Published:Updated:

சித்தத்தைத் தெளிவாக்கும் ஜோதிட சிந்தனைகள்!

காலக் கணிதத்தின் சூத்திரம்சேஷாத்ரிநாத சாஸ்திரிகள்

சித்தத்தைத் தெளிவாக்கும் ஜோதிட சிந்தனைகள்!

காலக் கணிதத்தின் சூத்திரம்சேஷாத்ரிநாத சாஸ்திரிகள்

Published:Updated:

மிதுனம், கன்னி ஆகிய இரண்டு ராசிகளில் ஒன்றில் பிறந்த வேளை (லக்னம்), நட்சத்திர பாதம் (சந்திரன்) இருக்கும்போது, சுக்ர த்ரிம்சாம்சகத்தில் பிறந்தவள், தனது விருப்பங்கள் நிறைவேறாத நிலையில் மன அமைதி இழந்திருப்பாள் என்கிறது ஜோதிடம் (ப்ரவிகீர்ண காமா). 'விகீர்ணம்’- சிதறிய நிலையை எட்டியது; சிதறுண்டு போனது. சிதறுண்டு போனவை சுவைக்க உகந்ததாக இருக்காது. 'ப்ர’ என்ற எழுத்தின் இணைப்பு, 'ப்ர’ விகீர்ண - காமா என்ற சொற்றொடரானது சேர்க்க இயலாத வகையில் சிதறிப் போனதைச் சுட்டிக்காட்டும்.

சித்தத்தைத் தெளிவாக்கும் ஜோதிட சிந்தனைகள்!

காமம் எனும் விருப்பம்..!

ஒட்டுமொத்த விகடனுக்கும் ஒரே ஷார்ட்கட்!

'காமம்’ என்ற சொல்லுக்கு 'விருப்பம்’ என்று பொருள். அதே சொல், இணை சேருவதையும் குறிக்கும். ஒட்டு மொத்தமாக உலகவியல் சுகபோக விருப்பங்களைச் சுட்டிக்காட்டும். அதில் முதன்மை பெறும் உடலுறவானது, இயற்கையின் தூண்டுதலால் இளமையில் மலரும் ஆசை. அது சிதறும் நிலையில் மன நிறைவு குன்றிப்போவதால் மனம் சோர்வடையும். மனத்தில் தோன்றிய ஆசையானது சீராக வளர்ந்து, சுவைக்கும் தருணத்தில் சிதறிவிடுவதால், அவள் அந்த உணர்வை எட்டமுடியாமல் போய் விடுவாள். பெண்மையின் தனிப்பெருமையை உணரும் தகுதி இழக்கப்பட்டுவிடும். குழந்தையை ஈன்றெடுக்காதவளாகவோ அல்லது ஈன்றெடுத்த குழந்தைகளை இழந்தவளாகவோ இருப்பாள்.

குழந்தைச் செல்வமும் விருப்பத்தில் அடங்கும். அந்த விருப்பமும் சிதறுண்டுவிடும். பெறாமல் இருந்தால் மலடி. பிறந்து தங்காமல் இருந்தாலும் மலடிக்குச் சமமானவளே. ஆக, உலகவியல் சுகங்களை எட்ட இயலாமல் தவிப்பது, அவளுடைய மனத்தைப் பாதிப்புக்கு உள்ளாக்கும் என்ற பொருளும் அதில் அடங்கும்.

இரண்டு வகை விருப்பங்கள்...

உலகவியல் ஆசைகளில் (ஆடம்பரப் பொருள்களில்) நிறைவைப் பெறும் பலன் என்பது, நுகர்பொருட்களில் தன்னிறைவு பெற்று மகிழ்வதாகும். அதாவது அந்தப் பொருட்களில் ஏற்பட்ட காமம்- விருப்பத்தில் நிறைவை எட்டுவது. உடல் உறுப்புகளான ஐம்பெரும் புலன்கள் முழு திருப்தியை எட்டும்போது மன நிறைவு உணரப் படும். ஜீவபரமான பலன்கள் என்பது, மனம் அதோடு இணைந்த ஆன்மா அதாவது சைதன்யம் சார்ந்தது. இதன் இணைப்பில் ஏற்படும் மகிழ்ச்சியானது சொல்லில் விவரிக்க இயலாதது. இப்படி உலகவியல் ஆசைகளால் பெறும் பலன்கள், ஜீவபரமான பலன்கள் என்று இருவகை மகிழ்ச்சி உண்டு.

மனம், ஆன்மா, உடல், புலன்கள் ஆகியவற்றின் இணைப்பில் உருவானது சரீரம். ஜீவபரமானது, உலகவியல் சார்ந்தது ஆகிய இரு வகை பலன்களையும் உணரும் உறுப்புகளுடன் இணைந்த உருவமாகவே இயற்கை நம்மைப் படைத்திருக்கிறது. ஆனாலும்,   மனமானது மேற்சொன்ன இருவகை பலன்களைப் பிரித்துப் பார்க்கும் தகுதியை இழந்திருப்பதால், பாமரர்கள் சிந்தனையானது இரண்டையும் ஒன்றாகவே பார்க்கிறது.

ஒன்றை இழந்தால் ஒன்று...

இருகூறான உடலுக்கு உகந்தபடி (மனம், ஆன்மா சார்ந்த இணைப்பு, உடல் உறுப்புகள், புலன்கள் சார்ந்த இணைப்பு... இப்படி இருகூறின் இணைப்பு உடல்), அத்தனை கிரகங்களும் இருவேறான பலன்களை  உணரவைக்கும்; லோகாயத பலனையும், ஆன்மிகத்தையும் வெளியிடும். ஜீவபரமான பலன்கள் மனத்தை பாதிப்புக்கு உள்ளாக்கும். லோகாயத பலன்கள் உடல் உருப்படிகளோடு நின்றுவிடும். லோகாயத பலன்கள் இழக்கப்பட்டால் விரக்தியைச் சந்திக்க வைக்கும். இதை, நுகர்பொருட்களில் நாம் உணரலாம். இப்படி யான உடல், உறுப்புகள், புலன்கள் அத்தனையையும் மறந்து ஆன்மாவுடன் இணைந்த மனமானது, மகிழ்ச்சியில் ஆழ்வது உண்டு.

இங்கு, சுக்ர த்ரிம்சாம்சகத்தில் பிறந்தவள் ஜீவபரமான பலனை இழக்கிறாள். லோகாயத பலன்களில் நிறைவு பெற்று உணரும் தகுதியை இழக்கவைக்கவில்லை. காமம் - ஆசை சிதறுண்டது என்பதற்கு 'மன நிறைவை இழந்தவள்’ என்ற கருத்தில் 'ப்ரவிகீர்ண காமா’ என்று சுட்டிக் காட்டுகிறது ஜோதிடம். இரண்டு பலன்களில் ஒன்றில் இழப்பு தென்பட்டால், மற்றொன்று அனுபவத்துக்கு வந்துவிடும். இரண்டு பலன்களையும் ஒட்டுமொத்தமாக அழிக்கும் தகுதி எந்த கிரகங்களுக்கும் அளிக்கப்படவில்லை. இரண்டும் இல்லை என்றால் அவள் இல்லை என்றாகிவிடும். அவள் உயிரோடு வாழ்க்கையில் இணைந்திருக்கும் வேளையில், அவளுக்கான அனுபவத்தைக் கொண்டுவரும் பணியை கிரகங்கள் ஏற்றுக் கொண்டிருக்கின்றன.

சித்தத்தைத் தெளிவாக்கும் ஜோதிட சிந்தனைகள்!

துறவிகளும் ஸம்சாரிகளும்...

மனம் ஆன்மாவோடு இணையாமல் இருந்தால் எந்தப் பலனும் அவளை எட்டாது. உடற்கூறுக்கு உகந்தபடி பலனளிப்பது பொருந்தும். உலகவியலில் இணையாத துறவிகள், ஸமாதியில் ஆனந்தத்தில் ஆழ்ந்திருப்பார்கள். ஆன்மிகத்தில் இணையாத ஸம்ஸாரிகள் உலகவியல் நுகர்பொருளில் இணைந்து மகிழ்ச்சியில் ஆழ்ந்திருப்பார்கள், விலைமாது ஜீவபரமான பலனை ஒட்டு மொத்தமாக இழக்கிறாள். லோகாயத பலனில் நிறைவு பெறுகிறாள். பலரது உடலுறவில் மனம் ஒன்றாது. பொருளாதாரம் நிரம்பி வழியும். நுகர்பொருள்கள் குறையாமல் இருக்கும். இங்கு, ஒன்று இழக்கப்பட்டு மற்றொன்றில் நிறைவுபெறுவதைப் பார்க்கிறோம். பஞ்சணையில் துறவிக்குப் பற்று இருக்காது. மனம் நிறைவுபெற்று இருக்கும். ஆன்மிகத்தில் துறப்பதில் ஆனந்தம் உருவாகும்; லோகாயதத்தில் இணைப்பதில் ஆனந்தம் தோன்றும். இரண்டு பலன்களும் வேறுபட்ட கோணத்தில் உருவாவதால், இரண்டும் ஒன்றாக அழிவதற்கு இடம் இல்லாமல் போய்விடும்.

சுக்ரனின் நிலைப்பாடு

இயற்கைத் தத்துவத்தில் உருவான ஜோதிடம், இயற்கைக்கு மாறாக விளக்கம் அளிக்காது. இப்படியிருக்க, சுக்கிரன் உச்சனாக இருக்கிறான்; வாழ்வில் மகிழ்ச்சி பொங்கும். சுக்கிரன் நீசம் பெற்று இருக்கிறான்; வாழ்க்கை இருண்டுவிடும் என்று ஆராயாமல் பலன்கள் சொல்வதில் ஜோதிடத்துக்கு உடன்பாடு இல்லை. இரு பலன்களை அள்ளித்தரும் தகுதி சுக்ரனுக்கு இருந்தாலும், மற்ற கிரகங்களின் இணைப்பில், பார்வையில், தகுதியில்... ஒன்றை அளித்து, ஒன்றை அழிக்கிறான் என்ற முடிவை இறுதி செய்கிறது, சுக்ர த்ரிம்சாம்சகம்.

கன்னியில் இணைந்த சுக்கிரனின் புதன் சேர்க்கையிலும், மீனத்தில் இணைந்த சுக்கிரனின் புதன் சேர்க்கையிலும் பலனில் மாறுதலை ஏற்படுத்துவதைக் கவனிக்க வேண்டும். கன்னியில் உச்சனான புதனோடு இணைந்து லோகாயத பலனை மட்டும் அளித்து, ஜீவபரமான பலனை இழக்கவைக்கிறான். மீனத்தில் நீசனான புதனின் இணைப்பில் ஜீவபரமான பலனை அளித்து நுகர்பொருள் மகிழ்ச்சியை இழக்கவைக்கிறான். இங்கு இருவரும் இரு பலன்களை அளிக்கும் தகுதி இருந்தும், இருவரது இணைப்பில் ஒன்றைத் துறந்து ஒன்றை சந்திக்க வைக்கிறார்கள். இங்கு புதனும் சுக்ரனும் தட்பக்கிரகங்கள். அவர்கள் இருக்கும் இரண்டு ராசிகளின் தலைவர்களும் தட்பக்கிரகங்கள். புதன்- சுக்கிரன் இணைப்பில் அவன் இயல்பை ஏற்கிறாள். சுக்ரன் - புதன் இணைப்பில், புதன் தகுதியை ஏற்கிறாள்.

கன்னியில், நீச சுக்ரன் புதனின் இணைப்பில் பலம்பெற்று, லோகாயத வாழ்க்கையை சிறப்புறச் செய்கிறான். புதன், நீச சுக்கிரனின் இணைப்பில் பலம் குன்றி ஜீவபரமான மகிழ்ச்சி அளிப்பதில் தகுதியை இழந்துவிடுகிறான். மீனத்தில் உச்சனான சுக்கிரனின் இணைப்பில் பலம் பெற்ற நீச புதன், ஜீவபரமான பலனை அளித்து, லோகாயத பலனை இழக்கவைக்கிறான். இங்கு புதனும் சுக்கிரனும்... இரண்டு விதமான பலன்களை அளிப்பதில் தகுதி இருந்தாலும், இணைப்பில் இருவரும் மாறுபட்ட பலன்களை அளிப்பதை உணர்கிறோம். உச்சனான, தட்பக் கிரகமான புதனின் சேர்க்கையில், தட்பக் கிரகமான சுக்கிரன் நீச பலத்தை இழந்து, வலுப்பெற்று, தனது நுகர் பொருள் அனுபவத்தை ஊட்டுகிறான். மீனத்தில் வலுவிழந்த புதன், சுக்கிரனின் சேர்க்கையில் வலுப்பெற்று, ஜீவபரமான பலத்தை ஊட்டுகிறான்.

கிரகங்களின் சேர்க்கை, இருவரது தகுதியை வைத்து மாறுபட்ட இரு பலன்களை சந்திக்கவைப்பதை ஜோதிடம் சுட்டிக்காட்டும். அதன் கண்ணோட்டத்தில் நீசபங்கத்தை ஆராயாமல், விருப்பப்படி அல்லது ஜாதகர்களின் மனம் நோகாதபடி பலன் சொல்வதில் ஜோதிடத்துக்கு உடன்பாடு இல்லை.

அறிவும் ஆசையும்!

புதன், சுக்கிரன் - இரண்டும் முறையே அறிவையும் ஆசையையும் சுட்டிக்காட்டும். அறிவில் ஆசை மறைவதையும், ஆசையில் அறிவு செயல்படாமல் இருப்பதையும் நன்கு உணர்த்துகிறது ஜோதிடம். சுக்கிரனின் தாக்கம் மனத்தில் தோன்றிய ஆசையை வளர்த்து, நிறைவை எட்டத் தூண்டிவிடும். அப்போது விவேகம்-பகுத்தறிவு படுத்துவிடும். அப்படி, விவேகத்தை மறந்த விலைமாது ஓர் இயந்திரம் போன்று உடலுறவில் ஈடுபடுவாள். அவளது குறிக்கோள் செல்வச் செழிப்பில் திளைப்பதுதான். 'விலைமாது’ என்ற சொல், 'ஜீவபரமான பலனை இழந்தவள்’ என்பதைச் சுட்டிச் காட்டும்.

சுக்ர த்ரிம்சாம்சகம்...

சித்தத்தைத் தெளிவாக்கும் ஜோதிட சிந்தனைகள்!

சுக்ர த்ரிம்சாம்சகத்தில் பிறந்தவளுக்கு, ஆசைகளின் உந்துதலில் விவேகம் இழந்து, அவளின் மனமானது லோகாயதத்தில் திளைப்பதை ஏற்கும். அந்த வேளையில் ஜீவபரமான பலன் மனத்தில் உதிக்காது. அதை இழந்த வேளையில், சுக்ரனின் தாக்கமானது, லோகாயத வாழ்க்கையை எல்லையாகப் பார்க்கவைத்துவிடும். அப்போது தனிப்பட்ட முறையில் தனது இழப்பை உணராததால்,  நாணம் விடுத்து விலைமாதாக மாறுகிறாள்.

ஒரே ராசியில் இரண்டு வெப்பக் கிரகங்களின் நடுவில் சுக்கிரன் மாட்டிக்கொள்வதும் உண்டு. உதாரணமாக, மேஷ ராசியில் அசுவினி முதல் பாதத்தில் சூரியனும், 2-ம் பாதத்தில் சுக்ரனும், 3-ம் பாதத்தில் சனியும் இருந்தால், சுக்ரன் இரண்டு வெப்ப கிரகங்களின் இடையே சுக்ரன் கிடுக்கிப்பிடியாக மாட்டிக்கொண்டவனாகத் திகழ்வான். பரணி ஒன்றில் சுக்கிரன், 2-ல் சனி- இப்படி இருந்தால் பாபக் கிரகத்துடன் இணைந்தவனாக ஆவான். மேஷத்தில் - சுக்கிரன், கடகத்தில் சனி, விருச்சிகத்தில் சூரியன் இருந்தால் 'சதுரச்ர’ தோஷத்தில் இணைந்துவிடுவான்.

வெப்ப கிரகத்தின் இணைப்பில் சுக்ரன்...

இங்கெல்லாம் தட்பக் கிரகமான சுக்ரனுக்கு வெப்பக் கிரகத்தின் ஒரு வகையான தொடர்பு ஏற்பட்டுவிடும். வெப்பக் கிரகத்தின் இணைப்பில்... இருவகையான பலனை அளிக்கும் திறமை இருந்தும், ஒன்று விடுபட்டு மற்றொன்று நடைமுறைக்கு வரும். நுகர்பொருள் இன்பத்தை அளித்து, ஜீவபரமான பலனை முடக்கிவைத்து விடுகிறான். அப்போது, மனம் திருப்தி அடையாது; புலன்கள் திருப்தி கொள்ளும்.

பொருளாதாரம், பட்டம், பதவி, இளமை, அழகு - அத்தனையும் அமைந்த தம்பதி களில் மனம் நிறைவு பெறாமல் பல விவாகரத்துகளைச் சந்திக்க நேர்ந்துவிடுகிறது. அவர்கள் அத்தனைபேரும் சிதறுண்ட ஆசைகளில் வெம்பிப் போனவர்களாக மாறுவார்கள். 'ப்ரவிகீர்ண காமா’ என்ற வரி அவர்களுக்கும் பொருந்தும்.

வாழ்க்கைத் துணையைத் தேர்ந்தெடுப்பதற்கான நேர்காணலில், ஆசைக்கு முன்னுரிமை அளித்து, அன்பைப் பின்னுக்குத் தள்ளும் முயற்சியில் இணைந்தவர்கள், விவாகரத்தைச் சந்திப்பது உண்டு. சுக்ரன் பிற கிரகங்களின் சேர்க்கையில் தனது இயல்பை முடக்கி வைத்து, மாறுபட்ட பலனை அளிப்பான் என்கிறது ஜோதிடம். மகர - கும்ப ராசிகளுக்கு யோக காரகனாக மாறிய சுக்ரன், மற்ற வெப்பதட்ப கிரகங்களுடைய இணைப்பில் லோகாயத வாழ்க்கையைத் துறக்கவைத்து, ஆன்மிக வாழ்வை ஏற்கவைப்பான். நுகர்பொருள் இன்பத்தை உதறித்தள்ள வைத்து, ஜீவபரமான மன மகிழ்ச்சியை ஏற்கவைப்பான். 'நுகர்பொருளின் இன்பம் துன்பத்தில் முடிவடையும்’ என்ற விவேகத்தை ஏற்படுத்தி, பற்றறுக்கச் செய்து, ஆன்மிக வாழ்வின் சுவையை உணரவைப்பான்.

சுக்ர த்ரிம்சாம்சகம்... ஒரு பார்வை!

இரு ராசிகளிலும் புதன் பரவியிருப்பான். ஒற்றைப்படை ராசியில் (மிதுனம்) கடைசி 5 பாகைகளும், இரட்டைப்படை ராசியில்  (கன்னி) முதல் 5 பாகைகளிலும் சுக்ரன் இருப்பான். ஒற்றைப்படை ராசியில் 3-வது த்ரேக்காணத்தில் சனியும், இரட்டைப்படை ராசியில் முதல் த்ரேக்காணத்தில் புதனும் இருப்பார்கள். ஒற்றைப் படை ராசியில் ஹோரையில் சந்திரன்; இரட்டைப்படை ராசியில் அதே சந்திரன் இருப்பான்.

புதன் (ராசி அதிபதி), சந்திரன் (ஹோராதிபதி), சனி, புதன் (த்ரேக் காணாதிபதிகள்) இவர்களோடு இணைந்த சுக்கிர த்ரிம்சாம்சகம், அதில் பிறந்தவளை, நிறமில்லாத வாழ்வை எட்டவைக்கிறது என்ற விளக்கம் தெளிவாக்கப்பட்டுள்ளது. அவளுக்கு வாழ்வு உண்டு. விருப்பங்களை சுவைத்து மகிழும் உணர்வு இல்லாமல் போவது குறை. ஒவ்வொரு விருப்பமும் அரைகுறையாக அனுபவத்துக்கு வருவது, மனம் நோகக் காரணமாகிவிடும்.

சித்தத்தைத் தெளிவாக்கும் ஜோதிட சிந்தனைகள்!

அதேநேரம், அளவு கடந்த ஆசையில் உந்தப்பட்டு, விவேகம் அகன்று தரம் தாழ்ந்த வாழ்வில் இணைந்துவிடுவதும் உண்டு. விரும்பியது கிடைக்காது என்று தெரிந்த பிறகு, கிடைத்ததில் விருப்பத்தை ஏற்படுத்திக் கொள்ளும் எண்ணமும் உதிக்காது.

அதற்கு மாறாக, உடலுறவில் திருப்தி ஏற்படாமல் விவாகரத்தை ஏற்று மாற்று வழியைப் பின்பற்றினாலும், அங்கும் ஏமாற்றத்தைச் சந்திக்கவைக்கும். இப்படி, பல விவாகரத்துகளைச் சந்தித்தவர்கள் தற்போது தென்பட ஆரம்பித்திருக்கிறார்கள்.

புதிய பகுத்தறிவு நம்பிக்கையானதா?

ஜீவபரமான மகிழ்வு இல்லை என்று சுக்ரன் சுட்டிக்காட்டி விட்டால், பரிகாரம் வாயிலாக அதை ஈட்ட இயலாது. 'விவாகத்தில் இணையாமல் சேர்ந்து வாழ்வோம்’ என்ற புதுக்கண்ணோட்டம் அதன் வெளிப்பாடு. அவரவர் செய்த கர்மவினையை நடை முறைப்படுத்தும் கிரகங்கள், தங்களுடைய பணியிலிருந்து என்றும் மாறமாட்டார்கள். இப்படியிருக்க, ஜாதகத்தை ஆழமாக- சாஸ்திரக் கண்ணோட்டத்துடன் ஆராயாமல், மக்களை திருப்திப்படுத்த, இயன்றளவு பரிகாரத்தைப் பரிந்துரைத்து, தன்னிச்சையாக செயல்படும் துணிவு ஜோதிடர்களிடம் இருக்கக்கூடாது.

ஜாதகப் பொருத்தம் பார்த்து விவாகம் நடந்தேறியது. ஆனால், விவாகரத்தைச் சந்தித்தார்கள். மாறாக, தங்களது விருப்பத்தில் இணைந்தவர் ஓஹோ என்று வாழ்கிறார்கள். ஆகவே, ஜோதிடம் பொய் என்பது புதிய பகுத்தறிவாளர்களின் கணிப்பு. இது சிந்தனை வளம் பெறாததையே சுட்டிக்காட்டுகிறது. உழைக்காமல் ஊதியம் பெற நினைப்பவர்கள், தகுதி இல்லையானாலும் விருப்பத்தை நிறைவேற்ற முயற்சிப்பவர்கள்- இவர்களுக்கு ஜோதிடம் துணை போகாது. தற்போது தகுதி இழக்கப்பட்டவர்கள், தகுதி பெற வேறு வழியின்றி ஜோதிடரை அணுகுபவர்கள் ஆகியோரின் எண்ணிக்கை அதிகமாகிக்கொண்டு இருக்கிறது. ஆசையைக் கட்டுப்படுத்தி, மனத்தைத் தெளிவுபடுத்தி, வாழ்வின் முழுமையில் நிறைவுபெற்று வாழும் பெருமையை அளிப்பதுதான் ஜோதிடம்.

- சிந்திப்போம்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism