Published:Updated:

துங்கா நதி தீரத்தில்... - 2

குரு தரிசனம்!பாரதி காவலர் டாக்டர் கே.ராமமூர்த்தி, ஓவியம்: ஸ்யாம்

துங்கா நதி தீரத்தில்... - 2

குரு தரிசனம்!பாரதி காவலர் டாக்டர் கே.ராமமூர்த்தி, ஓவியம்: ஸ்யாம்

Published:Updated:

ஸ்ரீசாரதா பீடத்தை தமக்குப் பின் சிறப்புடன் நிர்வகிக்க, தக்கதொரு சீடர் தேடியும் கிடைக்காத நிலையில், அம்பிகையைச் சரணடைந்த ஸ்ரீநரஸிம்ஹ பாரதி சுவாமிகள், 'ஸ்தலத்தை விட்டுச் செல்’ என்ற அம்பிகையின் மொழியைக் கேட்டு, அதன் பொருள் என்னவாக இருக்கும் எனச் சிந்தித்தார்.

மகான்களைப் பொறுத்தவரை, ஸ்தலம் என்பது அவர்களுடைய தூல சரீரத்தையும் குறிப்பதாகும். எனில், தம்முடைய தூல சரீரத்தை விட்டுவிடச் சொல்லுகிறாளா அம்பிகை? அப்படி நினைத்தபொழுதில் சரீரத்தை உடனே துறந்துவிடுவது என்பது சாத்தியம் இல்லையே! அப்படியே, தம் யோக பலத்தால் அது சாத்தியப்பட்டாலும்கூட, சாந்நித்தியம் நிரம்பப் பெற்ற பீடமாம் ஸ்ரீ சாரதா பீடத்தை நிர்வகிக்கத் தக்கதொரு சீடர் கிடைக்க வேண்டுமல்லவா? அதற்குத்தானே இத்தனை பிரயத்தனமும் பிரார்த்தனையும்!

இப்படி அவர் மிகுந்த பிரயத்தனம் செய்வதற்கும், அம்பிகையைப் பிரார்த்தனை செய்வதற்கும் காரணம் இல்லாமல் இல்லை.

ஒட்டுமொத்த விகடனுக்கும் ஒரே ஷார்ட்கட்!

ஸ்ரீநரஸிம்ஹ பாரதி சுவாமிகள் தமது 21-வது வயதிலேயே ஸ்ரீசாரதா பீடத்தின் பீடாதிபதி ஆனபடியாலும், தொடர்ந்து வந்த ஆறாவது நாளிலேயே அவருடைய குரு ஸ்ரீ அபிநவ ஸச்சிதானந்த பாரதி சுவாமிகள் ஸித்தி அடைந்துவிட்டபடியாலும், பீடத்திற்குரிய சம்பிரதாயங்களை நன்கு தெரிந்துகொள்வதற்குச் சந்தர்ப்பம் இல்லாமலே போய்விட்டது. இருந்தாலும், விவரம் தெரிந்தவர்களிடம் இருந்து அனைத்துச் சம்பிரதாயங்களையும் தெரிந்து தெளிவு பெற்றார். தமக்குப் பின் பீடாதிபதி பொறுப்பை ஏற்றுக்கொள்பவருக்கு அப்படி ஒரு சிரமமான நிலை இருக்கக் கூடாது என்று நினைத்தார். அதனால்தான் தாம் தேக ஆரோக்கியத்துடன் இருக்கும்போதே, தக்கதொரு சீடரைத் தேர்வு செய்யத் தொடங்கினார்.

துங்கா நதி தீரத்தில்... - 2

ஆனால், அம்பிகையோ அவரை 'ஸ்தலத்தை விட்டுச் செல்’ என்கிறாளே!

மேலும் சிந்தித்தவருக்கு, 'ஸ்தலத்தை விட்டுச் செல்’ என்பதற்கு மற்றுமொரு பொருளும் விளங்கியது.

ஸ்ரீ சாரதா பீடத்தை விட்டுச் சிறிது காலம் வெளியே செல்ல வேண்டும் என்பது அம்பிகையின் விருப்பம்போலும் என்று பொருள் விளங்கிக்கொண்டவர், தாம் சிறிது காலம் மைசூர் சமஸ்தானத்தில் தங்கி வரலாம் என்று முடிவு செய்தார்.

அப்போது, மைசூர் சமஸ்தானத்தை ஆட்சி செய்து வந்தவர் மும்முடி ஸ்ரீ கிருஷ்ணராஜ உடையார். ஸ்ரீ சிருங்கேரி சாரதா பீட ஆச்சார்யர்களை ராஜ குருவாகப் போற்றி வழிபட்ட வம்சம் மைசூர் அரச வம்சம். வம்ச வழி மாறாமல் ஸ்ரீ கிருஷ்ணராஜ உடையாரும் நம் ஸ்ரீ நரஸிம்ஹ பாரதி சுவாமிகளிடம் அளவற்ற பக்தியும் விசுவாசமும் கொண்டிருந்தார். சுவாமிகள், ஸ்ரீ சாரதா மடத்துக்கு தக்கதொரு சீடரைத் தேடிக்கொண்டிருப்பதாகத் தெரிந்து கொண்டவர், ஜோதிடர்களின் ஆலோசனையுடன் பல ஜாதகங்களைப் பெற்று சுவாமிகளுக்கு அனுப்பி வைத்தார். ஒன்றும் சரிவரப் பொருந்தி வராததால்தான் இத்தனை பிரயத்தனம்!

ஸ்ரீநரஸிம்ஹ பாரதி சுவாமிகள் மைசூர் சமஸ்தானத்துக்கு விஜயம் செய்ய இருப்பதாக ஸ்ரீமுகம் அனுப்பப்பட்டது.

ஆசார்ய சுவாமிகளின் வருகை பற்றித் தெரிய வந்ததும், சர்வ சக்தியும், யோக ஸித்தியும் பெற்றிருந்த மகானை சாஸ்த்ரோக்தமாக பூரண கும்ப மரியாதைகளுடன் வரவேற்பதற்கான ஏற்பாடுகளைச் செய்யத் தொடங்கிவிட்டார் மைசூர் மன்னர்.

ஸ்ரீநரஸிம்ஹ பாரதி சுவாமிகள், ராமேஸ்வரத்தில் சர்வதீர்த்தத்துக்கு மகிமை சேர்த்தவர் அல்லவா! அவரை வரவேற்க, மந்திர புஷ்ப மந்திரத்தால் புனிதம் பெற்ற தீர்த்தம் நிரம்பிய பூரண கும்ப மரியாதை பொருத்தம்தானே!

அது என்ன சர்வதீர்த்தத்துக்கு மகிமை சேர்த்த சம்பவம்?

ஸ்ரீநரஸிம்ஹ பாரதி சுவாமிகள், ஸ்ரீசாரதா பீடத்தின்  பீடாதிபதியானதும், தேசத்தின் பல இடங்களுக்கும் யாத்திரை சென்றார்.

அந்த வகையில், ஒருமுறை சிருங்கேரியில் இருந்து விஜய யாத்திரை மேற்கொண்டவர் காளஹஸ்தி, திருப்பதி, காஞ்சி, சிதம்பரம், கும்பகோணம், ஸ்ரீரங்கம் போன்ற திவ்விய க்ஷேத்திரங்களைத் தரிசித்தபடி, 1838-ம் ஆண்டு ராமேஸ்வரத்துக்கு விஜயம் செய்தார்.

துங்கா நதி தீரத்தில்... - 2

ராமேஸ்வர ஆலயத்தின் வடக்குப் பக்கத்தில் கோடி தீர்த்தம் என்று ஒரு தீர்த்தம் இருக்கிறது. ராமேஸ்வர யாத்திரை மேற்கொள்பவர்கள்,  ஆலயத்தில் உள்ள அனைத்து தீர்த்தங்களிலும் ஸ்நானம் செய்து, நிறைவாக இந்த கோடி தீர்த்தத்திலும் ஸ்நானம் செய்வதுடன், அந்தத் தீர்த்த நீரை சிறிது எடுத்துக்கொண்டு, தங்கள் ஊருக்குச் சென்று, கோடி தீர்த்த சமாராதனை என்று செய்வது மரபு!

இந்த கோடி தீர்த்தம், ராமேஸ்வரத்தைச் சேர்ந்த குறிப்பிட்ட சிலரின் கட்டுப்பாட்டில் இருந்தது. கோடி தீர்த்தத்தில் ஸ்நானம் செய்ய வருபவர்களிடம் காலணா பெற்றுக்கொண்டு, அவர்களாகவே ஒரு குடம் நீரை எடுத்து யாத்ரீகர்களிடம் கொடுப்பார்கள்.

ராமேஸ்வர விஜயத்தின்போது நம்முடைய மகான் ஸ்ரீநரஸிம்ஹ பாரதி சுவாமிகள், கோடி தீர்த்தத்துக்குச் சென்றபோது, அவரிடமும் அதேபோல் காலணா கொடுக்க வேண்டும் என்றும், தாங்கள்தான் நீரை எடுத்துக் கொடுப்போம் என்றும் கூறினார்கள். சுவாமிகளுடன் வந்தவர்கள், சுவாமிகளைப் பற்றி எவ்வளவோ எடுத்துச் சொல்லியும்கூட, அவர்கள் கேட்பதாயில்லை. சுவாமிகள் எதையும் பொருட்படுத்தவில்லை. அவருடைய பார்வையில், சற்றுத் தொலைவில் இருந்த சர்வதீர்த்தம் தென்பட்டது. அதுவும் ஸ்ரீ சாரதையின் திருவுள்ளம்தான்போலும்! உடனே தம்முடன் வந்த பரிவாரங்களைப் பார்த்து, ''ஏன் வீணாக விவாதம் செய்ய வேண்டும்? அதோ பாருங்கள், சர்வ தீர்த்தம்! கோடி தீர்த்தம் என்பது கோடி என்ற எண்ணிக்கைக்குள் அடங்கிவிட்டது. ஆனால், சர்வ தீர்த்தமோ எல்லைகள் அற்றது அல்லவா! கோடி தீர்த்தமும் அதனுள் அடக்கம்தான். எனவே, வாருங்கள், நாம் எல்லோரும் சர்வ தீர்த்தத்தில் ஸ்நானம் செய்யலாம்!'' என்று கூறவே, சுவாமிகளும் அவருடன் வந்தவர்களும் மட்டுமல்லாது, மற்றவர்களும் சர்வ தீர்த்தத்துக்கே சென்று ஸ்நானம் செய்தனர்.

இந்த நிகழ்ச்சி எங்கும் பரவிவிட்டது. அதன்பின், ராமேஸ்வர யாத்திரை மேற்கொள்பவர்கள் எல்லோரும் சர்வ தீர்த்தத்தில் நீராடுவதையே வழக்கமாகக் கொண்டதால், கோடி தீர்த்தம் தன்னுடைய முக்கியத்துவத்தைக் கொஞ்சம் கொஞ்சமாக இழக்கத் தொடங்கியது. கோடி தீர்த்தத்தின் மூலம் தங்கள் ஜீவனத்தை நடத்தி வந்த அந்தக் குறிப்பிட்ட பிரிவினர் மிகுந்த சிரம நிலைக்கு ஆட்பட்டார்கள். அத்துடன், கோடி தீர்த்தத்திலும் புதர்கள் மண்டி மூடத் தொடங்கிவிட்டது. ஆனால், இந்த நிலை வெகு காலம் நீடிக்கவில்லை. காரணம், கோடி தீர்த்த மும் ஒரு புண்ணிய தீர்த்தம் அல்லவா? யாரோ சிலரின் அறியாமை காரணமாக அது தன் மகிமையை, முக்கியத்துவத்தை இழக்கலாமா?

நம் சுவாமிகள் மூலமாக சர்வ தீர்த்தத்துக்குப் பெருமை சேர்த்த ஸ்ரீசாரதாம்பிகை, மீண்டும் நம் சுவாமிகளைக் கொண்டே, கோடி தீர்த்தமும் மங்கிய தன் மகிமையையும் பொலிவையும் திரும்பப் பெறும்படியாகச் செய்தாள்.

ஸ்ரீநரஸிம்ஹ பாரதி சுவாமிகள் சர்வதீர்த்தத் துக்கு மகிமை சேர்த்துச் சென்றதில் இருந்து சுமார் 35 வருடங்கள் கோடிதீர்த்தமானது தன் மகிமையையும் பொலிவையும் இழந்தே காணப்பட்டது. இந்த நிலையில்தான், 1873-ம் வருடம் மதுரைக்கு விஜயம் செய்தார் ஸ்ரீநரஸிம்ஹ பாரதி சுவாமி கள். கோடி தீர்த்தத்துக்கு உரிமை கொண்டாடிய அந்தக் குறிப்பிட்ட பிரிவினர், தங்கள் சிரமநிலை தீரவேண்டு மானால், உடனே மதுரைக்குச் சென்று சுவாமிகளைத் தரிசித்து, தங்கள் செயலுக்கு மன்னிப்பு கேட்பதுதான் ஒரே வழி என்று முடிவுசெய்து, மதுரைக்குச் சென்றார்கள்.

சுவாமிகளை நேரில் தரிசித்ததும் அவருடைய திருவடிகளில் சாஷ்டாங்கமாக நமஸ்காரம் செய்து, தங்கள் செயலுக்கு வருத்தம் தெரிவித்து, மன்னிப்பு கேட்டார்கள். நடப்பது எல்லாமே ஸ்ரீசாரதாம்பிகையின் லீலைதான் என்பது சுவாமிகளுக்குத் தெரியாதா என்ன?

தாம் விரைவிலேயே ராமேஸ்வரம் வருவதாகக் கூறியவர், அதேபோல் ராமேஸ்வரத்துக்கு வருகை புரிந்தார். நேராக சர்வ தீர்த்தத்துக்குச் சென்று ஸ்நானம் செய்துவிட்டு, தம் கமண்டலத்தில் சிறிது சர்வ தீர்த்தத்தையும் எடுத்துக்கொண்டு, தமது பரிவாரங்களுடன் கோடி தீர்த்தத்துக்கு வந்தார். அதற்குள் கோடி தீர்த்தத்தில் மண்டிக்கிடந்த புதர்களெல்லாம் களையப்பட்டு, சீர்செய்யப்பட்டிருந்தன.

கோடி தீர்த்தத்தின் அருகில் சென்ற சுவாமிகள், அம்பிகை சாரதையை தியானித்தபடி, தம் கமண்டலத்தில் இருந்த சர்வ தீர்த்த நீரை கோடி தீர்த்தத்தில் ப்ரோக்ஷணம் செய்தார். பின்னர், தாம் அதில் ஸ்நானம் செய்ததுடன், தம்முடைய பரிவாரங்களையும் ஸ்நானம் செய்ய வைத்தார். இவ்விதமாக, கோடி தீர்த்தமானது இழந்த தன் பொலிவையும் மகிமையையும் முன்னிலும் அதிகமாகப் பெற்றது.

சர்வ தீர்த்தத்துக்கு மகிமை சேர்த்தவரும், கோடி தீர்த்தம் தன் இழந்த பெருமையை மீண்டும் பெறச்செய்தவருமான சுவாமிகளை வரவேற்பதற்கான ஏற்பாடுகளை மைசூர் மன்னர் மிகச் சிறப்பாகச் செய்திருந்தார்.

அந்த மைசூரில்தான் சுவாமிகள் எதிர்பார்த்துக் காத்திருந்த ஸ்ரீ சாரதா பீடத்துக்கான வாரிசைச் சந்திக்க நேர்ந்தது.

யார் அந்த வாரிசு..?

- தொடரும்...

தொகுப்பு: க.புவனேஸ்வரி

படங்கள்: ஜெ.வேங்கடராஜ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism