Published:Updated:

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்
பிரீமியம் ஸ்டோரி
திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

Published:Updated:
திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்
பிரீமியம் ஸ்டோரி
திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்
திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

முத்துக்குளியலாலும் உப்பளங்களாலும் மட்டுமல்ல, முக்திப்பேறு அருளும் பல திருக்கோயில்களாலும் புகழ்பெற்றது தூத்துக்குடி மாவட்டம். மண்ணின் மரபைப் போற்றும் காவல் தெய்வங்கள் கிராமம்தோறும் அருள்பாலிக்க, சரித்திரத்தின் மகிமையைப் போற்றும் பல புண்ணிய க்ஷேத்திரங்களையும் தன்னகத்தே கொண்டு திகழ்கிறது இந்த மாவட்டம்.

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

ஒட்டுமொத்த விகடனுக்கும் ஒரே ஷார்ட்கட்!

திருச்செந்தூர் முருகன் கோயில், நவதிருப்பதிகள், குலசை முத்தாரம்மன் கோயில், பசுவந்தனை கயிலாச நாதர் ஆலயம், கழுகுமலை முருகன் கோயில்... தூத்துக்குடி மாவட்டத்தின் ஆன்மிகச் சிறப்புக்குக் காரணமான இந்தத் தலங்களின் வரிசையில் வேறு சில தலங்களும் உண்டு. அவற்றில், ஏற்றமிகு ஏழு சிவாலயங்கள் உங்களுக்காக...

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

எம பயம் நீக்கும் கோதண்ட ராமேஸ்வரர்

 தலம்: கயத்தாறு

 இறைவன் : ஸ்ரீகோதண்ட ராமேஸ்வரர்

 அம்பாள் : ஸ்ரீஅகிலாண்டநாயகி

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் :  ஸ்ரீராமபிரான் உருவாக்கி வணங்கிய சிவனாரே இந்தத் தலத்தில் அருள்பாலிக்கிறார். ராமேஸ்வரம் தோன்றுவதற்கு 41 நாள்களுக்கு முன்பே உருவாகிய கோயில் இது  என்பது முன்னோரின் கூற்று. காலப்போக்கில் இந்தப் பகுதி வனமாகிவிட, ராமன் வழிபட்ட லிங்கமும் மண்ணில் மறைந்து போனது. பிற்காலத்தில், குறுநில மன்னரான வெட்டும்பெருமாள் ராஜாவால் இந்தக் கோயில் நிர்மாணிக்கப்பட்டதாம். அவரே, இந்த ஸ்வாமிக்கு ‘கோதண்ட ராமேஸ்வர்’ என்று திருப்பெயர் சூட்டினாராம். ராமன் வழிபட்ட சிவனை நாமும் வழிபடுவதால் ஹரி, அரனார் இருவரின் பேரருளையும் ஒருங்கே பெறலாம்.

கோயிலுக்கு முன்னே கயத்தாறு ஓடிக்கொண்டிருக்கிறது. தெற்கிலிருந்து வடக்காக நதி பாயும் இந்தத் தலம் காசிக்கு நிகரானதாகக் கருதப்படுகிறது.  எனவே, இந்தத் தலத்துக்குச் சென்று வழிபடுவதால், காசிப் புண்ணியம் வாய்க்கும் என்கிறார்கள், பெரியோர்கள்.

  வழிபாட்டுச் சிறப்புகள்: இரவு 8 மணிக்கு நடைபெறும் பள்ளியறை பூஜையில் கலந்துகொண்டால், புத்திர பாக்கியம் கிட்டும். இங்கு வந்து சிவனுக்குத் தாரா அபிஷேகம் செய்தால்  எம பயம் நீங்கும். மதுப்பழக்கம் உள்ளவர்கள் இங்கு வந்து வணங்கினால், விரைவில் அந்தப் பழக்கத்திலிருந்து விடுபடுவார்கள். 

 எப்படிச் செல்வது?:  நெல்லை - சென்னை நான்குவழிச்சாலையில், கயத்தாறு சிவாஜி நினைவு மண்டபத்துக்குப் பின்புறம் கோயில் உள்ளது. காலை 7 முதல் 12  மணி வரை; மாலை 5 முதல் 8 மணி வரை நடை திறந்திருக்கும்.

வேண்டியதை அருளும் வீரபாண்டீஸ்வரர்

 தலம்: முத்தாலங்குறிச்சி

 இறைவன் : ஸ்ரீவீரபாண்டிஸ்வரர் (ஸ்ரீமுகில்வண்ண நாதர்)

 அம்பாள் : ஸ்ரீசிவகாமியம்மை

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் :  முத்தாலங்குறிச்சியில், தாமிரபரணி ஆற்றங்கரையில் கோயில்கொண்டிருக்கிறார்அருள்மிகு வீரபாண்டிஸ்வரர். இவருக்கு முகில்வண்ண நாதர் என்றும் ஒரு திருப்பெயர் உண்டு. அம்பாள் ஸ்ரீசிவகாமியம்மை.

வீரபாண்டியன் என்ற மன்னனால் கட்டப்பட்டது இந்தக் கோயில்.  ஆகவே, அந்த மன்னனின் பெயரே இங்குள்ள சிவபெருமானுக்கும் ஏற்பட்டதாம். அதேபோல், எப்போதும் மேகங்கள் சூழ்ந்திருக்கும் தாமிரபரணி  தீரத்தில் கோயில்கொண்டிருப்பதால், இவருக்கு முகில்வண்ண நாதர் என்ற திருப்பெயர் ஏற்பட்டது என்கிறார்கள். மிகப் புராதனமான இந்த ஆலயம், 200 வருடங்களுக்கு முன் ஏற்பட்ட வெள்ளப்பெருக்கில் மூழ்கிச் சிதைந்தது. பிற்காலத்தில், சிறியதாக ஒரு கோயிலைக் கட்டி, உள்ளே அனைத்துத் தெய்வங்களையும் பிரதிஷ்டை செய்தார்கள். இந்தக் கோயிலின் வளாகத்தில் மிகப்பிரமாண்டமாக சந்நிதி கொண்டிருக்கிறார், ஸ்ரீலட்சுமி நரசிம்மர். இங்குள்ள விநாயகரும் பிரமாண்டம்!

 வழிபாட்டுச் சிறப்புகள்: ஸ்ரீவீரபாண்டிஸ்வரரை வேண்டி வணங்கினால் எதிரிகளின் தொல்லை குறையும், தேர்வில் வெற்றி கிடைக்கும், தீராத பிரச்னைகளும் தீரும் என்கிறார்கள் அடியார்கள். ஆனந்தக் கோலத்தில் அருளும் ஸ்ரீலட்சுமிநரசிம்மரை வழிபடுவதால், பயம் மற்றும் குழப்பம் நீங்கி மனதில் நிம்மதி பிறக்கும்.

 எப்படிச் செல்வது?: நெல்லை- திருச்செந்தூர் சாலையில்,15 கி. மீ தொலைவில் உள்ளது செய்துங்கநல்லூர். இவ்வூரில் இறங்கி 6 கி. மீ பயணித்தால், முத்தாலங் குறிச்சியை அடையலாம். கோயிலுக்கு எப்போது சென்றாலும், அருகிலேயே குடியிருக்கும் அர்ச்சகர் கோயிலைத் திறந்து வழிபட வசதி செய்வார்.

குலம் காக்கும் குலசேகர நாதர்

 தலம் : தெற்கு காரசேரி

 இறைவன் : ஸ்ரீகுலசேகர நாதர்

 அம்பாள் :  ஸ்ரீஅறம்வளர்த்த நாயகி

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் :  குலசேகரப்பட்டினத்தைத் தலைமையிடமாகக் கொண்டு அரசாண்ட குலசேகர பாண்டியன், ஒரே நேரத்தில் ஒன்பது சிவாலயங்களைக் கட்டினார். அவை, குலசேகரப்பட்டினத்திலிருந்து திருவாரூர் வரை  அமைந்திருக் கின்றன. அவற்றில் ஒன்றே, தெற்கு காரச்சேரியில் அமைந்திருக்கும் ஸ்ரீஅறம்வளர்த்த நாயகி சமேத ஸ்ரீகுலசேகர நாதர் கோயில். ஆங்கிலேய அதிகாரி ஒருவன் இந்தக் கோயிலை இடிக்க வந்தான். அப்போது, தெய்வசக்தி ஒன்று அவனைத் தூக்கி வீசியது. நிலைகுலைந்து விழுந்த அந்த அதிகாரியை, குதிரை ஒன்று தன் கால்களால் மிதித்துக் கொன்றது. தற்போதும் இந்த ஆலயத்தில் குதிரையின் கால் தடம், துரையின் கால் தடம், முட்டு, கை தடம் ஆகியற்றைக் காணலாம்.

 வழிபாட்டுச் சிறப்புகள் : குலசேகர மன்னன் பல போர்களில் வெற்றிபெற அருள் பாலித்தவர், இந்த இறைவன். இவரை வழிபட்டால் நமக்கும் காரியவெற்றி உண்டாகும். மாணவர்கள் தேர்வில் நல்ல மதிப்பெண்ணுடன் வெற்றிபெறுவதற்கு  இந்த இறைவனை வழிபட்டுச் செல்கின்றனர். அதேபோல், ஸ்ரீகுலசேகர நாதரை வழிபட்டால் நோய்கள் தீரும் என்கிறார்கள் பக்தர்கள். இந்தக் கோயிலில் அருளும் முருகப்பெருமானின் சந்நிதியில் திருமணம் செய்துகொண்டால், வாழ்வு செழிக்கும்; விரைவில் குழந்தை பாக்கியம் கிடைக்கும் என்பது நம்பிக்கை.

  எப்படிச் செல்வது?: நெல்லை - திருச்செந்தூர் சாலையில், 18 கி.மீ தூரத்திலுள்ள கருங்குளம் விலக்கிலிருந்து வலதுபுறம் திரும்பி 6 கி.மீ  பயணித்தால், தெற்கு காரசேரியை அடையலாம். கோயில், காலை 7 முதல் 10 மணி வரையிலும் மாலை 6 முதல் 7 மணி வரையிலும் திறந்திருக்கும்.

தொழில் வளம் பெருக்கும் சோமசுந்தரர்

 தலம்: ஆத்தூர்

 இறைவன் :  ஸ்ரீசோமநாதர்

 அம்பாள்  : ஸ்ரீசோமசுந்தரி

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் : தாமிரபரணி ஆற்றின் கரையில் அமைந்திருப்பதால், இவ்வூருக்கு ஆற்றூர் என்று பெயர். அதுவே ஆத்தூர் என்று மருவியதாம். ஆதியில் இந்தத் தலம் ‘சோமாரண்யம்’ என்று அழைக்கப்பட்டது. அக்காலத்தில், பசு ஒன்று இந்தப் பகுதியிலுள்ள ஓர் ஆலமரத்தின் அடியில் வந்து தானாகவே பால் சொரியும். அதைக் கண்ட மேய்ப்பன் அரசனிடம் தகவல் சொன்னான். அரசனின் ஆணைப்படி அந்த மரத்தை வெட்ட முயன்றபோது, ரத்தம் பீறிட்டது.  அனைவரும் அதிர்ந்தனர். அன்றிரவு அரசன் கனவில் தோன்றிய இறைவன், ஆலமரத்துக்கு இடையே தான் லிங்கமாக உள்ளதாகவும், அங்கு தனக்கு ஒரு கோயிலை எழுப்பவேண்டும் என்றும் கூறினார். அரசனும் கோயில் எழுப்பினான்.

சோமாரண்யத்தில் தோன்றிய லிங்கம் ஆகையால், இந்த இறைவன் ‘சோம நாதர்’ என்று அழைக்கப்பட்டார். இங்கு ஸ்ரீஅனந்தபத்மநாதர், சிவலிங்க மூர்த்தி யைத் தன் வலது கையால் பூசிப்பது போன்று தரிசனம் கொடுக்கிறார். இங்கே அம்பிகை கிழக்கு நோக்கி அருள்வது விசேஷம்!

 வழிபாட்டுச் சிறப்புகள் : இங்கு வந்து விரதமிருந்து நீராடி, அம்மையப்பனை வணங்கினால், உடற்பிணிகள் நீங்கும் அதிசயம் இன்றும் நடக்கிறது என்கிறார்கள் பக்தர்கள். சந்திரனும் வியாழ பகவானும் வழிபட்ட தலம் ஆதலால், அந்தக் கிரகங்களால் ஏற்படும் குறைகளுக்குத் தீர்வு தரும் தலமாகவும் இது திகழ்கிறது.

 எப்படிச் செல்வது?: தூத்துக்குடி - திருச்செந்தூர் மார்க்கத்திலுள்ளது ஆத்தூர். பேருந்து நிறுத்தத்தில் இறங்கி ஆலயத்துக்குச் செல்லலாம். காலை 6 முதல் 10 மணி வரை; மாலை 4 முதல் 7 மணி வரை கோயில் திறந்திருக்கும்.

மனநலம் காக்கும் திருமூல நாதர்

 தலம்: வல்லநாடு

 இறைவன் : ஸ்ரீதிருமூலநாதர் 

 அம்பாள் : ஸ்ரீஆவுடையம்மன்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் : குவளை தாங்கிய சுயம்புலிங்கம் எழுந்தருளியுள்ள சிவத்தலங்கள், தாமிரபரணிக் கரையில் மூன்று உண்டு. அவை: அம்பாசமுத்திரம் திருமூலநாதர் கோயில், ஊர்காடு திருகோட்டீஸ்வரர் கோயில், வல்லநாடு திருமூலநாதர் கோயில். 16-ம் நூற்றாண்டில் வல்லநாடு பகுதியை ஆண்ட சீமாறன் வல்லப பாண்டியன் வெட்டிய குளத்தின் (சீவல்லப ராஜன் குளம்) கரையில் சுயம்புவாக எழுந்தருளியவர், ஸ்ரீதிருமூலநாதர்.

ஒருமுறை இந்த லிங்க மூர்த்தம் மழையில் கரைவதைக் கண்டு பதறிய மன்னன், ஸ்வாமிக்குக் கூரை அமைக்கக் கட்டளையிட்டான். பரமனோ சூறாவளியை ஏற்படுத்தினார். கூரை விண்ணில் பறந்தது. பின்னர், தனது வைர மணி முடியையே லிங்கத்தின் மீது சூட்டினான். மறுகணம் இயற்கையின் சீற்றமும் தணிந்தது. அதே இடத்தில் அழகுற ஆலயம் அமைத்தான் மன்னன். அருளாடல் புரிந்து மன்னனை ஆட்கொண்ட இறைவனுக்கு ‘ஸ்ரீஞான ஹிருதேயேஸ்வரர்’ என்றும் திருப்பெயர் ஏற்பட்டது. இந்த மூலவரை மார்ச் மற்றும் செப்டம்பர் மாதங்களில் - 21, 22, 23 ஆகிய நாள்களில், சூரியன் தன் ஒளிக்கரங்களால் தழுவி வழிபடுகிறார்.

 வழிபாட்டுச் சிறப்புகள்: குழந்தை பாக்கியம் வேண்டுவோர், ஆவுடை அம்மைக்கு வளையல் சாத்தி வழிபடுகின்றனர். இதயம் தொடர்பான பிணிகள் உள்ளவர்கள், மன நலம் குன்றியவர்களை இங்கு அழைத்து வந்து ஸ்வாமியை வழிபடச் செய்தால், விரைவில் அவர்கள் நலம் பெறுவார்கள் என்பது நம்பிக்கை.

 எப்படிச் செல்வது : நெல்லை-தூத்துக்குடி மார்க்கத்தில், வல்லநாடு என்ற ஊரில் இறங்கி 1 கி.மீ. கலியாவூர் சாலையில் சென்றால், கோயிலை அடையலாம். காலை 6 முதல் 9 மணி வரை; மாலை 5 முதல் 7 மணி வரை கோயில் திறந்திருக்கும்.

தீராத கடன் தீர்க்கும் சட்டநாதர்

 தலம்: கொங்கராயகுறிச்சி

 இறைவன் : ஸ்ரீவீரபாண்டீஸ்வரர் - சட்டநாதர்

 அம்பாள் : ஸ்ரீபொன்னுறுதி அம்பாள்

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் : தூத்துக்குடி மாவட்டம், ஸ்ரீவைகுண்டம் அருகே உள்ளது கொங்கராயக்குறிச்சி. இங்கு வாழ்ந்த கொங்குராயர் எனும் மன்னரால் இவ்வாலயம் விஸ்தரிக்கப்பட்டது. நவலிங்கத் தலங்களில் இரண்டாவது தலமாக விளங்குகிறது. கோயிலுக்குள் நுழைந்தால், தெற்குநோக்கியவளாக... ‘தேடி வருபவர்களுக்கு நிச்சயம் பொன்னும் பொருளும் அள்ளித்தருவேன்’ என்று உறுதி அளிப்பவள் போல் கருணைபொங்கக் காட்சி தருகிறாள், ஸ்ரீபொன்னுறுதி அம்பாள். வீரபாண்டீஸ்வரர் கிழக்கு நோக்கி அருள்பாலிக்கிறார்.

இந்த ஆலயத்தின் பைரவரைச் சட்டநாதர் எனப் போற்றுகிறார்கள். சீர்காழியைப் போலவே பைரவர் அருளும் காரணத்தால் இவ்வூர் ‘தென் சீர்காழி’ என அழைக்கப்படுகிறது.  

 வழிபாட்டுச் சிறப்புகள் :  இக்கோயிலில் தேய்பிறை அஷ்டமியில் பைரவருக்கு விசேஷ பூஜைகள் நடைபெறும். இதில் கலந்துகொண்டு பைரவரை வழிபட்டால், தீராத கடன் தொல்லைகள் தீரும், வியாபாரம் செழிக்கும், எதிரிகள் விலகி ஓடுவர், தடைகள் விலகி விரைவில் திருமணம் கைகூடும், குழந்தை இல்லாத அன்பர்களுக்குக் குழந்தை வரம் கிடைக்கும் என்கிறார்கள் பக்தர்கள்.

 எப்படிச் செல்வது : நெல்லை - திருச்செந்தூர் மெயின்ரோட்டில் சுமார் 20 கி. மீ தொலைவில் உள்ளது கருங்குளம். இவ்வூரிலிருந்து சுமார்
2 கி. மீ தொலைவில் உள்ளது கொங்கராயகுறிச்சி சிவாலயம். இந்தத் திருக் கோயில் காலை 8 முதல் 10.30 மணி வரை; மாலை 5 முதல் 7.30 மணி வரை திறந்திருக்கும்.

தோஷங்கள் நீக்கும் அழகிய கூத்தர்

 தலம்: கட்டாரிமங்கலம்

  இறைவன் : ஸ்ரீநடராஜர் அழகிய கூத்தர்

 அம்பாள் : ஸ்ரீசிவகாமி அம்பாள். 

திருவருள் திருவுலா: ஏற்றங்கள் அருளும் ஏழு சிவாலயங்கள்! - தூத்துக்குடி மாவட்டக் கோயில்கள்

திருத்தலச் சிறப்புகள் : இவ்வூர் பஞ்ச நடராஜ ஸ்தலங்களில் நான்காவது தலம். மற்றவை: சிதம்பரம், செப்பறை, கரிசூழ்ந்த மங்கலம், கருவேலங்குளம். கட்டாரிமங்கலத்தை ஆண்ட மன்னன் வீரபாண்டியன், நடராஜரின்  திருமேனியைச் செய்யும்படி சிற்பி ஒருவருக்கு ஆணையிட்டான். அந்தச் சிற்பி அழகான இரண்டு திருமேனிகளைச் செய்தார். `உலகில் இதுபோல் அழகிய திருமேனி வேறு எங்கும் திகழக்கூடாது’ என்ற எண்ணத்தில், மன்னன் சிற்பியின் கைகளை வெட்டி வீழ்த்தினான். ஏற்கெனவே, இதே சிற்பியைக் கொண்டு செப்பறை கோயில் அமைத்த `முழுதும் கண்ட ராமபாண்டியனு’க்கு இந்த நிகழ்வு தெரியவந்தது. மிகுந்த கோபத்துடன் வீரபாண்டியன்மீது படையெடுத்து வந்து, போரில் அவன் கைகளையும் வெட்டி வீழ்த்தினான். கைகளை இழந்த வீரபாண்டியன், தான் செய்த தவற்றுக்காக வருந்தினான். ராமபாண்டியனிடம் மன்னிப்பு கேட்டான். மனமிறங்கிய ராம பாண்டியன், வீரபாண்டியனுக்குக் கட்டாரிமங்கலத்தை ஆளும் உரிமையை வழங் கினான். அங்கு கோயிலைக் கட்டி நடராஜரை சிறப்புற வழிபட்டான் வீரபாண்டியன்.

 வழிபாட்டுச் சிறப்புகள் : இந்தக் கோயிலை மூன்று முறை வலம் வந்து வணங் கினால் திருமாங்கல்ய பாக்கியம் கிடைக்கும். மனக்கவலை, தீராத நோய், பிதுர் தோஷம், நவகிரக தோஷம் ஆகியவை நீங்கும் என்பது ஐதிகம். இந்தத் தலத்தில் அருள்புரியும் அழகிய கூத்தரை வழிபட்டால் பிறவிப் பிணி தீரும்.

 எப்படிச் செல்வது?: நெல்லையிலிருந்து (முனைஞ்சிப்பட்டி, பேய்குளம் வழியில்) சுமார் 35 கி.மீ. தொலைவிலுள்ளது கட்டாரிமங்கலம். இந்தக் கோயில் காலை 7 முதல்11 மணி வரை; மாலை 4.30 முதல் 7 மணி வரை திறந்திருக்கும்.

- முத்தாலங்குறிச்சி காமராசு

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism