Published:Updated:

காலக் கணிதத்தின் சூத்திரம்!

சேஷாத்ரிநாத சாஸ்திரிகள்

##~##

பெண்ணின் ஜாதகத்தில் லக்னத்தில் இருந்து 8-ஆம் இடத்தில் உள்ள செவ்வாய், கணவனை இழக்க வைக்கும் என்கிறது ஜோதிடம் (க்ரூரேஷ்டமே விதவதா...). 8-ஆம் இடம் பெண்ணின் ஆயுளை வரையறுக்கும். அதேநேரம், கணவனின் ஆயுளையும் கோடிட்டுக் காட்டும். துலா லக்னம், விருஷபத்தில் செவ்வாய்.

வரக்கூடிய கணவனின் லக்னம் பெண் ஜாதக லக்னத்தில் இருந்து  7-ஆம் இடம்; அதாவது மேஷம். மேஷத்தில் இருந்து 2-ஆம் வீட்டில்- ரிஷபத்தில் செவ்வாய் இருக்கிறார். அந்த செவ்வாய், 4-ஆம் பார்வையாக கணவனது பூர்வபுண்ணிய (5) ஸ்தானத்தை- சிம்மத்தைப் பார்க்கிறார். 7-ஆம் பார்வையாக விருச்சிகத்தைப் பார்க்கிறார். கணவனது ஆயுள் ஸ்தானமான 8-ஐ பார்க்கிறார். செவ்வாய் 8-ஆம் பார்வையாக கணவனின் பாக்கிய ஸ்தானமான 9-ஐயும் பார்க்கிறார். அதாவது தனுசையும் பார்க்கிறார். கணவனின் இரண்டு மாரக ஸ்தானம். அதாவது ரிஷப ராசி... பெண்ணுக்கு ஆயுள் ஸ்தானம். மாரக ஸ்தானத்தில் இருந்துகொண்டு செவ்வாய், முழுப் பார்வையோடு எட்டை - அவனது ஆயுளைப் பார்க்கிறார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
காலக் கணிதத்தின் சூத்திரம்!

வரப்போகும் கணவனின் லக்னமான மேஷத்தில் இருந்து 4-ஆம் பார்வையாக கணவனின் பூர்வ புண்ணியத்தைப் பார்க்கிறார். 7-ஆம் பார்வையாக அவனது ஆயுளைப் பார்க்கிறார். 8-ஆம் பார்வையாக அவனது பாக்கியத்தையும் பார்க்கிறார். செவ்வாய்க்கு 'க்ரூரத்ருக்’ என்று பெயர் உண்டு. குரூரமான பார்வை இருப்பதால், அழிப்பதில் எச்சரிக்கையுடன் ஈடுபடுவார். 5-ல் பார்வை- பூர்வ புண்ணியத்தை இழக்க வைக்கிறார். 8- ல் பார்வை- பாக்கியத்துக்கு முற்றுப்புள்ளி வைக்கிறார். 7-ல் பார்வை- ஆயுளுக்கு முடிவைக் குறிக்கிறார். பூர்வ புண்ணியமும், பாக்கியமும் இழந்த நிலையில் ஆயுளை முடிவுக்குக் கொண்டு வருவது எளிதாயிற்று. இங்கு, செவ்வாய் மாரக ஸ்தானத்தில் இருந்துகொண்டு பார்ப்பதால், பலம் பெற்ற பார்வையில் முடிவு நிச்சயமாகி விட்டது. கணவன் ஜாதகத்தைப் பார்க்காமல் இருந்தாலும், பெண் ஜாதகத்திலிருந்து (லக்னத்திலிருந்து 7-ஆம் இடம் கணவன் லக்னமாக மாறுவதால், அதை லக்னமாக வைத்து ஆராயும்போது, வருங்கால கணவனின் ஆயுள் முடிவுற இடம் உண்டு என்று சுட்டிக்காட்டும்.

அதே நேரம், பெண்ணின் ஆயுள் ஸ்தானம் 8-ஆம் இடம். வருங்காலக் கணவனின் ஆயுள் ஸ்தானமும் அதுதான். அவளது 7-ஆம் இடம் மேஷம். அதாவது, அவளுக்குக் கிடைக்கவேண்டிய பதி ஸெளபாக்கியம்; கணவனிடம் இருந்து கிடைக்க வேண்டிய இன்பங்கள். அந்த ராசியின் 2-ல் (ரிஷபத்தில்) செவ்வாய் இருக்கிறார். இரண்டு- மாரக ஸ்தானம். மாரக ஸ்தானத்தால் வலுப்பெற்ற செவ்வாய்... அதாவது, பதிசௌபாக்கிய ராசியின் பூர்வபுண்ணியத்தையும், 8-ஆம் இடம் அதன் ஆயுளையும், 9-ஆம் இடம் பாக்கியத்தையும் பார்ப்பதால், பதிசௌபாக்கி யம் பெற வாய்ப்பு இல்லாமல் செய்து விடுகிறான். அத்துடன், பெண் ஜாதக லக்னத்தில் இருந்து இரண்டை - குடும்பத்தையும், மூன்றை - ஒத்துழைப்பையும் பார்ப்பதால் பதி சௌபாக்கியமும், குடும்பச் சூழலும், ஒத்துழைப்பும் கிடைக்காமல் போய்விடுகின்றன. ஆக, பெண் ஜாதகத்தை வைத்துக்கொண்டு வருங்கால கணவனின் ஆயுளை கோடிட்டுக் காட்ட முடியும்.

துபோன்று ஆண் ஜாதகத்தில் 7-ல் இருக்கும் செவ்வாயை வைத்து, வருங்கால மனைவியின் இழப்பை ஜோதிடம் சுட்டிக்காட்டும். ஆண் ஜாதகத்தில் லக்னம் கன்னி. 7-ல் (மீனத்தில்) செவ்வாய். வரப்போகும் மனைவியின் லக்னம் மீனம். அதாவது 7-வது வீடு. செவ்வாய் 4-ஆம் பார்வையாக சுக ஸ்தானத்தைப் பார்க்கிறார். 7-ஆம் பார்வையாக தனது (கணவன்) ஸ்தானத்தைப் பார்க்கிறார். 8-ஆம் பார்வையாக தனது ஆயுள் ஸ்தானத்தைப் பார்க்கிறார். லக்னத்தில் செவ்வாய் இருப்பதால், தனது இழப்புக்குக் காரணமாகிறார்.  4-ஐ பார்ப்பதால் சுகத்தை இழக்கவைக்கிறான். 7-ஐ பார்ப்பதால் பதியிடம் கிடைக்கும் இன்பத்தை இழக்கவைக்கிறான். 8-ஐ பார்ப்பதால் தனது ஆயுளை முடிவுக்குக் கொண்டு வருகிறான். ஆகையால், ஆண் ஜாதகத்தில் 7-ல் இருக்கும் செவ்வாய், மனைவியை இழக்க வைக்கிறார். 7-ஆம் இடம் மனைவி ஸ்தானம். அங்கு செவ்வாய் வீற்றிருப்பதால், அவளின் இணைப்பில் கிடைக்கும் இன்பம் கேள்விக்குறியாகிறது. ஆனால், கணவனின் அதாவது ஆணின் 8-ல் இருக்கும் செவ்வாய் மனைவியை இழக்கவைக்க மாட்டான்.

துபோன்று 8-ல் இருக்கும் செவ்வாய் பெண்ணின் லக்னத்தையோ, அதாவது ரிஷபத்தையோ, தனது பதிசௌபாக்கியத்தையோ அதாவது, கணவனின் லக்னத்தையோ பார்க்க இயலாது. ஆகையால், மனைவியை இழக்க வைக்காது.

புருஷ ஜாதகத்தில் 8-ல் இருக்கும் செவ்வாயை, 'செவ்வாய் தோஷமாக’ நினைத்துப் பொருத்தத்தில் விலக்குவது தவறு. இரண்டு ஜாதகங்களிலும் 8-ல் செவ்வாய் இருந்தால் சேர்ப்பது தவறு. புருஷ ஜாதகத்தில் 8-ல் செவ்வாய் இருப்பது கண்டு, அதை செவ்வாய் தோஷமாகப் பார்ப்பதில் ஜோதிடத்துக்கு உடன்பாடில்லை. பல காலமாக பஞ்சாங்கத்தில் தவறான குறிப்பு தொடர்ந்துகொண்டு வருகிறது.

காலக் கணிதத்தின் சூத்திரம்!

ஆண் ஜாதகத்தில் 7-ல் செவ்வாயும், பெண் ஜாதகத்தில் 8-ல் செவ்வாயும் இருப்பதைப் பார்த்ததும், இருவரது இழப்பு உறுதி என்று சொல்ல இயலாது. அந்தச் செவ்வாய் லக்னாதிபதியாக இருந்தாலோ, 7-க்கு அல்லது 8-க்கு உடையவனாக இருந்தாலோ, யோக காரகனாக இருந்தாலோ... அந்தச் செவ்வாய் இழப்பை ஏற்படுத்தமாட்டான் என்ற விளக்கம் ஜோதிடத்தில் உண்டு.

அதுபோன்று, இருவரின் ஆயுள் பலமாக இருந்தாலும் இழப்பு இருக்காது. பாவாதிபதி பலமாக இருந்து, செவ்வாய் பலமிழந்து இருந்தாலும் இழப்பு இருக்காது. இவற்றை ஆராய்ந்த பிறகே, செவ்வாய் தோஷத்தை வரையறுக்கவேண்டும். 12, 1, 2, 4, 5, 7, 8- இங்கெல்லாம் செவ்வாய் இருந்தால் தோஷமாக ஏற்க இயலாது. பெண்ணுக்கு 7-லும், 8-லும், ஆணுக்கு 7-லும் செவ்வாய் இருப்பது செவ்வாய் தோஷம். மற்ற இடங்களில் பார்வையில் வரும் தோஷம்; அது, மனைவி அல்லது கணவனின் இழப்பை ஏற்படுத்தாது.

12-ல் இருக்கும் செவ்வாய் 8-ஆம் பார்வையாக 7-ஐ பார்ப்பான். லக்னத்தில் இருக்கும் செவ்வாய் 7-ஆம் பார்வையாக 7-யும், 8-ஆம் பார்வையாக 8-யும் பார்ப்பான். 2-ல் இருப்பவன் 7-ஆம் பார்வையாக 8-ஐ பார்ப்பான். 7-ல் இருக்கும் செவ்வாய் 4-ஆம் பார்வையாக 7-ஐ பார்ப்பான். 5-ல் இருக்கும் செவ்வாய் 4-ஆம் பார்வையாக 8-ஐ பார்ப்பான். இருக்கும் செவ்வாயும், பார்க்கும் செவ்வாயும் ஒன்றாகாது. இருக்கும் (ஏழிலும் எட்டிலும்) செவ்வாய்தான் இழப்பைச் சுட்டிக்காட்டுவான். பார்க்கும் செவ்வாய் இழப்பை இறுதியாக்க மாட்டான். 'பார்வை’ தோஷத்தையும், 'இருக்கும்’ தோஷத்தையும் ஒன்றாகப் பார்ப்பதில் ஜோதிடத்துக்கு உடன்பாடில்லை.

காலக் கணிதத்தின் சூத்திரம்!

7, 8 -ஐ தவிர மற்ற இடங்களில் இருக்கும் செவ்வாயால் கணவனையோ மனைவியையோ இழக்கவைக்க இயலாது. ஆழமாகச் சிந்தித்தால், அதன் நுணுக்கம் புலப்படும். வருங்காலக் கணவனின் ஆயுள்பாவம் பலமாக இருந்தால், பெண்ணின் செவ்வாய் இழப்பை ஏற்படுத்தாது. வருங்கால மனைவியின் ஆயுள் பாவம் பலமாக இருந்தால் ஆணின் செவ்வாய் இழப்பை ஏற்படுத்தாது. ஒருவரது ஜாதகத்தை வைத்து மற்றவரின் ஆயுளை அளக்க முடியாது. அவரவர் ஜாதகம்தான் அவரவர் ஆயுளை நிர்ணயிக்கும். செவ்வாயை வைத்து யூகிக்கலாமே தவிர, நிர்ணயம் செய்ய இயலாது.

செவ்வாய் தோஷத்தை நிர்ணயிக்கும் முன்பு இருவரது ஆயுளையும் ஆராய வேண்டும். பெண்ணின் செவ்வாயை வைத்து ஆயுளை முடிவுக்குக் கொண்டுவர இயலாது. அவளது ஜாதகத்தில் ஆயுள் பாவம், செவ்வாய் தோஷத்தை வலுவிழக்கச் செய்துவிடும். இவையெல்லாம் ஆராயப்படும்போது உயர்ந்த முறையில், துல்லியமாக ஜாதக இணைப்பை ஏற்படுத்த இயலும். அனுபவத்தை வைத்து ஜாதகம் பார்ப்பது தவறு. செவ்வாய் தோஷம் இல்லாமலேயே கணவன்- மனைவி இழப்புகள் தோன்றும். செவ்வாய் தோஷம் இருந்தும் இழப்புகள் இல்லாமல் போய்விடும்.

7-க்கு உடையவன் 12-லும், லக்னாதிபதியும் சந்திர லக்னாதிபதியும் பாபக் கிரகத்துடன் சேர்ந்து 7-ல் இருந்தால், குழந்தையும் இருக்காது; மனைவியும் இருக்கமாட்டாள் என்று சொல்லும் (பார்யாதி பேவ்யயகதே...). 7-க்கு உடைய செவ்வாய் 12-ல் இருக்கிறான். லக்னாதிபதி- சுக்கிரன்; சந்திர லக்னாதிபதி- புதன், பாப கிரகமான சனியுடன் 7-ல் இருக்கிறார்கள். இந்த ஜாதகத்துக்கு குழந்தையும் மனைவியும் தங்கமாட்டார்கள். இங்கு, செவ்வாயின் பங்கு இழப்புக்குக் காரணம் இல்லை. 7-ஆம் பாவாதிபதி வலுவிழந்து, லக்னாபதிக்கும் சந்திர லக்னாதிபதிக்கும் பாபயோகம் இருந்து, மாரக ஸ்தானத்தில் இருப்பதால் மனைவி இழப்பு நேர்ந்தது என்று சொல்லும் ஜோதிடம்.

காலக் கணிதத்தின் சூத்திரம்!

மகர லக்னம் 7-ல் அதாவது கடகத்தில், செவ்வாய் சனியோடு சேர்ந்து இருக்கிறார். இங்கு மனைவி நல்லவளாக விளங்குவாள் (ஸெளராரயோ: மதகயோ:அமிருதாம்சுராசி...). இங்கு 7-ல் செவ்வாயும், பாப கிரகமான சனியோடு இணைந்திருந்தும் மனைவி இழக்கப்படவில்லை. இங்கு நீசமான செவ்வாய், உச்ச ராசி அதிபனான சனியின் சேர்க்கையில், நீசபாவிக ராஜயோகம் பெற்று லக்னத்தைப் பார்ப்பதாலும்... அதே நேரம், லக்னாதிபதி சனி லக்னத்தைப் பார்ப்பதாலும் அவனுக்கும் இழப்பில்லை; மனைவிக்கும் இழப்பில்லை. பஞ்சாங்கத்தில் தென்படும் செவ்வாய் தோஷ அட்டவணை ஜோதிடத்தை ஆராயாமல் விளக்கப்பட்டிருக்கிறது.

இருவரது இணைப்பில் இடையூறைத் தோற்றுவிக்கும் கிரகங்களின் செயல்பாட்டுக்கு 'தோஷம்’ என்று பெயர். அது இருவரிலும் சம அளவில் பலம் பொருந்தியிருந்தால் 'ஸாம்யம்’ என்று சொல்லும் ஜோதிடம். தோஷம் இருவரிலும் வலுவுற்று இருப்பதால், துல்லியமாக இருக்கிறது என்று பொருள்.

பெண் ஜாதகத்தில் 8-ல் செவ்வாயும், ஆண் ஜாதகத்தில் 7-ல் செவ்வாயும் சமமான தோஷமாக மாறிவிடுகிறது. இங்கு பெண் ஜாதகத்தில் இருக்கும் செவ்வாய், ஆணை அழிக்க முழு பலத்தோடு முனைகிறது. ஆண் ஜாதகத்தில் இருக்கும் செவ்வாய், பெண்ணை அழிக்க முயல்கிறது. இருவரது முயற்சியும் தளராமல் மோதிக்கொண்டிருக்கிறது.

வெற்றி- தோல்வி இல்லாமல் மோதிக் கொண்டு இருப்பதால், இரண்டும் செயல்பட முடியாமல் தளர்ந்துவிடும். அந்த இடைவெளி அவர்களது தாம்பத்தியத்தை இனிப்பாக்கிவிடும். தொங்குப் பாலத்தின் இரு முனைகளும் சமமாக ஒட்டிக்கொண்டிருக்கும் போது, பாலம் சரியாமல், பயணிகள் செல்வதற்கு ஏதுவாவது உண்டு. இரு முனைகளும் ஒன்று மற்றொன்றைத் தள்ளிக் கொண்டு ஒட்டிக்கொண்டு விடுவது உண்டு. தோஷ சாம்யம் இரு தோஷங்களையும் செயலிழக்க வைக்கும்.

- சிந்திப்போம்...