Published:Updated:

அமிர்த விருட்சம்... ஆகாய கங்கை!

அத்ரி மகரிஷி
பிரீமியம் ஸ்டோரி
News
அத்ரி மகரிஷி

அற்புதங்கள் நிறைந்த அத்ரிமலை!

மேற்குமலைத் தொடரில் மிக அற்புதமான க்ஷேத்திரங்கள் பல அமைந்துள்ளன.

தென்கயிலை எனப்போற்றப்படும் பொதிகை மலை, நான்கு வேதங்களும் நான்கு சிகரங்களாக அமைந்ததெனத் திகழும் சதுரகிரி, முருகன் மற்றும் அனுமனின் பாதச்சுவடுகளோடு திகழும் மகேந்திரகிரி, பெருமாள் குடிகொண்டிருக்கும் நம்பிமலை ஆகிய இந்த க்ஷேத்திரங்களின் வரிசையில் மற்றுமொரு தலமும் உண்டு. அதன் பெயர் அத்ரிமலை.

ப்த ரிஷிகளில் முதன்மை பெற்றவரான அத்ரி மகரிஷி வாழ்ந்த இடம் என்பதால், இதை `அத்ரிமலை’ எனப் போற்றுகிறார்கள். வடக்கே புகழ்பெற்று திகழும் பத்ரிநாத் தலத்துக்கு இணையானது, தென்தமிழ்நாட்டின் இந்த அத்ரிநாத் எனப் போற்றுகிறார்கள் பக்தர்கள். அத்ரிமலையை தரிசிப்பது, கயிலையை தரிசிப்பதற்கு ஒப்பானது.

அத்ரிமலை
அத்ரிமலை

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

டனா நதி நீர்த்தேக்கத்தைத் தாண்டி அத்ரிமலைக்குச் செல்ல வேண்டும். தன் சீடர் கோரக்கருக்காக கங்கையை இந்த மலைப் பகுதிக்கு வரவழைத்தாராம் அத்ரி மகரிஷி. அந்த நதிக்குக் கருணை நதி என்றும் பெயர் வைத்தாராம். இந்தப் பெயரே பிற்காலத்தில் `கடனா நதி’ என்று மருவியதாகச் சொல்கிறார்கள்.

டனா நதிக்குக் கல்லாறு என்றும் பெயர் உண்டு. இந்த நதிக்கடியில் கிடக்கும் கற்கள் சில, சிவலிங்க ரூபத்தில் திகழ்கின்றனவாம். அன்பர்கள் பலரும் அவற்றை எடுத்துச் சென்று ஆவுடையில் பிரதிஷ்டை செய்து சிவலிங்கமாக வழிபடுகிறார்கள். புனிதமிகு கற்களைக் கொண்ட இந்த நதிக்கு `கல்லாறு’ எனும் பெயர் வந்தது இப்படித்தானாம்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

அற்புத மூலிகைகள்

ற்புத மூலிகைகளால் நிறைந்தது இந்த மலைப்பகுதி. விஷக்காய்ச்சலை குணப்படுத்தும் விஷ்ணு கிரந்தை, தாய்ப்பால் நன்கு சுரக்க உதவும் அம்மான் பச்சரிசி மூலிகை, இதய நோய்க்கு அருமருந்தான சஞ்ஜீவி மூலிகை, சிறுநீரகப் பிரச்னைக்கு மருந்தான சர்க்கரை வேம்பு, உணவுப் பொருள்களைக் கெட்டுப்போகாமல் காக்கும் புளி ஆரை மூலிகை, சகல பிணிகளுக்கும் மருந்தாகும் மயில்கொன்றை போன்ற அபூர்வ மூலிகைகள் இங்கு உண்டு.

அமிர்த விருட்சம்... ஆகாய கங்கை!

இவையெல்லாம் எங்கிருக்கின்றன என்பது மூலிகை மருத்துவத்தோடு சம்பந்தப்பட்டவர் களுக்கே தெரியும். மற்றவர்கள் இவற்றை இனம்காண்பது எளிதில் இயலாத காரியம். ஆனாலும் இந்த மூலிகைகளைத் தழுவியபடி வரும் காற்றை சுவாசித்தாலே போதும், நம் உடற்பிணிகள் அனைத்தும் நீங்கிவிடும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கோரக்கர் குகை

`இந்த மலை முழுவதுமே சித்தர்கள் வியாபித்து இருக்கிறார்கள்’ என்கிறார்கள் பக்தர்கள். மலைப் பகுதியில் இருக்கும்போது, எச்சில் துப்புவதாக இருந்தாலும்கூட கைகளைத் தட்டி ஓசை எழுப்பிவிட்டே உமிழ்கிறார்கள்.

சித்தர் பெருமக்களின் கவனத்தை ஈர்த்து அனுமதி பெறவே கைத்தட்டி ஓசை எழுப்புகிறார்களாம் அன்பர்கள். ``மலை யில் சூட்சுமமாக அமர்ந்து தவம் செய்யும், உலவும் சித்தர்களுக்கு இடைஞ்சல் தராமல், அடியெடுத்து வைப்பதிலும்கூட கவனமாக இருப்போம்’’ என்கிறார்கள் பக்தர்கள்.

கோரக்கர் குகை
கோரக்கர் குகை

த்ரிமலைக்குச் செல்லும் வழியில் கடனா நதியைக் கடந்து மலைக்குச் செல்லும் வழியில், கோரக்கர் குகையை தரிசிக்கலாம். சதுரகிரி மலையிலும் கோரக்கர் குகை இருக்கிறது. ஆனால், இங்கே அத்ரி மலையிலுள்ள கோரக்கர் குகை சுவர்கள் வித்தியாசமாக , சுண்ணாம்புப் பாறை போன்று காட்சியளிக்கின்றன. கோரக்கர் குகைக்கு முன்னதாக, இஸ்லாமிய மகான் ஒருவரது குகை ஸ்தலம் உள்ளது. சடமலை மகான் என்கிறார்கள்.

போகர் பிரான், பழநியில் அருளும் நவ பாஷாண முருகன் சிலையை உருவாக்கிய இடம் அத்ரிமலையே என்றும் சிலர் சொல்கிறார்கள். அந்த விக்கிரகத்தை உருவாக்கிய பிறகு, மீதமான ஒளஷதங்களே இங்கே மூலிகைப் பாறையாகத் திகழ்கிறது என்ற நம்பிக்கையும் உண்டு.

‘மற்றவர்கள் கங்கையைத் தேடி வடக்கே செல்லட்டும். உன்னைத் தேடி கங்கையே இங்கு வருவாள்’

துணைக்கு வருவாள் வனதுர்கை

த்ரி தபோவனத்தில் நுழையும் அன்பர்கள், முதலில் தரிசிப்பது, அருள்மிகு வனதுர்கையையே. இந்தப் பகுதியின் காவல் தெய்வம் இந்த துர்கை. அன்பர்கள் பலர் வழிபாட்டின் பொருட்டு அத்ரி தபோவனத்தில் இரவில் தங்குவது வழக்கம்.

வனதுர்கை
வனதுர்கை

அப்படிச் சிலர், ஒருமுறை இரவில் கடனா நதியை கடந்ததுமே `ஜல் ஜல்’ எனும் கொலுசு ஒலியைக் கேட்டார்களாம். பெரியவர்கள் மூலம் அம்பிகையே தங்களுக்குப் பாது காவலாக வந்ததை அறிந்து சிலிர்த்தார்களாம். மலைக்கு வரும் அன்பர்கள், வழிபாடு முடிந்து திரும்பி கடனா நதியைக் கடந்து செல்லும் வரை அவர்களுக்குப் பாதுகாப்பாக நின்று அருள்பாலிப்பவள் இந்த வனதுர்கை என்பது பக்தர்களின் நம்பிக்கை.

அத்ரி மகரிஷி
அத்ரி மகரிஷி

இரட்டை லிங்கங்கள்

திருக்கோயிலை வலம்வர தொடங்கினால், இடப்புறம் இரட்டை விநாயகர்கள், மகிஷாசுரவர்த்தினி, அத்ரி, அகத்தியர், தட்சிணாமூர்த்தி, பிரம்மா, விஷ்ணு, சாஸ்தா தேவியருடன் அருளும் முருகன் ஆகிய தெய்வங்களை தரிசிக்கலாம். கருவறையில் சிவசக்தி அம்சமாக இரண்டு லிங்க மூர்த்தங்கள். ஒன்று ஈஸ்வரன்; எண்பட்டை பாணத்துடன் திகழும் மற்றொன்று அம்பாளின் அம்சமாம். பௌர்ணமி தினங்களில் இங்கு வந்து ஆகாய கங்கையில் நீராடி, பால் சமர்ப்பித்து அம்பாளையும் ஸ்வாமியையும் வழிபட்டால், குழந்தை பாக்கியம் கிடைக்கும். அதேபோல், அமாவாசை தினங்களில் வந்து வழிபட்டால், சகல சௌபாக்கியங்களும் கிடைக்கும் என்கிறார்கள் பக்தர்கள்.

அமிர்த விருட்சம்... ஆகாய கங்கை!

ஆகாய கங்கை

கோயிலின் அருகிலேயே ஆகாய கங்கை உள்ளது. சிறு தொட்டி போன்ற தீர்த்தக்கட்டத்தில், விக்கிரகத் திருமேனியாக காட்சி தருகிறாள் கங்காதேவி. ஒருமுறை, அத்ரியின் சீடர்கள் தீர்த்த யாத்திரை புறப்பட்டனர். ஆனால், குருநாதருக்குப் பணிவிடை செய்வதற்காக, கோரக்கர் மட்டும் இங்கேயே தங்கிவிட்டார். இதனால் நெகிழ்ந்த அத்ரி முனிவர், ‘மற்றவர்கள் கங்கையைத் தேடி வடக்கே செல்லட்டும். உன்னைத் தேடி கங்கையே இங்கு வருவாள்’ என்று கூறி, தமது தவ வலிமையால் உண்டாக்கிய தீர்த்தமாம் இது. தீர்த்தத் தொட்டிக்குள் பாதமும் நனையாத அளவுக்கே இருக்கும் நீர், முகத் துவாரத்தில் திபுதிபுவென கொட்டுகிறது. ஆகாய கங்கையின் நீர் எங்கிருந்து வருகிறது என்று ஆராய்ந்தால்... அது, விடை சொல்ல முடியாத இயற்கையின் விநோதம்தான்.

இதில் நீராடினால், எந்தப் பிணியும் நம்மை அண்டாது என்பது நம்பிக்கை. இந்த தீர்த்தத் தொட்டிக்குள் எப்போதாவது (பல வருடங்களுக்கு ஒருமுறை) அபூர்வமாக வெள்ளை ஆமை வந்து சேருமாம். தேவேந்திரனே வெள்ளை ஆமையாக வந்து இங்கு வழிபடுவதாக ஐதிகம்.

அத்ரி மகரிஷி
அத்ரி மகரிஷி

அமிர்த விருட்சம்

த்ரி தபோவனத்தில் பாலை விருட்சத்தைப் பக்தர்கள் பயபக்தியுடன் வணங்குகிறார்கள். இதன் விசேஷம் என்ன தெரியுமா? பங்குனி மாதத்தின் கடைசி ஐந்து நாள்கள், சித்திரையின் முதல் ஐந்து நாள்கள்... இந்தப் பத்து தினங்களில் ஏதேனும் இரண்டு நாள்கள், இதன் அருகில் வந்து நின்றால் பன்னீர் தெளிப்பது போன்று நீர்த் தாரைகள் நம் மீது பொழியுமாம்.

காரணம்... குறிப்பிட்ட அந்த தினங்களில் இந்த மரத்தில் அடையும் வண்டுகள். மரத்தின் நிறத்திலேயே இருப்பதால், கீழிருந்து பார்க்கும்போது வண்டுகள் கண்ணுக்குத் தெரியாது. அவற்றின் உடம்பிலுள்ள சுரப்பிகளின் நீர்தான், தூவானம் போன்று தூறிக்கொண்டே இருக்குமாம். இந்த மரத்தை நெருங்கினாலே, நம்மிடம் இருந்து பிணிகள் விலகும் என்பது நம்பிக்கை. அதனால் இதை அமிர்த விருட்சம் என்கிறார்கள்.

ன்னொரு விருட்சமும் உண்டு. ஆதிசேஷ அம்சமாகக் கருதப்படும் அந்த விருட்சத்தின் கிளையில், தலைகீழாகத் தொங்கியபடி உலக நன்மைக்காக தவம் செய்தாராம் அத்ரி மகரிஷி. இதன் அடிப்பகுதியில் அத்ரி வழிபட்ட சிவலிங்கம் உள்ளது. கருவறை போன்று உட்குழிந்திருக்கும் மரத்தின் பகுதி ஆதிசேஷன் படமெடுத்திருப்பது போன்று அமைந்திருப்பது, விநோதம்தான். இந்த விருட்சத் தில் பெரிய நாகம் வசிப்பதாக நம்பிக்கை.

அமிர்த விருட்சம்... ஆகாய கங்கை!

பக்தர்கள் கவனத்துக்கு...

நெல்லை மாவட்டம் அம்பா சமுத்திரம் - தென்காசி வழியில் உள்ளது ஆழ்வார்குறிச்சி. இங்கிருந்து சுமார் 13 கி.மீ. தொலைவிலுள்ளது கடனாநதி நீர்த்தேக்கமும், அதையொட்டிய அத்ரிமலையும். தென்காசி, சேரன்மாதேவி ஆகிய இடங்களிலிருந்து பஸ் வசதி உள்ளது. ஆழ்வார்குறிச்சியில் இறங்கி, அங்கிருந்து ஆட்டோவில் கடனா நதி அணைப்பகுதிக்குச் சென்று, பின் அங்கிருந்து நடந்தால் ஒரு மணி நேரத்தில் அத்ரிமலைக்குச் சென்றுவிடலாம். அத்ரி முனிவருக்குச் சிறப்பு பூஜை அத்ரி மரத்தின் அடியில் நடக்கும். இந்த பூஜை ஞாயிறு, அமாவாசை, பௌர்ணமி, சித்திரை மாத பிறப்பு முதலான முக்கிய நாள்களில் நடக்கிறது.

வெளியூர் பக்தர்கள் தென்காசியில் முதல் நாள் வந்து தங்கியிருந்து, மறுநாள் அதிகாலையில் ஆழ்வார்குறிச்சிக்கு வந்து செல்வது நன்று. தனியாகச் செல்வதைத் தவிர்க்க வேண்டும். புதியவர்கள், தகுந்த வழிகாட்டிகளுடனும் அனுபவசாலிகளுடனும் பயணத்தை மேற்கொள்வது அவசியம்.