Published:Updated:

காற்றில் பறக்கவிடப்பட்ட நீதிமன்ற உத்தரவு... தஞ்சை பெரிய கோயில் குடமுழுக்கில் நடந்தது என்ன?

தஞ்சை பெரியகோயில் குடமுழுக்கு
தஞ்சை பெரியகோயில் குடமுழுக்கு

நீதிபதிகளின் இந்த உத்தரவை வரவேற்று தமிழ் அமைப்புகளும் மேற்கொண்டு எந்த நடவடிக்கைகளிலும் இறங்காமல் அமைதி காத்தனர். தொடர்ந்து குடமுழுக்கு விழாவில் நீதிபதிகளின் உத்தரவுகள் சரியாகக் கடைபிடிக்கப்படுகின்றனவா என்பதையும் கண்காணித்து வந்தனர். 

23 ஆண்டுகளுக்குப் பிறகு லட்சக்கணக்கான மக்கள் வெள்ளத்தில் நடந்து முடிந்திருக்கிறது தஞ்சை பெரிய கோயில் குடமுழுக்கு. விழா தேதி அறிவிக்கபட்ட உடனே, தமிழில் மட்டுமே வழிபாடு நடத்தப்படவேண்டும் எனத் தமிழ் அமைப்புகள் நீதிமன்றத்தை நாடின. "தமிழ், சம்ஸ்கிருதம் ஆகிய இருமொழிகளுக்கும் சம அந்தஸ்து வழங்கப்படும்'' என இந்து சமய அறநிலையைத் துறை நீதிமன்றத்தில் மனு அளிக்க, தமிழில் மட்டுமே நடத்தப்படவேண்டும் எனத் தாக்கல் செய்யப்பட்ட மனுக்களை நீதிபதிகள் தள்ளுபடி செய்தனர். அதோடு, அறநிலையத்துறை கொடுத்த வாக்குறுதிப்படி தமிழுக்கும் சம்ஸ்கிருதத்துக்கும் சம அந்தஸ்து வழங்கப்பட்டு குடமுழுக்கு நடத்தப்பட்டதா என்பது குறித்த ஒரு முழுமையான அறிக்கையை, விழா முடிந்த ஒரு வாரத்துக்குள் நீதிமன்றத்தில் தாக்கல் செய்யவேண்டும் எனவும் நீதிபதிகள் உத்தரவிட்டனர்.

அதிகாரிகளிடம் மனு
அதிகாரிகளிடம் மனு

நீதிபதிகளின் இந்த உத்தரவை வரவேற்று தமிழ் அமைப்புகளும் மேற்கொண்டு எந்த நடவடிக்கைகளிலும் இறங்காமல் அமைதி காத்தனர். தொடர்ந்து குடமுழுக்கு விழாவில் நீதிபதிகளின் உத்தரவுகள் சரியாகக் கடைப்பிடிக்கப்படுகின்றனவா என்பதையும் கண்காணித்து வந்தனர்.

நேற்று குடமுழுக்கு முடிந்த நிலையில், "நீதிமன்ற உத்தரவுகள் சரியாகப் பின்பற்றப்படவில்லை. வெறும் பெயரளவுக்கு மட்டுமே தமிழ் பயன்படுத்தப்பட்டது. கண்டிப்பாக இந்து சமய அறநிலையைத்துறையின் மீதும் அரண்மனை தேவஸ்தானத்தின் மீதும் நீதிமன்ற அவமதிப்பு வழக்கு தொடருவோம்'' என அறிவித்துள்ளது நாம் தமிழர் கட்சியின் துணை அமைப்பான வீரத்தமிழர் முன்னணி.

இதுகுறித்து அந்த அமைப்பின் ஒருங்கிணைப்பாளர் முனைவர் செந்தில்நாதன் பேசுகையில்,

"எந்த இடத்திலும் சம்ஸ்கிருதம் முன்னிறுத்தப்படாது, தமிழுக்கும் சம்ஸ்கிருதத்துக்கும் சம அந்தஸ்து வழங்கப்படும் என்றுதான் இந்து சமய அறநிலையைத்துறை நீதிமன்றத்தில் ஒப்புதல் அளித்திருந்தது. ஆனால், கொடிக்கம்பம் நிறுவ ஆரம்பித்தபோதே தமிழ் புறக்கணிப்புக்கு ஆளாக ஆரம்பித்துவிட்டது. நாங்கள் ஆன்மிகப் பெரியவர்களை வைத்துக் கண்காணித்தோம். அடுத்தநாள் யாகசாலையிலும் தமிழுக்கு உரிய ஆந்தஸ்து வழங்கப்படவில்லை. ஐந்து நாள்கள் இது தொடரவே உடனடியாக தஞ்சை பெரிய கோயில் உரிமை மீட்புக் குழுவின் ஒருங்கிணைப்பாளர் மணியரசன் ஐயாவும் நானும் அறநிலையைத்துறை அதிகாரிகளிடத்தில் மனு கொடுத்தோம். குடமுழுக்கு நடக்கும் நாள் அன்றாவது தமிழில் முறையாக வழிபாடு நடத்தப்படவேண்டும் என்று அழுத்தம் கொடுத்தோம்.

செந்தில்நாதன்
செந்தில்நாதன்

ஆனால், குடமுழுக்கு நடந்த நாளன்றும் தமிழுக்கு உரிய அந்தஸ்து வழங்கப்படவில்லை. அதுமட்டுமல்ல, சிவாச்சாரியர்கள் சிலருக்கு அச்சுறுத்தலும் வந்துள்ளது. அதனால், நீதிமன்ற உத்தரவை நடைமுறைப்படுத்தத் தவறிய இந்து சமய அறநிலையத்துறையின் மீதும் அரண்மனை தேவஸ்தானத்தின் மீதும் நீதிமன்ற அவமதிப்பு வழக்கு தொடர இருக்கிறோம். '' என்றார் அவர்.

தமிழ்நாடெங்கும் உள்ள சைவ, வைணவ, கிராமப்புறக் கோயில்களில் தமிழ் மட்டுமே பூசை மொழியாக வேண்டும் என்பதே தமிழர்களின் நீண்டகால ஏக்கமும் நோக்கமும் ஆகும். அந்தப் பயணத்தில், தஞ்சைப் பெருவுடையார் கோயில் குடமுழுக்கில் கோபுரக் கலசத்திலும் மற்ற சந்நிதியிலும் தமிழ் மந்திரங்கள் ஒலித்தது நமக்கு முதல் கட்ட முன்னேற்றம்!
பெ.மணியரசன்

தஞ்சை பெரிய கோயில் உரிமை மீட்புக்குழுவின் சார்பாக, தமிழில் முறையாக வழிபாடு நடத்தப்பட்டதா என்பதைக் கண்காணித்தவர் ஆன்மிகச் செயற்பாட்டாளர் இறைநெறி இமயவன். அவரிடம் பேசினோம்,

"யாகசாலையில் கலசங்கள் வைத்து எடுக்கப்படும் வேள்விகளில்  கிரியைகள் தமிழில் செய்யப்படவில்லை. ஓதுவார்களை வைத்து பாராயணம் மட்டுமே நடந்ததே தவிர கிரியா முறைகள் தமிழில் நடைபெறவில்லை. கிரியை என்பது  தெய்வத்தை அழைப்பது, எழுந்தருளச் செய்வது, தூபதீபம் ஆராதனை காட்டுவது போன்ற மிக முக்கியமான வழிபாட்டு முறை. ஆனால், பாராயணம் என்பது வெறும் பாடல்பாடுவது. அதாவது வேண்டுகோள் முன்வைப்பது மட்டுமே. வேள்வி குண்டத்திலும் தமிழில் கிரியா முறைகள் நடைபெறவில்லை. 80 ஓதுவார்கள் எனச் சொன்னார்கள். ஆனால் 20 பேர் மட்டுமே இருந்தார்கள்.

குடமுழுக்கு
குடமுழுக்கு

கருவறையிலும் கலச நீர் எடுத்துச் செல்லும்போதும் தமிழில் கிரியா முறை செய்யப்படவில்லை. பாராயணம் மட்டுமே செய்யப்பட்டது. விமானத்திலும் தமிழில் பாராயணம் மட்டுமே நடத்தப்பட்டது. அதேபோல. அழைப்பிதழிலும் தமிழ் இல்லை. கிரியா முறை தெரிந்த தமிழ் அந்தணர்களை அழைக்கவில்லை. ஒரு குழு வந்தார்கள் அவர்களையும் கைது செய்து அடைத்துவிட்டார்கள். தர்மபுரம் ஆதினம் கலசத்துக்கு மேல் நீர் ஊற்றியதும் கலசத்தில் தமிழில் வழிபாடு நடத்தப்பட்டதும் மட்டுமே இத்தனை ஆண்டுகள் இல்லாத ஒரு நிகழ்வு. அதேசமயம், நீதிமன்ற உத்தரவில் வெறும் பத்து சதவிகிதம் மட்டுமே கடைப்பிடிக்கப்பட்டது என்பதே உணமை'' என்றார் அவர்.

தஞ்சைப் பெருவுடையார் கோயில் குடமுழுக்கைத் தமிழ், சம்ஸ்கிருதம் ஆகிய இரு மொழிகளிலும் சம அளவில் நடத்த வேண்டும் என்று மதுரை உயர் நீதிமன்றம் 31.01.2020 அன்று அளித்தத் தீர்ப்பை இந்து சமய அறநிலையத்துறையும் தஞ்சாவூர் அரண்மனைத் தேவஸ்தானமும் முழுமையாகச் செயல்படுத்தாமல் அரைகுறையாகத்தான் நிறைவேற்றினார்கள்.
பெ.மணியரசன்.

மேற்கண்ட குற்றச்சாட்டுகள் குறித்து விளக்கம் கேட்க, தஞ்சை மாவட்ட ஆட்சியர் கோவிந்தராவிடம் பேசினோம்,

"யாகசாலை ஆரம்பத்திலிருந்து கடைசி வரை தமிழிலும் வழிபாடு நடத்தப்பட்டது. இருமொழிக்கும் சம அந்தஸ்து வழங்கப்பட்டது. இந்து சமய அறைநிலையைத்துறை நீதிமன்றத்தில் அளித்த வாக்குறுதி பெரும்பாலும் பின்பற்றப்பட்டது'' என்கிறார் அவர்.

மாவட்ட ஆட்சியர் கோவிந்தராவ்
மாவட்ட ஆட்சியர் கோவிந்தராவ்
`தமிழில் குடமுழுக்கு' அன்றே கிடைத்த மக்கள் தீர்ப்பு! - Pazha Nedumaran Interview

இரண்டு மொழிகளிலும் வழிபாடுகள் நடத்தப்பட்டன என்பது உண்மை. ஆனால், ஆன்மிக ரீதியான முன்னுரிமையில் தமிழ் பின்னுக்குத் தள்ளப்பட்டிருக்கிறது என்பதையும் நாம் அறிய முடிகிறது. ஆகமொத்தம் இருமொழிக்கும் சம அந்தஸ்து வழங்கப்படவேண்டும் என்கிற நீதிமன்ற உத்தரவு காற்றில் பறக்கவிடப்பட்டிருக்கிறதா இல்லை சரியாகக் கடைப்பிடிக்கப்பட்டிருக்கிறதா என்பது, இது தொடர்பான வழக்கு நீதிமன்றத்துக்கு வந்தால் மட்டுமே தெரியவரும்... பொறுத்திருந்து பார்ப்போம்!

பின் செல்ல