Published:Updated:

கேள்வி-பதில்

கேள்வி-பதில்

கேள்வி-பதில்

கேள்வி-பதில்

Published:Updated:
கேள்வி-பதில்
கேள்வி-பதில்
கேள்வி-பதில்

ஒட்டுமொத்த விகடனுக்கும் ஒரே ஷார்ட்கட்!

கோயில்கள் சிலவற்றில் நிகழும் திருவிளக்கு பூஜையில் சிறுவர், சிறுமிகளும்... ஏன் ஆண் பக்தர்களும்கூட அமர்ந்து பூஜிக்கிறார்கள். இது சரிதானா? ஆண்கள் திருவிளக்கு பூஜை செய்யலாமா? வயது வரம்பு உண்டா?

- எம்.தனலட்சுமி, சென்னை-5

திருவிளக்கு பூஜை சம்பிரதாயத்தில் வந்தது. ஆண் - பெண் பேதமின்றி அத்தனைபேரும் வழிபடலாம். 'பகவதி சேவை’ என்ற பெயரில், திருவிளக்கில் அம்பாளை பூஜிப்பார்கள் கேரளத்து மக்கள். அதில் ஆண்கள் மட்டுமே ஈடுபடுவார்கள்; பெண்களுக்கு இடமில்லை.

ஏழுமலையானுக்கு தீபமேற்றி தீபத்தில் அவரை வழிபடுவர். அதில் ஆண்கள் இடம்பெறுவர். தம்பதியாக செயல்பட்டால் பெண்களுக்கு இடமுண்டு. மங்கலப் பொருட்களில் தீபமும் ஒன்று. மஞ்சளில் பிள்ளையாரை வழிபடுவோம். கூர்ச்சத்தில் (தர்ப்பையில்) தேவர்களையும், தென் புலத்தாரையும் வழிபடுவோம். தேங்காயில் (கும்பத்தேங்காய்) தேவர்களை வழிபடுவோம். அதேபோன்று, மங்கலப் பொருளான ஜோதியில் இறைவனை வழிபடலாம். தகுதி இருப்பவர்கள் எல்லோரும் ஈடுபடலாம்.

செய்யுள்களையும், போற்றி போற்றி என்று சொல்லியும் வழிபடும் தகுதி இருக்கவேண்டும். சிறுபிள்ளைத்தனமாக செயல்பட்டு, அதன் தரத்தை குறைக்க முற்படக்கூடாது. இறைவனாக எண்ணி அடக்கத்துடனும், பண்புடனும் செயல்பட வேண்டும்.

பொதுவாக சுமங்கலி பிரார்த்தனையின்போது ஒற்றைப் படை எண்ணிக்கையில் சுமங்கலிப் பெண்களையும், கன்யா பெண் ஒருவரையும் உட்காரவைப்போம். அவர்களில் ஒருவராக கல்யாணப் பெண்ணையும் உட்காரவைக்கலாமா?

* இது சரியெனில், ஒட்டுமொத்த எண்ணிக்கை (9 1) இரட்டைப்படையாக அமையலாமா?

* மேலும் சுமங்கலி கன்யா பெண் சுவாமி இலை சேர்த்து ஒற்றைப்படையில் இருக்க வேண்டுமா? அல்லது சுவாமி இலை தனியாக இருக்கவேண்டுமா?

* கன்யா பெண் தாயாதிகாரர் பெண்ணாக இருக்கலாமா? அல்லது பெண்ணின் பெண், பேத்தி அல்லது அசல் இவர்களில் எவரையாது உட்கார வைக்கலாமா?

* சுமங்கலிப் பிரார்த்தனைக்கு நாள் நேரம் பார்த்துதான் செய்ய வேண்டுமா? முன்னோர் (சுமங்கலியாக மறைந்தவர்)  திவசம் வரும் பட்சத்தில் அதற்கு மறுநாள் சுமங்கலி பூஜை செய்ய வேண்டி வந்தால், செய்யலாமா?

- எஸ்.ஜெயலக்ஷ்மி, சென்னை

##~##
ஒரு குடும்பத்தில் வருடத்துக்கு ஒருமுறை சுமங்கல்ய பிரார்த்தனை நடத்துவது உண்டு. இன்னும் சிலர் பூணூல், திருமணம் போன்ற வைபவங்களை முன்னிட்டு சுமங்கல்ய பிரார்த்தனை நடத்துவார்கள். வேறு சிலர், சுமங்கலியாக ஒருவர் மறைந்த நாளில் - சிராத்தம் முடிந்து, அதற்கு மறு தினம் சுமங்கல்ய பிரார்த்தனையை நிகழ்த்துவர். இன்னும் சிலர், திருமணத்தன்று கல்யாணப் பந்தலில் சுமங்கல்ய பிரார்த்தனையை (அதிசயப் பொண்டுகள் என்ற பெயரில்) நடைமுறைப்படுத்துவார்கள்.

3, 5, 7, 9 - இந்த எண்ணிக்கையில் சுமங்கலி களை நிர்ணயம் செய்வார்கள். அத்துடன் ஒரு கன்யா பெண்ணையும் சேர்ப்பார்கள். அவர் களுடன் ஒரு பிரம்மசாரியையும் சேர்ப்பார்கள். ஒரு விதவையையும் சேர்க்கும் சம்பிரதாயமும் சில இடங்களில் உண்டு. வீட்டுப் பெண், அதாவது நாத்தனார், அன்றைய தினம் பூஜையில் வைக்கப்படும் 18 முழம் புடவையை ஏற்பார்.

ஆனால், தற்போது சில இடங்களில், 18 முழம் புடவையை முதல் நாள் சிராத்தத்துக்கு உதவ வந்த சுமங்கலிக்கு தருவது வேதனை அளிக்கிறது. நாத்தனார் 'சுடிதார்’ எனில், வந்திருக்கும் மாமிக்கும் சுடிதார்தான்!

வீட்டில் பெரியவர் பூஜையை (ஏற்றி இறக்குதல் போன்றவற்றை)நிகழ்த்துவார். பெரியவர் இல்லாத நிலையில் முதல் மருமகள் அதை ஏற்பார். ஆண்களும் பூஜையில் கலந்துகொண்டு அட்சதை போட்டு அடிபணிவார்கள். இங்கு சுமங்கலிகள் உணவை ஏற்று பிரார்த்தனை முடிந்ததும், ஆண்கள் உணவை ஏற்பர்.

ஒற்றைப்படை என்பது பெண்ணினத்துடன் தொடர்பு உடைய எண்ணிக்கை. பெண் களுக்கு ஒற்றைப்படை எழுத்தில் பெயர் வைக்கச் சொல்கிறது தர்மசாஸ்திரம் (அயுஜாஷரம்குமார்யா:). பெண்ணினத்துக்கு மாதவிடாயும் மூன்று நாட்கள்; அங்கும் ஒற்றைப்படை. அத்தை செய்யும் காப்பும் 7-ஆம் நாளில் நடைபெறுவது உண்டு. பாலிகை தெளிக்கும் சுமங்கலிகளும் ஒற்றைப்படையாக இருப்பர். கணவனுடன் இணையும் நாள்... அவள் தலைக்குக் குளித்த பிறகு ஒற்றைப்படை நாளாக இருந்தால், பெண் குழந்தை பிறக்கும் என்கிறது சாஸ்திரம். லாஜ ஹோமத்தில் பெண்ணுக்கு முன்னுரிமை இருப்பதால், 3 பிரதக்ஷிணத்துடன் முடிவு பெறும்.

பெண்ணினத்தை நினைவுபடுத்தும் வெற்றிலை யையும் ஒற்றைப்படையில் அளிப்பார்கள். வெற்றிலை, பாக்கு, சுண்ணாம்பு ஆகியவற்றுடன் தாம்பூலம் நிறைவு பெறும். நாம்தான் வலுக்கட்டாயமாக நான் காவதைச் சேர்த்தோம். பலதானத்தை (பழம்) ஆண் பிறப்பதற்காகவும், தாம்பூல தானத்தை (வெற்றிலை) பெண் பிறப்பதற்காகவும் என்று மனதில் எண்ணி அளிப்பார்கள்.

ஆக, சுமங்கலிகள் ஒற்றைப்படையில் இருப்பது தகும். கன்யா பெண்ணானவள், மங்கல்ய தாரணத்துக்குப் பிறகு 'சுமங்கலி’ என்ற பெருமையைப் பெறுவாள். அடுத்து வரும் சுமங்கலி  என்பதால் அவளையும் (கன்யகையையும்) சேர்க்கிறோம். தாலி கட்டி சுமங்கலியாக மிளிர வைப்பவன் என்பதால், பிரம்மசாரியையும் சேர்க்கிறோம்.

கேள்வி-பதில்

திருமணத்தில் பெண் வீட்டார் கல்யாணத்துக்கு முன்பு சுமங்கல்ய பிரார்த்தனையை முடித்து விடுவார்கள். ஆண் வீட்டார் மருமகள் வந்த பிறகு சுமங்கல்ய பிரார்த்தனையை நிகழ்த்துவது உண்டு. பெண் கணவன் வீட்டுக்குச் செல்வதால் பெண் வீட்டார் முன்னதாகவும், சுமங்கலியின் புது வரவு நிகழ்வதால் ஆண் வீட்டார் பின்னதாகவும் நடத்துவது பொருந்தும். தமிழர்களில் தென்படும் தனிச் சடங்கு இது. மாறுபட்ட முறையில் நடத்தப் படுவதால், இது சம்பிரதாயம் என்பது புலனாகிறது. சம்பிரதாயம் என்றாலும் உயர்ந்த குறிக்கோளில் எழுந்ததால் பெருமை உண்டு, மந்திரம் ஓதாமல் பெண்ணினம் செய்யும் சடங்குகளை தர்மசாஸ்திரம் ஏற்கும். மாலை போட்டு ஊஞ்சல் ஆடல், பச்சைப்பிடி சுற்றல் போன்றவற்றை சாஸ்திரம் ஏற்கும் (ஆவிருத: ச ஆஸ்தரீப்ய: ப்ரதீயேரள்...) பண்பைக் காக்க முறையாகச் செயல்படவேண்டிய நிகழ்வு சுமங்கல்ய பிரார்த்தனை.

சுவாமி இலை எண்ணிக்கையில்  அடங்காது. சிராத்தத்தில் சுவாமி இலை தனியாக இருக்குமே தவிர, சிராத்தத்தின் எண்ணிக்கையில் வராது. சுவாமி இலை இல்லாமல் சிராத்தமும் உண்டு, சுமங்கலிப் பிரார்த்தனையும் உண்டு.

கன்யா பெண் தாயாதியும் ஆகலாம், பெண் வயிற்றுப் பேத்தியும் ஆகலாம். கிடைக்காவிட்டால் அசலும் ஆகும்.

அமாவாசை, பௌர்ணமி, ஏகாதசி விரத நாட்கள், பிரதமை, சனி, செவ்வாய் மற்றும் ஞாயிறு ஆகியவற்றைத் தவிர்க்கலாம். இக்கட்டான சூழலில், நெருக்கடி நிலையில் நாள் பார்க்காமலே அதை நடைமுறைப்படுத்தலாம். அதற்காக, நாமே நெருக்கடி நிலையை உருவாக்கக் கூடாது; பலன் இருக்காது. முன்னோர் திவசம் முடிந்த பிறகு செய்ய வேண்டும் என்கிற கட்டாயம் இல்லை. சுமங்கலியாக மறைந்த பெண்மணியின் திவசத்துக்கு பிறகு வைத்துக்கொள்வது சிறப்பு. அங்கு அந்த சுமங்கலியின் தொடர்பு மனதில் நிழலாடும். எல்லா நடைமுறைகளையும் ஏற்று குழப்பிக் கொள்ளக் கூடாது. ஏதாவது ஒன்றை பின்பற்றுவது சிறப்பு.

ஒரே நட்சத்திரத்தில் பிறந்த ஆண்-பெண் இருவரும் திருமணம் செய்துகொள்ளக் கூடாது என்கிறார்களே, ஏன்?

- எம்.கே.வேங்கட சுப்ரமணியன், கோபிச்செட்டிபாளையம்

திருமணம் செய்து  கொள்ளலாம். திருமணத்தை நட்சத்திரம் தீர்மானிக்க முடியாது. அவர்களின் மன ஒற்றுமையை நட்சத்திரம் சொல்ல இயலாது. அவனது வேலை வாய்ப்பு, குழந்தைச் செல்வம், பதவி உயர்வு, இருவரின் ஆயுள் ஆகியவற்றை நட்சத்திரத்தால் நிர்ணயிக்க முடியாது.

தவறான தகவல்களை உண்மை போல் சித்திரிக்கும்போது நாமும் ஏமாந்துவிடுவோம். திருமணத்தை நிச்சயிப்பது நட்சத்திரம் அல்ல; ஜோதிடமும் தலையிடாது. இயற்கையின் வளர்ச்சியில் திருமண வயது நிர்ணயிக்கப்படும். கிரகங்களின் தசாகாலங்களோ புத்தியோ அதை நிர்ணயிக்காது. மடைதிறந்த வெள்ளம் போல் ஆசை வெளிவரும்போது, சூழலை மறந்து திருமணம் நடந்தேறிவிடும்; நம் சாஸ்திரங்களுக்குக் கட்டுப்படாது. அவர்களது சிந்தனையையும், உடல் வளத்தையும் ஆராய்ந்து திருமண காலத்தை நிர்ணயிக்க வேண்டும்.

ஜோதிட வல்லுநர்கள் நட்சத்திரப் பொருத்தத்தை நம்பி திருமணத்தில் இறங்கமாட்டார்கள். லோகாயத வாழ்க்கையில் ஈடுபட்டு... ஜோதிடத்தில் பற்றில்லாதவர்கள் - ஒப்புக்காக ஜாதகம் பார்ப்பவர்கள் உண்டு; அவர்களுக்கான பதில் இது.

- பதில்கள் தொடரும்...

கேள்வி-பதில்