Published:Updated:

நற்குணங்களை வரமாக அருளும் நாதன்!

ஶ்ரீகுணம் தந்த நாதர்
பிரீமியம் ஸ்டோரி
News
ஶ்ரீகுணம் தந்த நாதர்

எண்ணங்களையும் நடத்தைகளையும் வைத்தே ஒருவா் சிறந்த குணநலன்களைக் கொண்டவரா, இல்லையா என்பதை நாம் உணரமுடியும்.

றைவன் எட்டு வகையான நற்குணங்களால் ஆனவன். அதனால் `எண்குணத்தான்' என்று இறைவனைப் போற்றுவார்கள். உண்மையான பக்தி கொண்டு, தன் திருவடிகளில் பணியும் அன்பா்களுக்கு எட்டு வகையான குணநலன் களை அளித்து, அவா்களைப் பேரின்ப நிலைக்கு உயா்த்துவதும் அவன் செயலே!

எண்ணங்களையும் நடத்தைகளையும் வைத்தே ஒருவா் சிறந்த குணநலன்களைக் கொண்டவரா, இல்லையா என்பதை நாம் உணரமுடியும். நற்குணங்கள் ஒருவருக்கு வாய்க்கப்பெறுவது, இறைவனின் திருவருளா லும் அவா்களுடைய பூா்வ ஜன்ம புண்ணியங் களாலும் மட்டுமே.

ஶ்ரீகுணம் தந்த நாதர்
ஶ்ரீகுணம் தந்த நாதர்

அவ்வகையில், பூலோக மாந்தர்களின் வாழ்க்கை செழிக்கும் பொருட்டு, அவர்களுக்கு உன்னதமான குணநலன்களை வரமாக அருளும் ஈசன் குடிகொண்டிருக்கும் தலமே, செங்கல்பட்டு அருகிலுள்ள `ஒரக்காட்டுப்பேட்டை' என்று வழங்கப்படும் `உறைக்காட்டுப்பேட்டை. இங்கு கோயில்கொண்டிருக்கும் ஈசனின் திருநாமம் ஶ்ரீகுணம் தந்த நாதா்; அம்பாள் ஶ்ரீதிரிபுரசுந்தரி.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

ஊரும் திருப்பெயரும்...

உறைகாட்டுப்பேட்டை - `உறை' என்ற தமிழ்ச்சொல், சங்க இலக்கியங்களிலும் சங்கம் மருவிய தமிழ் இலக்கியங்களிலும் கையாளப் பட்டிருக்கிறது. `உறை' என்பதை, வாழ்நாளைக் குறிப்பிடும் சொல்லாகவும் வாழும் இடத்தைக் குறிப்பிடும் சொல்லாகவும் ஞானநூல்கள் கையாண்டுள்ளன.

ஶ்ரீ
திரிபுரசுந்தரி
ஶ்ரீ திரிபுரசுந்தரி

இத்தலத்தின் பெயரில் இடம்பெற்ற உறை எனும் சொல், இறைவன் உறைகின்ற இடத்தைக் குறிப்பிடுவதோடு, `பூவுலக மாந்தா்களுக்கு ஆயுளை நீட்டித்து அருளும் ஆற்றலைக் கொண்டவர் இத்தல ஈசன்' என்பதை உணா்த்து வதாக அமைந்துள்ளது என ஆன்மிக ஆன்றோர்கள் கூறுகின்றனர்.

நற்குணங்களை வரமாக அருளும் நாதன்!

`காடு’ எனும் சொல் காட்டைக் குறிப்பதோடு, தலத்தின் செழிப்பைக் குறிக்கும் சொல்லாகவும் அமைந்துள்ளது. சோழ மன்னன் கரிகால் வளவன் தொண்டை மண்டலக் காடுகளை அழித்து நாடாக்கிய செய்தி பட்டினப்பாலையில் உள்ளது. இதனால் தொண்டை மண்டலத்தில் அமைந்த இத்தலத்துக்கு `உறைகாடு' என்ற திருநாமம் ஏற்பட்டது என்பர். `உறை காடு' என்றால், உறைவதற்கு அல்லது வாழ்வதற்கு வளமான பூமி என்பது பொருளாகும்.

அறுநூறு ஆண்டுகளுக்கு முன்பு, விஜயநகரப் பேரரசர்களுக்குக் கட்டுப்பட்டு, தஞ்சையை அரசாண்டனர் நாயக்க மன்னா்கள். அவா்களில், தொண்டை நாட்டுப் பகுதியை கிருஷ்ணதேவராய மன்னரின் பிரதிநிதியாக இருந்து ஆண்டவா், திம்ம நாயக்கன்.

நற்குணங்களை வரமாக அருளும் நாதன்!

இவரைச் சிறப்பிக்கும் விதமாகவே இவரது பெயரில் திம்மராஜன் குளம், திம்மாவரம், திம்மையன்பேட்டை, திம்மராஜன் பேட்டை போன்ற ஊா்கள் உருவாயினவாம். காஞ்சி முதல் செங்கல்பட்டு வரையிலான நெடுஞ்சாலையில், பேட்டை எனும் பெயருடன் திகழும் ஊர்களில் பெரும்பாலானவை, விஜயநகர ஆட்சியின் போது ஏற்பட்டவை.

`தமிழகத்தின் ஊரும் பேரும்' என்ற நூலை எழுதிய பேராசிாியா் ரா.பிசேதுப்பிள்ளை, பேட்டை என்று முடியும் ஊா்களுக்கு உள்ள ஒரு பொதுத்தன்மையைக் குறிப்பிட்டுள்ளாா்.

ஶ்ரீ
ஈசான்ய லிங்கம், ஶ்ரீ
நிருதி லிங்கம், ஶ்ரீ
இந்திர லிங்கம்
ஶ்ரீ ஈசான்ய லிங்கம், ஶ்ரீ நிருதி லிங்கம், ஶ்ரீ இந்திர லிங்கம்

கைத்தறி நெசவுத் தொழில் புரியும் மக்கள் பெரும்பான்மையாக வாழ்ந்த ஊா்கள் `பேட்டை' என்று பெயா் பெற்றிருந்தன என்று குறிப்பிட்டுள்ளார். இத்தலத்திலும் நெசவுத் தொழிலைப் பூர்வீகத் தொழிலாகக் கொண்ட மக்கள் தற்போதும் வசிக்கின்றனர். இனி, இத்தலத்து இறைவனின் மகிமையைக் காண்போம்!

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

`சர்வமும் நீயே ஈசனே’

மதுரையம்பதியில் எழுந்தருளியுள்ள ஆலவாய் அண்ணலை, `குற்ற(ம்) நீ, குணங்கள் நீ கூடலால வாயிலாய்' என்று பாடும் திருஞானசம்பந்தர், குணம் - குற்றம் அனைத்துக்கும் காரணமான அந்த ஈசனை, `சர்வமும் நீயே’ என்று பாடிச் சிறப்பிக்கிறார். ஆம், முன்வினைக்கேற்ப நம் வாழ்வும் இயல்பும் அமையப்பெறுவது ஈசனின் திருவருளால்தான்.

ஶ்ரீ
குபேர லிங்கம், ஶ்ரீ
அக்னி லிங்கம், ஶ்ரீ
எம லிங்கம்
ஶ்ரீ குபேர லிங்கம், ஶ்ரீ அக்னி லிங்கம், ஶ்ரீ எம லிங்கம்

அவ்வகையில், முன்வினை காரணமாக குணநலன்களை முறைப்படுத்த முடியாமல் தவறான பாதையில் பயணித்து அல்லல்படும் மாந்தா்கள், வணங்க வேண்டிய அற்புதத் தெய்வம்தான், ஒரக்காட்டுப் பேட்டையில் அருளும் குணம்தந்த நாதர். இவரை வழிபட்டால், மனமது செம்மையாகும்; சிந்தை தெளிவுறும்; நல் வழியைத் தேர்ந்தெடுப்பதில் தடுமாற்றம் இருக்காது.

மது, புகை முதலான தவறான பழக்கங்களுக்கு ஆட்பட்டு, அதன் காரணமாக பாதிப்புக்கு ஆளானோர், தொடர்ந்து 11 பிரதோஷ தினங்கள் இந்தத் தலத்துக்குச் சென்று, நெய் தீபம் ஏற்றி வேண்டிக்கொண்டு, ஈசனின் சந்நிதியில் சத்தியப் பிரமாணம் செய்து கொண்டால், விரைவில் கொடுமையான தீய பழக்கங்களிலிருந்து விடுபடுவாா்கள்; தீய பழக்கங்களிலிருந்து விடுபடக்கூடிய மன உறுதியை அவா்களுக்கு அளிப்பாா் குணம் தந்த நாதா் என்பது நம்பிக்கை.

ஶ்ரீ
வருண லிங்கம், ஶ்ரீ
வாயு லிங்கம்
ஶ்ரீ வருண லிங்கம், ஶ்ரீ வாயு லிங்கம்

கருவுற்றிருக்கும் பெண்கள், தன் கணவருடன் சென்று ஒரக்காட்டுப்பேட்டைத் தலத்தில் அருளும் குணம்தந்த நாதரை தரிசித்து வழிபட்டால், நல்ல குணநலன்கள் கொண்ட மகவினை ஈன்றெடுப்பா் என்பது ஆன்றோா் வாக்காகும்.

அஷ்ட லிங்கங்கள்

திருவண்ணாமலை தலத்தில் மலையைச் சுற்றி அஷ்டலிங்கங்கள் அருள்பாலிப்பது போல், இத்தலத்திலும் எட்டு திசைகளிலும் திசைக்கு ஒன்றாக அஷ்ட லிங்கங்கள் அருள் பாலிப்பது சிறப்பான ஒன்றாகும்.

நற்குணங்களை வரமாக அருளும் நாதன்!

உடல்நிலை, வயோதிகம் மற்றும் இதரச் சூழல்களின் காரணமாக திருவண்ணாமலைக்குச் சென்று கிரிவலம் செல்ல இயலாத நிலையில் இருப்பவர்கள், 21 பெளர்ணமி தினங்கள் இந்தத் தலத்துக்குச் சென்று வலம் வந்து, குணம் தந்த நாதரையும் அம்பிகை திரிபுரசுந்தரி யையும் வழிபட்டால், கிரிவலம் செய்த புண்ணியம் கிட்டும்.

பிறவியிலேயே பேச முடியாத நிலையிலிருந்த அன்பர் ஒருவர், 21 பெளர்ணமி தினங்கள் தொடர்ந்து வந்து குணம் தந்த நாதரை வழிபடுவது என்று தீர்மானித்து வழிபாட்டைத் தொடங்கினார். 7 பெளர்ணமி தினங்கள் வழிபாடு செய்த நிலையிலேயே அவருக்குப் பேச்சுத் திறன் வந்தது என்று சமீபகாலத்து அற்புதச் சம்பவத்தைச் சிலிர்ப்போடு சொல்கிறார்கள், இப்பகுதி பக்தர்கள்.

நவவீரர்கள் வழிபாடு!

கந்தப் பெருமானின் படைத் தளபதிகளாகப் பணியாற்ற, அம்பிகை பாா்வதிதேவியின் பாதச் சிலம்பி லிருந்து உதித்தவா்கள் வீரபாகு முதலான நவவீரர்கள்.

திருச்செந்தூர் முதலான புகழ்பெற்ற முருகன் திருத் தலங்களில் இந்த நவவீரர்களுக்கான வழிபாடுகள் நடைபெறுவது உண்டு. இந்தத் தலத்திலும் நவவீரர் களுக்கான வழிபாடு நடைபெறுகிறது. மட்டுமன்றி, கந்த சஷ்டி - சூரசம்ஹார விழா வைபவமும் இங்கே சிறப்புற நடைபெறுகின்றன. இத்தலத்தின் அக்னி தீா்த்தம் சா்வ ரோக நிவாரணி யாகப் போற்றப்படுகிறது. ஆனால், தற்போது இது நீரின்றி வறண்டு காணப்படுகிறது. திருக் குளத்தின் கட்டுமான அமைப்பு அற்புதம். சரக் கொன்றை இவ்வூரின் தலவிருட்சமாகும்.

நற்குணங்களை வரமாக அருளும் நாதன்!

கல்வெட்டு காட்டும் சமய நல்லிணக்கம்!

1923-ம் ஆண்டு பிரிட்டிஷ் அரசாங்கத்தின் தொல் பொருள் ஆய்வுத்துறை, உறைக்காட்டுப் பேட்டை திருத்தலத்தில் ஒரு கல்வெட்டினைக் கண்டுபிடித்து ஆவணப்படுத்தியுள்ளது.

கீலக ஆண்டு ஆவணி மாதம் என்று குறிப்பிடப் பட்டுள்ள இக்கல்வெட்டு தெலுங்கு மொழியில் உள்ளது. `உசேன் கான்' என்ற இஸ்லாமிய அன்பா் ஒருவர், தன் நிலத்தைக் குணம் தந்த நாதா் திருக்கோயிலுக்குக் கொடையாக அளித்து திருப்பணி செய்த விவரத்தை, இந்தக் கல்வெட்டுச் செய்தியின் மூலம் அறியமுடிகிறது.

திம்மநாயக்கன் காலத்துக் கல்வெட்டு இது என்கிறார்கள் ஆராய்ச்சியாளர்கள். சிவன் கோயிலுக்கு அளிக்கப்பட்ட கொடை குறித்த இக்கல்வெட்டின் தலைப்பில், வைணவச் சின்னமான நாமம் (திருமண்) பொறிக்கப்பட்டுள்ளது சிறப்பு!

தற்போதுள்ள தலைமுறையினருக்கு உசேன் கான் என்ற அன்பரைப் பற்றித் தொிந்திருக்கவில்லை. ஆனால், துலுக்க மானியம் என்று அழைக்கப்படும் கோயில் நிலம் இன்றும் உறைகாட்டுப் பேட்டையில் இருப்பதை ஊா் மக்கள் தொிவிக்கின்றனா்.

இங்கு வாழ்ந்த அமீா் சாயுபு என்ற முதியவா், தான் உயிரோடிருந்த வரையிலும்... பொங்கல் திருநாளன்று இவ்வூா் பிள்ளையாா் கோயில் முன்பு கூடும் கிராமசபை முன்பாக, மங்கலப் பொருள்கள் தாங்கிய தாம்பாளத் தட்டினை சமா்ப்பிப்பாராம்.

அதனை இவ்வூ இறைவனுக்கு உசேன் கான் பரம் பரையினா் அளிக்கும் காணிக்கையாக ஊா்ச்சபையினா் ஏற்றுக் கொள்வார்களாம். ஆக, சமய நல்லிணக்கத்துக்கும் சான்றாகத் திகழ்கிறது இந்தத் தலம்.

நீங்களும் ஒருமுறை செங்கல்பட்டு அருகிலுள்ள உறைக்காட்டுப் பேட்டைக்குக் குடும்பத்துடன் சென்று, குணம் தந்த நாதரை வழிபட்டு வாருங்கள். அந்த ஈசனின் திருவருளால், நம் வருங்கால சந்ததியினருக்கு நற்குணங்களும், வாழ்வை வெல்ல நல்வழியும், நல்ல சுற்றமும் உறவும் கிடைக்கும்; அவர்களினி எதிர்காலம் சிறக்கும்!

பக்தர்கள் கவனத்துக்கு...

தலம்: உறைக்காட்டுப் பேட்டை

ஸ்வாமி: ஶ்ரீகுணம் தந்த நாதா்

அம்பாள்: ஶ்ரீதிரிபுரசுந்தரி

வழிபாட்டுச் சிறப்பு: தீய பழக்கவழக்கங்களுக்கு ஆளாகி அவற்றால் பாதிக்கப்பட்ட அன்பர்கள், 11 பிரதோஷ நாள்கள் இந்தக் கோயிலுக்குச் சென்று வழிபட்டால், பாதிப்பிலிருந்து விரைவில் மீள்வார்கள். 21 பெளர்ணமி தினங்களுக்கு இத்தலத்துக்குச் சென்று வலம் வந்து வழிபட்டால் திருவண்ணாமலையில் கிரிவலம் செய்த புண்ணியம் கிடைக்கும்.

எங்கு உள்ளது?: செங்கல்பட்டிலிருந்து சுமாா் 8 கி.மீ.தூரத்தில் உள்ளது ஒரக்காட்டுப் பேட்டை. செங்கல் பட்டிலிருந்து T5, 22, 22A ஆகிய வழித்தட எண் கொண்ட பேருந்துகள் ஒரக்காட்டுப் பேட்டைக்குச் செல்கின்றன. செங்கல்பட்டிலிருந்து ஷேர் ஆட்டோ வசதியும் உள்ளது. கோயில் காலை 8 முதல் 12 மணி வரை; மாலையில் 4 முதல் இரவு 7.30 மணி வரை திறந்திருக்கும் (தொடர்புக்கு: எஸ்.சிவசெந்தில் 89407 33278 ; 77080 17278).