Published:Updated:

பூப்போட்டு... விதை விதைத்து!

கோவை - குட்டையூர் ஸ்ரீமாதேஸ்வரர் கோயில் மண் மணக்கும் தரிசனம்!

பூப்போட்டு... விதை விதைத்து!

கோவை - குட்டையூர் ஸ்ரீமாதேஸ்வரர் கோயில் மண் மணக்கும் தரிசனம்!

Published:Updated:
##~##

குன்றுக் கோயில்!

தன்னை நாடி வருவோருக்கு அருளும் பொருளும் தருவதற்கு, குன்றின் மேல் கோயில் கொண்டு காத்திருக்கிறார் ஸ்ரீமாதேஸ்வரர். கோவையில் இருந்து மேட்டுப்பாளையம் செல்லும் பேருந்தில் சென்றால், வழியில் குட்டையூர் எனும் பஸ் ஸ்டாப் உள்ளது. இங்கு இறங்கி சிறிது தூரம் நடந்தால்,  குன்றுக் கோயிலை அடையலாம்.

ஸ்தல வரலாறு:

சுமார் ஆயிரம் வருடங்களுக்கு முன்பு நிகழ்ந்த சம்பவம்... இந்தப் பகுதியில் மேய்ச்சலுக்குச் சென்ற காராம்பசு ஒன்று, ஓரிடத்தில் நின்று தானாகவே பால் சொரிந்ததாம். பசுவின் மடியில் பால் குறைவது கண்டு குழம்பிய மக்கள், ஒருநாள் அதைப் பின்தொடர்ந்து வந்து பார்த்தபோது, வியந்தே போனார்கள்! அங்கே... பசு பால் சொரிந்த இடத்தில் அழகிய சிவலிங்கத் திருமேனியைத் தரிசித்துச் சிலிர்த்தார்கள். பின்னர் அங்கே ஆலயம் அமைத்து வழிபடத் துவங்கினார்கள்.

நோய் தீர்க்கும் தீர்த்தம்!

பசு வணங்கி, சிவனாருக்கு அபிஷேகித்து, ஊர்மக்களுக்கு சிவ தரிசனம் கிடைக்கச் செய்த தலம் என்பதால், இந்த ஊரிலும் சுற்று வட்டாரத்திலும் கால்நடைகளுக்கு ஏதேனும் பிரச்னை, நோய் என்றால், இங்கு வந்து சிவனாரை வழிபட்டு, தீர்த்தப் பிரசாதம் வாங்கிச் சென்று, கால்நடைக்குத் தருகின்றனர். இதனால், விரைவில் அவை குணமாகி விடும் என்கின்றனர் பக்தர்கள்.

பூப்போட்டு... விதை விதைத்து!

பூப்போட்டு சம்மதம்!

வீட்டில் சுபகாரியம் நடத்துவதாக இருந்தாலோ, நிலத்தில் விதைப்பதற்கு நாள் குறித்துவிட்டுச் செய்ய முற்பட்டாலோ... ஸ்ரீமாதேஸ்வரரிடம் பூப்போட்டு சம்மதம் கேட்கும் சடங்கு இங்கே பக்தர்களிடம் உள்ளது. அப்படிப் பூப்போட்டு சம்மதம் கிடைத்துவிட்டால், வீட்டில் சுபகாரியம் விமரிசையாக நடந்தேறி விடும், விளைச்சல் அந்த முறை அமோகமாக இருக்குமாம்.

நேர்த்திக்கடனாக... நந்தி பிரதிஷ்டை!

பூப்போட்டு... விதை விதைத்து!

பிள்ளை வரம் வேண்டுவோர் இங்கு வந்து ஈஸ்வரனைத் தரிசித்து, குழந்தை வரம் தந்தால் நந்திப் பிரதிஷ்டை செய்வதாக வேண்டிக் கொள்கின்றனர். அதன்படி, பிள்ளை பிறந்ததும் கோயில் சுற்றுச் சுவர்களில் நந்தி சிலை வாங்கி வைத்து, நேர்த்திக்கடனைச் செலுத்திச் செல்கின்றனர். தவிர, குழந்தை பொம்மைச் சுதைச் சிற்பங்களைச் செய்து வைப்பவர்களும் உண்டு. தவிர, தொழிலில் லாபம், வழக்கில் வெற்றி என வேண்டுவோரும் நந்திப் பிரதிஷ்டை செய்வதாக, பௌர்ணமி கிரிவலம் வந்து வேண்டிக்கொள்கின்றனர்.

இந்த ஆலயத்தில், காலை 7 முதல் மாலை 4 மணி வரை நடை திறந்திருக்கும்.

- ஞா.சுதாகர்

படங்கள்: ர.சதானந்த்