Published:Updated:

சேதி சொல்லும் சிற்பங்கள்! 21

ஆலயம் ஆயிரம்! முனைவர் குடவாயில் பாலசுப்ரமணியன்

சேதி சொல்லும் சிற்பங்கள்! 21

ஆலயம் ஆயிரம்! முனைவர் குடவாயில் பாலசுப்ரமணியன்

Published:Updated:
##~##

காஞ்சி வைகுந்த பெருமாள்

கரங்களில் சிறந்தது காஞ்சி (நகரேஷு காஞ்சி) என்ற சிறப்புக்கு உரிய காஞ்சிபுரத்தில் உள்ள மங்களாசாசனம் பெற்ற 14 திருக்கோயில்களில் ஒன்று ஸ்ரீவைகுந்தநாத பெருமாள் ஆலயம்! இந்தக் கோயிலைப் பற்றிக் குறிப்பிடும் பல்லவர் காலக் கல்வெட்டுச் சாசனங்கள், 'பரமேஸ்வர விண்ணகரம்’ என்றும், 'பரமேஸ்வர விஷ்ணுகிரஹம்’ என்றும் தெரிவிக்கின்றன. வைணவக் கோயில் ஒன்றுக்கு 'பரமேஸ்வரன்’ என சிவநாமம் அமைந்திருப்பது வியப்பைத் தருகிறது, பாருங்கள்!

ஒட்டுமொத்த விகடனுக்கும் ஒரே ஷார்ட்கட்!

எழிலார்ந்த இந்தக் கோயிலை எடுப்பித்தது, பல்லவமல்லன் எனும் இரண்டாம் நந்திவர்ம பல்லவனாவான். இவனைப் பற்றி வைகுந்தநாதர் ஆலயத்தில் உள்ள கல்வெட்டு, 'பல்லவ மல்லனான பரமேஸ்வரன்’ என்று குறிப்பிட்டு, அவனுடைய இயற்பெயர் பரமேஸ்வரன் என்பதைச் சுட்டுகிறது. இந்த மன்னன் கி.பி. 730-ல் துவங்கி 795 வரை சுமார் 65 வருட காலம் நீண்ட நெடிய ஆட்சி புரிந்திருக்கிறான்.

இவனுடைய சமகாலத்தில் வாழ்ந்த திருமங்கை ஆழ்வார், இந்தக் கோயிலைப் பற்றிப் பத்துப் பாடல்கள் (பாசுரம்) பாடியுள்ளார். அதில், 'பல்லவன் மல்லையர் கோன் பணிந்த பரமேச்சுர விண்ண கரம் அதுவே’ என்று நந்திவர்மனின் புகழையும் குறிப்பிட்டுச் சொல்கிறார்.

சேதி சொல்லும் சிற்பங்கள்! 21

அழகிய திருச்சுற்று; அதன் உட்புறம் சுவருடன் இணைந்த திருச்சுற்று மாளிகை எனும் மண்டபம்; இந்த மண்டபத்தின் நான்கு பத்திகளையும் சிம்மங்களுடன் உள்ள தூண்கள் தாங்கி நிற்கின்றன. ஒவ்வொரு சிம்மமும் உயிர்ப்புடன் நிற்பதான பிரமிப்பைத் தருகிறது!

மண்டப உட்புறச் சுவரில், இரண்டு அடுக்குகளாகத் தொடர் சிற்பக் காட்சிகள் உள்ளன. ஒவ்வொரு காட்சிக்குக் கீழேயும் பல்லவ கிரந்த எழுத்தில், அந்தக் காட்சிக்கு உரிய விவரங்கள் குறிப்புகளாக, கல்வெட்டுகளில் பொறிக்கப்பட்டுள்ளன.

திருச்சுற்றுக்கு நடுவே பிரதான ஆலயமான பரமேஸ்வர விண்ணகரம் கம்பீரமாகக் காட்சி தருகிறது. கருவறைக்கு மேலே ஒன்றன் மேல் ஒன்றாக, மூன்று தளங்களில் மூன்று மூலஸ்தானங்கள் அமைந்துள்ளன. கீழ்த்தளத்தில், ஸ்ரீவைகுந்தநாதர் மேற்கு நோக்கிய படி காட்சி தருகிறார். அதையடுத்து, மேலே அமர்ந்த கோலத்திலும் கிடந்த கோலத்திலும் காட்சி தருகிறார்.

கருவறையின் புறச்சுவர் முழுவதும் திருமாலின் பல்வேறு திருக்கோலக் காட்சிகள் புடைப்புச் சிற்பங்களாக வடிக்கப்பட்டுள்ளன. பல்லவர் அல்லது சோழர், பாண்டியர் படைத்த எந்த வைணவ ஆலயத்திலும் இந்த அளவுக்குப் பேரழகு கொண்ட, பிரமிக்கத்தக்க சிற்பக் காட்சிகளைத் தரிசிப்பது அரிது!

ஸ்ரீவிமானத்து மூன்று திசைகளிலும் புறத்தில் சிறிய வாயில்கள் உள்ளன. இவை, கருவறையைச் சுற்றியுள்ள சாந்தாரம் எனும் சுற்று அறைக்குக் காற்றும் வெளிச்சமும் கிடைக்க அமைக்கப்பட்டுள்ளன. அத்தகைய வாயில்களின் இரண்டு புறமும் தாமரை மலரை ஏந்தியபடி துவார பாலகர்கள் நிற்பதைக் காணலாம். இவற்றுக்கு நடுவே திருமாலின் திவ்வியக் காட்சிகளைத் தரிசிக்கலாம்.

சேதி சொல்லும் சிற்பங்கள்! 21

கருடாழ்வார் தோளில் திருமால் அமர்ந்திருக்க, அருகே ஸ்ரீதேவி நிற்பது; சங்கு- சக்கரம் ஏந்திய திருமால் அமர்ந்திருக்க, அடியார் களும் தெய்வங்களும் தொழுது நிற்பது; ஐந்து தலை அரவின் கீழ் பரமபத நாதன் (வைகுந்தநாதர்) அமர்ந்திருக்க, திருமகள் வணங்கிப் போற்றுவது; தாமரை மலர் மீது மாலவன் நிற்க, இருபுறமும் சூரிய- சந்திரர் கையுயர்த்தி போற்றவும், கீழே முனிவர்கள் நால்வர் அமர்ந்திருப்பது; விஷ்வக் சேனனுக்கு திருமால், தலையில் மாலை சூட்டுவது ( சண்டீசருக்கு சிவன் மாலை சூட்டுவது போன்றே); இரணியனை மடியில் கிடத்தி, உடல் பிளக்கும் நரசிங்கத் திருவடிவம் என, கருவறையின் புறச்சுவர் முழுவதும் பேரழகு வாய்ந்த சிற்பக் காட்சிகளை நாம் கண்டுகளிக்கலாம்.

சேதி சொல்லும் சிற்பங்கள்! 21

மூலவரான வைகுந்தநாத பெருமாளையும், மேல் நிலைகளில் உள்ள அமர்ந்த, கிடந்த கோலக் காட்சிகளையும், புறச் சுவரில் காணப்படும் திருமாலின் திரு அவதாரக் காட்சிகளையும் கண்டுகளித்தவாறு திருச்சுற்று மாளிகைப் பத்தியில் நுழைந்து, இரு அடுக்குகளாகக் கல்வெட்டுக் குறிப்புகளுடன் உள்ள சிற்பத் தொடரை அதன் வரலாற்றுப் பின்புலத்துடன் அறிந்துகொண்டு வியப்புடன் வெளிவர ஒருநாள் போதாது நமக்கு!

அந்தத் திருமாளிகையில் பல்லவ குல வரலாறு புடைப்புச் சிற்பங்களாகச் செதுக்கப்பட்டுள் ளது. பல்லவ அரசர்களின் முடிசூட்டு விழாக்கள், அவர்கள் சாளுக்கியர்களோடும் பிறபுலத்து அரசர்களோடும் நிகழ்த்திய போர்க் காட்சிகள், வெற்றி விழாக்கள், பல்லவர் எடுத்த கோயில்கள், நாட்டியக் காட்சிகள்,  இறைத் திரு மேனிகள் என வரிசை வரிசையாகக் கல்வெட்டுக் குறிப்புகளுடன் இருப்பதைப் பார்த்து பிரமித்துப் போவோம்!

சேதி சொல்லும் சிற்பங்கள்! 21
சேதி சொல்லும் சிற்பங்கள்! 21

குறிப்பாக, 2-ம் நந்திவர்மனாகிய பரமேஸ்வரன் எடுத்த இந்த ஆலயமான பரமேசுவர விண்ணகரத் தின் சிற்பக் காட்சியையும் இங்கு நாம் காண முடிகிறது. பல்லவ மல்லனின் வரலாற்று நிகழ்வுகள் உயிரோட்டமான சிற்பமாக வடிக்கப்பட்டுள்ளன. முக்கியமாக, காஞ்சி ஸ்ரீகயிலாய நாதர் ஆலயத்தை எடுப்பித்தவனும், பல்லவ மன்ன னின் முன்னோருமான ராஜசிம்ம பல்லவனும், அவன் தேவி ரங்கபதாகையும் நிற்கும் காட்சி அரிதானதொன்று!

காஞ்சிபுரம் செல்வோர், அந்த ஊரில் ஆழ்வார்களால் துதித்துப் போற்றி, மங்களாசாசனம் செய்யப்பட்ட 14 திவ்விய தேசங்களையும் கண்டு சேவித்த பின்பு, சிற்பசாகரமாகத் திகழும் ஸ்ரீவைகுந்த நாதர் ஆலயத்துக்கு மீண்டும் ஒருமுறை சென்று, அந்த அற்புதக் காட்சிகளை அணு அணுவாக ரசித்துப் பாருங்கள். திருமங்கை ஆழ்வாரின் கூற்று மெய்ப்படும்.

- புரட்டுவோம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism