Published:Updated:

ஞானப் பொக்கிஷம்! - 3

ஞானப் பொக்கிஷம்! - 3

ஞானப் பொக்கிஷம்! - 3

ஞானப் பொக்கிஷம்! - 3

Published:Updated:
ஞானப் பொக்கிஷம்! - 3
ஞானப் பொக்கிஷம்! - 3

துணி துவைக்க இயந்திரம், மாவு அரைக்க இயந்திரம், சட்டினி அரைக்க இயந்திரம், சமைக்க இயந்திரம், வீட்டைக் கூட்டிப் பெருக்க இயந்திரம், கணக்கு வழக்குகளைக் கூட்டிப் பெருக்கவும் இயந்திரம்,  இருந்த இடத்திலேயே நடைபயில இயந்திரம்... இப்படி எல்லாமே இயந்திரமயமாகிவிட்டது. முன்பு, மனிதர்கள் செய்த வேலைகளை எல்லாம் இயந்திரங்கள் செய்து கொண்டிருக்கின்றன.

ஒட்டுமொத்த விகடனுக்கும் ஒரே ஷார்ட்கட்!

அது சரி! பிறகு, மனிதர்கள் எல்லாம் என்னதான் செய்துகொண்டிருக்கிறார்கள்?

##~##
கையில் எடுத்த ரிமோட்டைக் கீழேயே வைக்காமல் தொலைக்காட்சி பார்த்துக்கொண்டு இருக்கிறார்கள். ரிமோட் (remote) என்ற வார்த்தைக்கு நீ...ண்டதூரம், தொலைதூரம் என்பது பொருள். 'ரிமோட் ஏரியா! ரிமோட்ல இருக்கு அந்த ஊர்’ என்றெல்லாம் சொல் வோம் இல்லையா? அப்படித்தான் இதுவும்!

இந்த 'ரிமோட்’டை என்றைக்கு நாம் தொட்டோமோ, அன்றே நல்லவை எல்லாம் நம்மிடம் இருந்து 'ரிமோட்’டில் போய்விட்டன. எல்லா வேலைகளை யும் இயந்திரங்களிடம் சுமத்திவிட்டு, இயந்திரத்தின் (தொலைக்காட்சி) முன்னால் தவம் செய்துகொண்டிருப்பதால்... நம்மையும் இயந்திரங்கள் பார்க்கின்றன.

எப்படி? ஸ்கேனிங், இ.சி.ஜி., எக்ஸ்-ரே, ரத்தப் பரிசோதனை, ரத்த அழுத்தப் பரிசோதனை... இப்படித் தனித்தனியாகக் கூறு போட்டு நம்மைப் பரிசோதித்தும், அந்த இயந்திரங்களுக்குத் திருப்தி ஏற்படவில்லை. ஒட்டு மொத்தமாக முழு உடம்பையும் சோதனை செய்கின்றன. நாம் இயந்திரங்களிடம் பாசமாக இருக்கிறோம்; பதிலுக்கு அவையும் நம்மிடம் பாசமாக இருக்கின்றன. அவ்வளவுதான்!

வாரியார் ஸ்வாமிகள் நகைச்சுவையாகச் சொல்வார்... ''அந்தக் காலத்துல எல்லோ ரும் அடிக்கடி பாட்டி வீட்டுக்குப் போயிட்டு வருவோம். எதனால்? நாம் பிறந்தது பாட்டி வீட்டில்; பொறந்த இடத்துப் பாசம்! அதனால அடிக்கடி பாட்டி வீட்டுக்குப் போயிட்டு வந்தோம். ஆனா, இந்தக் காலத்துல எல்லோரும் அடிக்கடி ஆஸ்பத்திரிக்குப் போயிட்டு வரோம். ஏன் இப்படி? எல்லாரும் அங்கேதானே பொறக்கறோம்! பொறந்த இடத்துப் பாசம். அதான்... அடிக்கடி ஆஸ்பத்திரிக்குப் போயிட்டு வரோம்'' என்பார்.

வாரியார் சொல்வது போன்று, அடிப்படை யில் இருந்தே நமது ஆரோக்கியம் போய்விட்டது. ஆரோக்கியம் என்பது இறைவனால் கொடுக்கப்பட்ட மாபெரும் பரிசு. அதை நல்ல முறையில் காப்பாற்றி, அடுத்த தலைமுறையிடம் ஒப்படைக்க வேண்டியது நமது பொறுப்பு.

''ஏன் சார்! அது என்ன சொத்தா? நிலமா? பத்திரப்பதிவு செய்தா கொடுக்க முடியும்?'' என்று கேலியாக நினைக்க வேண்டாம். ஆரோக்கியத்தைக் காப்பாற்றி அடுத்த தலைமுறையிடம் ஒப்படைப்பதைப் பற்றி நாம் நினைக்கிறோமோ இல்லையோ, நம் முன்னோர்கள் அந்த ஆரோக்கியத்தைக் காப்பாற்றினார்கள்; அடுத்த தலைமுறையிடம் அதைப் பத்திரமாக ஒப்படைத்தார்கள்.அது மட்டுமல்ல; பத்திரப்பதிவும் செய்து கொடுத்துவிட்டுப் போயிருக்கிறார்கள்.

பத்திரப் பதிவு நடந்த காலம் - கடைச் சங்க காலம். பத்திரப் பதிவு செய்தவர்- பெருவாயின் முள்ளியார். சொத்து பற்றிய விவரங்கள் அடங்கிய அந்தப் பத்திரத்தின் பெயர்  'ஆசாரக்கோவை’.

ஞானப் பொக்கிஷம்! - 3

ஆம்! இப்போது நாம் பார்க்கக் கூடிய பழம் பெருந்தமிழ் நூலின் பெயர் 'ஆசாரக்கோவை’. கடைச் சங்க காலத்திய நூலான இதை எழுதியவர், 'பெருவாயின் முள்ளியார்’ என்பவர்.

இந்நூலில் நூறு பாடல்கள் உள்ளன. காலையில் எழுந்திருப்பதில் இருந்து, குளிப்பது எப்படி என்று சொல்லி; சாப்பிடுவதில் இருந்து, இரவு தூங்குவது வரை - நாம் என்னென்ன செய்ய வேண்டும், எப்படி எப்படிச் செய்ய வேண்டும் என்று அற்புதமாகப் பாடம் நடத்தும் அருமையான நூல் அது.

இந்நூலில் இருந்து ஒரு சில தகவல்கள்... தற்போது வெயில் காலமாக இருப்பதால், குளிப்பதில் இருந்து பார்க்கலாம்.

ஆறு போன்ற பொது இடங்களில் குளித்தாலும் சரி, வீட்டில் குளியலறையில் குளித்தாலும் சரி... ஆடையில்லாமல் குளிக்கக் கூடாது.

'உடுத்து அல்லால் நீராடார்’ - ஆசாரக் கோவை- பாடல் 11

அடுத்து, உணவு உண்ணும் முறை. குளித்து விட்டே உண்ண வேண்டும். அது மட்டுமல்ல; உண்பதற்கு முன்பும் பின்பும் கை,  கால்களைச் சுத்தமாகக் கழுவிக்கொள்ள வேண்டும். இவ்வாறு செய்தால் இரைப்பை பலப்படும். அஜீரணக் கோளாறு போன்றவை வராது. வாயை நன்றாகக் கொப்பளித்துக் கழுவிவிட்டு உண்ண வேண்டும். உண்ணும்போது உண்ணும் கலத்தைச் சுற்றி, தெய்வத்தை நினைத்து நீர் சுற்றி விட்டுப் பிறகு உண்ண வேண்டும்.

'எவ்வளவோ பேர் உணவில்லாமல் கஷ்டப் படும்போது, தெய்வமே... உன்னருளால் இது எனக்குக் கிடைத்தது. எவ்வளவோ பணக்காரர்கள் உணவு உண்ண முடியாமல் ஆரோக்கியம் கெட்டிருக்கும்போது, இந்த உணவை உண்ணும்படி யாகவும் என்னை வைத்திருக்கிறாயே!’ என்று நன்றிக்காகத்தான் தெய்வத்தை நினைப்பது.

'நீராடிக் கால் கழுவி வாய் பூசி மண்டலம் செய்து
உண்டாரே உண்டார் எனப்படுவர்’

- பாடல் எண் 18.

இவ்வாறு சொன்ன ஆசாரக் கோவை, மற்றோர் அற்புதமான தகவலையும் சொல்கிறது.

'காலின் நீர்நீங்காமை உண்டிடுக
பள்ளியுள் ஈரம் புலராமை ஏறற்க
என்பதே பேரறிவாளர் துணிவு.’

   - பாடல் எண் 19.

காலைக் கழுவிக்கொண்டுதான் உண்ணவேண்டும் என்று கூறும் ஆசாரக் கோவை, இரவு தூங்குவதற்கு முன்பும் காலைக் கழுவிக்கொண்டுதான் படுக்க வேண்டும் என்று சொல்கிறது.

சாப்பிடும்போது, கழுவிய கால் களில் ஈரம் இருக்கவேண்டும்; ஆனால், காலைக் கழுவிக்கொண்டு படுக்கும் போது, காலில் ஈரம் இருக்கக் கூடாது.

ஈரம்போக சுத்தமாகத் துடைத்துக் கொண்டே படுக்க வேண்டும்.

ஏன்? எல்லோருடைய கைகளும் எப்போதும் தரையில் இருப்பதில்லை; ஆனால், கால்கள் எப்போதும் தரையில் தான் இருக்கும். தரையில் இருக்கும் சிறுசிறு அழுக்குகள், நோய் பரப்பும் கிருமிகள், கால்களில் உள்ள நகக் கண்களின் வழியே உடலில் ஏறி, ஆரோக்கியத்தைக் கெடுக்கும். அதனால்தான், படுக்கும் முன்பு கால்களை நன்றாகக் கழுவிவிட்டு, அந்த ஈரத்தையும் துணியால் ஒற்றி எடுத்து நீக்கி விட்டுப் படுக்கச் சொல்கிறது ஆசாரக் கோவை.

நோயற்ற வாழ்வே குறைவற்ற செல்வம்! அந்தச் செல்வத்தை அடைவதற்கான வழிமுறைகள், அபூர்வமான தகவல்கள் இந்நூலில் உள்ளன. ஆரோக்கியம் வேண்டுவோர் ஆசையோடு அள்ளிக்கொள்ளவேண்டிய புத்தகம் ஆசாரக் கோவை.

(இன்னும் அள்ளுவோம்...)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism