அட்டையிலும், இங்கும் பிரபல கார்ட்டூனிஸ்ட்,
ஓவியர் கேசவ் வரைந்த படங்கள்.

ஒன்பது என்ற எண்ணுக்கு வடமொழியில் நவம் என்று பெயர். 'நவ’ என்ற சொல் புதிய, புதுமை எனும் பொருள் உடையது. வாழ்வில் புதிய திருப்பங்கள் தரப்போகும் இந்த நந்தன வருட துவக்கத்தில், நமது சக்தி விகடன் 9-ஆம் ஆண்டில் அடியெடுத்து வைக்கும் இந்த தருணத்தில்... எண் 9 குறித்த சுவாரஸ்யமான சில ஆன்மிகத் தகவல்களை அறிவோமா?!

நவவித பக்தி

சிரவணம்  காதால் கேட்டல்; ஸ்ரீபாகவதம் கேட்டு அருள் பெற்றவன் பரீட்சித்து மகாராஜா. கருவில் இருக்கும்போதே பகவானின் பெருமைகளை, நாராயண நாம மகிமையைக் கேட்டு உய்வடைந்தவன் பக்த பிரகலாதன்.

கீர்த்தனம்  பாடுதல்; எப்போதும் நாராயண மந்திரத்தையே உச்சரித்து மகிமை பெற்றவர், தேவரிஷி நாரதர்.

ஸ்மரணம்  மனதால் நினைத்தல்; பூசலார் நாயனார் மனக் கோயில் எழுப்பி இறைவனை வழிபட்டு பேறுபெற்றவர்.

பாத சேவனம்  திருவடிதொழுதல்; 'எடுத்தப் பொற்பாதமும் காணப்பெற்றால் மனித்தப் பிறவியும் வேண்டுவதே இந்த மாநிலத்தே...’ எனும் அப்பரின் வரிகளுக்கேற்ப, இறைவனின் திருவடி தரிசனத்தில் மகிழ்ந்திருத்தல்.

அர்ச்சனம்  பூஜித்தல்; கற்களையும் மலர்களாக பாவித்து, அதைக் கொண்டு சிவனாரை அர்ச்சித்து சிந்தை மகிழ்ந்தவர் சாக்கிய நாயனார்.

வந்தனம்  வணங்குதலால் செய்யும் பக்தி வகை இது.

தாஸ்யம்  தொண்டு செய்தல்; இதற்கு உதாரணமாக அனுமனைச் சொல்லலாம். அவன் ஸ்ரீராமனுக்கு தாஸனாகப் பணி செய்த பக்தன் அல்லவா?!

சக்கியம்  தோழமை; இந்த பக்திக்கு நல்ல உதாரணம் சுந்தர மூர்த்தி நாயனார். இவருக்காக இறைவனாரே காதல் தூது சென்றார் எனில், இருவருக்குமான நட்பை நாம் அறியலாம்!

ஆத்ம நிவேதனம்  தன்னையே அர்ப்பணித்தல்; அர்ஜுனனே இந்தப் பக்திக்குச் சான்றானவன். அவன் தன்னை முழுவதுமாக பகவான் கண்ணனிடம் அர்ப்பணித்து அருள்பெற்றவன்.

நவ தீர்த்தங்கள்: கங்கை, யமுனை, சரஸ்வதி, கோதாவரி, சரயு, நர்மதை, காவிரி, பாலாறு, குமரி

நவலோகம் (தாது): பொன், வெள்ளி, செம்பு, பித்தளை, ஈயம், வெண்கலம், இரும்பு, தரா, துத்தநாகம்

நவ அபிஜேகங்கள்: மஞ்சள், பஞ்சாமிர்தம், பால், நெய், தேன், தயிர், சர்க்கரை, சந்தனம், விபூதி.

நவ குண்டங்கள்: யாகசாலையில் அமைக்கப்படும் ஒன்பது வகையிலான யாக குண்ட அமைப்புக்கள்:

சதுரம், யோனி, அர்த்த சந்திரன், திரிகோணம், விருத்தம் (வட்டம்), அறுகோணம், பத்மம், எண்கோணம், பிரதான விருத்தம்.

சிவ விரதங்கள் ஒன்பது: சோமவார விரதம், திருவாதிரை விரதம், உமாகேச்வர விரதம், சிவராத்ரி விரதம், பிரதோஷ விரதம், கேதார விரதம், ரிஷப விரதம், கல்யாணசுந்தர விரதம், சூல விரதம்

அடியார்களின் குணங்கள்: அன்பு, இனிமை, உண்மை, நன்மை, மென்மை, சிந்தனை, காலம், சபை, மௌனம்.

அடியார்களின் பண்புகள்: எதிர்கொள்ளல், பணிதல், ஆசனம் (இருக்கை) தருதல், கால் கழுவுதல், அருச்சித்தல், தூபம் இடல், தீபம் சாட்டல், புகழ்தல், அமுது அளித்தல்

தொகுப்பு: வலையப்பேட்டை ரா.கிருஷ்ணன்