Published:Updated:

துங்கா நதி தீரத்தில்... - 5

குரு தரிசனம்! பாரதிகாவலர் டாக்டர் கே.ராமமூர்த்தி, ஓவியங்கள் ஸ்யாம்

துங்கா நதி தீரத்தில்... - 5

குரு தரிசனம்! பாரதிகாவலர் டாக்டர் கே.ராமமூர்த்தி, ஓவியங்கள் ஸ்யாம்

Published:Updated:

ஸ்ரீநரஸிம்ம பாரதி சுவாமிகள், மைசூர் அரண்மனை யில் ஏகாந்தமாக அமர்ந்து சிந்தித்திருந்த வேளையில், அவரை அடுத்து ஸ்ரீசாரதா பீடத்தை நிர்வகிக்கப் போவது யார் என்று அன்னை ஸ்ரீசாரதை யின் அருளாலும், அவள் அருளால் தாம் பெற்றிருந்த ஞானதிருஷ்டியாலும் அறிந்து கொண்டார்.

அந்த வாரிசு யார் தெரியுமா?

சுவாமிகளை பல வருடங்களுக்கு முன்பு தரிசித்தபோது, 'எங்கே தன் செல்வ மகனை ஸ்ரீசாரதா மடத்துக்குத் தந்து விடும்படி கேட்டுவிடுவாரோ’ என்று நினைத்து, அவசரம் அவசரமாகத் தன் மகன் லக்ஷ்மிநரஸிம்ம சாஸ்திரிக்குத் திருமணம் செய்துவைத்தாரே... அதே சதகோடி ஸ்ரீராம சாஸ்திரிகளின் வாரிசுதான், ஸ்ரீமடத்தின் அடுத்த பீடாதிபதி!

ஒட்டுமொத்த விகடனுக்கும் ஒரே ஷார்ட்கட்!

அவர்தான் தன் மகனுக்குத் திருமணம் செய்து வைத்து விட்டாரே! பிறகு, எப்படி அது சாத்தியம்?

துங்கா நதி தீரத்தில்... - 5

இன்னாரின் வாரிசுதான் ஸ்ரீசாரதா பீடத்தின் அடுத்த பீடாதிபதியாக வரவேண்டும் என்று ஸ்ரீசாரதை தீர்மானித்து விட்டால் எதுதான் சாத்தியப் படாது?

சாத்தியப்படாததையும் சாத்தியப்படுத்துவதல்லவா ஸ்ரீசாரதையின் சாந்நித்தியம்!

ஸ்ரீசாரதையின் சாந்நித்தியம் எங்கெல்லாம் இருக்கிறதோ, அங்கெல்லாம் நல்லன யாவும் சாத்தியப்படும் என்பது சங்கரரின் சத்தியவாக்கு. அப்படித்தான் ஸ்ரீராம சாஸ்திரிகளின் விஷயத்திலும் நடைபெற்றது.

தன் பிள்ளை லக்ஷ்மிநரஸிம்மனுக்குத் திருமணம் செய்து வைத்த சில தினங்களிலேயே ஸ்ரீராம சாஸ்திரிகளின் மனைவி கருத்தரித்தார். இந்த விஷயத்தைக் கேள்விப்பட்ட நம் சுவாமிகள், பக்கத்தில் இருந்தவர்களிடம், ''ராம சாஸ்திரிகள் இப்போது என்ன செய்வார்?'' என்று கேட்டுச் சிரித்தார். ஆசார்யாள் ஒன்றை சங்கல்பித்துக் கொண்டுவிட்டால், அதுதானே ஸ்ரீசாரதையின் தீர்மானமாக இருக்கமுடியும்!

50 வயதைக் கடந்த நிலையில், தனக்குச் சந்தான பாக்கியம் கிடைத்திருப்பதால், பிறக்கப்போவது ஆண் குழந்தையாகத்தான் இருக்கும் என்று முடிவு செய்து, சம்பிரதாயம் இல்லை என்றாலும்கூட, பும்ஸவனம் என்னும் சம்ஸ்காரத்தைச் செய்தார் ஸ்ரீராம சாஸ்திரிகள்.

ஒரு நாள், நஞ்சன்கூடு ஸ்ரீகண்டேசுவரர் ஆலயத்துக்கு தரிசனம் செய்யச் சென்றார். அப்போது தம்முடன் வந்த சுப்ரமணிய சாஸ்திரி என்ற சீடரைப் பார்த்து, ''இப்போது பிறக்கப்போகும் பிள்ளைக்கு என்ன பெயர் வைத்தால் நன்றாக இருக்கும்? உங்கள் சோழ தேசத்தில் சிவபெருமானின் எந்தத் திருப் பெயரை விசேஷமாக வைப்பது வழக்கம்?'' என்று கேட்டார்.

அதற்கு அந்தச் சீடர், ''சுவாமி! தங்களுக்குப் பிறக்கப்போகும் பிள்ளை ஆணா அல்லது பெண்ணா என்று தெரிந்த பிறகுதானே பெயர் வைப்பது பற்றி யோசிக்க வேண்டும்?'' என்று கேட்க, ஸ்ரீராம சாஸ்திரிகள், ''ஏன் உனக்கு இவ்வளவு சந்தேகம்? நான் பும்ஸவனம் செய்து இருக்கிறேன். பிள்ளைதான் பிறக்கப் போகிறான். நான் கேட்ட கேள்விக்கு பதில் சொல்'' என்றார்.

''அப்படியென்றால் சிவஸ்வாமி என்று பெயர் வைக்கலாம்'' என்றார் சீடர்.

உரிய காலமும் வந்தது. 1858-ம் ஆண்டு, பங்குனி மாதம், கிருஷ்ணபட்ச ஏகாதசி திதி, திருவோண நட்சத்திரம் கூடிய ஒரு குருவாரத்தில், இரவு 9 மணிக்கு, சர்வலட்சணங்களும் பொருந்திய ஆண் குழந்தை பிறந்தது. ஸ்ரீராமசாஸ்திரிகள் தாம் ஏற்கெனவே முடிவு செய்திருந்தபடி, பிறந்த பிள்ளைக்கு 'சிவஸ்வாமி’ எனும் திருப்பெயர் சூட்டினார். ஓர் ஆண்டு பூர்த்தியாவதற்குள்ளேயே அந்தக் குழந்தை பேசவும் நடக்கவும் தொடங்கிவிட்டது.தகப்பனார் ஸ்தோத்திரங்கள் சொல்லும்போது, விபூதியை மேலெல்லாம் பூசிக்கொண்டு, கைகளைத் தட்டியபடி நடனம் செய்வான் சிவஸ்வாமி. மழலை மொழியில் ஸ்தோத்திரம் சொல்லுவான்.

ஆனால், அப்பிள்ளையின் லீலைகளைத் தொடர்ந்து அனுபவிக்க முடியாதபடி, சிவஸ்வாமிக்கு இரண்டு வயது நடக்கும்போது ஸ்ரீராமசாஸ்திரிகளும், ஐந்தாவது வயதில் தாய் லக்ஷ்மி அம்மாளும் தெய்வத்திருவடி சேர்ந்துவிட்டனர். எனவே, சிவஸ்வாமி தன் தமையனா ரான லக்ஷ்மி நரஸிம்மனின் பராமரிப்பில் வளர்ந்து வரலானான். வயது வித்தியாசம் அதிகம் என்பதால், அவரே ஒரு தந்தையின் ஸ்தானத்தில் இருந்து, சிவஸ்வாமிக்கு சகல வேதாந்த சாஸ்திரங் களையும் போதித்தார். உரிய வயதில் உபநயனம் செய்துவைத்ததோடு, வேதத்தின் முக்கியமான பகுதிகளையும் அத்யயனம் செய்து வைத்தார்.

துங்கா நதி தீரத்தில்... - 5

ஸ்ரீநரஸிம்ம பாரதி சுவாமிகள், மேற்கண்ட விஷயங்களை ஏற்கெனவே தெரிந்து வைத்திருந்த படியாலும், அந்த சிவஸ்வாமிதான் தமக்கு அடுத்து ஸ்ரீசாரதா பீடத்தை நிர்வகிப்போகிறவர் என்பதைத் தெளிவாகத் தெரிந்து கொண்டதாலும், மேற்கொண்டு என்ன செய்வது என்று தீர்மானம் செய்துகொண்டார். தமது எண்ணத்தை ஸ்ரீசாரதை நிறைவேற்ற வேண்டும் என்று பிரார்த்தனையும் செய்து கொண்டார்.

அவருடைய பிரார்த்தனையை ஸ்ரீசாரதை நிறைவேற்ற மாட்டாளா என்ன?

முன்பே ஒருமுறை, மதுரை ஸ்ரீமீனாட்சி அம்மனை தரிசிக்கச் சென்றபோது, சுவாமி களுடைய தீர்மானத்தை வெற்றி பெறச் செய்தவள் ஆயிற்றே ஸ்ரீசாரதை!

அது 1872-ம் வருடம். ஸ்ரீநரஸிம்ம பாரதி சுவாமிகள் மதுரை மீனாட்சி அம்மனைத் தரிசிக்க மதுரைக்குச் சென்றார். எப்போதும் போல் ஸ்ரீமீனாட்சி சுந்தரேசுவரர் திருக்கோயில் கல்யாண மண்டபத்தில் முகாம் அமைத்துக்கொண்டார்.

ஒரு நாள், அன்னை மீனாட்சியின் சந்நிதி கருவறைக்குச் சென்று, மீனாட்சி அம்பிகைக்கு தாமே பூஜை செய்யத் திருவுள்ளம் கொண்டார். இதற்கு அங்கே இருந்த சில அர்ச்சகர்கள் ஆட்சேபம் தெரிவித்தனர். உடனே, சுவாமிகள் இரண்டு தேங்காய்களைக் கொண்டு வரச் செய்து, அவற்றில் அன்னை மீனாட்சியை ஆவாஹனம் செய்துகொண்டு, தமது இருப்பிடத்துக்கு வந்தார். பக்தர்களும் சுவாமிகளைத் தொடர்ந்து வந்தனர். தம் இருப்பிடம் சேர்ந்த சுவாமிகள், மீனாட்சியை ஆவாஹனம் செய்திருந்த தேங்காய்களை வைத்து, நியமத்துடன் பூஜை, நைவேத்தியம் செய்து, வந்திருந்த பக்தர்களுக்கு மடத்திலேயே பிரசாதமும் கொடுத்து அனுப்பினார்.

அப்போது அன்னை மீனாட்சியின் திருவுள்ளப் படி, ''இனி பக்தர்கள் யாரும் அர்ச்சகர்கள் மூலமாக பூஜைகள் செய்யவோ, அவர்களிடமிருந்து பிரசாதம் பெற்றுக்கொள்ளவோ வேண்டாம்'' என்று ஓர் உத்தரவு சுவாமிகளின் திருவாய் மொழியாக வெளிப்பட்டது.

இதனால், சுவாமிகளுக்கு அந்த அர்ச்சகர்களிடம் துவேஷம் ஏற்பட்டுவிட்டது என்று யாரும் தவறாக நினைத்துக்கொள்ளக் கூடாது. ஒப்பற்ற மகானாகிய நம் சுவாமிகளுக்குத் தனிப் பட்ட விருப்பு வெறுப்புகள் எதுவும் எப்போதும் இருந்ததே கிடையாது. ஸ்ரீசாரதையின் திருவுள்ளம் எதுவோ, அதுவே சுவாமிகளின் சொல்லாகவும் செயலாகவும் பரிணாமம் பெற்றது. மகான்களின் மகத்துவம் பற்றித் தெரியாமல், அறியாமையில் மூழ்கிக் கிடக்கும் பலருக்கும் ஒரு படிப்பினை கற்பிக்கவே மகான்களின் வாழ்க்கையில் பல நிகழ்ச்சிகள் இதுபோல் நடந்திருக்கின்றன. அந்த வகையில்தான், ஸ்ரீசாரதையின் தவப்புதல்வராம் நம் நரஸிம்ம பாரதி சுவாமிகளை அலட்சியப்படுத்தி நடத்திய தன் திருக்கோயில் அர்ச்சகர்களுக்கு சுவாமிகளின் வாயிலாக ஒரு பாடம் கற்பிக்கத் திருவுள்ளம் கொண்ட மீனாட்சி, அதைச் செயல்படுத்தியும் விட்டாள்.

அம்பிகையின் வாக்காக சுவாமிகள் கூறிய வார்த்தைகளைக் கேட்ட பக்தர்கள், அன்று முதல் மீனாட்சியின் சுந்நிதிக்குச் செல்லாமல், சந்நிதிக்கு வெளியில் உள்ள பலிபீடத்துக்கு அருகில் இருந்தபடி, தாங்களே தேங்காய் உடைத்து நைவேத்தியம் செய்து, தீபாராதனை காட்டி, அங்கிருந்த படியே மீனாட்சியை தரிசனம் செய்து வந்தார்கள்.

துங்கா நதி தீரத்தில்... - 5

ஒப்புயர்வற்ற மகானிடம் அபசாரமாக நடந்து கொண்டதன் பலனாக, அந்த அர்ச்சகர்கள் மிகுந்த சிரம தசைக்கு ஆட்பட்டனர். மகான்கள் எப்போதும் யாரையும் சபிக்கவே மாட்டார்கள். அவர்களுக்கு நாம் செய்த அபசாரமே சாபமாக மாறி, நம்மைக் கஷ்டப்படுத்தும் என்பதற்கு உதாரணம் போல் அமைந்துவிட்டது மதுரை அர்ச்சகர்களின் நிலை.

தங்கள் நிலைமைக்கு, தாங்கள் நரஸிம்ம பாரதி சுவாமிகளுக்கு செய்த அபசாரம்தான் காரணம் என்பதைப் புரிந்துகொண்ட அர்ச்சகர்கள், மறுபடியும் சுவாமிகள் மதுரைக்கு வந்திருந்தபோது முக்கிய பிரமுகர்களின் துணையுடன் சுவாமிகளிடம் சென்று, தாங்கள் செய்த அபசாரத்தைப் பொறுத்துக்கொண்டு, தங்களை மன்னிக்கும்படியாக பிரார்த்தித்துக்கொண்டார்கள்.

அவர்களிடம் இரக்கமும் கருணையும் கொண்ட சுவாமிகள், மீனாட்சி அம்மன் கோயிலுக்குச் சென்று, தம் திருக்கரங்களாலேயே விசேஷ பூஜைகள் செய்து, அம்பாளுக்குப் பூர்ண கலையை ஏற்படுத்தியதுடன், ''இனி எல்லா பக்தர்களும் அர்ச்சகர்கள் மூலமாகவே பூஜைகள் செய்து பிரசாதம் பெற்றுக் கொள்ளலாம்'' என்று அனுகிரஹித்தார். இந்தச் சம்பவத்தின் காரணமாக, எந்தத் தினத்தில் சுவாமிகள் மீனாட்சியைத் தேங்காய்களில் கலாகர்ஷணம் செய்து, மடத்திலேயே பூஜை நைவேத்தியங்கள் செய்யத் தொடங்கினாரோ, அன்று முதல் ஸ்ரீசிருங்கேரி மடத்தில் ஸ்ரீசந்திரமௌலீசுவர பூஜை வேளையில், ஸ்ரீமீனாட்சி சுந்தரேசுவரர்களுக்கும் நைவேத்தியம் செய்யப்பட்டு வருகிறது.

அன்று சுவாமிகள் மீனாட்சியின் பொருட்டு மதுரையில் எடுத்த தீர்மானத்தை நிறைவேற்றிய ஸ்ரீசாரதை, மைசூரில் மட்டும் அவர் மேற்கொண்ட முடிவை நிறைவேற்றமாட்டாளா என்ன?

மறுநாள் காலை, மன்னருக்கு ஆள் அனுப்பி வரச் செய்த சுவாமிகள், மன்னரிடம் ராமசாஸ்திரிகளின் பிள்ளை சிவஸ்வாமியைத் தம்மிடம் அழைத்து வரும்படி கூறினார்.

அதன்பேரில், தம் சந்நிதானத்துக்கு அழைத்து வரப்பட்ட சிவஸ்வாமியை தமக்கு அருகில் வரவழைத்து, வாஞ்சையுடன் அரவணைத்துக்கொண்ட சுவாமிகள், ''உனக்கு வேண்டுவது என்ன குழந்தாய்?'' என்று பரிவுடன் கேட்டார்.

சிவஸ்வாமி கேட்டது என்ன?

- தொடரும்...

தொகுப்பு: க.புவனேஸ்வரி, படம்: ஜெ.வேங்கடராஜ்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism