Published:Updated:

‘உங்கள் குழந்தைகள் கையால்... அம்பாளுக்கு அபிஷேகம்!’

அம்மன் அருள் பெருகட்டும்! ஆர்.கே.பாலா

‘உங்கள் குழந்தைகள் கையால்... அம்பாளுக்கு அபிஷேகம்!’

அம்மன் அருள் பெருகட்டும்! ஆர்.கே.பாலா

Published:Updated:
##~##

குழந்தைகளுக்கு சாக்லேட், பிஸ்கட் எனக் கொடுப்போம். விளையாட்டுப் பொருட்கள் தருவோம். ஓவியம் வரைவதற்கான உபகரணங்கள் வழங்கி அவர்களை உற்சாகப்படுத்துவோம். அவற்றைக் கையில் வாங்கிக் கொள்ளும்போது, அந்தக் குழந்தைகளின் முகமே பூரிப்பில் மலர்வதைக் கண்டு நம் கவலைகளெல்லாம் காணாமல் போய்விடும். ஆனால், ஓசூர் காமாட்சி அம்மன் கோயிலில் குழந்தைகளுக்கு என்ன தருகிறார்கள் தெரியுமா?

கிருஷ்ணகிரி மாவட்டம், ஓசூர் ரயில்வே நிலையத்துக்கு அருகில் உள்ளது ஸ்ரீகாமாட்சி அம்மன் ஆலயம். சந்ததியை வளர்த்து, வாழையடி வாழையாக வளர்வதற்கு ஆதாரமாகவும் அஸ்திவாரமாகவும் இருக்கிற திருமண வரத்தை வழங்குபவள் இவள் என்பதால், ஸ்ரீகல்யாண காமாட்சி அம்பாள் என்கிற திருநாமம், பக்தர்களால் வழங்கப்பட்டதாம்.

ஒட்டுமொத்த விகடனுக்கும் ஒரே ஷார்ட்கட்!

வம்சத்தை வளமுடன் வாழவைக்கும் ஸ்ரீகல்யாண காமாட்சியை, குழந்தைகளை அர்ச்சகர்களைப்போல, குருக்களைப்போல அருகில் நின்று அபிஷேகம் செய்ய அனுமதிக்கிறார்கள்.

 ‘உங்கள் குழந்தைகள் கையால்... அம்பாளுக்கு அபிஷேகம்!’

அழகிய, கிழக்குப் பார்த்த ஆலயம். அன்பே உருவெனக் கொண்டு காட்சி தரும் அம்பாளும் கிழக்குப் பார்த்தபடி குடியமர்ந்திருக்கிறாள். ஸ்ரீபாலமுருகன், ஸ்ரீபாலவிநாயகர், ஆகமப் பிரதிஷ்டை செய்யப்பட்டுள்ள நவக்கிரகங்கள் எனச் சந்நிதிகள் உள்ளன. உத்ஸவ மூர்த்திகளாக ஸ்ரீஏகாம்பரேஸ்வரரும் ஸ்ரீகாமாட்சி அம்பாளும் அழகு ததும்பக் காட்சி தருகின்றனர். இங்கு தியான மண்டபமும் உண்டு.

திருமணத் தடையால் கலங்கித் தவிப்பவர்கள், இங்கு வந்து ஏலக்காய் மாலை சார்த்தி வழிபட்டால் விரைவில் கல்யாண வரம் கைகூடும் என்பது ஐதீகம். அதாவது, 25 கிராம் ஏலக்காயை எடுத்துச் சிறிது நேரம் தண்ணீரில் ஊற வைத்து, பிறகு ஊசி நூல் கொண்டு கோத்து மாலையாக்கி, அந்த ஏலக்காய் மாலையை அம்பாளுக்குச் சார்த்திப் பிரார்த்திக்க வேண்டும். பிறகு, வேண்டிக்கொண்ட பக்தரின் பெயர், முகவரி ஆகியவற்றைப் பதிவு செய்து, பதிவு எண் கொடுக்கிறார்கள். அந்தப் பதிவு எண்ணையும் தேதியையும் ஏலக்காய் மாலையில் குறித்துக்கொண்டு, ஒரு டப்பாவில் பத்திரமாக வைத்துவிடுகிறார்கள்.

 ‘உங்கள் குழந்தைகள் கையால்... அம்பாளுக்கு அபிஷேகம்!’

அம்பாளின் அனுக்கிரகத்தால், விரைவில் திருமணம் நடந்தேறியதும் மாதந்தோறும் மாலையில் நடைபெறும் சங்கடஹர சதுர்த்தி சிறப்பு ஹோமத்தில் அந்த மாலையைச் சமர்ப்பித்துவிடுகிறார்கள்.

''கடந்த வருஷம் மட்டுமே சுமார் 600 பேர் வரை ஏலக்காய் மாலை சார்த்தி, திருமண பாக்கியத்தைப் பெற்றிருக்கிறார்கள். இதில் டில்லி, சென்னை, கோவை ஆகிய ஊர்களில் இருந்து வந்த பக்தர்களும் உண்டு. அம்பாள், மிகுந்த வரப்பிரசாதி. கேட்டதையெல்லாம் தந்தருளக்கூடியவள்'' என்று தெரிவிக்கிறார் கோயில் டிரஸ்டிகளில் ஒருவரான முத்துக்குமர சுவாமி.

அதேபோல், கேரளாவில் கோயில் குறித்துப் பிரஸ்னம் பார்க்கப்பட்டது. அதில், 'ஸ்ரீகாமாட்சி அம்பாளுக்குக் குழந்தைகள் தங்கள் கையாலேயே அபிஷேகம் செய்தால், அவர்கள் படிப்பிலும் வாழ்விலும் சூட்டிகையாக இருப்பார்கள். ஞானமும் யோகமும் கிடைக்கப்பெற்று ஆரோக்கியத்துடனும் இறையுணர்வுடனும் திகழ்வார்கள்’ எனத் தெரிவிக்கப்பட... அது முதல், வருஷாபிஷேக நாளான ஆனி மாத உத்திர நன்னாளில், ஒரு வயது முதல் ஐந்து வயது வரை உள்ள குழந்தைகளைக் கொண்டு அம்பாளுக்கு அபிஷேகம் செய்வதை வழக்கமாகக் கொண்டுள்ளனர்.

''இந்த முறை ஆனி உத்திரம், ஜூலை 14-ஆம் தேதி வருகிறது. காலை 8 மணிக்குத் துவங்கி 11 மணி வரை, குழந்தைகள் தங்கள் கையால் அபிஷேகம் செய்வதைப் பார்ப்பதே கண்கொள்ளாக் காட்சியாக இருக்கும். சுமார் 200 குழந்தைகள் வரை இதில் பங்கேற்பார்கள். அடுத்து, ஐந்து வயது முதல் 13 வயது வரை உள்ள சிறுவர்- சிறுமிகள், தியான மண்டபத்தில் உத்ஸவ மூர்த்திகளுக்குக் குங்கும அர்ச்சனை செய்வார்கள். இந்த பூஜையைப் பார்க்கும்போதே, நம் வம்சத்தை தழைக்கச் செய்வாள் காமாட்சி அம்பாள் என்பதைத் தெளிவுற உணர்ந்துவிடுவோம்'' என்கிறார் முத்துக்குமர சுவாமி.

 ‘உங்கள் குழந்தைகள் கையால்... அம்பாளுக்கு அபிஷேகம்!’

''குழந்தைகளுக்கு பூஜை செய்யும் பழக்கத்தைக் கொண்டு வருவது நல்ல விஷயம். அதுவும் கோயில் கருவறையில் இருக்கிற மூலவிக்கிரத்துக்கு பாலபிஷேகம், பஞ்சாமிர்த அபிஷேகம், பன்னீர் அபிஷேகம் என்று குழந்தைகளே செய்யச் செய்ய... அதில் ஆர்வமும் பிரார்த்தனையில் ஈடுபாடும் இறைபக்தி உணர்வும் அவர்களிடம் மேலோங்கும்!'' என்று சிலிர்ப்புடன் சொல்கிறார்கள் பக்தர்கள்.

14.7.13 அன்று, ஓசூர் ஸ்ரீகல்யாண காமாட்சிக்கு அபிஷேகம் செய்ய, உங்கள் குழந்தைகளை அழைத்துச் செல்ல ரெடியாகிவிட்டீர்கள்தானே!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism