Published:Updated:

பயணம்... பரவசம்! - 19

லதானந்த்

பயணம்... பரவசம்! - 19

லதானந்த்

Published:Updated:
##~##

மானா- பத்ரிநாத்தில் இருந்து சுமார் 3 கி.மீ. தூரத்தில் அமைந்திருக்கும் அழகிய கிராமம் இது. இந்திய- சீன எல்லையில் அமைந்திருக்கும் இந்தியாவின் கடைசி கிராமமும் இதுதான். அங்கிருக்கும் தேநீர்க் கடை ஒன்றில், India’s last tea shop’ என்று எழுதி வைத்திருக்கிறார்கள். அங்கே அமைந்துள்ள வியாசர் குகை மிகவும் பிரசித்தி பெற்றது.

மலைப்பாதையில் ஒரு கி.மீ. ஏறினால் வியாசர் வசித்த குகை வருகிறது. இது, சரஸ்வதி நதிக் கரையில் அமைந்திருக்கிறது. சரஸ்வதி நதியை இங்கு மட்டும்தான் காண முடியும்! இங்கேதான் ஆதிசங்கரர், பிரம்மசூத்திரத்துக்கு தாம் எழுதிய பாஷ்யத்துக்கான சந்தேகங்களை வியாசரிடம் கேட்டு நிவர்த்தி செய்து கொண்டாராம். குகையினுள் இருக்கும் பாறை அடுக்குகள், பண்டைக்கால ஓலைச்சுவடிகளை நினைவுபடுத்துகின்றன. கணேஷ் குகை என்ற ஒன்றும் மானா கிராமத்தில் இருக்கிறது. பஞ்ச பாண்டவர்கள் ஸ்வர்க்கம் நோக்கிச் செல்லும் போது இந்தக் கிராமத்தைக் கடந்ததாக உள்ளூர்வாசிகள் தலபுராணம் சொல்கின்றனர்.

ஒட்டுமொத்த விகடனுக்கும் ஒரே ஷார்ட்கட்!

மானா கிராமத்தில் இருந்து மீண்டும் பத்ரிநாத் வந்து சேர்ந்தோம். அதன் பிறகு, மதியம் பத்ரிநாத்தில் இருந்து புறப்பட்டு 73 கி.மீ. பயணித்து மாலை நேரத்தில் பீபால்கோட்டி என்ற அழகிய ஊரில் தங்கினோம். இது ஜோஷிமட்டுக்கும் ருத்ரப்பிரயாகைக்கும் இடையில், தேசிய நெடுஞ்சாலை NH58ல் அமைந்திருக்கிறது. சுற்றிலும் மலைகள்; பக்கத்திலேயே ஜில்லென்ற ஆறு. பனி படர்ந்த மலைகளும் பசுமை சூழ்ந்த பள்ளத்தாக்குகளும் மனத்தை மயக்குகின்றன. பலதரப்பட்ட வாடகையில் அறைகள் கொண்ட விடுதிகள் இங்கே இருக்கின்றன. மிதமான குளிர், இளம் வெயில், தூய்மையான காற்று ஆகியன மனத்துக்கு மிகவும் இதமாக இருந்தன. 'பீபால்’ என்று அழைக்கப்படும் அரச மரங்கள் ஒருகாலத்தில் மிகுதியாக இருந்த இடம் இது. அதனாலேயே பீபால்கோட்டி எனப் பெயர் வந்ததாம். பக்கத்திலேயே இருக்கும் 'ஹாட்’ என்ற கிராமத்தில் மிகத் தொன்மை வாய்ந்த லட்சுமி நாராயணர் கோயில் இருக்கிறது. எங்கள் பயணத் திட்டத்தில் இது இடம்பெறாததால், பார்க்க இயலவில்லை.

பயணம்... பரவசம்! - 19

பீபால்கோட்டியில் இருந்து பிரியாவிடை பெற்று, 152 கி.மீ. தூரத்தில் இருக்கும் தேவப் பிரயாகை நோக்கிப் புறப்பட்டோம்.

பிரயாகை என்றால் 'இரு புண்ணிய நதிகளின் சங்கமம்’ என்று பொருள். பத்ரிநாத், கேதார்நாத் பயணத்தின்போது எதிர்ப்படும் பிரயாகைகள் மொத்தம் 5. அவை: நந்தப் பிரயாகை, ருத்ரப் பிரயாகை, கர்ணப் பிரயாகை, விஷ்ணுப் பிரயாகை, தேவப் பிரயாகை. மகர சங்கராந்தி, ராமநவமி ஆகிய விசேஷ நாட்களின்போது, பஞ்சபிரயாகையில் நீராடுவது மிகவும் சிறப்பானது.

விஷ்ணுப் பிரயாகை நீங்கலாக ஏனைய நான்கு பிரயாகைகளின் பெயர்களிலும் ஊர்கள் இருக்கின்றன. பாண்டவர்கள் உலக வாழ்வை நீத்து ஸ்வர்க்கம் சென்ற வழியை ஸ்வர்காரோஹனா என்கிறார்கள். அந்தப் பாதையில் இந்த ஐந்து பிரயாகைகளும் அமைந்திருக்கின்றன எனப் புராணங்கள் சொல்கின்றன. இதில் தேவப் பிரயாகை 108 வைணவ திவ்ய தேசங்களில் ஒன்று. அதைப் பற்றிப் பார்ப்பதற்கு முன்னர், ஏனைய நான்கு பிரயாகைகள் பற்றிப் பார்ப்போம்.

விஷ்ணுப் பிரயாகை: 'பஞ்ச் பிரயாகை’ என அழைக்கப்படும் ஐந்து பிரயாகைகளில் விஷ்ணுப் பிரயாகைதான் முதலில் உருவானது. இமயமலையின் கிழக்குச் சரிவுகளில் இருக்கும் சௌகாம்பா பனிப்பாறைப் பகுதியில் இருந்து உற்பத்தியாகிறது அலகநந்தா ஆறு. ஏற்கெனவே நாம் குறிப்பிட்டிருக்கும் இந்திய எல்லையோரப் பகுதியான மானா அருகில் சரஸ்வதி நதியுடன் சங்கமிக்கிறது இது. அதுதான் பின்னர் பத்ரிநாத் ஆலயத்தின் அருகில் பாய்கிறது. பள்ளத்தாக்கிலிருந்து உற்பத்தியாகும் தௌலிகங்கா நதியுடன் அலகநந்தா சங்கமிக்கும் இடமே விஷ்ணுப் பிரயாகை. அலகநந்தா நதியின் இந்தப் பகுதி விஷ்ணுகங்கை என அழைக்கப்படுகிறது. இங்கு நாரதரிஷி விஷ்ணுவைக் குறித்துத் தவம் செய்ததாகத் தலபுராணம் சொல்கிறது. இந்தோர் மகாராணி அகல்யாபாய் என்பவர், 1889-ல் விஷ்ணுப் பிரயாகை சங்கமம் அருகில் எண்கோண வடிவில் சிவனுக்கு ஓர் ஆலயத்தை எழுப்பி இருக்கிறார். தற்போது விஷ்ணுவின் திருவுருவும் இங்கே ஆராதிக்கப்படுகிறது. ராமர் தவம் இருந்த இடம் ராமர் கட்டீ எனப்படுகிறது.

கோடை காலத்தில் காலை 6 முதல் 12 மணி வரையிலும், மாலை 5 முதல் இரவு 9 மணி வரையிலும் ஆலயம் திறந்திருக்கிறது. குளிர்காலத்தில் காலை 7 முதல் 12 மணி வரையும், மாலை 4 முதல் இரவு 8 மணி வரையும் திறந்திருக்கிறது.

நந்தப் பிரயாகை: இரண்டாவது பிரயாகை இது. நந்தாதேவி சிகரத்திலிருந்து வரும் நந்தாகினி ஆற்றுடன் அலகநந்தா ஆறு ஒன்று சேரும் இடமே நந்தப் பிரயாகை. இந்தப் பிரயாகையின் பெயர் ஏற்பட்டதற்கு இரண்டு விதமான காரணங்களைச் சொல்கிறார்கள். நந்தன் என்னும் மன்னன் இங்கே மாபெரும் வேள்வி ஒன்றைச் செய்து இறையருள் பெற்றதால் நந்தப் பிரயாகை என்று பெயர் ஏற்பட்டதாக ஒரு தகவல் சொல்கிறது. கிருஷ்ணரின் வளர்ப்புத் தந்தை நந்தகோபரின் நினைவாக இந்தப் பெயர் ஏற்பட்டதாக இன்னொரு கருத்து நிலவுகிறது. கோபாலனுக்கு இங்கே ஓர் ஆலயமும் இருக்கிறது. கண்வ முனிவர் இங்கே தவம் செய்தார் எனவும், துஷ்யந்தனின் திருமணம் இங்கேதான் நடைபெற்றது எனவும் சொல்கிறார்கள்.

பயணம்... பரவசம்! - 19

கர்ணப் பிரயாகை: பிண்டார் என்னும் நதி, நந்தாதேவி சிகரத்துக்குத் தென்கிழக்கில் உள்ள பிண்டாரி பனிப்பாறைப் பகுதியில் உற்பத்தியாகிறது. இது, சிறிதுதூரம் தெற்கு நோக்கி ஓடி, பிண்டார் என்னும் நதியாக உருவெடுக்கிறது. அலகநந்தாவும், பிண்டார் ஆறும் சங்கமம் ஆவது இந்தக் கர்ணப் பிரயாகையில்! இந்த இடத்தில்தான் கர்ணன் சூரியனை வழிபட்டுக் கவச குண்டலங்கள் பெற்றதாக ஐதீகம். கர்ணன் அமர்ந்து தவம் செய்ததாக ஒரு பாறையை உள்ளூர்வாசிகள் காண்பிக்கின்றனர். இங்கே கர்ணனுக்குக் கோயில் ஒன்றும் உண்டு. சிவனுக்கும் விநாயகருக்கும் ஆலயங்கள் இருக்கின்றன. காளிதாசரின் 'மேக தூதம்’ காவியத்தில் கர்ணப் பிரயாகை பற்றிக் குறிப்பிடப்பட்டு இருக்கிறது.

ரிஷிகேஷில் இருந்து  ஜோஷிமட் செல்லும் வழியில் 172 கி.மீ. தூரத்திலும், ருத்ரப் பிரயாகையில் இருந்து 31 கி.மீ. துரத்திலும் இருக்கிறது கர்ணப் பிரயாகை. சுவாமி விவேகானந்தர் இங்கே 18 நாட்கள் தவம் செய்திருக்கிறார். நைனிடால் மற்றும் ஜிம் கார்பட் தேசியப் பூங்கா செல்ல விரும்புபவர்கள் இங்கிருந்து கிளை பிரியும் பாதைகளில் செல்லவேண்டும்.

ருத்ரப் பிரயாகை: கேதார்நாத்தில் இருந்து வரும் மந்தாகினி ஆறும், அலகநந்தா ஆறும் சங்கமிக்கும் இடம்தான் ருத்ரப் பிரயாகை. சரிவு மிகுந்த படிகளில் கீழிறங்கிச் சென்றால்,  இரண்டு ஆறுகளும் சங்கமிக்கும் ருத்ரப் பிரயாகையை அடையலாம். புராதனமான ருத்ரநாத் மற்றும் சாமுண்டிதேவி ஆகியோர் அருளும் ஆலயம், படிக்கட்டுகளின் உச்சியில் அமைந்திருக்கிறது. சிவனின் திருநாமங்களுள் ஒன்றான ருத்ரன் என்பதை ஒட்டி இந்த சங்கமம் ருத்ரப் பிரயாகை எனப்படுகிறது.

இங்கே சிவன் ருத்ர தாண்டவம் ஆடினார் என்றும், தனக்கு விருப்பமான இசைக் கருவியான ருத்ர வீணையை இங்கே வாசித்தார் என்றும் சொல்கிறார்கள். ருத்ரப் பிரயாகையில் ருத்ரனுக்கு (சிவனுக்கு) ஓர் ஆலயம் இருக்கிறது. இவர் ஸ்வயம்புலிங்க மூர்த்தி! பார்வதி மற்றும் விநாயகர் திருவுருவங்கள் லிங்கத்தை அடுத்து இருக்கின்றன. விநாயகர், லட்சுமிநாராயணர் மற்றும் பைரவருக்கும் தனிச் சந்நிதிகள் உண்டு.

சிவனை நோக்கித் தவம் இருந்து இசையின் நுணுக்கங்களை நாரதர் பெற்ற ஸ்தலம் இது. நாரதர் தவம் இருந்ததாகச் சொல்லப்படும் பாறை 'நாரதஷிலா’ எனப்படுகிறது. ருத்ரப் பிரயாகைக்கு இன்னொரு சிறப்பும் உண்டு. இங்கிருந்துதான் கேதார்நாத்துக்கும் பத்ரிநாத்துக்கும் தனித்தனிச் சாலைகள் கிளையாகப் பிரிகின்றன.

அடுத்ததாக, நாங்கள் தரிசிக்கச் சென்றது தேவப் பிரயாகை.

(அடுத்த இதழில் நிறைவுறும்)

பயணம்... பரவசம்! - 19

மலர்களின் பள்ளத்தாக்கு

பத்ரிநாத்தில் இருந்து 57 கி.மீ. தூரத்தில் அமைந்திருக்கிறது மலர்களின் பள்ளத்தாக்கு எனும் அற்புதமான இடம். ஃப்ராங்க் எஸ்.ஸ்மித் என்பவரால் 1931-ல் இந்த அரிய இடம் கண்டுபிடிக்கப்பட்டது. கணக்கில் அடங்கா மலர்க் கூட்டங்களால் நிரம்பி வழிவதால் இதற்கு இந்தப் பெயர் ஏற்பட்டதாகச் சொல்கிறார்கள். நந்தாதேவி பர்வதத்துக்கு வடக்கு மற்றும் வடமேற்கில் அமைந்திருக்கிறது இது. அபூர்வமான தாவரங்கள், பறவைகள் மற்றும் விலங்குகள் நிறைந்த பகுதி இது.

எங்கள் பயணத்திட்டத்தில் இந்த இடம் இடம்பெறவில்லை என்பதால் பார்க்கமுடியாமல் போய்விட்டது. பத்ரிநாத் செல்லும் அன்பர்கள் தங்களது பயணத் திட்டத்தில் அவசியம் இந்த மலர்களின் பள்ளத்தாக்கையும் சேர்த்துக்கொள்ளுங்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism