச்சைக் கனியை முருகன் காலடியில் வைத்து வணங்கினால் சகலமும் கிடைக்கும் என்பது ஐதிகம். இத்தலம் செவ்வாய் தோஷப் பரிகாரத்தலமாகவும் விளங்குகிறது.

இந்தக் கோயிலின் அருகே தன்னாசி குகை என்ற ஒரு குகை உள்ளது. சித்தர்களும், மகான்களும் வாழ்ந்ததாகக் கருதப்படும் இந்தக் குகையில் பக்தர்கள் தீபங்கள் ஏற்றி வழிபடுகிறார்கள். தன்னாசி குகையில் கார்த்திகை தீபத்தன்று சிறப்பு வழிபாடுகள் நடத்தப்படுகின்றன.

திருவருள் திருவுலா - கொங்கு நாட்டு ஆறுபடை வீடுகள்!

தீராத வினை தீர்க்கும் வேலுடன் காட்சி தரும் திண்டல்மலை முருகனை வணங்கினால் மாளாத துயர் யாவும் நீங்கும் என்பார்கள். காலை 7 மணிக்கு காலைச் சந்தி பூஜையும், 12 மணிக்கு உச்சிக்கால பூஜையும், மாலை 6 மணிக்கு சாயரட்சை பூஜையும் அதற்கு முன்பாக நடைபெறும் அபிஷேகமும் இங்கு சிறப்பானவை.

  எப்படிச் செல்வது : ஈரோட்டிலிருந்து பெருந்துறை செல்லும் வழியில், சுமார் 8 கி.மீ தொலைவில் திண்டல் மலை அமைந்துள்ளது. பெருந்துறை பேருந்து நிலையத்திலிருந்து பேருந்துகள் இயக்கப் படுகின்றன.

படங்கள்: ம.நா.சுபாஷ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு