<table align="right" border="0" cellpadding="1" cellspacing="1"> <tbody> <tr> <td>##~##</td> </tr> </tbody> </table>.<p><span style="color: #ff0000"><strong>தி</strong></span><strong>ருப்பூர் மாவட்டம், உடுமலைப்பேட்டையின் மேற்குப் பகுதியில் அமைந்துள்ளது ஸ்ரீபிரசன்ன விநாயகர் கோயில். சுமார் 350 வருடப் பழைமை வாய்ந்த ஆலயம் இது. கருவறையிலும் அரச மரத்தடியிலுமாக இரண்டு விநாயகர்கள் அருள்பாலிக்கும் ஒப்பற்ற திருத்தலம் எனப் போற்றுகின்றனர் பக்தர்கள்.</strong></p>.<p>மூலவர் ஸ்ரீபிரசன்ன விநாயகரின் திருமேனி, காசியம்பதியில் இருந்து எடுத்துவந்து பிரதிஷ்டை செய்யப்பட்டதாகும். எனவே, இந்தத் தலத்து விநாயகரை வணங்கினால், காசியில் சென்று வழிபட்ட பலன்கள் கிடைக்கப் பெறலாம் என்பது ஐதீகம்!</p>.<p>ஸ்ரீவிசாலாட்சி சமேத ஸ்ரீகாசி விஸ்வநாதர், ஸ்ரீநடராஜர், ஸ்ரீசௌரிராஜ பெருமாள், ஸ்ரீதட்சிணாமூர்த்தி, ஸ்ரீதுர்கை, ஸ்ரீஆஞ்சநேயர், ஸ்ரீவள்ளி- தெய்வானை சமேத ஸ்ரீபாலசுப்ரமணியர், ஸ்ரீபிரம்மா மற்றும் ஸ்ரீகால பைரவர் ஆகியோர் தனிச்சந்நிதிகளில் இருந்தபடி அருள்பாலிக்கின்றனர்.</p>.<p>சதுர்த்தி நாளில் ஸ்ரீவிநாயகருக்கும், பிரதோஷ வேளையில் ஸ்ரீகாசி விஸ்வநாதருக்கும், சஷ்டி திதியில் ஸ்ரீமுருகப்பெருமானுக்கும், சனிக்கிழமைகளில் பெருமாளுக்கும் சிறப்பு வழிபாடுகளும் ஆராதனைகளும் நடைபெறுகின்றன.</p>.<p>கார்த்திகையில் சிவனாருக்கு 108 சங்காபிஷேகம் விமரிசையாக நடைபெறும். அதேபோல் விநாயகர் சதுர்த்தி நாளில், வெள்ளிக் கவசத்தில் காட்சிதரும் ஆனைமுகத்தானைக் காணக் கண் கோடி வேண்டும். </p>.<p>வன்னிமரத்தடியில் இருந்தபடி, தன்னை நாடி வருவோருக்கு அருளும் பொருளும் அள்ளித் தரும் ஸ்ரீபிரம்மா, கொடுமுடி தலத்தைப் போலவே இங்கேயும் இருந்து அருள்புரிகிறார் எனச் சொல்லிச் சிலிர்க்கின்றனர் பக்தர்கள்.</p>.<p>தெற்குத் திசையை நோக்கியபடி நம்மைக் காலமெல்லாம் வாழவைக்கக் காட்சி தருகிறார் ஸ்ரீகால பைரவர். சிவாம்சமான இவர், தெற்குப் பார்த்தபடி காட்சிதருவது சிறப்பு என்பார்கள். அக்னி சொரூபமாகவும் திகம்பரராகவும் திகழ்பவரை வணங்கினால், தீராத பிரச்னைகள் யாவும் தீர்ந்து நிம்மதியாக வாழலாம் என்பது ஐதீகம்! </p>.<p>தேய்பிறை அஷ்டமியிலும், ஞாயிற்றுக்கிழமை ராகு கால வேளையிலும் ஸ்ரீகால பைரவருக்கு அபிஷேகம் செய்து பிரார்த்தனை செய்தால், வாழ்வில் தடைகள் யாவும் விலகும்; எதிலும் வெற்றி கிடைக்கும் என்கின்றனர் பக்தர்கள். தவிர, குழந்தைகளுக்கு உண்டாகும் பயத்தையும் போக்கி அருள்வார், ஸ்ரீகாலபைரவர் எனப் போற்றுகின்றனர்.</p>.<p style="text-align: right"><strong> - இரா.வசந்த்</strong></p>.<p style="text-align: right"><strong>படங்கள்: கி.விக்னேஸ்வரி</strong></p>
