ஸ்தல வழிபாடு
தொடர்கள்
Published:Updated:

'குடும்பத்தோட வராம இருந்துட்டேனே...!'

'குடும்பத்தோட வராம இருந்துட்டேனே...!'

'குடும்பத்தோட வராம இருந்துட்டேனே...!'
##~##
ந்தக பூமி என்று சொல்லப்படும் திருச்சி மாநகரில், வெயில் தன் மொத்த உக்கிரத்தையும் காட்டிய ஞாயிற்றுக்கிழமையின் காலை வேளை... வந்திருந்த வாசகர்களின் முகங்களில் அயர்ச்சியையும் கடந்து டாலடித்தது ஆர்வம்! சக்தி விகடனும் உலக சமுதாய சேவா சங்கமும் இணைந்து  மே 15-ஆம் தேதி அன்று நடத்திய மனவளக் கலை

பயிற்சி முகாமுக்கு, திருச்சி பெல் அறிவுத்திருக்கோயிலில் உற்சாகத் துடன் கூடினர், வாசக நண்பர்கள்.

''சமீபத்துல மலேசியா போயிருந்தப்ப, அங்கேயிருந்த நண்பர்களும் உறவினர்களும் இந்த யோகா முகாம் பத்தி சொன்னாங்க. அசந்து போயிட்டேன். ஊருக்கு வந்ததும், எங்கே முகாம் நடந்தாலும்  கலந்துக்கணும்னு முடிவு பண்ணினேன். பத்திரிகை உலகில் இந்தப் புதிய முயற்சிக்கு, கடல் கடந்தும் பாராட்டுக்கள் குவியும்போது, நான் புதுசா சொல்றதுக்கு வேறென்ன இருக்கு?'' என்று உணர்ச்சி பொங்கச் சொன்ன சுந்தரமூர்த்தி, நாகப்பட்டினம் வெளிப்பாளையத்தில் இருந்து வந்திருந்தார்.

''அம்மா ரெகுலரா சக்தி விகடன் படிப்பாங்க; நான் ஆனந்த விகடன் வாசகன். அம்மாவோட வற்புறுத்தலுக்காகத்தான் இங்கே வந்தேன். ஆனா, அன்பான வழிகாட்டுதல்களோடும், ஆழ்ந்த ஈடுபாட்டோடும் அக்கறையோடும் உலக சமுதாய சேவா சங்கத்தார் சொல்லித் தந்த பயிற்சிகளை அனுபவபூர்வமாகப் பார்த்தபோது, 'அடடா... இத்தனை நாளா மிஸ் பண்ணிட்டோமே’னு தோணுச்சு. இனிமே, வீட்டுக்குச் சக்தி விகடன் வந்ததும், அதை எடுத்துப் படிக்கிற முதல் ஆள் நானாத்தான் இருப்பேன்'' என உற்சாகத்துடன் பேசிய ஸ்வின் ஒரு கல்லூரி மாணவர். பெரம்பலூரில் இருந்து வந்திருந்தார்.

'குடும்பத்தோட வராம இருந்துட்டேனே...!'

''ஏற்கெனவே பணம் செலுத்தி ஆழ்நிலை தியானம் அது இதுன்னு நிறைய பயிற்சிகள்ல கலந்துக்கிட்டிருக்கேன். ஆனா, அவை எதுவும் தராத ஆத்ம திருப்தியையும், மன நிறைவையும் இந்தப் பயிற்சி கொடுத்திருக்கு'' என நெகிழ்ச் சியுடன் சொன்னார் லால்குடி வாசகி நவமணி.

''நான் கிராமத்துக்காரன். படிச்சவங்க நல்லதா எதுனா சொன்னா கேட்டுக்குவேன். அப்படித் தெரிஞ்சவங்க சில பேர், இது பத்தி எனக்கு எடுத்துச் சொன்னதாலதான் இங்கே வந்திருக்கேன். உள்ளபடியே மனசுக்கு நிறைவா இருந்துச்சுங்க. என் சம்சாரத்தையும் பசங்களையும் இந்தப் பயிற்சிக்குக் கூட்டிட்டு வராம போயிட்டமேனு இப்ப வருத்தமா இருக்குது. எங்க ஊர்ப் பக்கம் மறுபடி முகாம் வைக்கிறப்ப, கண்டிப்பா குடும்பம் சகிதமா கலந்துக்கணும்னு முடிவே பண்ணிட்டேன்'' என்று ஏக்கமும் மகிழ்ச்சியும் கலந்த குரலில் தெரிவித்த பாபு எழில்தாசன், தரங்கம்பாடியில் இருந்து வந்திருந்தார்.

''மனசுக்குள் அமைதியையும் அன்பையும், உடலில் ஆரோக்கியத்தையும் புத்துணர்வையும் தருவதே மனவளக் கலைன்னு பயிற்சியாளர் சொன்னது நூத்துக்கு நூறு சரிதான்!’ என வாசகர்கள் பரஸ்பரம் பேசிக்கொண்டது நம் காதுகளிலும் விழுந்தது.

சக்தி விகடனின் நோக்கமே அதுதானே!

- வி.ராம்ஜி
படங்கள்: 'ப்ரீத்தி’ கார்த்திக்

'குடும்பத்தோட வராம இருந்துட்டேனே...!'