Published:Updated:

பெருமாள் கையில் செண்டலங்காரம்!

உ.வே.சா அவர்களுக்கு அப்போதுதான் `துச்சாதனன் எப்படி செண்டு கொண்டு திரௌபதியின் கூந்தலைப் பற்றியிழுத்திருப்பான்' என்கிற சந்தேகம் தீர்ந்தது.

பிரீமியம் ஸ்டோரி
மிழ்த் தாத்தா உ.வே.சா. வில்லி பாரதத்தைப் பிரியத்துடன் படிப்பார். வில்லி புத்தூரார், திரௌபதியை துச்சாதனன் இழுத்துவரும் காட்சியைச் சொல்லும்போது, `செண்டால் அவள் பைங்கூந்தல் பற்றி' என்று எழுதியிருக்கிறார்.

இதுகுறித்து உ.வே.சா பலவேறுவிதமாக சிந்திக்கத்தொடங்கினார். செண்டு என்றால் மலர்ச்செண்டைக் குறிக்கிறதா... மலர்ச் செண்டைக் கொண்டு எப்படிப் பற்றி இழுக்க முடியும்? தொடர்ந்து தமிழ் இலக்கியங்கள் பலவற்றிலும் செண்டு என்னும் சொற்பிரயோகம் வருவதை கவனித்தார். திருவிளையாடற் புராணத்தில் சோமசுந்தரக் கடவுள் உக்கிரகுமாரருக்கு, `வேல்வளை செண்டு' வழங்கியதாகக் கூறப்படுவதையும் கவனித்தார்.

ஐயனார் திருக்கரங்களில் செண்டு ஏந்தியவராக இருக்கிறார். கரிகாற்சோழன் இமயமலையை செண்டால் அடித்துத் திரித்தான் என்கின்றன இலக்கியங்கள். அப்படியென்றால் செண்டு என்பது ஆயுதமா... அல்லது மலர்ச் செண்டா என்றெல்லாம் யோசிக்கலானார்.

பெருமாள் செண்டலங்காரம்
பெருமாள் செண்டலங்காரம்

ஒருமுறை மாயூரத்தைக் கடந்து ஆறுபாதி என்னும் ஊருக்கருகில் ஒரு கோயிலுக்குச் செல்லும் வாய்ப்பு அவருக்குக் கிடைத்தது. அந்த சுவாமியின் திருநாமம், `ராஜகோபாலப் பெருமாள்'. கோயிலுக்குள் சென்று சுவாமி தரிசனம் செய்தார் உ.வே.சா. கற்பூர ஒளியில் பெருமாளின் கரத்தில் பிரம்புபோல ஏதோ ஒன்று இருப்பதைக் கண்டார்.

இதுவரை அப்படி ஒன்றை அவர் பார்த்ததில்லை. அந்தக் கோயில் தர்ம கர்த்தாவிடம் `அது என்ன?' என்று கேட்டார். அவரும், `அதுதான் செண்டு' என்றார் உ.வே.சா. ஆச்சர்யம் அடைந்தார். மீண்டும் ஒருமுறை அதை தரிசனம் செய்விக்க முடியுமா என்று கேட்டார். உடனே அர்ச்சகர் கற்பூர தீபத்தை அந்த செண்டின் அருகில் காட்டினார். பிரம்பின் தலைப்பு வளைந்து இருந்தது. `செண்டு' என்றால் என்ன என்பது விளங்கி விட்டது. அது, எதையும் பற்றி இழுக்க உதவும் ஆயுதம்.

உ.வே.சா அவர்களுக்கு அப்போதுதான் `துச்சாதனன் எப்படி செண்டு கொண்டு திரௌபதியின் கூந்தலைப் பற்றியிழுத்திருப்பான்' என்கிற சந்தேகம் தீர்ந்தது. அந்த தர்மகர்த்தாவுக்கும் அர்ச்சகருக்கும் மனமார்ந்த நன்றிகளைச் சொன்னார் உ.வே.சா.

அப்போது அந்த தர்மகர்த்தா, ``மன்னார்குடியில் எழுந்தருளியிருக்கும் பெருமாளும் இவரும் ஒன்றுபோல இருப்பார்கள். அவர் திருக்கையிலும் ஒரு செண்டு உண்டு. அதனால் அவருக்குச் செண்டலங்காரப் பெருமாள் என்றே திருநாமம் உண்டு்'' என்ற கூடுதல் தகவலையும் சொல்ல, உ.வே.சா மகிழ்வின் உச்சத்துக்கே சென்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு