Published:Updated:

சக்தி சங்கமம்

உள்ளம் ஒரு புல்லாங்குழல்!

சக்தி சங்கமம்

உள்ளம் ஒரு புல்லாங்குழல்!

Published:Updated:

'தி ஹிந்து கார்ட்டூனிஸ்ட்’ ஓவியர் கேஷவ் சக்தி விகடன் வாசகர்கள் கலந்துரையாடல் - 2

சித்திரச் சாலை போன்று இல்லம் முழுக்க சுவர்களில், அழகழகாய், கம்பீரமாய் ஓவியங்கள் இடம்பெற்றிருக்க, அவை ஒவ்வொன்றுக்கும் தகுந்த விளக்கம், வாசகர்களில் ஓவியக்கலை பயிலும் மாணவர்கள் வரைந்து கொண்டுவந்திருந்த ஓவியங்கள் குறித்து கருத்துப் பரிமாற்றம், இடையே குளிர்பான உபசரிப்பு... என வெகு சுவாரஸ்யமாகத் தொடர்ந்தது, ஓவியர் கேஷவ் உடனான வாசகர்களின் கலந்துரையாடல்.

சக்தி சங்கமம்

ஒட்டுமொத்த விகடனுக்கும் ஒரே ஷார்ட்கட்!

'கிருஷ்ண பிரேமி’ - ஓவியர் கோபுலு உங்களுக்குத் தந்த இந்தச் சிறப்புப் பட்டம் குறித்த தகவலை நண்பர்கள் சிலர் எஸ்.எம்.எஸ் செய்தியாகப் பரிமாறிக்கொண்டார்கள். எனக்கும் வந்தது. மிகவும் மகிழ்ச்சியாக இருந்தது, சார். நீங்கள் இதை எப்படி உணர்கிறீர்கள்?’ - வாசகர் கேதார்நாத் பெஹோரா இந்தக் கேள்வியைக் கேட்டதும் பெரிதாகச் சிரிக்கிறார் ஓவியர் கேஷவ். அவர் முகத்தில் அப்படியொரு பூரிப்பு!

''நான் வரைந்த ஓவியங்களை எனது ஃபேஸ்புக், ட்விட்டர் போன்ற சமூக வலைதளங்களில் வெளியிடுவேன். கிரேஸி மோகன் போன்ற இன்னும் சில நண்பர்கள் இருக்கிறார்கள். அவர்களுக்கு மெயில் பண்ணுவேன். கோபுலு சாருக்கும் அப்படித்தான் நான் வரைந்த ஓவியங்களை தினமும் மெயிலில் அனுப்புவது வழக்கம்.

படத்தைப் பார்த்ததும், ஃபோனில் அழைத்து, வாழ்த்துவார். நான் வரைந்த கிருஷ்ணர் படங்களைப் பார்த்து நிறையப் பாராட்டி யிருக்கார். அப்படி ஒருநாள் ஃபோன் செய்தவர், 'கிருஷ்ண பிரேமி’ என்ற பெயரையும், பெருமையையும் எனக்குத் தந்தார். அதற்கு நான் கொடுத்துவைத்திருக்க வேண்டும். கோபுலு சார் எங்களுக்கெல்லாம் பீஷ்ம பிதாமகர் போன்றவர். அவர் மூலமாக இப்படியொரு பெருமை கிடைத்தது என்றால், அது நான் செய்த பாக்கியம்தான்.

சக்தி சங்கமம்

இதை நண்பர் கிரேஸி மோகன் போன்றவர்கள் மகிழ்ச்சியோடு மற்ற நண்பர்களுக்கு குறுஞ்செய்தியாகப் பகிர்ந்துகொண்டார்கள்.  உங்களுக்கும் அப்படித்தான் வந்திருக்கவேண்டும் என்று நினைக் கிறேன். ரொம்ப சந்தோஷமா இருக்கு!'' என்று கேஷவ் சொன்னதும்,

''ஆமாம் சார்! கிரேஸி மோகன் இது குறித்து,

'வசிட்டரவர் கோபுலு வாயால் புகழும்
விசிட்டா துவைத வரைவே - தெவிட்டா
கிருஷ்ணனை டெய்லி தருகின்ற கேஷவ்

கிருஷ்ண பிரேமி - கரெக்ட்!’னு ஒரு வெண்பாகூட எழுதி நண்பர்களுக்கெல்லாம் மெயில் அனுப்பியிருக்கார்!'' என்று தகவல் தந்தார் வாசகர் கேதார்நாத் பெஹோரா.

''சார், பூஜையறையில் காஞ்சி மகாபெரியவா படத்தைப் பார்த்தேன். அதுபற்றி...'' - வாசகி சுகன்யா முடிப்பதற்குள், அவரை முந்திக்கொண்டு கேட்கிறார் ஓவியரும் வாசகருமான செந்தமிழ்ச் செல்வன்...

''ஆமாம் சார்! நானும் கேட்கவேண்டும் என்றிருந்தேன். நீங்கள் வரைந்த அந்த மகாபெரியவா படத்தை அவரே பார்த்து ஆசிர்வதித்துக் கொடுத்தாராமே... அந்தச் சிலிர்ப்பான அனுபவத்தைப் பகிர்ந்து கொள்ளுங்களேன்.''

''அது அற்புதமான அனுபவம்!

பரமாச்சார்யார் மறைவதற்கு ஒரு வருடத் துக்கு முன், இந்தப் படத்தை முடித்து எடுத்துக்

கொண்டு, காஞ்சிபுரம் சென்றேன். அன்று பெரியவாளைத் தரிசிக்கப் பெருங்கூட்டம் காத்திருந்தது. நல்லவேளையாக, மடத்துச் சிப்பந்தி ஒருவர் என்னிடம் இருந்த ஓவியத்தைப் பார்த்துவிட்டு, 'கொடுங்கள். பெரியவாளிடம் காண்பிக்கிறேன். அவர் அழைத்ததும், வந்து சொல்கிறேன்’ என்று, அதை வாங்கிக்கொண்டு உள்ளே சென்றார்.சற்று நேரத்தில், பெரியவாளிடமிருந்து அழைப்பு வந்தது. நான் அவர் முன்னால் போய், பணிவாக நின்றேன். என்னைக் கனிவுடன் ஆசிர்வதித்தவர், மாலையும் அணி விக்கச் சொன்னார்!'' என்றவர், தொடர்ந்து சொன்னார்...

''மகா பெரியவாளைத் தரிசித்த அந்தத் தருணத்தில் நான் பொடிப் பொடியாக உதிர்ந்து போனேன் என்றுதான் சொல்லவேண்டும். பிரமாண்டமான ஆலயத்தின் முன் நிற்கும் போது, நாமெல்லாம் வெறும் தூசு என்றொரு எண்ணம் எழுமே, அப்படியொரு உணர்வு அவர் முன் நின்றபோது!

அதேபோல், 1989-ல் அவரைத் தரிசிக்கச் சென்றபோது, மட்டைத் தேங்காய் ஒன்றைக் கொண்டு வரச் சொல்லி, என்னிடம் அதைக் கொடுக்கப் பணித்தார். அதைப் பொக்கிஷமாக வைத்து பூஜித்து வருகிறேன்.

'ஒண்ணு தெரியுமோ? ஒரு விஷயத்தைக் கேலி செஞ்சு கார்ட்டூன் போடறபோது, அந்த விஷயத்தைக் குறித்த ஞானம் நிறைய இருக்கணும். நீ அந்தந்த விஷயத்தைப் பத்தின ஹிஸ்டரியெல்லாம் நன்னா தெரிஞ்சுண்டுதானே போடறே?'' என்று கேட்டார் பெரியவா. இப்படி எனது துறை சார்ந்தும், கார்ட்டூன் குறித்தும் அப்போது அவர் பேசியதும், அறிவுறுத்தியதும் என்னைப் பிரமிக்கவைத்தது!''

சக்தி சங்கமம்

''சார், உங்கள் ஓவியங்கள் என்ன ஸ்டைல்? தென்னிந்திய பாணி என்று வைத்துக் கொள்ள லாமா?'' - எனக் கேட்டார் வாசகர் ராஜன்.

''அப்படிச் சொல்ல முடியாது. தென்னிந்தியா, வட இந்தியா என்றெல்லாம் பிரித்துச் சொல்ல முடியாது. கிழக்கத்திய பாணி, மேற்கத்தியபாணி என்பதே சரியாக இருக்கும்.

உங்களுக்கு ஒன்று தெரியுமா... ஒட்டுமொத்த கலைகளின் பிறப்பிடம் ஒடிசா என்பார்கள். தேசியகீதத்தில்கூட 'உத்கல’ என்றொரு வார்த்தை வருமே, அது ஒடிசாவைக் குறிப்பதுதான். கலைகளின் உற்பத்தி ஸ்தானம் ஒடிசா என்பது பெரியோர்கள் கருத்து. பஹாடி ஸ்டைல், மிதிலா ஸ்டைல் என இடத்துக்கு இடம் பெயர் வைத்திருக்கிறார்களே தவிர, ஒட்டுமொத்தமாகப் பார்த்தால், கிழக்கத்தியது, மேற்கத்தியது என்றுதான் பிரிக்க முடியும்.

கிழக்கத்திய பாணி ஓவியங்களில் ஒரு நியதி இருக்கும். ஒரு குழந்தையின் ஓவியம் என்றால் இப்படி, மனிதனை வரைய வேண்டுமானால் இப்படி என்று ஒரு வரையறை இருக்கும். உதாரணமாகச் சொல்லவேண்டுமானால், குழந்தை கிருஷ்ணனை வரைவது போன்றே எந்தவொரு குழந்தையையும் வரைவார்கள். முகம், கை, கால் அளவுகள் ஒவ்வொன்றும் அப்படித்தான் இருக்கும்.

மேற்கத்திய பாணியில்... அவர்களுக்கு எதை வரைந்தாலும், ஒரு மாடல் வேண்டும். இருப்பதைப் பார்த்து அப்படியே வரைவார்கள். அவற்றைவிட நமது கற்பனைகளும் உருவங்களும் இன்னும் விரிவானது; விஸ்தாரமானது.

நமது ஓவியக் கலையின் பூரணத்துவத்தைச் சொல்வதானால், அஜந்தா குகை ஓவியங் களைச் சொல்லலாம்!

''உங்களுடைய கண்ணன் ஓவியங்களில் பெரும்பாலும் புல்லாங்குழல் மிஸ்ஸிங். இதற்குப் பிரத்யேகமாக ஏதாவது காரணம் உண்டா?'' - இது வாசகி சுகன்யாவின் கேள்வி.

''நல்ல கேள்வி. மிகவும் உன்னிப்பா கவனிச்சிருக்கீங்க; ரசிச்சிருக்கீங்க. ரொம்ப சந்தோஷமா இருக்கு.

இதில் தத்துவம், பாவனை என இரண்டு விஷயங்கள் உண்டு. பரதநாட்டியத்தைக் கவனித்திருக்கிறீர்களா? எல்லா தகவல்களையும் பாவனையாலேயே உணர்த்துவார்கள். பகவான் கண்ணன் குழலிசைக்கிறான் என்றால், அதையும் கரங்களால் பாவனைக் காட்டிச் சொல்வார்கள். நானும் பாவனையையே காட்டியிருக்கிறேன். தத்துவமும் உண்டு. புல்லாங்குழல் உள்ளீடற்றது. உள்ளே வெற்றிடம்தான். அதனாலேயே அதனுள் புகும் காற்று அற்புத நாதமாக வெளிவருகிறது.

நம்முள் நிறைந்திருப்பது எல்லாம் புற வாழ்க்கைக்கான விஷயங்களே! அவையெல் லாம் ஒரு பொருட்டே அல்ல என்று கருதி, கண்ணனின் முன் நம்மை ஒரு புல்லாங்குழலாக பாவித்து வெறுமையாக்கி சமர்ப்பணமாக்கிவிடவேண்டும். அப்போது அந்தப் புல்லாங்குழலில் இருந்தும் உன்னதமான நாதம் வெளிப்படும் என்பார்கள் பெரியோர்கள். இப்படியான உயர்ந்த தத்துவத்தைப் போதிப்பதுதான் புல்லாங்குழல்!''

''அதேபோல், கண்ணன் ஓவியங்களில் பெண்மைக்கு உரிய நளினமே தூக்கலாக இருக்கிறதே, அது ஏன்?'' - இது வாசகர் கேதார்நாத் பெஹோராவின் கேள்வி.

''நீங்கள் சொல்வது போன்று ஆண்- பெண் என்ற பேதம் எல்லாம் கிடையாது. ஓவியத்துக்கு அழகு சேர்க்க வேண்டும். சொல்லப் போனால், கண்ணனே அழகுதானே!

நான் ஏற்கெனவே சொன்னது போல், எல்லா தெய்வ ரூபங்களும் தத்துவக் குறியீடுகள்தான். நளினம் என்று நீங்கள் எதைக் குறிப்பிடுகிறீர்கள்..?'' என்று கேட்ட ஓவியர் கேஷவ், அருகிலிருக்கும் படத்தைச் சுட்டிக்காட்டியபடி தொடர்ந்து பேசுகிறார்...

''இதோ, இந்தக் கண்ணனைப் பாருங்கள். இடுப்பு வளைத்து, தலை சாய்த்து நிற்கிறான். இதனால், உங்களுக்கு இதில் பெண்மையின் சாயல் தெரிகிறதோ, என்னவோ! அதாவது, மூன்று இடங்களில் வளைவு கொண்ட நிலையே த்ரிபங்க நிலை. படத்தைப் பாருங்கள்...  முழங்கால், இடுப்பு, தலை ஆகிய பகுதிகளை வளைத்து நிற்பான் கண்ணன்.

சக்தி சங்கமம்

தமோ குணம், ரஜோ குணம், சத்வ குணம் ஆகிய மூன்று குணங்களை பங்கம் செய்தால், விலக்கினால், தெய்வ நிலையை அடையலாம் என்கின்றன அறநூல்கள். அதிலும் ஒரு விசேஷம் உண்டு. என்ன தெரியுமா? தமோ குணத்தை ரஜோ குணத்தால் வெல்லலாம்; ரஜோ குணத்தை சத்வ குணத்தால் வெல்ல லாம்; ஆனால், சத்வ குணத்தை சத்வ குணத் தால் மட்டுமே வெல்ல முடியும் என்பார்கள்.

கண்ணன் கோவர்த்தனகிரியை சுண்டு விரலால் தூக்கி, கோகுல வாசிகளுக்கு அபயம் அளிக்கும் படத்தைப் பார்த்திருக்கிறீர்களா? அந்தச் சம்பவத்தில், இந்திரனுக்குக் கர்வ பங்கம் நிகழ்ந்தது. சில தருணங்களில், உன்னதமான சத்வ குணத்தின் மிகுதியாலும் கர்வம் எழுமாம். அதையும் அடக்க வேண்டும் என்கின்றன சாஸ்திரங்கள். சத்வ குணத்தை சத்வ குணத்தால்தான் அடக்கமுடியும். இந்திரனும் நல்லவனே! ஆனாலும், கர்வத்தால் அவன் தவறு இழைக்கிறான் என்றதும், அவனது கர்வத்தை அழித்தார் இறைவன்.

சக்தி சங்கமம்

நமது விரல்களில் நடுவிரல் - தமோ குணம்; மோதிர விரல் - ரஜோ குணம்; சுண்டு விரல் சத்வ குணத்தைக் குறிக்கும். இந்த மூன்று விரல்களையும் (குணங்களையும்) விலக்கி, ஜீவாத்மா (சுட்டு விரல்) பரமாத்மாவுடன் (கட்டை விரல்) இணைய வேண்டும் என்பதையே குறிப்பிட்ட யோக முத்திரைகள் உணர்த்தும். ஆக, கோவர்த்தனகிரி குறித்த ஓவியங்களில் சத்வ குணம் (சுண்டு விரல்) சத்வ குணத்தை (இந்திரன்) அடக்குவதைக் காணலாம்.

இவ்வளவு விரிவாக எதற்குச் சொல்கிறேன் என்றால், நமது தெய்வ உருவங்கள் ஒவ்வொன் றும் ஓர் உயர்ந்த தத்துவத்தை உணர்த்துவன. அதையே சித்திரங்களாகவும் சிற்பங்களாகவும்  மாற்றி, நமக்கும் கற்பித்தார்கள் நம் முன்னோர்.

இரண்டு முக்கோணங்களை ஒன்றன் மீது ஒன்றாகப் போட்டுக் கோலமிடுவார்கள். மேல் நோக்கிய முக்கோணம் பரமாத்மா, கீழ்நோக்கியது ஜீவாத்மா. இரண்டும் இணைவது பேரானந்தம் என்பதைக் குறிப்பதே கோலத்தின் நடுவில் இருக்கும் புள்ளி.

எத்தனை உயர்ந்த தத்துவத்தை எவ்வளவு எளிதாக, ஒரு சிறிய கோலத்தில் காட்டியிருக் கிறார்கள் பாருங்கள்! மீண்டும் சொல்கிறேன்... நம்முடையவை ஒவ்வொன்றிலும் ஒரு தத்துவம் இருக்கும்!''

சக்தி சங்கமம்

கேஷவ்வின் அற்புதமான இந்த நீண்ட விளக்கம் வாசகர்களை பிரமிப்பில் ஆழ்த்தி யது. வியப்பின் உச்சியில் சிறிது நேரம் கனத்த மௌனம் நிலவியது. அவர்களை சகஜ நிலைக்குத் திருப்பியது வாசகர் செந்தமிழ்ச் செல்வனின் அடுத்த கேள்வி.

''சார்! ஒருபுறம், தெய்விகப் படங்கள்; மற்றொருபுறம், கலக்கலான அரசியல் அதிரடி கார்ட்டூன்கள்! மாறுபட்ட இரண்டு குதிரைகளில் எப்படி சார் உங்களால் பயணம் செய்ய முடிகிறது? எப்படி இதை பேலன்ஸ் செய்கிறீர்கள்?''

''இரண்டிலும் ஸ்டடி ஆஃப் ஸ்ட்ரக்சர் அவசியம். அரசியல் கார்ட்டூன்களில் ஒருவரை அல்லது ஒரு விஷயத்தின் குறைபாடு களை கேலியாகவும் மிகைப்படுத்தியும் சுட்டிக்காட்ட வேண்டும்.அதில், மற்றவர்களையும் திருப்திப் படுத்தியாக வேண்டும்.

தெய்விகப் படங்கள் என்பது, கிட்டத்தட்ட துதிப்பாடல் போன்றது. தெய்விகச் சிறப்புகளை உசத்திக்காட்டுவது. ஓர் உயர்ந்ததை எவ்வளவு உயர்வாகக் காட்டவேண்டுமோ, அத்தனை உயர்வாகக் காட்டியாக வேண்டும்.

தெய்விகப் படங்களைப் பொறுத்தவரையில், முதலில் என்னை நான் திருப்திப்படுத்தியாக வேண்டும். சில படங்கள் வெகுபல நிலைகளைக் கடந்த நிலையில், அதுபற்றிய வேறு சில புதிய குறிப்புகள் கிடைக்குமானால், அந்த ஓவியத்தை அப்படியே எடுத்து வைத்துவிட்டு, மீண்டும் முதலில் இருந்து வரையத் தொடங்குவது வழக்கம். இதை முடிப்பதற்குக் காலவரையறை கிடையாது. ஆனால், அரசியல் கார்ட்டூன்கள் அப்படியல்ல!

சித்திரமும் கைப்பழக்கம் என்பதுபோல் தினமும் வரையும் கார்ட்டூன்களால் தொடர்ந்து பயிற்சி கிடைத்துக்கொண்டே இருக்கிறது. தெய்விகப் படங்களோ எனது டென்ஷனைக் குறைத்து சாந்தத்தைத் தருகின்றன. இப்படியாக, இரண்டு விஷயங்களுமே என்னையும் அறியாமல் என்னை பேலன்ஸ் செய்துவிடுகின்றன என்றே சொல்ல வேண்டும்!''

சக்தி சங்கமம்

''இன்றைய இளைஞர்களுக்கு நீங்கள் சொல்லும் அறிவுரை?''

- நிறைவாக ஒரு கேள்வியைக் கேட்கிறார் வாசகர் ராஜன்.

''அறிவுரை என்று பெரிய வார்த்தை வேண்டாமே! ஒரு கருத்தாக இதை எடுத்துக் கொள்ளுங்கள்.

தயவுகூர்ந்து புராணக் கதைகளை, கதாபாத்திரங்களை, சமயம் சார்ந்த பழைய நூல்களை எல்லாம், அவை ஆன்மிகம் மற்றும் வழிபாட்டுக்கு மட்டுமே உரியவை; நமக்கானது அல்ல என்று கருதி, விலக்கிவிடாதீர்கள். அப்படிச் செய்தால், அது உங்களுக்குத்தான் மிகப்பெரிய இழப்பு!

மகான்கள், பெரியோர்கள் சிலருக்கு 'ஹம்சர்’ என்றொரு அடைமொழி உண்டு. ஹம்சப் பறவை, அதாவது அன்னம் நீரிலிருந்து பாலைத் தனியே பிரித்துப் பருகும் வல்லமை கொண்டது. மகான்களும் நல்லது- கெட்டதைப் பகுத்தறியும் தன்மை கொண்டவர்கள் என்பதால், அப்படியொரு அடைமொழி!

நீங்களும் பண்டைய காவியங்கள், கதாபாத்திரங் கள், அறநூல்களில் நிரம்பியிருக்கும் நல்லதை ஏற்று, நன்மை பெற வேண்டும். இறைவன் அதற்கு அருள் செய்யட்டும்!''

ஓவியர் கேஷவ் கூறி முடிக்க, அதை வரவேற்பதுபோல் வாசகர்கள் எழுந்து நின்று கைதட்டினார்கள். மகிழ்ச்சியோடு தலையசைத்து ஏற்றுக்கொண்ட ஓவியர் கேஷவ், கரம் கூப்பி வணங்கி, விடைகொடுத்தார்.

தொகுப்பு: தி.தெய்வநாயகம்

படங்கள்: ஜெ.வேங்கடராஜ்

சக்தி சங்கமம்

உங்களின் லட்சிய ஓவியம்... நீங்கள் ரசித்த ஓவியம்?

-கே.கண்ணன், தூத்துக்குடி

ஓவியக் கலை என்பது பெருங்கடல். அதன் எல்லையை லட்சியம் என்ற அடைப்புக்குறிக்குள் அடக்கிவிட முடியாது. ஓட்டுமொத்த கலைகளின் உன்னத பிரதிநிதித்துவமாகத் திகழ்வது, தில்லை நடராஜ பெருமானின் ஆனந்த தாண்ட வத்தைச் சொல்லும் சிற்பமும் சித்திரமும்தான். அப்படியான ஒரு கலை ஓவியத்தைப் படைக்க நானெல்லாம் தகுதியானவனா என்று பற்பல சந்தர்ப்பங்களில் நான் திகைத்து நின்றது உண்டு!

ரசித்த ஓவியங்கள் என்றால் ரவிவர்மாவின் தெய்விக ஓவியங்களை நிரம்ப ரசித்திருக்கிறேன். குறிப்பாக அவரது கிருஷ்ண தூதுப் படலம், ஜடாயு வதை படலம் படங்கள். அதேபோல் எஸ்.ராஜம் அவர்களது ராமாயண பட்டாபிஷேக படமும் மிகவும் ஈர்த்தது. அதை அடிப்படையாகக் கொண்டே எனது சில ஓவியங்களை வரைந்திருக்கிறேன். மேற்கத்திய ஓவியங்களில் ரஃபேல், மைக்கேல் ஏஞ்சலோ, லியனார்டோ டாவின்சி ஆகியோரின் படங்களைப் பார்த்து வியந்திருக்கிறேன்.

சிற்பங்களையும் சித்திரங்களையும் பிரித்துப்பார்க்க முடியாததுதான். நீங்கள் ரசித்த சிற்பப் பொக்கிஷங்கள், அதற்காக நீங்கள் சென்று வந்த இடங்கள் பற்றி...

- எம்.அருணா, காரைக்கால்

திட்டமிட்டு பயணிப்பதில்லை. ஸ்வாமி தரிசனத்துக்காக திருப்பதி முதலான தலங்களுக்குச் சென்று வந்திருக்கிறேன். சிற்பக் களஞ்சியங்கள் என்றால் தஞ்சை பெரியகோயில், தாராசுரம், கும்பகோணம் ஆகிய கோயில்களையும் தலங்களையும் சொல்லலாம். தஞ்சை மண்டலத்துக்கு சிற்பச் சிறப்புகள் அதிகம். சின்ன விளக்காக இருந்தாலும் அவ்வளவு கலையம்சம் மிகுந்திருக்கும் அங்கே! அதுபோன்று, திருக்கோஷ்டியூர் சென்றிருந்தபோது, கோயிலின் கிழக்கு வாயிலில் இரண்டு நரசிம்மர் சிற்பங்களைத் தரிசித்து வியந்தேன். ஒருவர் இரண்யகசிபுவுடனான சண்டைக்கு ஆயத்தமாகும் கோலத்தில் அருள்கிறார். மற்றொரு நரசிம்மர் இரண்யகசிபுவை வதைக்கும் கோலத்தில் காட்சி தருகிறார். உன்னதமான சிற்பவேலைப்பாடுகள்!

என்னைப்போன்று இளம் ஓவியர்கள் படித்து பயன்பெற வேண்டிய ஓவியம் குறித்த நூல்கள் ஏதேனும் உண்டா?

- வே.ராம்குமார், மதுரை-2

விஷ்ணு தர்மோத்திரத்தின் 'சித்ர சூத்திர’ பகுதிகள் ஓவியம் குறித்து விளக்குகின்றன. கூடுதல் தகவல் என்னவென்றால், 'இதில் விடுபட்டவற்றை நாட்டிய சாஸ்திர நூல்களில் படித்தறிக’ என்ற குறிப்பும் இறுதியாகக் காணப்படும். அதேபோன்று நாட்டிய சாஸ்திர நூல்களிலும் இதில்

சக்தி சங்கமம்

விடுபட்டவற்றை 'சித்ர சூத்திர’த்தில் அறிந்துகொள்க என்றிருக்கும். ஒன்றையும் விடாமல் எல்லாவற்றையும் அறிந்துகொள்ள வேண்டும் என்ற நோக்கில் நம் முன்னோர் செய்துவைத்த ஏற்பாடு இது.

ஆன்மிகக் கதைகளில் உங்களுக்குப் பிடித்த கதாபாத்திரம்...

- பி.ராமநாதன், கோவை

ராமாயணத்தில் பரதன். மகாபாரதத்தில் பீஷ்மர். இருவரது தியாகங்களும் அளவிட முடியாதது. அதேபோன்று அர்ஜுனனையும் எனக்குப் பிடிக்கும். அவன் மனத்தின் சிம்பல்!

அடுத்த இதழில்... சக்தி விகடன் வாசகர்களுடன் கலந்துரையாடுகிறார் தவத்திரு குன்றக்குடி அடிகளார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism