Election bannerElection banner
Published:Updated:

பச்சைமலை முருகனுக்கு பச்சை நிற வஸ்திரம்!

பங்குனி உத்திர தரிசனம்!

பச்சைமலை முருகனுக்கு பச்சை நிற வஸ்திரம்!
பச்சைமலை முருகனுக்கு பச்சை நிற வஸ்திரம்!

ச்சைமலை ஸ்ரீசண்முகக் கடவுளைத் தரிசித்தால், பொன்னும் பொருளும் கிடைக்கப் பெற்று சகல ஐஸ்வரியங்களுடன் வாழலாம் என்கின்றனர் ஈரோடு மாவட்ட பக்தர்கள்.

ஈரோடு மாவட்டம் கோபிசெட்டிப்பாளையம் பேருந்து நிலையத்தில் இருந்து சுமார் 1 கி.மீ. தொலைவில் உள்ளது பச்சைமலை. அழகிய பசுமை சூழ்ந்த இடத்துக்கு நடுவே மலையுச்சியில் கோயில் கொண்டிருக்கிறார் முருகப்பெருமான். மலையேறிச் செல்ல படிகள் உண்டு; வாகனங்களில் உச்சியை அடைவதற்கு சாலை வசதியும் உள்ளன.  

சுமார் 2,000 வருடப் பழைமை மிக்க கோயில் இது. துர்வாச முனிவர் இந்தப் பகுதியில் இருந்து தவமிருந்தபோது, 'இங்கேயுள்ள மலையில் பாலகுமாரனாக ஸ்ரீசுப்ரமணியரைப் பிரதிஷ்டை செய்து வழிபடு!’ என அருளிச் சென்றாராம் சிவபெருமான். அதன்படி, அங்கே முருகன் விக்கிரகத்தைப் பிரதிஷ்டை செய்து துர்வாசர் வழிபட்டார் என்கிறது ஸ்தல புராணம்.

பழநி திருத்தலத்தைப் போன்று, இங்கும் மேற்கு நோக்கி அருள்கிறார் ஸ்ரீசண்முகக் கடவுள். இங்கேயுள்ள ஸ்ரீவித்யா கணபதியும் விசேஷமானவர். இவருக்கு அருகம்புல் மாலை சார்த்தி, தோப்புக்கரணமிட்டு வணங்கினால், கல்வி - கேள்விகளில் சிறக்கலாம். மூலவரின் திருநாமம் ஸ்ரீசண்முகநாத ஸ்வாமி. ஸ்ரீவள்ளி - தெய்வானை சமேத ஸ்ரீகல்யாண சுப்ரமணியரும் தனிச்சந்நிதியில் அருள்கிறார். இவருக்கு வஸ்திரம் சார்த்தி வணங்கினால், விரைவில் திருமண வரம் கைகூடும் என்கின்றனர் பக்தர்கள்.

பச்சைமலை முருகனுக்கு பச்சை நிற வஸ்திரம்!
##~##
இங்கு, ஸ்ரீமரகதவல்லி சமேத ஸ்ரீமரகதீஸ்வரர், ஸ்ரீதேவி- பூதேவி சமேத ஸ்ரீமரகத வேங்கடேச பெருமாள், ஸ்ரீதட்சிணாமூர்த்தி, ஸ்ரீபைரவர், மனைவியர் சமேதராக நவக்கிரகங்கள் ஆகியோருக்கும் சந்நிதிகள் உள்ளன.  

கந்த சஷ்டி, தைப்பூசம் ஆகிய நாட்களில் ஈரோடு மாவட்டத்தின் பல ஊர்களில் இருந்தும் ஆயிரக்கணக்கான பக்தர்கள், காவடி எடுத்தும் பால் குடம் ஏந்தியும் வந்து தரிசித்துச் செல்வார்கள். குறிப்பாக, பத்து நாள் விழாவாக நடைபெறுகிறது பங்குனி உத்திரப் பெருவிழா. இந்த நாளில், முருகப்பெருமானுக்கு ருத்ராபிஷேகம் செய்தால் பிள்ளை பாக்கியம் கிடைக்கும். கடன் தொல்லை நீங்கி, வீடு - மனை வாங்கும் யோகம் கிட்டும் எனச் சொல்லிப் பூரிக்கின்றனர் பக்தர்கள்!

பச்சைமலை முருகனுக்கு பச்சை நிற வஸ்திரம்!

ஆறாம் நாள் - திருக்கல்யாண வைபவம். இதில் கலந்து கொண்டு வேண்டினால், நினைத்தபடி திருமணம் இனிதே நடந்தேறும். 7-ஆம் நாள் திருத்தேரோட்டமும் 8-ஆம் நாள் முத்துப்பல்லக்கில் பவனி வருதலும் கோலாகலமாக நடைபெறுகின்றன.  

''ஸ்ரீசண்முகக் கடவுளுக்கு, பன்னீரால் அபிஷேகம் செய்து, பச்சை நிற வஸ்திரம் சார்த்தி, சிறப்பு அர்ச்சனை செய்தால் வீட்டில் சகல ஐஸ்வரியங்களும் கிடைக்கப் பெறலாம்'' என்கிறார் கோயிலின் பழனிச்சாமி குருக்கள்.

கட்டுரை, படங்கள்: மு.கார்த்திகேயன்

Election bannerElection banner
அடுத்த கட்டுரைக்கு