இந்தக் கோயிலில் ஏப்ரல் 25-ம் தேதி கொடியேற்றுத்துடன் தொடங்கிய சித்திரைத் தேர்த் திருவிழா மே 8-ம் தேதிவரை நடைபெறவுள்ளது. கடந்த ஏப்ரல் 29-ம் தேதி பஞ்ச மூர்த்திகள் புறப்பாடு 63 நாயன்மார்கள் காடசியளிக்கும் வைபவம் நடைபெற்றது. தொடர்ந்து, திங்கள்கிழமை (மே 1) இரவு 9:30-க்கு கற்பக விருட்சம், திருக்கல்யாணம், யானை வாகனக் காட்சி ஆகியவை நடைபெற்றன. அப்போது, யானை வாகனத்தில் சுவாமி எழுந்தருளினார்.

இந்தத் திருவிழாவின் முக்கிய நிகழ்வான தேரோட்டம் மே 2-ம் தேதியில் தொடங்கி மே 4-ம் தேதிவரை மூன்று நாள்கள் நடைபெறுகிறது. இதன்படி, அவிநாசியப்பர் தேரோட்டம் செவ்வாய்க்கிழமை காலை கோலாகலமாகத் தொடங்கியது. இதற்காக செவ்வாய்க்கிழமை அதிகாலை சிறப்பு பூஜைகள் நடைபெற்று, சிவாசார்யர்கள், ஆன்மிகப் பெருமக்கள், பக்தர்கள் என அனைத்துத் தரப்பினரும் 'அவிநாசியப்பா', 'அரோகரா', 'நமசிவாயா' போன்ற கோஷங்கள் எழுப்பினர். திருப்பூர் சிவனடியார்களின் கைலாய வாத்தியம் முழங்க திருத்தேர் வடம் பிடித்து இழுக்கப்பட்டது. திருத்தேரில் சோமஸ்கந்தர் சொர்ண அலங்காரத்தில் எழுந்தருளி பக்தர்களுக்கு அருள்பாலித்தார்.

தெற்கு ரத வீதியில் தொடங்கப்பட்ட தேரோட்டம், மேற்கு ரத வீதி வழியாக வந்து, வடக்கு ரத வீதி வளைவில் நிறுத்தப்பட்டவுள்ளது. மீண்டும் புதன்கிழமை காலை (மே 3) வடக்கு ரத வீதியில் இருந்து தேரோட்டம் நிலை சேருதல் நிகழ்ச்சியும், வியாழக்கிழமை (மே 4) அம்மன் தேரோட்டமும் நடைபெறவுள்ளது. திருப்பூர், கோவை, ஈரோடு மாவட்டங்களைச் சேர்ந்த பல்லாயிரக்கணக்கான பக்தர்கள் கலந்துகொண்டு தேரை வடம் பிடித்து இழுத்து சுவாமி தரிசனம் செய்தனர். தேரோட்டம் காரணமாக அவிநாசி பகுதியில் ஏராளமான போலீஸார் பாதுகாப்புப் பணியில் ஈடுபட்டனர்.