Published:Updated:

பிரிந்த தம்பதியை சேர்த்து வைப்பாள்!

அம்மன் அருள் பெருகட்டும்!

டுமலைப்பேட்டை நகரின் மேற்குக் கோடியில், பொள்ளாச்சி செல்லும் வழியில், கிழக்கு நோக்கியபடி காட்சி தருகிறாள் ஸ்ரீமாரியம்மன். ஊரையும் எங்களையும் காத்தருளும் காவல்தெய்வம் எனப் போற்றுகின்றனர், பக்தர்கள்.

சுமார் 300 வருடங்கள் பழைமை வாய்ந்த ஆலயம். ஸ்ரீசக்திவிநாயகர், ஸ்ரீசெல்வமுத்துக்குமரன், ஸ்ரீமாரியம்மன் ஆகியோர் தனித்தனிச் சந்நிதிகளில் அருள்பாலிக்கின்றனர்.

மேலும் குளிகன், வாசுகி, சங்கபாலன், அனந்தன், மகாபத்மன், தட்சகன், பத்மன், கார்க்கோடகன் என அஷ்ட நாகர்களும் ஸ்தல விருட்சமான அரசமரத்தடியில் இருந்தபடி, தங்களை வணங்கும் அன்பர்களின் தோஷங்களைப் போக்கி அருள்கின்றனர்.

ஆடி மாதம் துவங்கிவிட்டால் செவ்வாய், வெள்ளி மற்றும் ஞாயிற்றுக்கிழமைகளில் அம்மனுக்குச் சிறப்பு அபிஷேகங்களும் வழிபாடுகளும் நடைபெறுகின்றன. பௌர்ணமி நாளில் பால், தயிர், பன்னீர், இளநீர், சந்தனம் கொண்டு அம்மனுக்கு அபிஷேகம் செய்து பிரார்த்தித்தால், நம் வாழ்வை மலரச் செய்து, நம் மனத்தைக் குளிரச் செய்வாள்.

இங்கே நடைபெறும் விசேஷ ஹோமத்தில் கலந்துகொண்டால், கல்வியிலும் உத்தியோகத்திலும் சிறந்து விளங்கலாம். ஆடி மாதத்தில் வரும் நாக பஞ்சமி நாளில், அஷ்ட நாகர்களுக்கும் பால் முதலான அபிஷேகமும் சிறப்பு வழிபாடுகளும் நடைபெறுகின்றன.  இதில் கலந்துகொண்டு ஸ்ரீமாரியம்மனை வணங்கித் தொழுதால், முன் ஜென்மப் பாவங்களும் விலகும் என்பது ஐதீகம்!  

பிரிந்த தம்பதியை சேர்த்து வைப்பாள்!

ஆடி மாத வெள்ளிக்கிழமையில் கூழ் வார்க்கும் வைபவம் கோலாகலமாக நடைபெறும். தவிர ஆடிப்பூரம், ஆடி அமாவாசை ஆகிய நாட்களிலும் பக்தர்கள் கூட்டம் அலைமோதுகிறது.

நவராத்திரியின் ஒன்பது நாட்களிலும் ஸ்ரீமீனாட்சி, ஸ்ரீகாமாட்சி, ஸ்ரீவிசாலாட்சி, ஸ்ரீமூகாம்பிகை என ஒன்பது அலங்காரங்களில் ஜொலிப்பாள் ஸ்ரீமாரியம்மன்.

மேலும், 15 நாள் நடைபெறும் திருவிழா, ஏக அமர்க்களமாக நடைபெறுமாம். விழாவின் முக்கிய நிகழ்ச்சியான தேரோட்ட நாளில் உடுமலை, பொள்ளாச்சி, மடத்துக்குளம் என சுற்றுவட்டார ஊர்களில் இருந்தெல்லாம் பக்தர்கள் குடும்பத்துடன் வந்து தரிசித்துச் செல்கின்றனர். இன்னொரு சிறப்பு... யானையைக் கொண்டு தேர் இழுக்கப்படும் ஆலயங்களில் இந்தக் கோயிலும் உண்டு எனப் பூரிப்புடன் தெரிவிக்கின்றனர், ஊர்மக்கள்.

கண்ணில் நோய் வந்து அவதிப்படுவோர் இங்கு வந்து கண்மலர் வாங்கி காணிக்கை செலுத்துகின்றனர்.

குடும்பப் பிரச்னையால் பிரிந்த தம்பதியர், பில்லி சூனியம் ஆகிய தீயசக்திகளால் கலங்குவோர் இங்கு வந்து மாரியம்மனை வழிபட்டால் போதும்... விரைவில் தீயவை விலகி, மங்கல காரியங்கள் வீட்டில் நிகழும்; பிரிந்த தம்பதி ஒன்று சேருவார்கள் என்பது பக்தர்களின் நம்பிக்கை. 

- இரா.வசந்த்

படங்கள்: கி.விக்னேஸ்வரி

அடுத்த கட்டுரைக்கு