Election bannerElection banner
Published:Updated:

விஷ பயம் நீக்கும் வம்பய்யா பெருமாள்!

புரட்டாசியில் புண்ணிய தரிசனம்காரைக்குடி - கொங்கரத்தி ஸ்ரீவண்புகழ் நாராயணன் கோயில்

##~##

சிவகங்கை மாவட்டம் திருப்பத்தூர் அருகில் உள்ளது கண்டரமாணிக்கம். இதையடுத்த கொங்கரத்தி கிராமத்தில் அழகே உருவாக கோயில் கொண்டிருக்கிறார் ஸ்ரீவண்புகழ் நாராயணப் பெருமாள். ஊர் மக்களும் சுற்றுவட்டாரத்தினரும் இந்தக் கோயிலை 'வம்பய்யாக் கோயில்’ என்றே அழைக்கின்றனர்.

சிவகங்கை ராஜா, ஒருமுறை காட்டுக்கு வேட்டையாடச் சென்றபோது, அங்கே சுயம்பு மூர்த்தமாகத் தோன்றிக் காட்சி தந்தாராம் பெருமாள். அதையடுத்து, பெருமாளின் மூர்த்தத்தை எடுத்துவந்து பிரதிஷ்டை செய்து, கோயில் கட்டி வழிபடத் துவங்கினார் என்கிறது ஸ்தல வரலாறு.

பாம்பு, தேள், பூச்சி எனக் கடித்தாலோ அல்லது கடிப்பது போல் கனவு கண்டாலோ ஸ்ரீவண்புகழ் நாராயணப் பெருமாளை வந்து தரிசித்தால், விஷக்கடி நீங்கும்; விஷப் பூச்சிகள் நம்மை அண்டவே அண்டாது என்பது ஐதீகம்.

தவிர, விஷக்கடிக்கு இந்தக் கோயிலில் மருந்தும் வழங்குகின்றனர். இதனைப் பத்தியம் இருந்து சாப்பிட, விரைவில் குணமாகும் எனப் பூரிப்புடன் சொல்கின்றனர் பக்தர்கள்.

விஷ பயம் நீக்கும் வம்பய்யா பெருமாள்!

இந்த ஆலயத்தில் ஸ்ரீஆகாசக் கருப்பர் சந்நிதியும் விசேஷம். மேற்கூரை இல்லாமல் ஆகாயத்தைப் பார்த்தபடி வெட்டவெளியில் சந்நிதியுடன் காட்சிதரும் ஸ்ரீஆகாசக் கருப்பரை வணங்கினால், பில்லி- சூனியம் முதலான ஏவல்களில் இருந்தும், எதிரிகள் தொல்லையில் இருந்தும் விடுபடலாம்; மேலும், சக்தியின் வடிவமாகத் திகழும் வேப்ப மரம், சிவ வடிவமாக விளங்கும் வில்வ மரம் ஆகியவை ஒன்றோடு ஒன்று பிணைந்தபடி காட்சி தருவது சிறப்புக்கு

விஷ பயம் நீக்கும் வம்பய்யா பெருமாள்!

உரிய ஒன்று எனப் போற்றுகின்றனர். இந்தப் பகுதியில் உள்ள விவசாயிகள், வம்பய்யாப் பெருமாளிடம் வேண்டிக் கொண்ட பின்பே வயலில் விதைக்கின்றனர். அறுவடை ஆனதும் விளைகிற முதல் நெல், காய்கறி என விளைபொருள் எதுவானாலும் அதை வம்பய்யாவுக்குக் காணிக்கையாக வழங்கு கின்றனர். புரட்டாசி சனிக்கிழமைகளில் இங்கு சிறப்பு பூஜைகள் நடைபெறுகின்றன. காலை 5 மணிக்குக் கோயில் நடை திறக்கப்பட்டு, இரவு 7.30 வரை தொடர்ந்து பூஜைகள் நடைபெறும். செட்டிநாட்டு நகரத்தார், புரட்டாசியில் ஒரே நாளில் ஐந்து பெருமாள் கோயில்களுக்குச் சென்று தரிசிப்பதை வழக்கமாகக் கொண்டிருக்கின்றனர். அதன்படி அரியக்குடி, திருமயம், திருக்கோட்டியூர், திருப்பத்தூர் மற்றும் கொங்கரத்தி ஆகிய தலங்களுக்குச் சென்று பெருமாளை ஸேவித்தால், தொழில் வளம் பெருகும், இல்லறம் சிறக்கும், கல்வியும் ஞானமும் மேலோங்கும் என்பது நம்பிக்கை!

புரட்டாசி சனிக்கிழமைகளில், காரைக்குடி மற்றும் திருப்பத்தூரில் இருந்து சிறப்புப் பேருந்துகளும் இயக்கப்படுகின்றன.

- சு.மணிகண்டன்

படங்கள்: எஸ்.சாய்தர்மராஜ்

Election bannerElection banner
அடுத்த கட்டுரைக்கு