குடும்ப ஒற்றுமைக்கு... துளசி மாலை வழிபாடு!

##~## . பு துக்கோட்டையில், நகரின் மையப்பகுதியிலேயே அமைந்துள்ளது ஸ்ரீரங்கநாதர் திருக்கோயில். அரிசிக் கடை வீதியில் அழகுற அமைந்துள்ள ரங்கநாதர் கோயில், புரட்டாசி மாதம் வந்துவிட்டாலே களை கட்டத் துவங்கிவிடும் என்று பெருமிதத்துடன் சொல்கிறார்கள் பக்தர்கள்.

. சுமார் 400 வருடப் பழைமை வாய்ந்த ஆலயம் இது. முன்னொரு காலத்தில், கோதை நாச்சியார் ஸ்ரீரங்கத்தில் இருந்து இந்த வழியே ஸ்ரீவில்லிப்புத்தூர் சென்றாள் என்றும், அப்போது இங்கே இந்த இடத்தில் எழுந்தருளிய பிறகே கிளம்பிச் சென்றாள் என்றும் சொல்வர்.

. பிறகு, இந்த இடத்தின் உன்னதத்தை அறிந்த பாண்டிய மன்னர்களில் ஒருவர், இங்கே ஸ்ரீரங்கநாதரின் திருவிக்கிரகத் திருமேனியைப் பிரதிஷ்டை செய்து, கோயில் எழுப்பியதாகச் சொல்கிறது ஸ்தல வரலாறு.

. ஸ்ரீதேவி- ஸ்ரீபூதேவி சமேதராக நின்ற திருக்கோலத்தில், தெற்குத் திசை பார்த்தபடி அற்புதமாகக் காட்சி தரும் ஸ்ரீரங்கநாதரை கண்ணாரத் தரிசித்தாலே நம் பாவமெல்லாம் பறந்தோடிவிடும்.

. திருமாலின் திருமார்பில் ஸ்ரீமகாலக்ஷ்மித் தாயாரும் குடிகொண்டிருக்கிறாள். இங்கு வந்து, பெருமாளுக்கு துளசி மாலை சார்த்தி மனதாரப் பிரார்த்தனை செய்தால், தம்பதி இடையே ஒற்றுமை மேலோங்கும்; இல்லறம் சிறக்கும் என்பது ஐதீகம்.

. ஸ்ரீகருடாழ்வார், ஸ்ரீஅனுமன், ஸ்ரீஆண்டாள் ஆகியோருக்கும் சந்நிதிகள் உள்ளன. இங்கே உள்ள ஸ்ரீஆண்டாளை, தொடர்ந்து ஏழு வெள்ளிக்கிழமைகளில் விளக்கேற்றி அர்ச்சித்து வழிபட்டால், தடைப்பட்ட திருமணம் விரைவில் நடைபெறும் என்று மகிழ்ச்சி பொங்கத் தெரிவிக்கின்றனர், பெண்கள்.

. புரட்டாசி மாதத்தில் ஒவ்வொரு சனிக்கிழமையும் பெருமாளுக்கு இங்கு சிறப்பு அபிஷேக- ஆராதனைகள் நடைபெறும். அந்த நாளில் புரட்டாசி விரதம் மேற்கொண்டு, பெருமாளைத் தரிசித்து, தங்களது வேண்டுதலைத் தெரிவித்தால், விரைவில் நினைத்த காரியங்கள் ஈடேறும் என்பது மக்களின் நம்பிக்கை.

. - க.அபிநயா

. படங்கள்: தே.தீட்ஷித்