Published:Updated:

திருமலைக்கு இணையான தலைமலை

தலைமலை
பிரீமியம் ஸ்டோரி
News
தலைமலை

சஞ்சீவிராய பெருமாள் ஆலயம்

யற்கை அழகும் இறைவனின் அருளும் நிறைந்த திருத்தலம் தலைமலை.

மலைகள், நம் மரபில் வெறும் மலைகள் மட்டுமல்ல; இறை சாந்நித்தியம் நிறைந்த இயற்கைப் பொக்கிஷங்கள்! இறைவன் கோயில் கொள்ளும் இடம் என்பதாலும் இறைவனே மலையாகக் காட்சி கொடுக்கிறான் எனும் நம்பிக்கையாலும் மலைகளைத் தொழுவது நம் முன்னோர்களின் வழக்கம். அப்படிப்பட்ட அற்புதமே தலைமலை. கேட்டவருக்குக் கேட்ட வரம் தரும் திருவேங்கடவன் எழுந்தருளியிருக் கும் திருமலைக்கு இணையான ஓர் அற்புதத் திருத்தலம், இந்தத் தலைமலை என்கிறார்கள்!

தலைமலை
தலைமலை

பொதுவாகவே, மலையேறி இறைவனை தரிசிக்கும் அனுபவம் மகத்தானது. இப்போது, பெரும்பாலான மலைக்கோயில்களுக்கு வாகனப் பாதைகள் அமைக்கப்பட்டுவிட்டன. சில நிமிடங்களில் பயணித்துக் கோயிலை அடைந்து விடுகிறோம். இதன்மூலம் சுவாமி தரிசனம் எளிதில் கிடைத்துவிடுகிறது என்றபோதும், தேகப் பிரயத்தனத்துடன் நடைப்பயணமாக மலையேறிச் செல்லும்போது கிடைக்கும் மகத்தான அனுபவம் வாய்ப்பதில்லை. இயற்கை எழில்சூழ்ந்த மலைகளில் ஏறி, தூய காற்றை சுவாசித்தபடி உடலும் உள்ளமும் புத்துணர்ச்சி கொள்ளும் பயணத்தை மேற்கொண்டு இறைவனை வழிபடும் அனுபவம் தனித்துவமானது. அப்படி ஓர் ஈடு இணையற்ற பரவச அனுபவமாக அமைவது தலைமலை யாத்திரை.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

தொலைவிலிருந்து பார்க்கும்போது, சயன கோலத்தில் அருள்பாலிக்கும் பெருமாள்போலவே காட்சியளிக்கிறது, தலைமலை. ஆக, மலையையே மாலவனாக பாவித்து, மலைக்குக் கற்பூரம்காட்டி மானசீகமாக அனுமதி பெற்று, நல்லவிதமாகப் பயணித்துத் திரும்ப வேண்டிக்கொண்டு மலையேற்றத்தைத் தொடங்குகிறார்கள் பக்தர்கள்.

இயற்கை எழில் சூழந்த தலைமலை தலத்தை தரிசிக்க...

மலையேறத் தொடங்கியதும் சுகமான காற்று நம்மைத் தழுவுகிறது. வழி எங்கும் வித்தியாசமான பூச்சிகள் இங்குமங்கும் ஓடிக் கொண்டிருக்கின்றன. ஆனால், யாரையும் அவை தொந்தரவு செய்வதில்லை. மலைமேல் இருக்கும் வேங்கடவனை எப்போதும் துதித்துக் கொண்டிருப்பன போல் திகழும் மயில்கள் எழுப்பும் அகவல் ஓசை நம் காதுகளுக்கு விருந்து!

பாதைகள் அற்ற வழியில் கல்லும் முள்ளும் கடந்து பயணிக்க, ஒரு கி.மீ தொலைவில் அமைந்திருக்கும் கருப்பசாமி கோயிலை அடையலாம்.

தலைமலை
தலைமலை

`ஒரு கி.மீ தூரம்தானே' என்று தோன்றினாலும் அந்தத் தூரத்தைக் கடக்க ஒரு மணி நேரத்துக்கும் மேலாகும். மழைக்காலங்களில் கூடுதல் நேரமாகும். காரணம், பாறைகளில் வழிந்துகொண்டிருக்கும் நீர். அதன்காரணமாக அந்தப் பாறைகள் வழுக்கும். கோவிந்த நாமம் சொல்லிக்கொண்டே மலையேறி, கருப்பசாமியை வழிபட்டுவிட்டு சிறு ஓய்வுக்குப் பின் மலையேறினால் `காத்தாடி மேடு' எனும் பகுதியை அடையலாம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பெயருக்கேற்றாற்போல் அந்தப் பகுதியில் வீசும் காற்று பக்தர்களின் களைப்பைப்போக்கும் விதத்தில் சுகம் தருகிறது. காற்றில் மூலிகைகளின் வாசம் வீசுவதால் உடல் ஆரோக்கியம் மேம்படும் என்கிறார்கள் பக்தர்கள். மூலிகைக் காற்று நம் மேனியைத் தீண்டும்போது புது உற்சாகம் பிறக்கிறது. அதுவரை பயணித்ததால் ஏற்பட்ட களைப்பை எல்லாம் காத்தாடி மேட்டில் நாம் மேற்கொள்ளும் சிறு ஓய்வில் போக்கிக்கொள்ள முடியும். அதன் பின்பு கூட்டுப்பாதை வழியாக ‘முழங்கால் முடிச்சு’ என்னும் இடத்துக்கு வந்து சேரலாம்.

தலைமலை
தலைமலை

திருமலையில் காணப்படும் `முழங்கால் முறிச்சான்' பகுதியைப் போலவே, இந்த `முழங்கால் முடிச்சும்' செங்குத்தான மலையேற்றமாய்த் திகழ்கிறது. கடினமான அந்த மலையேற்றத்தின் முடிவில் கன்னிமார் சுனையை அடையலாம்.

தலைமலை
தலைமலை

கன்னிமார் சுனை, திருப்பதி திருமலையின் சுவாமி புஷ்கரணிக்கு இணையான தீர்த்தமாகக் கருதப்படுகிறது. கோடையிலும் வற்றாமல் தீர்த்தம் நிறைந்து காணப்படுகிறது. அருகிலிருக்கும் மூலிகைகளின் சாறுகள் கலப்பதால், இந்தத் தீர்த்தமே அருமருந்தாக விளங்குகிறது.

இந்தத் தலம் குறித்த புராணச் சம்பவம் ஒன்று சொல்லப்படுகிறது. சனி பகவானின் அதிதேவதை யமன். யாராக இருந்தாலும் அவர்களைக் குறிப்பிட்ட காலம் பற்றிக்கொள்வது என்பது சனி பகவானின் கடமை. தனக்கு அதிதேவதையாயிருந்த போதும் குறிப்பிட்ட காலத்தில் யமனையும் பற்றிக் கொண்டார், சனி பகவான்.

தலைமலை
தலைமலை

உலக மக்களின் உயிர்களை எல்லாம் எடுக்கும் யமதருமரைச் சனி தோஷம் பீடித்ததால், அவர் தன் கடமைகளைச் செய்ய இயலாமல் தவித்தார். அப்போது, சனி தோஷம் நீக்கும் தலம் எது என்று அவர் தேவகுருவைக் கேட்டபோது, ‘தலைமலையில் இருக்கும் கன்னிமார் சுனையில் நீராடி, அங்கு சுயம்புவாய்த் தோன்றியிருக்கும் வேங்கடாசலபதியை வணங்கினால் அனைத்து தோஷங்களும் நீங்கும்’ என்று அறிவுறுத்தினார். யமனும் அதன்படியே செய்ய, அவரைப் பீடித்திருந்த சனி தோஷம் விலகியதாம். இத்தகைய மகிமை மிகுந்த சுனை நீரைத்தொட்டு வணங்கி, கொஞ்சம் நீரை எடுத்து தலையிலும் தெளித்துக் கொண்டு மலையேறினால், சிறிய திருவடியாம் ஆஞ்சநேய சுவாமியின் சந்நிதியை அடையலாம்.

வாயு புத்திரனின் சந்நிதியில் வழிபட்டுவிட்டு, மேலும் படிகள் ஏறினால் கிருஷ்ணனின் சந்நிதி. கிருஷ்ணன் இருக்குமிடத்தில் ஆழ்வார்கள் இல்லாமலா... ஆழ்வார்கள் பன்னிருவரும் இங்கு கோயில்கொண்டுள்ளனர். கிருஷ்ணனை வழிபட்டு இன்னும் மேலேறினால்... சஞ்ஜீவிராயப் பெருமாள், நல்லேந்திரப் பெருமாள், நல்லையன், வேங்கடாசலபதி, ஸ்ரீநிவாஸப் பெருமாள் என்றெல்லாம் போற்றப்படும் வேங்கடவனின் சந்நிதியை அடையலாம்.

தலைமலை
தலைமலை

இருள் சூழ்ந்திருக்கும் அந்தச் சந்நிதிக்குள் தீப ஒளியில் மிளிரும் பெருமாளின் திருமேனி தரிசனம் சிலிர்ப்பூட்டுகிறது. உள்ளே இரண்டு மூலவர்கள். ஒருவர் சுயம்புவாய் உதித்த மூர்த்தி. மற்றொருவர் பூதேவி ஸ்ரீதேவி சமேதராய்ப் பிற்காலத்தில் உருவாக்கப்பட்ட மூர்த்தி.

தலைமலை
தலைமலை

சுயம்புமூர்த்தியின் காலம் மிகவும் பழைமையானது. இந்த மூலவருக்கு அபிஷேகங்கள் இல்லை. மற்றவருக்கே அனைத்து அபிஷேகங்களும் நடைபெறுகின்றன.

மகாலட்சுமி தாயாருக்கு தனி சந்நிதி அமைந் துள்ளது. அன்னையின் தரிசனம் அனைத்து மனக்கவலைகளையும் போக்கும் அருமருந்தாகத் திகழ்கிறது.

தலைமலை
தலைமலை

``இந்தத் தலத்தில் ஒருமுறை மலையேறி வந்து வேண்டிக்கொண்டாலே துன்பங்கள் எல்லாம் நம்மைவிட்டு நீங்கிவிடும். குழந்தை வரம் வேண்டுபவர்கள், கடன் பிரச்னைகளில் சிக்கித் தவிப்பவர்கள், பகைவர்களின் தொல்லைகளால் பாதிக்கப்பட்டவர்கள் இங்கு வந்து வேண்டிக் கொண்டால், விரைவில் தங்களின் துயர் நீங்கப் பெறுவர். நன்மைகள் நிறைந்த வாழ்வைப் பெறுவ தோடு வாழ்க்கைக்குப்பின் பிறவிப் பிணியும் தீரும்” என்கின்றனர் பக்தர்கள்.

இந்த மலையின் அற்புதம் உணர்ந்த மக்கள், இங்கு பௌர்ணமி தினங்களில் மலையடி வாரப் பகுதியில் உள்ள பாதையில் கிரிவலம் வருகிறார்கள். தற்போது இந்தப் பாதை செம்மைப் படுத்தப்பட்டு வருகிறது.

தலைமலை
தலைமலை

மலைக்குமேல் தரிசனத்துக்காகச் செல்லும் பக்தர்கள், பிளாஸ்டிக் பொருள்களைக் கொண்டு செல்வதையும், மலைக்கு மேல் ஆபத்தான பகுதிகளுக்குச் செல்வதையும் அறவே தவிர்க்க வேண்டும். பாதுகாப்பு கருதி, மலைமீதுள்ள கோயிலை வலம் வருவது தடைசெய்யப்பட்டுள்ளது.புதிதாக தலைமலைக்குச் செல்பவர்கள் தகுந்த வழிகாட்டுதலைப் பெறுவது அவசியம்.

எப்படிச் செல்வது ?!

முசிறியிலிருந்து பவுத்திரம் செல்லும் பேருந்தில் ஏறி நீலியாம்பட்டியில் இறங்கிக்கொள்ள வேண்டும். அங்கிருந்து 5 தொலைவில் உள்ளது தலைமலை. காலை, மாலை இரண்டு வேளை மட்டுமே நீலியாம்பட்டியிலிருந்து பேருந்து வசதி உண்டு. மற்ற நேரங்களில் சொந்த வாகனத்தில்தான் செல்லமுடியும்.