Published:Updated:

அய்யனார் கோயில் தீர்த்தக்குளம்!

அய்யனார் கோயில் தீர்த்தக்குளம்!

பிரீமியம் ஸ்டோரி
அய்யனார் கோயில் தீர்த்தக்குளம்!

'சக்தி இல்லையேல் சிவமில்லை’ எனும் நினைப்பில் இருந்தார் தேவி. 'சிவமில்லையேல் சக்தி இல்லை’ என்பதில் உறுதியாக இருந்தார் ஈசன். அத்துடன் நிற்காமல், தன் திருவிளையாட்டையும் தொடங்கினார்.

 இதனால் உலக இயக்கமே ஸ்தம்பித்தது. அதைக் கண்டு தேவர்களும் முனிவர்களும் கலங்கிப் போனார்கள். அனைத்தையும் பார்த்துப் பதறிப்போன உமையவள், 'கோபத்தைத் தவிர்த்து, உலக இயக்கம் நடைபெற அருளுங்கள்’ என்றாள். 'யமுனையில் வலம்புரிச் சங்காக இருந்து, தவம் செய்வாயாக!’ என அருளினார் சிவனார். அதன்படி, யமுனை நதியில், மலருக்குள் வலம்புரிச் சங்காக இருந்து உமையாள் கடும் தவம் செய்தாள். அங்கே வந்த தட்சன் மலரை எடுக்க, மலரின் உள்ளிருந்து வந்த வலம்புரிச் சங்கு, பெண்ணாக உருவமெடுத்து நின்றது. அதையடுத்து, தட்சனின் மகளாக தாட்சாயினி எனும் திருநாமத்துடன் வளர்ந்த அந்தப் பெண்ணை சிவனார் ஆட்கொண்டு, திருமணம் செய்துகொண்டார் என்கிறது ஸ்தல புராணம்.

அய்யனார் கோயில் தீர்த்தக்குளம்!

புதுக்கோட்டை மாவட்டம், அறந்தாங்கியில் இருந்து பட்டுக்கோட்டை செல்லும் வழியில் உள்ளது பனங்குளம் பெரிய பாலம் பேருந்து நிறுத்தம். இங்கிருந்து சிறிது தூர நடைப் பயணத்தில் அமைந்துள்ளது அய்யனார் கோயில்.

இங்கே உள்ள திருக்குளம் சிறப்பு வாய்ந்தது. மாசி மக நன்னாளில் இங்கு வந்து நீராடினால், ராமேஸ்வரத்தில் நீராடிய புண்ணியம் கிடைக்கும் என்பது ஐதீகம்! மாசி மக நன்னாளில், சந்நிதியில் உள்ள இறைத் திருமேனியில் சூரியக் கதிர்கள் வந்து விழுந்து நமஸ்கரித்துச் செல்வதைக் காணக் கண்கோடி வேண்டும்.

அய்யனார் கோயில் தீர்த்தக்குளம்!

ஒரு காலத்தில், காரை மரங்கள் அடர்ந்த வனமாக இருந்ததாம் இந்தப் பகுதி. ஆடுகளை மேய்ச்சலுக்கு ஓட்டி வந்த சிறுவர்கள், ஒருமுறை விளையாட்டாகக் கடவுளுக்குப் படைப்பதாகச் சொல்லி ஓர் ஆட்டின் கழுத்தை வெட்டிவிட, தலை வேறு உடல் வேறாக விழுந்ததாம் ஆடு. இதை அறிந்த ஊர்மக்கள் ஓடி வந்து பார்க்க, மரத்தடியில் இருந்த கல் ஒன்றிலிருந்து ரத்தம் பீறிட்டு வந்ததாம். பிறகு, தலையும் உடலும் சேர, அந்த ஆடு உயிர் பெற்றது. ஆச்சரியத்தில் மூழ்கிய மக்கள், அந்தக் கல்லையே அய்யனாராக வழிபடத் துவங்கினார்கள். காரை மரத்தடியில் இருந்து தோன்றி ஆட்டுக்கு உயிர் தந்ததால், காரையடி மீட்ட அய்யனார் என்று திருநாமம் சூட்டப்பட்டு, பிறகு காரையடி மீண்ட அய்யனார் என மருவியதாகச் சொல்கிறது ஸ்தல வரலாறு.

அய்யனார் கோயில் தீர்த்தக்குளம்!

கோயில் நுழைவாயிலில், சுமார் 33 அடி உயரத்தில் அய்யனாரின் குதிரைச் சிலை அமைந்துள்ளது. குதிரைச் சிலைக்கு மாலை அணிவித்து அய்யனாரை வேண்டிக் கொண்டால், நினைத்ததெல்லாம் நிறைவேறும் என்பது நம்பிக்கை. பிரார்த்தனை நிறைவேறியவர்கள், இங்கு வந்து முடி காணிக்கை செலுத்தியும், காவடி எடுத்தும் தங்களின் நேர்த்திக்கடனைச் செலுத்துகின்றனர்.

அய்யனார் கோயில் தீர்த்தக்குளம்!

சுற்றுவட்டார மக்கள், வீட்டில் நடைபெறும் விசேஷங்கள் குறித்து அய்யனாரிடம் உத்தரவு கேட்டுப் பெற்ற பிறகே காரியத்தில் இறங்குகின்றனர். கோயிலில் உள்ள சப்தகன்னியர் மிகச் சக்தி வாய்ந்த தெய்வங்கள். இவர்களை வணங்கினால், விரைவில் கல்யாண வரம் கைகூடும் என்பது நம்பிக்கை. குழந்தை பாக்கியம் இல்லாதவர்கள் தொட்டில் கட்டிப் பிரார்த்திக்கின்றனர். ஸ்ரீபாலமுருகன், ஸ்ரீவீரபத்திரர், ஸ்ரீசன்னாசி, ஸ்ரீநர்த்தன விநாயகர், ஸ்ரீகருப்பாயி அம்மன் ஆகியோருக்கும் தனிச்சந்நிதிகள் அமைந்துள்ளன.

மகா சிவராத்திரி நாளில் தீர்த்தக் குளத்தில் நீராடி, அய்யனாரைத் தரிசித்தால், பாவங்கள் விலகி புண்ணியங்கள் பெருகும். எனவே அந்த நாளில், சுற்றுப்பட்டு ஊர்களில் இருந்தெல்லாம் பக்தர்கள் குடும்பத்துடன் வந்து, வணங்கிச் செல்கின்றனர்.  

  - ராம்குமார்
படங்கள்: எஸ்.சாய் தர்மராஜ்

##~##
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு