Published:Updated:

நினைத்ததை நிறைவேற்றும் செவ்வரளி மாலை வழிபாடு!

கோவை கோனியம்மன் கோயில் காவல் தெய்வம்!

எங்கே இருக்கிறது?

கோவை நகரில் அமர்ந்து, கொங்கு தேசத்துக்கே காவல் தெய்வமாக, வீரசொரூபிணியாகக் காட்சி தருகிறாள் ஸ்ரீகோனியம்மன். கோயம்புத்தூரில் இருந்து உக்கடம் செல்லும் வழியில், சுமார் 4 கி.மீ. தொலைவில், டவுன்ஹால் பேருந்து நிறுத்தத்தில் இறங்கினால், ஆலயத்தை அடையலாம்.

நினைத்ததை நிறைவேற்றும் செவ்வரளி மாலை வழிபாடு!

ஸ்தல வரலாறு

கொங்கு மண்டலத்தை கோவன் எனும் மன்னன் ஆட்சி செய்ததால், இந்தப் பகுதி கோவன்புத்தூர் எனும் பெயர் வந்தது. இதுவே, பின்னாளில் கோயம்புத்தூர் என மருவியது. காட்டை அழித்து ஊரை உருவாக்கும்போது, இந்தப் பகுதியில் ஸ்ரீதுர்கையைப் பிரதிஷ்டை செய்து, சிறிய ஆலயம் ஒன்றைக் கட்டினர். அந்த அம்மனுக்கு ஸ்ரீகோனியம்மன் எனப் பெயர் சூட்டி, வழிபடத் துவங்கினார்கள் மக்கள். அன்று முதல் இந்தப் பகுதியையும் மக்களையும் காத்து வருகிறாள் ஸ்ரீகோனியம்மன்.

கோவன் மன்னனுக்குப் பிறகு, பல வருட காலம் அம்மனுக்கு வழிபாடேஇல்லாமல் போனதாம். பின்னாளில், மைசூர் மன்னர் இந்தப் பகுதியை ஆட்சி செய்தபோது, ஸ்ரீகோனியம்மனின் சாந்நித்தியத்தை உணர்ந்து, கோயிலை புனர்நிர்மாணம் செய்து, ஏராளமான திருப்பணிகள் செய்தார் என்கிறது ஸ்தல வரலாறு.

நினைத்ததை நிறைவேற்றும் செவ்வரளி மாலை வழிபாடு!

கண்கண்ட தெய்வம்!

செவ்வாய் மற்றும் வெள்ளிக் கிழமைகளில், ஸ்ரீகோனியம்மனைத் தரிசிக்க, கோவை நகரின் பல பகுதிகளில் இருந்தும் ஏராளமான பக்தர்கள் வந்து செல்கின்றனர். இந்த ஊர் மக்களுக்கு இவளே கண்கண்ட தெய்வம். ஆடி மாதத்திலும் சிறப்பு பூஜை மற்றும் வழிபாடுகள் நடைபெறுகின்றன.

மாசி விழா!

மாசி மாதத்தில் கோலாகலமாக நடைபெறுகிறது திருவிழா. 14 நாட்கள் விழாவில், தினமும் ஆயிரக்கணக்கான பக்தர்கள் வந்து வேண்டிக்கொள்வதும், பிரார்த்தனை நிறைவேறியவர்கள் தங்களின் நேர்த்திக்கடனைச் செலுத்துவதும் அதிகம்!

மாசி முதல் செவ்வாய் அன்று பூச்சாட்டு விழா நடைபெறும். அதையடுத்து இரண்டாவது செவ்வாய்க்கிழமை நாளில், அக்கினிச் சாட்டு நடைபெறும். 3-வது சனிக்கிழமையன்று, திருக்கல்யாண உத்ஸவம் விமரிசையாக நடைபெறும். மறுநாள், கோலாகலமாக நடைபெறுகிறது தேர்த்திருவிழா. கோவை நகரில் நடைபெறும் முக்கியமான தேரோட்ட விழா இது!  

சந்நிதியில்... நிச்சயதார்த்தம்!

இங்கே ஸ்ரீவிநாயகர், தேவியருடன் ஸ்ரீசுப்ரமணியர், நவக்கிரகங்கள் ஆகிய சந்நிதிகளும் அமைந்துள்ளன. இந்தக் கோயிலில் உப்பு- மஞ்சள் வாங்குதல் நிகழ்ச்சி நடைபெறுகிறது. அதாவது, திருமணத்துக் கான நிச்சயதார்த்தத்தில், உப்புக் கூடையை மாற்றிக்கொள்வது இந்தப் பகுதியில் வழக்கம். திருமண வீட்டார் இங்கு வந்து, கோனி அம்மனைச் சாட்சியாக வைத்து, திருமணத்தை உறுதிப்படுத்துவதற்கான உப்புக்கூடை மாற்றும் சடங்கைச் செய்கிறார்கள்.

நினைத்ததை நிறைவேற்றும் செவ்வரளி மாலை வழிபாடு!

நினைத்தது நிறைவேறும்!  

திருமணத் தடை உள்ளவர்கள், தொழிலில் நஷ்டம் வந்து கலங்குவோர், அடிக்கடி உடல் உபாதையால் அவதிப்படுபவர்கள் ஆகியோர், தொடர்ந்து ஒன்பது செவ்வாய் அல்லது வெள்ளிக் கிழமைகளில் அம்மனுக்கு செவ்வரளி மாலை சார்த்தி வழிபட்டால், விரைவில் நல்லது நடக்கும் என்பது ஐதீகம்!

          - ஞா.சுதாகர்

   படங்கள்: ர.சதானந்த்