Published:Updated:

வரதர் கோயில் அற்புதங்கள்!

வரதர் கோயில் அற்புதங்கள்!
பிரீமியம் ஸ்டோரி
வரதர் கோயில் அற்புதங்கள்!

வரதர் கோயில் அற்புதங்கள்!

வரதர் கோயில் அற்புதங்கள்!

வரதர் கோயில் அற்புதங்கள்!

Published:Updated:
வரதர் கோயில் அற்புதங்கள்!
பிரீமியம் ஸ்டோரி
வரதர் கோயில் அற்புதங்கள்!

நூற்றியெட்டு திவ்யதேசங்களில் ஒன்று... ஸ்ரீஹயக்ரீவர், அகத்தியருக்கு ‘ஸ்ரீவித்தை’யை உபதேசித்த தலம்... சக்தி பீடங்களுள் ஸ்ரீசக்ர பீடமாகத் திகழ்வது... ‘நகரேஷு காஞ்சி’ என காளிதாசனால் போற்றப்பட்டது... இப்படி, பல சிறப்புகள் கொண்ட காஞ்சி, சென்னையிலிருந்து தென்மேற்கில் சாலை மார்க்கமாக சுமார் 62 கி.மீ. தொலைவில் உள்ளது.

முக்தி தரும் ஏழு தலங்களில் காஞ்சி, ஸ்ரீநாராயணரின் இடுப்புப் பகுதியாக திகழ்கிறது என்பது ஐதீகம். மற்றவை அவந்தி (காலடி), துவாரகை (தொப்புள்), ஹரித்வார் (மார்பு), மதுரா (கழுத்து), காசி (மூக்கு) அயோத்தி(தலை).

பஞ்ச மூர்த்தி தலங்கள் அல்லது பஞ்சாமிர்த க்ஷேத்திரங்கள் எனப் போற்றப்படும் தலங்களுள் ஒன்றாகவும் காஞ்சி திகழ்கிறது. மற்றவை: திருவரங்கம், திருப்பதி, திருவல்லிக்கேணி, திருநாராயணபுரம்.

வைணவத் தலங்களில், திருநாராயணபுரத்தை `ஞான மண்டபம்’ என்பர். திருவேங்கடத்தை `பூ மண்டபம்’ என்பர். திருவரங்கத்தை `போக மண்டபம்’ என்பர். காஞ்சி ஸ்ரீவரதராஜ பெருமாள், தனக்குத் திருமஞ்சன கைங்கர்யம் செய்த ஸ்ரீராமானுஜரை வைணவத் தலைமை ஏற்கச் செய்யும் பொருட்டு ஸ்ரீரங்கத்துக்கு தியாக உணர்வுடன் அனுப்பியதால், இந்தத் தலத்தை `தியாக மண்டபம்’ என்பர்.

வரதர் கோயில் அற்புதங்கள்!

ஒட்டுமொத்த விகடனுக்கும் ஒரே ஷார்ட்கட்!

• பிரம்மா, யாகம் செய்து வழிபட்டதால், (க- பிரம்மா; அஞ்சிதம் -பூஜிக்கப்பட்டது) காஞ்சி எனப் பெயர் கொண்ட இந்தத் தலத்தை ஸ்ரீவிஷ்ணு க்ஷேத்திரம், விஷ்ணு சாலை, ஹரி க்ஷேத்திரம், புண்ணியகோடி க்ஷேத்திரம், வைகுண்ட க்ஷேத்திரம், ஹஸ்திசைல க்ஷேத்திரம், திரிஸ்ரோத க்ஷேத்திரம், திருக்கச்சி மற்றும் ஹஸ்திகிரி ஆகிய பெயர்களாலும் போற்றுவர்.

• பிரளய காலத்திலும் அழியாத தலம் ஆதலால்- பிரளயசித்து; கம்பை ஆற்றின் வெள்ளம் கண்டு அஞ்சிய அம்பிகை, இறைவனைத் தழுவியதால்- சிவபுரம்; பிரம்மன் தவம் செய்ததால்- தபோவனம்; பிரம்மனது வேள்விக்கு மகிழ்ந்து திருமால் காட்சி தந்த தலம் ஆதலால் விண்டுமாபுரம்; பிரம்மன், திருமால், சிவபெருமான் ஆகிய மூவரும் வசிப்பதால் திருமூர்த்திவாசம்; துண்டீர மகாராஜாவால் ஆளப்பட்டதால் துண்டீரபுரம்; சத்திய சத்தியர், சத்திய சோதகர், சத்திய கற்பர், சத்திய காமர்கள் போன்ற ஞானியர் வாழ்ந்த தலமாதலால் சத்திய விருத க்ஷேத்திரம் ஆகிய பெயர்களுடன் திகழ்கிறது காஞ்சி.

• இங்கு அருள்பாலிக்கும் ஸ்ரீவரதராஜ பெருமாளைக் கிருத யுகத்தில் பிரம்மனும், திரேதா யுகத்தில் கஜேந்திரனும் (யானை), துவாபார யுகத்தில் பிருகஸ்பதியும், கலி யுகத்தில் அனந்தசேஷனும் வழிபட்டு அருள் பெற்றனராம். தவிர, சரஸ்வதிதேவி, நாரதர், ஆதிசேஷன், இந்திரன், பிருகு முனிவர் ஆகியோரும் இங்கு வந்து வழிபட்டுள்ளனர். இன்றும், ஆண்டுக்கு இரு முறை- வைகாசி விசாகம் மற்றும் ஆடி மாதம் வளர்பிறை தசமி ஆகிய நாள்களில் ஆதிசேஷன் இங்கு வந்து வழிபடுவதாக ஐதீகம்.

• வில்லிபாரதத்தின் ‘தீர்த்த யாத்திரை’ சருக்கத் தில் அர்ஜுனன் காஞ்சிபுரம் வந்து ஸ்ரீவரதராஜர், அஷ்டபுஜ பெருமாள் ஆகியோரை தரிசித்ததுடன், ஏழு நதிகள் மற்றும் தீர்த்தங்களில் நீராடியதாகக் குறிப்பிடப்பட்டுள்ளது.

• பொய்கை ஆழ்வார் மற்றும் ஸ்ரீஸ்வாமி தேசிகன் ஆகியோர் அவதரித்த தலம். பூதத்தாழ்வார், திருமங்கை ஆழ்வார், கூரத்தாழ்வான், ஸ்ரீராமானுஜர், ஸ்ரீநிகமாந்த மகாதேசிகன், கன்னிகாதானம் தாதாச்சார்யார் சுவாமிகள், அப்பய்ய தீட்சிதர், புரந்தரதாசர், அப்புள்ளார், நடாதூர் அம்மாள் ஆகியோர் பெருமாளைப் போற்றிப் பரவி அருள் பெற்ற தலம்.

• ஸ்ரீவரதராஜர்மீது திருக்கச்சி நம்பிகள்- தேவராஜ அஷ்டகமும், வேதாந்த தேசிகர்- வரதராஜ பஞ்சாசத்தும், மணவாள மாமுனிகள்- தேவராஜ மங்களமும் பாடி மகிழ்ந்துள்ளனர்.

• அர்த்த சாஸ்திரம் எழுதிய சாணக்கியர், திருக்குறளுக்கு உரை எழுதிய பரிமேலழகர், சக்ரவர்த்தி ஹர்ஷவர்த்தனர் நிறுவிய நாளந்தா பல்கலைக்கழகத்தின் முதல் தலைவரான தர்மபாலர் முதலான அறிஞர்கள், கல்வியும் ஞானமும் பெற்ற தலம் இது.

• கி.மு. 2-ஆம் நூற்றாண்டில் பண்டைய சோழர்களது தலைநகரமாக இருந்த காஞ்சி கி.பி. 3 முதல் 9-ஆம் நூற்றாண்டு வரை பல்லவர் களது தலைநகரமாகவும், 10 முதல் 14-ஆம் நூற்றாண்டு வரை பிற்காலச் சோழர்களின் காலத்தில் முக்கிய நகரமாகவும் திகழ்ந்ததாம். பிறகு, 17-ஆம் நூற்றாண்டில் விஜயநகர மன்னர்களால் சிறப்புப் பெற்றது காஞ்சி.

• இந்தக் கோயில் கட்டப்பட்ட காலம் கி.பி.1053 என்பர். பிற்காலத்தில் (14-ஆம் நூற்றாண்டு) சோழர்கள் இந்தக் கோயிலை மேலும் விரிவுபடுத்தி அமைத்தார்களாம்.

• விஜய நகர மன்னர்கள்- கோபுரம், ஊஞ்சல் மண்டபம், ஆண்டாள் சந்நிதி, நவராத்திரி மண்டபம் மற்றும் கல்யாண மண்டபம் ஆகியவற்றை அமைத்தனர். விஜய நகர மன்னர்கள் வரதர் கோயிலுக்கு 17 கிராமங்களை மான்யமாக வழங்கியதைக் கல்வெட்டுகள் தெரிவிக்கின்றன. அச்சுததேவராயர், திருமலை மன்னர் ஆகியோரும் நில தானம், திருப்பணிகள் செய்ததுண்டு.

• மேற்கு நோக்கிய ஸ்ரீவரதராஜ பெருமாள் திருக்கோயில், சுமார் 20 ஏக்கர் பரப்பளவில் அமைந்துள்ளது. கிழக்குக் கோபுரம் 9 நிலைகளுடனும் மேற்குக் கோபுரம் 7 நிலைக ளுடனும் திகழ்கின்றன. கிழக்குக் கோபுரத்தைக் கிருஷ்ணதேவராயரும், மேற்குக் கோபுரத்தைப் பல்லவர்களும் கட்டியுள்ளனர். இவை தவிர, தொண்டரடிப்பொடி வாயில் கோபுரம், ஸ்ரீகருடன் சந்நிதி வாயில் கோபுரம் உட்பட இன்னும் 4 கோபுரங்களும் இங்கு உண்டு.

வரதர் கோயில் அற்புதங்கள்!

• ஐந்து பிராகாரங்களுடன் காணப்படும் இந்தக் கோயில், வாரணகிரி மற்றும் அத்திகிரி எனும் இரு தளங்கள் கொண்ட கட்டுமலை அமைப்புடன் காணப்படுகிறது. வாரணகிரியில் அழகிய சிங்கரையும், அத்திகிரியில் வரதராஜப் பெருமாளையும் தரிசிக்கலாம். இந்தக் கட்டுமலையைப் பாண்குன்று கல், அஞ்சன வெற்பு, மணிக்குன்று, அஸ்தகிரி, கரி கிரி, வாரண வெற்பு ஆகிய பெயர்களாலும் குறிப்பிடுவர்.

• மாட வீதி எனப்படும் வெளிப்பிராகரத்தில் மேற்குக் கோபுரம் வழியே உள்ளே நுழைந்தால் இடப்புறம் நூற்றுக்கால் மண்டபம். முகம் பார்க்கும் கண்ணாடியுடன் ஒப்பனை செய்யும் பெண், விஸ்வாமித்ரர் யாகம், சீதா கல்யாணம், வாலி வதம், ராமபிரானின் கணையாழியை சீதாவிடம் தரும் அனுமன், கிளி வாகனத்தின் மீது ரதிதேவி, அன்ன வாகனத்தின் மீது மன்மதன், சஞ்சீவி பர்வதத்தைத் தூக்கி வரும் அனுமன் மற்றும் தசாவதாரக் காட்சிகள் என்று சிற்பக் களஞ்சியமாகத் திகழ்கிறது நூற்றுக் கால் மண்டபம். இதன் ஒவ்வொரு மூலையிலும் விதானத்தில் தொங்கும் கருங்கல்லினால் ஆன சங்கிலிகள் சிற்ப அற்புதம்!

• உண்மையில் இதில் 96 தூண்களே உள்ளன. இதன் மையத்தில் பிரமாண்டமான மேடை ஒன்று விமானம் மற்றும் நான்கு மரத் தூண்களுடன் அமைந்துள்ளது. இவற்றையும் சேர்த்தே நூறுகால்! விசேஷ நாள்களில் உற்சவ மூர்த்தியர் இந்த மேடையில் எழுந்தருள்கின்றனர்.

• இந்த மண்டபத்தின் அருகே அனந்த சரஸ் எனும் தீர்த்தம். சனிக்கிழமைகளில் இதில் நீராடுவோருக்குக் காவிரியில் நீராடிய பலன் கிடைக்குமாம். ஆதிசேஷன் இதில் நீராடி பூமியைத் தாங்கும் வல்லமை பெற்றாராம். இதை சேஷ தீர்த்தம் என்றும் கூறுவர். இதன் நடுவில் நீராழி மண்டபம் ஒன்றைக் காணலாம். இதன் அடியில் நீருக்குள் வெள்ளிப் பேழை ஒன்றில் அருள்பாலிக்கிறார் அத்தி வரதர்.

• கடந்த 1979-ஆம் ஆண்டில் வெளியே எழுந்தருளிய அத்திவரதர், வசந்த மண்டபத்தில் ஒரு மண்டல காலம் பக்தர்களுக்கு தரிசனம் அருளினார். அப்போது, திருப்பதி கோயிலில் இருந்து பட்டாடை முதலியன அத்திவரதருக்கு அனுப்பப்பட்டு, சிறப்பு செய்யப்பட்டதாம்.

• அனந்த சரஸ் குளத்தின் கரையில் சக்கரத்தாழ் வார் சந்நிதி உள்ளது. உள்ளே 16 ஆயுதங்கள் தரித்து சேவை சாதிக்கிறார் ஸ்ரீசக்கரத்தாழ்வார். இந்த விக்கிரகத்தின் மறுபுறம் ஸ்ரீநரசிம்ம மூர்த்தி. அதாவது ஒரே விக்கிரகத்தில் முன்னும் பின்னுமாக இரு மூர்த்திகள். அருகே, உற்சவர் விக்கிரகம். அனந்த சரஸ் தீர்த்தக்குளம் தவிர ப்ரஹ்ம தீர்த்தம், ஸ்வர்ண பத்ம தீர்த்தம், அக்னி தீர்த்தம், குஸ தீர்த்தம், வேகவதி ஆறு ஆகிய தீர்த்தங்களும் இங்கு உண்டு.

• அனந்த சரஸ் திருக்குளத்தின் மேற்கில் வேணு கோபாலன் மற்றும் பூவராகன் ஆகியோரின் சந்நிதிகள். குளத்தின் வடகரையில் ஸ்ரீரங்கநாதர் சந்நிதி. இந்தச் சந்நிதிகளை தரிசித்து, திருக்குளத்தைக் கடந்து சென்றால் ஆழ்வார் வீதி எனப்படும் முதல் பிராகாரம். பொதுவாக ‘ஆழ்வார்’ என்றால் நம்மாழ்வாரையே குறிக்கும். இவர், ‘அவர் வீதி’ என்று வேண்டி பாடியதால், பெருமாள் கருட வாகனத்தில் எழுந்தருளும்போதெல்லாம் இந்த வீதியிலேயே முதலில் எழுந்தருள்கிறார். எனவே இது, நம்மாழ்வாரைச் சிறப்பிக்கும் வகையில் `ஆழ்வார் வீதி’ எனப்படுகிறது.

• நம்மாழ்வாருடன் மதுரகவி, நாதமுனிகளும் எழுந்தருளி உள்ளனர். உடையவர் சந்நிதியில் முதலாழ்வார்கள் மூவர், திருமழிசை பிரான், பெரியாழ்வார், தொண்டரடிப் பொடியாழ்வார், திருமங்கை ஆழ்வார் ஆகியோரையும் ஆளவந்தார், கூரத்தாழ்வான் ஆகிய ஆசார்யர்களையும் தரிசிக்கலாம்.

• தொடர்ந்து மேற்கில் திருக்கச்சி நம்பிகள் சந்நிதி. கொடிமரத்துக்கு முன்னுள்ள வேதாந்த தேசிகன் சந்நிதியில் கோடிகா தானம் ஸ்ரீலக்ஷ்மி குமாரதேசிகனும் அவர் மனைவி அம்மங்காரும் உள்ளனர் (கி.பி.14 முதல் 16-ம் நூற்றாண்டு வரை விஜயநகர சமஸ்தானம் ஆட்சியில் காஞ்சி இருந்தது. அப்போது இருந்த தாததேசிகன் என்பவர், இந்தக் கோயிலுக்குப் பல திருப்பணிகள் செய்தார். இவர் பரம்பரையில் வந்தவரே கோடிகாதானம் லக்ஷ்மி குமார தேசிகன். இவரும் பல திருப்பணி செய்துள்ளாராம்).

வரதர் கோயில் அற்புதங்கள்!

• இங்குள்ள அம்மாள் காலட்சேபக் கூடம் குறிப்பிடத்தக்கது. வேதாந்த தேசிகரின் குரு நடாதூர் வரதாச்சார்யார் தினமும் பெரு மாளுக்கு பாலை ஆற்றி அமுது செய்து வந்தவர். இவ்வளவு வாஞ்சையுடன் தாயைப் போல் செயல்பட்டதால், பெருமாள் இவரை ‘அம்மாள்’ என்று அழைத்தாராம். இவர் தம் சீடர்களுக்கு உபதேசிக்கும் இடமே காலட்சேபக் கூடம்.

• ஆழ்வார் பிராகாரத்திலிருந்து 4-ஆம் பிராகாரத்துக்குள் (ஆளவந்தார் பிராகாரம், மடைப்பள்ளி பிராகாரம்) ஒரு கோபுர வாயில் வழியே நுழைகிறோம். இந்த வாயிலை தோடர்மால் வாயில் என்பர். இதில் உற்சவ காலங்களில் பெருமாள் எழுந்தருளும் கண்ணாடி அறை, அபிஷேக மண்டபம், வாகனக் கிடங்கு, ஸ்ரீராமன் சந்நிதி, திருவனந்தாழ்வான் சந்நிதி, கருமாணிக்கப் பெருமாள் சந்நிதி, மடைப்பள்ளி, ராப்பத்து விழா மண்டபம், பெருந்தேவி தாயார் சந்நிதி ஆகியன உள்ளன.

• தாயார் சந்நிதி உள்ள பிராகாரத்தில் இருந்து உள்பிராகாரத்துக்கு மற்றுமொரு கோபுர வாயில் வழியே நுழையலாம். இதன் நேர் மேற்கில் கருடன் சந்நிதி. கிழக்கில் எதிர்ப் புறம் ஸ்ரீஅழகிய சிங்கர் எனப்படும் நரசிம்மர் சந்நிதி. மேலும் இந்தப் பிராகாரத்தில் ஆண்டாள் சந்நிதி, விஷ்வக்சேனர் சந்நிதிகளை தரிசிக்கலாம். இவரை முன்னிட்டு இந்த பிராகாரம் சேனையர்கோன் திருமுற்றம் எனப் படுகிறது. இதன் வடகிழக்கு மூலையில் தீர்த்தக் கிணறான பிரம்ம தீர்த்தம்.

• தென்கிழக்கு மூலையில் தன்வந்திரி சந்நிதி. தென் மேற்கு மூலையில் வலம்புரி விநாயகர் சந்நிதி. இவர், தும்பிக்கை ஆழ்வார் என்றில்லாமல் வலம்புரி விநாயகர் என்ற பெயரிலேயே அழைக்கப்படுவது இந்தத் தலத்தின் தனிச் சிறப்பு. இந்தப் பிராகாரத்திலேயே மலையாள நாச்சியார் சந்நிதியும் உள்ளது. இந்தப் பிராகாரத்திலிருந்து அத்திகிரி எனப்படும் பெருமாள் சந்நிதிக்கு 24 படிகள் ஏறிச் செல்ல வேண்டும். இவை காயத்ரி மந்திரத்தின் 24 தத்துவங்களை உணர்த்துகின்றனவாம்.

• கருவறையில் புண்ணியகோடி விமானத்தின் கீழ், நின்ற திருக்கோலத்தில் அருள்பாலிக்கிறார் மூலவர் ஸ்ரீதேவராஜர். இவருக்கு தேவ பெருமாள், அத்தியூரான், அத்திவரதன், பேரருளாளன், தேவாதிராஜன், யக்ஞோத்பவர், கஜேந்திர வரதர், தேவராஜ ஸ்வாமி, மாணிக்க வரதன், பிரணதார்த்திஹரன் ஆகிய நாமங்களும் உண்டு.

• திருவேங்கடத்தான்- ஸ்ரீகிருஷ்ணாம்சம் கொண்டவர். ஸ்ரீரங்கநாதர்- ஸ்ரீராமர் அம்சம் கொண்டவர். காஞ்சி வரதரோ இரண்டும் சேர்ந்து ‘ராம கிருஷ்ண’ அம்சத்துடன் விளங்குகிறார்.

• சித்ரா பௌர்ணமி அன்று பிரம்மதேவன் இவரை வழிபட்டுச் செல்வதாக ஐதீகம். இதையடுத்த 14 நாள்கள் மாலைக் கதிரவனின் கிரணங்கள் மூலவரின் திருப்பாதங்களைத் தழுவுமாறு கருவறை அமைக்கப்பட்டுள்ளது.

• உண்மை வைணவன் எப்படி இருக்கவேண்டும் என்பதை விளக்கும் ஸ்ரீவேதாந்த தேசிகரது, ‘அடைக்கலப் பத்து’ பாசுரங் களை வெள்ளிப் பதக்கங்களில் பொறித்து ஸ்ரீவரதராஜருக்கு மாலையாக அணிவித் துள்ளனர். தவிர, திருவத்தியூரன் மீது அருத்த பஞ்சகம், மெய்விரத மான்மியம், திருச்சின்ன மாலை ஆகிய பிரபந்தங்களையும் வரதராஜ ந்யாஸ தசகம் உட்பட இன்னும் பல நூல்களையும் இயற்றியுள்ளார் வேதாந்த தேசிகர்.

• ஸ்ரீவரதனைப் போற்றி ஸ்ரீதியாகராஜர் ‘வரதா நவ நீ தாசா... வரத ராஜ நிந்நு கோரி...’ என்றொரு கீர்த்தனை பாடியுள்ளார்.

• எம்பெருமானைச் சேவிக்க உகந்த வேளை, உஷத் காலம் என்பர். அப்போது, ‘திருப்பள்ளி யெழும் பெருமாளின் கழுத்தில்... பெருந்தேவி தாயார், வரதரை இறுக அணைத்து சயனித்திருந் ததால் பதிந்திருக்கும் பொன் வளையல்களின் தழும்புகள் காணப்படுமாம். இதனால் மலர்ச்சியுடன் திகழும் பெருமாளை இந்த வேளையில் தரிசிப்பது, மகத்தானது’ என்கிறார் வேதாந்த தேசிகர்.

• இந்தப் பெருமாளுக்கு சூட்டப்படும் தங்கக்கொண்டை பிரசித்திபெற்றது. 19-ம் நூற்றாண்டில் வெங்கடாத்ரி என்கிற தெலுங்கு வைணவர் ஸ்ரீரங்கத்திலுள்ள பெருமாளுக்குச் சில தங்க ஆபரணங்கள் வழங்கினார். அவர் காஞ்சிக்கு வந்தபோது ஸ்ரீவரதராஜ பெருமாளுக்குத் தங்கக் கொண்டை அளிக்க விரும்பினார். அதற்கான போதிய பணம் இல்லாததால், யாசகம் செய்து பொருள் சேர்த்தார். திருப்பணி முடியும் தறுவாயில் ஒரு சோதனை!

• ஆபரணத்தின் நடுவில் பதிக்க வேண்டிய எமரால்ட் கற்களை, நகைத் தொழிலாளி தன் ஆசை நாயகியான நடன மாது ஒருத்தியிடம் கொடுத்துவிட்டான். அவள் தஞ்சையில் இருந்தாள். இதை அறிந்த வெங்கடாத்ரி தஞ்சை சென்று, நடன மாதுவிடம் கற்களைத் தருமாறு வேண்டினார். அவள் மறுத்து விட்டாள். இறுதியில் அவள் வீட்டு வாயிலில் உண்ணாவிரதம் இருந்து, எமரால்டு கற்களைப் பெற்று வந்து ஆபரணம் செய்து முடித்து பெருமாளுக்கு அணிவித்தார் வெங்கடாத்ரி. இவர் கவி பாடுவதிலும் வல்லவராம்.

• ஆற்காடு யுத்தத்தின்போது நோய்வாய்ப்பட்ட ராபர்ட் கிளைவ், ஸ்ரீவரதரின் துளசி தீர்த்தம் பருகி, நோய் நீங்கப் பெற்றாராம். அதற்கு நன்றிக்கடனாக போரில் வெற்றி பெற்றுத் திரும்பும்போது, விலையுயர்ந்த மகரக் கண்டி (கழுத்தில் அணியும் ஆபரணம்) ஒன்றை வரதராஜருக்குச் சமர்ப்பித்தாராம்.

வரதர் கோயில் அற்புதங்கள்!

• ஒரு பிரம்மோற்சவத்தின்போது பெருமாளை தரிசித்த கிளைவ், ஸ்வாமியின் தெய்விகத் தோற்றத்தில் மனமகிழ்ந்து, தன் மனைவியின் தங்கச்சங்கிலியை ஸ்ரீவரதனுக்கு அணிவித்து மகிழ்ந்தாராம். இன்றும், இந்த ஆபரணத்தை கருட சேவையின்போது வரதருக்கு அணிவிப்பார்கள் என்று கூறுவர்.

• 19-ஆம் நூற்றாண்டின் ஆரம்பத்தில், ஆங்கிலேய அதிகாரியான பிளேஸ் துரை என்பவர், ஸ்ரீவரதருக்குத் தலையில் அணியும் தங்க ஆபரணத்தை அன்பளிப்பாகத் தந்து மகிழ்ந்தாராம்.

• ஸ்ரீவரதராஜர் என்ற பெயர் இங்குள்ள உற்சவரையே குறிக்கும். எல்லா வைணவத் திருக்கோயில்களிலும் உற்சவருக்கு இருபுறமும், முறையே ஸ்ரீதேவி- பூதேவி நாச்சியார்கள் இருப்பர். ஆனால், இங்கு ஸ்ரீவரதராஜ பெருமாள் உற்சவரின் இருபுறமும் ஸ்ரீபூமா தேவியே அருள்கிறார். மாலிக்காபூரின் படையெடுப்பின் போது, பாதுகாப்பு கருதி இங்கிருந்த உற்சவ விக்கிரகங்கள் உடையார்பாளையம் ஜமீனுக்கு எடுத்துச் செல்லப்பட்டன. போர் அபாயம் நீங்கி, மீண்டும் உற்சவர்களை எடுத்து வந்த போது இரண்டு உபய நாச்சியார்களும் பூமி பிராட்டியாகவே அமைந்துவிட்டனராம்!

• பிரம்மனின் யாகத்திலிருந்து தோன்றியவர் என்பதால், வெப்பத்தின் காரணமாக பெருமா ளின் திருமுகத்தில் வடுக்கள் ஏற்பட்டனவாம். அவற்றை உற்சவரின் திருமுகத்தில் காணலாம்.

• காஞ்சிபுரம் வரதராஜ பெருமாள் கோயிலின் இட்லி பிரசாதம் பிரசித்தி பெற்றது. இதற்காக தனியே இரு மூங்கில் கூடை பயன் படுத்தப்படுகின்றன. இரண்டரை படி பச்சரிசி, ஒன்றரை படி உளுந்து ஆகியவற்றை முதல் நாள் மாலையில் அரைத்து அந்த மாவுடன், உப்பு- மிளகு- சீரகம்- சுக்கு ஆகியவற்றை இடித்துக் கலந்து, மூடிவைப்பர்.

• மறுநாள், மாவுடன் அரைப் படி புளித்த தயிர், ஒரு கரண்டி நெய் ஆகியவற்றைச் சேர்த்து பெரிய மண் பானையில் இட்டு வேகவைப்பர். பிறகு, இந்த இட்லியை சுவாமிக்கு நிவேதித்து, முக்கால் பாகத்தை மட்டும் உதிர்த்து வெண்பொங்கலுடன் சேர்த்து பக்தர்களுக்கு விநியோகிப்பர்.

• பெருமாளுக்குத் துளசி மாலை, தாயாருக்குப் புடவை சாத்துதல் மற்றும் சர்க்கரைப் பொங்கல் படைத்தல் ஆகியவை இங்கு நேர்த்திக் கடன்களாக இருக்கின்றன.

• சித்ரா பௌர்ணமியன்று இரவு 12 மணிக்கு மேல் இங்கு பிரம்மா வந்து வழிபடுவதாக ஐதீகம். எனவே அன்று, பெருமாளுக்கு பிரசாதம் படைத்துவிட்டு பட்டர்கள் வெளியே வந்து விடுவர். ஒரு நாழிகை கழித்து உள்ளே சென்றால், பிரசாதம் நறுமணத்துடன் திகழுமாம்!

• வெள்ளிக்கிழமை தோறும் பிராகாரங் களுக்குள் பிராட்டியார் திருவீதி உலா வருவார். ஏகாதசி தோறும் பெருமாள் உலா நடைபெறும். வெள்ளியும் ஏகாதசியும் சேர்ந்து வரும் நாளில் பெருமாளும் பிராட்டியும் சேர்ந்து உலா வருவர்.

• கள்ளழகர் வைகையில் இறங்குவது போல, ஸ்ரீவரதராஜப்பெருமாள், காஞ்சியிலிருந்து சுமார் 4 கி.மீ. தொலைவில் உள்ள பாலாற்றில் இறங்கும் ‘நடவாவி உற்சவம்’ சித்ரா பௌர்ணமி அன்று நடைபெறுகிறது.

• இங்கு, கருடசேவை வருடத்துக்கு மூன்று முறை... அதாவது, வைகாசி பிரம்மோற்சவம், ஆனி மாதம் சுவாதி நட்சத்திரம் கூடிய பெரியாழ்வார் சாற்றுமுறை, ஆடி மாதம் பௌர்ணமி கஜேந்திர மோட்சம் ஆகிய வைபவங்களின்போது நடைபெறுகிறது.

வரதர் கோயில் அற்புதங்கள்!

• வைகாசி பிரம்மோற்சவத்தின் 6-ஆம் திருநாள் அன்று காஞ்சி ஸ்ரீவரதராஜர், ஸ்ரீவேணுகோபாலன் அலங்காரத்தில் வீதி புறப்பாடு கண்டு திரும்பியதும் மாலைகள் எல்லாம் களைந்த பிறகு, திருவாபரணங்கள் (நகைகள்), வெள்ளி விதானம் (பந்தல்) ஆகியவற்றுடன் ரத்தினக் கம்பளம் விரிக்கப் பட்டு அழைத்து வரப்படுவார். அப்போது நாகஸ்வரம் முழங்க அசைந்து வரும் அவரது (பெருமாளை சுமந்து வரும் அழகு) நடையழகே அழகு!

• மொகலாயர் படையெடுப்பின்போது காஞ்சி வரதராஜர் (உற்சவமூர்த்தி), காஞ்சிக்கு அருகில் வந்தவாசி செல்லும் பாதையில் 4 கி.மீ. தொலைவில் பாலாற்றங்கரையில் உள்ள செவிலிமேடு லட்சுமி நரசிம்மர் கோயிலில் அடைக்கலம் புரிந்தார்.

• ஒரு வருட காலம் அவருக்குத் திருமஞ்சனம் மற்றும் உற்சவங்கள், செவிலிமேட்டில் நடைபெற்று வந்தன. இதன் அடையாளமாக ஒவ்வொரு வருடமும், காஞ்சி வரதர் சித்ரா பௌர்ணமி விழாவில் பாலாற்றில் எழுந்தருளி திரும்பும்போது, செவிலிமேடு லட்சுமி நரசிம்மரை வலம் வந்து செல்கிறார்.

• இங்கு, கருடசேவை வருடத்துக்கு மூன்று முறை அதாவது வைகாசி பிரம்மோற்சவம், ஆனி மாதம் சுவாதி நட்சத்திரம் கூடிய பெரியாழ்வார் சாற்றுமுறை, ஆடி மாதம் பௌர்ணமி கஜேந்திர மோட்சம் ஆகிய வைபவங்களின்போது நடைபெறுகிறது.

• இங்கு ‘பாஞ்சராத்திர’ முறைப்படி வழிபாடுகள் நிகழ்கின்றன. மந்த்ராஸநம்- திருப்பள்ளி எழச் செய்வது, ஸ்நாநாஸநம்- திருமஞ்சனம், அலங்காரஸநம்- பட்டாடை- மாலைகள்- ஆபரணம் அணிவித்தல், போஜ்யாஸநம்- அமுது படைத்தல்/தளிகை சமர்ப்பித்தல், புநர் மந்த்ராஸநம்- துளசியால் அர்ச்சிக்கப்பெறுவது, பர்யங்காஸநம்- பள்ளி அறை பூஜை... இந்த முறைப்படி பூஜைகள் நிகழ்கின்றன.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism