Published:Updated:

திருவருள் திருவுலா: விதியை மாற்றும் கார்த்திகை கணபதி தரிசனம்!

கணபதி
பிரீமியம் ஸ்டோரி
News
கணபதி

இந்தப் பிரபஞ்சம் பிரணவ மந்திரத்தால் இயங்குகிறது என்கின்றன வேதங்கள்.

பிரணவமே ஒலி வடிவமாக ‘ஓம்’ என்றும் உருவ வடிவமாக விநாயகராகவும் திகழ்கிறது எனப் போற்றுவர் அடியவர்கள். அதனால்தான், விநாயகரை முழுமுதற்கடவுளாகப் போற்றி வழிபடுகிறோம். அவரிடமிருந்தே சகலமும் தொடங்கின என்பதுவே காணாபத்தியம் என்னும் மார்க்கத்தின் சாரம். கடவுள்களில் அவர் எளிமையின் ரூபம். குழந்தைகள் முதல் பெரியவர்கள் வரை அனைவரும் நெருங்கி வழிபட விரும்பும் மகிழ்வின் திருவுருவம். எளிமையின் ரூபம்கொண்ட கணநாதர் இந்த நானிலம் எங்கும் கோயில்கொண்டு அருள்கிறார். இந்தக் கார்த்திகை மாதத்தில் மாலையணியும் சுவாமிமார்கள் அனைவரும் கணநாதனை வழிபட்டே தம் விரதத்தைத் தொடங்குவர். இம்மாதத்தின் தேய்பிறை பிரதமை முதல் கணபதிக்கான சஷ்டி விரதம் தொடங்கும். ஆக, கார்த்திகையில் கந்தனையும் ஈசனையும் மட்டுமல்ல, பிள்ளையாரையும் போற்றி வழிபட வேண்டும். அவ்வகையில், கணநாதனை வழிபட உகந்த சில அற்புதத் தலங்களை இந்த இதழில் தரிசிப்போம். அதனால் நம் விதி மாறும்; நல்லன எல்லாம் கூடிவரும்; எதிர்காலம் சிறக்கும்!

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS
கணபதி
கணபதி
தோஷம் நீக்கும் திருச்செங்காட்டங்குடி வாதாபி கணபதி!

இறைவன் : ஸ்ரீகணபதீஸ்வரர் (ஸ்ரீஉத்திராபதீஸ்வரர்)

இறைவி : ஸ்ரீவாய்ந்த திருகுகுழல் உமைநாயகி

விநாயகர் : ஸ்ரீவாதாபி கணபதி

தலச் சிறப்புகள் : யாராலும் வெல்ல முடியாத வரத்தை ஈசனிடம் பெற்ற கஜமுகாசுரனை வதம் செய்ய சிவபெருமான் விநாயகப்பெருமானுக்கு உத்தரவிட்டார். அதை ஏற்ற கணநாதனும் கஜமுகாசுரனுடன் போரிட்டு அவனை சம்ஹாரம் செய்தார். தெய்வமேயானாலும் ஓர் உயிரைக் கொல்வது பாவம் என்பது பிரபஞ்சவிதி. அதனால் ஏற்பட்ட தோஷம் நீங்க விநாயகப் பெருமான் திருச்செங்காட்டங்குடி வந்து சிவபெருமானை வழிபட்டார். கணபதியின் வழிபாட்டில் மகிழ்ந்த மகேஸ்வரன் அவருக்குக் காட்சிகொடுத்து தோஷம் நீக்கி அருளினார். கணபதியும் ஈஸ்வரனும் கோயில்கொண்டதால் இந்தத் தலத்துக்கு கணபதீஸ்வரம் என்று பெயர்.

ஸ்ரீவாதாபி கணபதி
ஸ்ரீவாதாபி கணபதி

பல்லவ மன்னனின் படைத்தளபதியான பரஞ்சோதி, வாதாபி வரை படையெடுத்துச்சென்று வெற்றிபெற்று, அதன் அடையாளமாக அங்கிருந்த கணநாதனின் திருமேனியைக் கொண்டுவந்து இங்கு பிரதிஷ்டை செய்தார் என்றும் சொல்கிறார்கள். அதனால் இந்தக் கணபதியை வாதாபி கணபதி என்று அழைக்கிறார்கள்.

வழிபாட்டுச் சிறப்புகள் : கணபதி சிவபெருமானை வழிபட்ட தலம் ஆதலால் இங்கு சிவனையும் கணபதியையும் வழிபட நன்மைகள் பெருகும் என்பது ஐதிகம். தோஷம் நீங்க விநாயகப் பெருமானுக்கு மார்கழி மாத சதய நட்சத்திர தினத்தில் இறைவன் அருள்புரிந்தார் என்கின்றன புராணங்கள். அதனால், இத்தலத்தில் மார்கழி சதய நட்சத்திர தினத்தில் விநாயகருக்குச் சிறப்பு வழிபாடுகள் செய்யப்படுகின்றன. சதுர்த்தி திதி அன்று இங்கு வந்து விநாயகரை வணங்கி வழிபட தோஷங்கள் யாவும் தீர்கின்றன. அமர்ந்த நிலையில் அருள்பாலிக்கும் இந்தக் கணபதியை வணங்க மனக்கவலைகள் நீங்கி சகல நலன்களும் கிடைக்கின்றன என்கின்றனர் பக்தர்கள்.

எப்படிச் செல்வது?: திருவாரூர் - திருமருகல் சாலையில், சந்தைப்பேட்டை வழியாக சுமார் 3 கி.மீ பயணித்தால் இத்தலத்தை அடையலாம். திருவாரூரிலிருந்தும் திருமருகலிலிருந்தும் பேருந்து வசதிகள் உள்ளன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

ஞானம் அருளும் வயலூர் பொய்யா கணபதி

இறைவன் : ஸ்ரீசுப்பிரமணிய சுவாமி, ஸ்ரீஆதிநாதர் (அக்னீஸ்வரர்)

இறைவி : ஸ்ரீஆதிநாயகி (ஸ்ரீபூர்வ சித்தி நாயகி)

விநாயகர் : ஸ்ரீபொய்யா கணபதி

திருத்தலச் சிறப்புகள் : திருவண்ணாமலையில் உயிரை மாய்த்துக்கொள்ளப்போன அருணகிரிநாதருக்குத் திருவடி தரிசனம் காட்டி, `வயலூருக்கு வா’ என்று அழைத்தார் முருகப்பெருமான். வயலூருக்கு வந்த அருணகிரியாருக்கு கந்தன் தரிசனம் தரவில்லை.

ஸ்ரீபொய்யா கணபதி
ஸ்ரீபொய்யா கணபதி

மனம் உடைந்த அருணகிரியார் அங்கிருந்த பொய்யா கணபதியின் சந்நிதியில் போய் நின்று, ‘கைத்தல நிறைகனி அப்பமோடவல் பொரி’ என்று அவரை துதித்துப் பாடினார் என்றும் அதற்கு இரங்கிய விநாயகப்பெருமான் அவருக்கு முருகனின் தரிசனம் கிடைக்க அருள்செய்தார் என்றும் கூறுவர். இத்தலத்து விநாயகரின் கட்டளையின் பேரிலேயே அருணகிரிநாதர் திருப்புகழ் பாடினார் என்பது நம்பிக்கை.

வழிபாட்டுச் சிறப்புகள் : பொய்யா என்பது மெய்ஞ்ஞானம் என்பதன் மறுவடிவமே. எனவே, இந்த விநாயகரை வழிபட மெய்ஞ் ஞான வழி கிடைக்கும் என்கின்றனர். வயலூர் கணபதியின் துதிக்கையில் இருப்பது அமுதக்கலசம் என்பர் சிலர். ஆனால், அது மாதுளம்பழம். இது ஞானத்தின் சின்னம்.

விநாயகர் சிவசக்தியிடம் ஞானப்பழம் பெற்றதை, ‘ஒளி ரானையின் கரமில் மகிழ் மாதுளம் கனியை ஒருநாள் பகிர்ந்த உமை அருள்பாலா’ என்று திருப்புகழில் சுட்டிக் காட்டுகிறார் அருணகிரியார். இந்தப் பொய்யா கணபதியை வணங்க நல்லறிவும் ஞானமும் கிடைக்கும் என்பது ஐதிகம்.

எப்படிச் செல்வது ? : திருச்சியிலிருந்து சுமார் 11 கி.மீ தொலைவில் உள்ளது இந்த ஆலயம். திருச்சியிலிருந்து பேருந்து வசதிகள் உள்ளன.

காரிய வெற்றி தரும் காஞ்சிபுரம் விகட சக்கர விநாயகர்

இறைவன் : ஸ்ரீஏகாம்பரநாதர்

இறைவி : ஸ்ரீஏலவார்குழலி

விநாயகர் : ஸ்ரீவிகட சக்கர விநாயகர்

திருத்தலச் சிறப்புகள் : பஞ்சபூதத் தலங்களுள் பூமி (ப்ருதிவி) தலமாகப் போற்றப்படுவது காஞ்சிபுரம் ஏகாம்பரநாதர் திருக்கோயில். இங்குள்ள ஆயிரங்கால் மண்டபத்தில் சந்நிதிகொண்டு அருள்கிறார் விகட சக்கர விநாயகர்.

ஸ்ரீவிகட சக்கர விநாயகர்
ஸ்ரீவிகட சக்கர விநாயகர்

தட்சனின் ஆணவத்தை அடக்க சிவபெருமான் தன் வடிவமாக வீரபத்திரரை உருவாக்கி யாக சாலைக்கு அனுப்பினார். வீரபத்திரரும் தட்சனை அழித்தார். பின்பு வீரபத்திரர் அணிந்திருந்த கபால மாலையில் இருந்த கபாலம் ஒன்று விஷ்ணுவின் சக்கரத்தைக் கவ்விக்கொண்டது. அதை மீட்க விஷ்வக்சேனர் அதன் முன் விகடக் கூத்தாடினார். அது கண்டு சிரித்த கபாலம், சக்கரத்தை விடுவித்தது. அந்தச் சக்கரத்தை எடுத்துக்கொண்ட விநாயகக் கடவுள் ஏதும் அறியாதவர்போல நின்றார். இதையறிந்த விஷ்வக்சேனர் மீண்டும் விநாயகர் முன்பாக விகடக் கூத்தாட, விநாயகர் மனம் மகிழ்ந்து சக்கரத்தை விஷ்வக்சேனரிடம் தந்தார். அதுமுதல் அந்தக் கணபதிக்கு விகட சக்கர கணபதி என்ற திருநாமம் ஏற்பட்டது.

வழிபாட்டுச் சிறப்புகள் : ஒருகாலத்தில் இந்த மண்டபம் புலவர்கள் கூடும் இடமாக இருந்ததாகச் சொல்லப்படுகிறது. கந்தபுராணம் பாடிய கச்சியப்பர், விகட சக்ர விநாயகரை ‘திகட சக்கரச் செம்முகம் ஐந்துளான்...’ எனப் புகழ்ந்து பாடியே தொடங்கினார். இந்த விநாயகரை வணங்கினால் தொடங்கும் காரியங்கள் அனைத்தும் வெற்றியடையும் என்பது ஐதிகம். மேலும், கலைகளின் ரசிகராகத் திகழும் விகட சக்கர விநாயகரை வேண்டிக்கொண்டால் சகல கலைகளிலும் மேன்மையை அருள்வார். வேண்டுதல் அனைத்தையும் நிறைவேற்றும் வல்லமை கொண்டவர் விகட சக்கர விநாயகர் என்பது பக்தர்களின் நம்பிக்கையாகும்.

எப்படிச் செல்வது ? : காஞ்சிபுரம் ஏகாம்பரேஸ்வரர் திருக்கோயிலினுள் அமைந் துள்ள ஆயிரங்கால் மண்டபத்தில் அமைந்துள்ளது விகட சக்கர விநாயகர் சந்நிதி. எல்லா இடங்களிலிருந்தும் காஞ்சிக்குப் பேருந்து வசதிகள் உண்டு.

வாழ்வுக்கு வழிகாட்டும் திருமுருகன்பூண்டி கூப்பிடு விநாயகர்

இறைவன் : ஸ்ரீதிருமுருகநாதர் (ஸ்ரீமுருகநாதேஸ்வரர்)

இறைவி : ஸ்ரீஆவுடைநாயகி, ஸ்ரீமங்களாம்பிகை

விநாயகர் : ஸ்ரீகூப்பிடு விநாயகர்

திருத்தலச் சிறப்புகள் : சுந்தரரால் பாடல்பெற்ற திருமுருகன் பூண்டி தலத்தில் வாசம் செய்யும் விநாயகருக்குக் `கூப்பிடு விநாயகர்’ என்று பெயர். சேரமான் பெருமானிடம் பெரும்பொருள்பெற்று வந்த சுந்தரரை, வேடராகத் தன் பூத கணங்களோடு வந்து வழிமறித்து சுந்தரரின் பொருள்களை யெல்லாம் அபகரித்துச் சென்றார் சிவபெருமான்.

ஸ்ரீகூப்பிடு விநாயகர்
ஸ்ரீகூப்பிடு விநாயகர்

செய்வதறியாது நின்ற சுந்தரரை விநாயகப் பெருமான் குரல்கொடுத்துக் கூப்பிட்டுத் தன் துதிக்கையால் வேடர்கள் சென்ற திசையைக் காட்டினார். ஆலயத்தின் பதினாறுகால் மண்டபத்தில் விநாயகர் அருள்பாலிக்கிறார். இங்கிருந்து ஒரு கி.மீ தூரத்தில் அவிநாசி போகும் வழியில் வேடுபரி நடந்த இடம் (சுந்தரருக்கு வழிகாட்டிய இடம்) அமைந்துள்ளது. அங்குதான் பாறைமேல் கூப்பிடு விநாயகர் அருள்பாலிக்கிறார்.

வழிபாட்டுச் சிறப்புகள் : இவரை வேண்டிக் கொள்ள, களவு போன பொருள்கள் திரும்பக் கிடைக்கும் என்பது ஐதிகம். முருகநாதர் திருக்கோயிலில் மனநோய் உள்ளவர்கள் தங்கி திருக்குளத்தில் நீராடித் தொடர்ந்து வழிபட்டுவந்தால் நோய்கள் அனைத்தும் நீங்கி ஆரோக்கியம் பெருகும். மாசி மாதத்தில் சுந்தரர் வேடுபறி உற்சவம் விமர்சையாக நடைபெறும். இந்த வேடுபறி உற்சவத்தில் கலந்துகொண்டு இறைவனை தரிசனம் செய்தால் வாழ்வில் அமைதியும் செல்வச்செழிப்பும் உண்டாகும்.

எப்படிச் செல்வது ? திருப்பூர் மாவட்டம், திருமுருகன்பூண்டியிலிருந்து அவிநாசி செல்லும் சாலையில் உள்ளது இந்தத் திருக் கோயில்.

கேட்ட வரம் அருளும் திருப்புன்கூர் குளம் வெட்டி விநாயகர்!

இறைவன் : ஸ்ரீசிவலோகநாதர்

இறைவி : ஸ்ரீசெளந்திரநாயகி, ஸ்ரீசொர்க்கநாயகி.

விநாயகர் : ஸ்ரீகுளம் வெட்டி விநாயகர்

திருத்தலச் சிறப்புகள் : சிவபெருமான் தன் பக்தர்களுக்கு அருளும் பொருட்டு விறகு வெட்டியும் வளையல் விற்றும் திருவிளையாடல்கள் நடத்தியது உண்டு. அதுபோல், தன் மகனார் விநாயகப் பெருமானை குளம் வெட்டும் பணிக்கு அனுப்பிய திருத்தலம் திருப்புன்கூர்.

ஸ்ரீகுளம் வெட்டி விநாயகர்
ஸ்ரீகுளம் வெட்டி விநாயகர்

நந்தனார், சிவலோகநாதரை தரிசனம் செய்ய அடிக்கடி திருப்புன்கூர் தலத்துக்கு வந்து செல்வார். வாசலிலிருந்து அவர் தரிசிக்க வசதியாக நந்திதேவரை ஈசன் விலகி இருக்கச் சொன்ன தலம் இது. ஒவ்வொருமுறை இந்தத் தலத்துக்கு வரும்போதும், ஒரு திருக்குளம் ஒன்றை வெட் டவேண்டும் என்று மனத்தில் எண்ணிக்கொள்வார் நந்தனார். ஆனால், சரியான ஆட்கள் கிடைக்காமலும் கைப்பொருள் இல்லாமலும் திண்டாடினார். இதை அறிந்த ஈசன், விநாயகப் பெருமானை அழைத்து நந்தனுக்கு உதவுமாறு வேண்டிக்கொண்டார். விநாயகரும் நொடிப்பொழுதில் குளம் வெட்டியருளினார். நந்தனார், ஈசனின் கருணையை எண்ணி வியந்தார். இதனால் இந்தத் திருக்கோயிலில் வெளிப்பிராகார மூலையில் அமைந்திருக்கும் விநாயகர், ‘குளம் வெட்டி விநாயகர்’ என்றே அழைக்கப்படுகிறார்.

வழிபாட்டுச் சிறப்புகள் : இங்கு கோயில்கொண்டிருக்கும் சிவனாரும், விநாயகரும் எளிய மக்களின் உள்ளத்தை அறிந்து உதவுபவர்கள். இவர்களது சந்நிதியில் வைக்கப்படும் கோரிக்கை உடனடியாக நிறைவேறுகிறது என்பது பக்தர்களின் கருத்து. மன அமைதி வேண்டுபவர்களும் செல்வச் செழிப்பு வேண்டுபவர்களும் இங்கு வந்து வேண்டிக்கொண்டால் உடனடியாக அவை கிடைக்கப்பெறுகிறார்கள். ஈசன் சந்நிதியில் வேண்டிக்கொண்டு அர்ச்சனை செய்தால் திருமண வரம் உடனே கிடைக்குமாம். இத்தல விநாயகரை வேண்டிக்கொண்டால் துயரங்கள் நீங்கும்.

எப்படிச் செல்வது ?: வைத்தீஸ்வரன்கோவிலிலிருந்து திருப்பனந்தாள் செல்லும் சாலையில், மேற்கே 3 கி.மீ தொலைவில் திருப்புன்கூர் சந்திப்பு வரும். அங்கிருந்து ஒன்றரை கி.மீ தூரம் பயணித்தால், சிவலோகநாதர் கோயிலை அடையலாம்.